Beilage 1: Räte Herzog Johanns von Sachsen an Gerhard Westerburg, [Weimar], 1524, 1. Oktober

1^v

1^r Unnser freuntlich diennst zuvorn, hochgelarter
guter freundt der Durchlauchtige Hochgebornn furst
unnd her Her Johanns hertzog zu Sachssenn etc. unnser
gnediger her hat uns bevolenn euch diese seiner
f. g.² meynung³ anzuzeigenn, das sein f. gn. ernstlich
beger⁴ aus^a ursachenn sein f. g. darzu
bewegennd⁵ Ir wollet euch von Jhene⁶ unnd aus
seiner f. g. brudern unnd seiner f. g. furstenthum⁷
wenden, unnd wes Ir zu Jhene oder in Irer kurf.
unnd f. g. landen eigenns⁸ habt dasselb furderlich⁹
verkauffen, euch dieses seiner f. g. bevelichs unnd
nit annders haltenn. Daran geschiet seiner f. g.
gentzliche meinung. Datum am sonnabent
nach Michaelis Anno etc. xxiiij.¹⁰

Beilage 2: Protestschreiben Gerhard Westerburgs an Herzog Johann, [Jena], 1524, 26. November

3^v

2^r Durchleuchtiger hochgeborener fürst, gnediger herr. Es hatt
Andres Brewnig, Burgermeyster tzu Jhen,¹¹ihn meynem
abwesenn (denn ich ihn drey monat nitt inheymischs)¹²
von E F G Redt eynen schrifftlichenn bevelch, mich
belangen,¹³ entpfanngen, unnd itzundt ßo ich heym kumen
mir uberantwort, ihnn welchem ich E F G Ernnstlich
dysse meynung¹⁴ vernumen hab, Nemblich das ich mich
unnd das meyn auffs furderlichst¹⁵ auß E F G fursten-
thumb abwenden sollt. Nun wiewoll ichs vormutte, das
ich so hoch unnd schwerlich¹⁶ (weyß nicht durch welche)
fur¹⁷ E F G angegeben¹⁸ unnd beclagt sey, das ich meynes
entschuldigens oder schreybens wol hett mugen lassen ann-
stehen,¹⁹ so dringet mich doch E F G Richtigs unnd
Christlichs gemutt, darneben meynne nott unnd unschuldt
dysse meynne bitte unnd erbiethung E F G antzutzeigen,
und bith Erstlich, E F G wollet meyn wanndel unnd
leben, so ich ytzundt anderthalb jhar in der Stadt Jhenn
gehabt,²⁰ gruntlich unnd woll erforschenn, jha durch meyn
herrn unnd mitbruder Radt unnd gemeyn der obgenannten
Stadt Jhenn erkundigen, ob yrgentz eyniger wehr, der mich
für E F G vormeyndt antzuclagen oder mich yrgent eyniger
unnredlicher tadt oder furnemens zu beschuldigen, mich dar-
neben tzo verhörung kumen lasset, will ich mich alletzeitt
Bey E F G gegenwertigk dar stellen²¹ das recht dulden unnd
leydenn. Das sey von meynem eusserlichen wanndl geredt,
Was aber denn glauben unnd das wort Gottis antrifft, soll
E F G wissen das ich wider²² geprediget noch etwas offentlich
2^v gelernnt²³ hab, Bynn auch nitt byß hyher von Gott noch von
dem menschen dartzu beruffenn. War ist es, das ich ihnn
dyssen leufften gernn gesehen unnd dartzu geholffen heth,
das die sach, so doctor Martinum und Carolstadt betreffent,
Erstlich durch offentliche verhörung oder disputation wehr
ahnn tag gebracht, unnd also gerichtiget und geslicht,²⁴
unnd wollt Gott das es noch dartzu kumen mocht, wollt ich
mühe arbait und das meyn nicht drann sparen, sonnder
dartzu helffen, sovil alß myr gelegen, uff das warheytt
und lügen ahnn²⁵ tag gebracht wurden, Auch das doctor Car-
rolstat, entweder offentlich tzu schannden, so ehr
unnrecht, oder fur ydermeniglich²⁶ durch die warheit befreyet
wurde,²⁷ so ehr der warheyt anhieng.²⁸ Das möcht auch
meynnes bedunckens tzu eynem grossen taill des frides ihn
E F G furstenthumb geratten. Es wurt auch E F G
ihn diesem fall mehr mitt verhörung der personen unnd
sachenn dann mit landtverpiethung auß richten.²⁹ Unnd
wilß E F G itzunder, die weyll myr Gott ursach gibt, ge-
sagt unnd treulich gewarnnet haben, das E F G sich
woll fürsehe, wie sie ihn sachen so Gott angehen, hanndl,
auff das sie nitt alls dann am meystenn denn tzorn Gottis
anlauffen,³⁰ wenn sie Gottes hulde, durch das schwert und
weltliche gewalt am höchsten vermeynt, zuverdiennen,³¹
ich will E F G nicht heuchlen kan auch nicht heuchlen,
Gott unnd seynn wort ist mir lieber dann Alle Fürsten
und herrn, jha lieber dann dye ganntze wellt,³² unnd alles
was drynnen ist. Was aber meyn eygne person unnd
glaubenn angehet, Bynn ich willig unnd bereyt ßo es
von nötten ist, fur E F G unnd ydermeniglich meynnes 3^r
glaubens rechenschafft, unnd sovill mir Gott vorleyhet, der
warheyt zeugnis dartzugeben.³³ Zum Anndern bith ich, E F G
wollen myr gnediglich, die ursachen, warumb ich mich
E F G fürstenthumb eusern³⁴ soll, zu erkennen gebenn,
auff das den gotzlesternn und widerstrebern des wort Gottes,
pfaffen und münnchen und yren anhengern, Besunderlich
denen so ihn meinem heymadt zu Cöllen,³⁵ der untzellich
viell seindt, nicht ursach gegeben,^c mich alß eynenn ver-
tribnen mörder, diep, verretter, oder sunst alß eynen ubell-
thetter lügenhafftig auß tzuschreyhenn und schellten, dadurch
dann Gott und sein wort geschmecht und gelestert wurdt,
welcher meynet halben gepreysset unnd wollgesagt³⁶ seyn solt.
Zum Letztenn Bith ich E F G wollen doch dye gele-
genheyth der tzeitt ansehenn, ihn welcher ich ohn uhnüber-
windtlichen schaden meynes weybs,³⁷ kinds, leyber und gutter
nicht reyssen vermag, Myr der halben als eynen frembligen³⁸
ihn E F G furstenthumb dysse schwere winther zeyth mich
zu erhallten Gnediglich vergunnen. So aber dyß alles Bey
E F G nicht helffen mag und E F G alßo beslossen, das
ich yhe³⁹ das landt reumen soll, des ich mich doch nitt gegen
E F G zuthun vorsehe,⁴⁰ wyll ich die sach zuvor Got be-
vehlen, seinen willen ihn dysem allen ansehen, Darnach
E F G Bevelch und gepott, allen frost, kellt, schne unnd
anndere widerwertigkeyten des winters unangesehenn, williglich
gehorchen, All stundt unnd augenblick E F G
willen nach vormügen volbrengen, deren ich mich und
das meyn hiemit will bevollen haben. Bith E F G
Gnedige antwort. Datum tzu Jhenn Sonnabendes nach
Katherine Anno 1524.⁴¹
E F G

Beilage 3: Räte Herzog Johanns von Sachsen an Gerhard Westerburg, [Weimar], 1524, 28. November

4^v

4^r Hochgelarter guter frund. Als ir itzund auff
das schreiben, so wir euch hievor aus bevelch
des durchlauchten hochgebornen fursten unnd
herrn, hern Johansen hertzogen zu sachssenn etc.,
unnsers genedigen herrn, getan,⁴³ seiner f. g.
widergeschriben,⁴⁴ solchs haben dieselbn Inhalts
hören lesen. Und als ir unter anderm gebeten,
euch ursachen zuvormelden, warumb ir euch
seiner f. g. furstenthumb eussern sold. So
haben sein f. g. bevolhen euch darauf anzuzaigen
das ir aus berurtem unserm nechsten schreiben⁴⁵
sonder zweivel verstanden, das solichs aus
ursachen, so sein f. g. darzu bewogen, beschehen.
Unnd wiewol sein f. g. als^d ein mensch^e
irren können, so
sey doch seiner f. g. gemuet und syn,^f das
sein f. g. in irer regirung^g
und verwaltung des empfahenen schwerts⁴⁶ aus vorsorge yhe ungern anders dann^h zu der gotlichen ere handeln woltenⁱ.
Und derhalben ist seiner f. g.
beger, ir wollet derselbigen bevelchs, so ir aus
obberurten unserm nechsten schreiben⁴⁷
verstanden, unwegerlich halten und deroselbigen unvorzuglich mit enteusserung seiner
f. g. furstenthumbs volge thun.
4^v Daran thuet ir seiner f. g. gefellige maynung.⁴⁸
Datum montags nach Catherine Anno etc xxiiij.