A1^v
Frid^b und wolfahrt in Christo/ wunsch
ich allen/ szo diessen zettel² sehenn/ odder
horen leszen/ und bitte zuwissen/ das ich/
durch gleubwirdige und unvordechtige
leuthe bericht³/ wie das doctor Johan.
Eck/ sich bey und nebent dem pfarhern
zu Dreszen/ doctor Peter⁴/ Den ich dem narren Nabal⁵
wol darff vorgleichen/ weil er sich widder den Apostel
Paulum und David/ schympflicher wort lessit horen/⁶
heldet/ und unterstehen sol/ mich/ zu sambt andern hern/
glidmassen⁷ diszer loblichen Universitet/ mit processen/
die man widder ketzer und unglaubigen pflegt furtzu-
wenden⁸/ antzutasten⁹ und beschwerenn. Ich wirt auch
ferner bericht (das ich dan glaubenn musz) wie das
mein lerung/ in etzlichen artickel/ sol/ als ungerecht und
ketzerisch bereyt vorurteylt sein/¹⁰ wo dem alszo/ und nicht
anders/ wil ich nachfolgende Notred und Bedingung¹¹/
mich zuschutzen/ gesetzt haben/ in hocher vermanung/
meniglicher wolle betrachten/ wie ich durch eehafft¹²/
und treffenliche vervolgung zu solcher furwendung¹³ be-
notet¹⁴ bin.

Ich weer fast¹⁵ willig und bereyt/ in Teutschen oder
Welschen/ odder andern landen/ auff mein leer/ so yhn
schrifften odder wortten von mir vornummen/ zu antwor-
ten/ wan in den yenen/ redlicher glaub erfunden¹⁶ weer/
die sich zu verhorung¹⁷ christlicher lernung¹⁸/ szonderlich
wirdigen/ aber die weyl die selbige zu recht erkant ha-
ben/ das der/ der einem ein mal unglauben beweyst/ al-
letzeit glauben zuprechen/ unnd eytel boszheit zuuben/
verdechtig ist.¹⁹ Sollen mir^c dieselbe gesetzmacher nit vor-
argen/ das ich meinem leben und ehre zu gut/ und zu un-
terhaltung^d gottis wort/ fursichtiglicher handlen wurt.
Dan ich hab geleseszenn/ das Joann'is' Hussen/ weyland
doctor Christlicher kirchen/ ein sicher/ vehelich²⁰ geleyd A2^r
zugeschriben ist/ aber unangesehen/ das sie in den concilio
zu Kostnitz geleyd geben/ und frid gelobt/ haben/ sie ob-
genanten Joan'nem' Husz/ umb etzliche artickel/ der ein teil
in den heyligen Evangelien/ Aposteln/ und Propheten
dartzu ym Augustino gegrundt/²¹ ja gar nohe²² mit wor-
ten und sententien geschriben stehen/ zu widderruffung
der warheit bedrengt/ und endtlich zu dem feur und tod
verurteylt und verbrant.²³ Der wegen und dartzu/ so sol-
cher leut (die got sein reich schmelern und geburlicher
ehre geringer machen) gebrauch ist/ das sie: wie Paulus
ad Ro. i. schreybt:²⁴ kein gelubt halten/ sie wissen auch
nit was vorbintnisz²⁵ foddert/ auch allein glauben²⁶ wollen
gehalten haben/ und niemants glauben beweysen/ der-
halben/ wil ich mich/ mit meynen freunden/ zuvor be-
raten/ welche stel²⁷ und zeit mir dienen mocht/ so ich mit
angetzeygter ladung²⁸ berufft wurd. Ich will auch yhren
brieffen und sigeln/ szo mir villeicht Bischoffen odder
Bepstlich heylickeit zuschicken mochten/ nit vortrawen/
dan yhre vorfaren haben obgenanten doctor Joan'nem' husz
keinen glauben²⁹ gehalten/ szo besitzen sie nun die stulen³⁰
solcher glaubbruchiger³¹ freveler/ darumb zuforchten/ der
weyn stinck nach dem fasz.³² Dartzu bewegt mich auch/
das Bepstliche heylickeit/ die sachenn meiner artickel/
meynem todtlichen feynd doctor Hans Ecken zuhanden
gestelt.³³ Auch das gemein gerucht/ szo man hyn und her
saget/ dieser Bapst sol eynem Cardinal ein frey sicher ge-
leyd/ mit eygner handtschrifft/ zugeschrieben haben/ und
doch denselben Cardinal lassen hencken/³⁴ ob gleich³⁵ das
gerucht falsch und erlogen weere/ das ich bepstlicher hey-
lickeit ausz gantzem hertzen wol gundet³⁶/ doch wil ich umb
andere obberurten ursachen/ in fleysz furbetrachten/ was
mir zuthun/ und was mir in gotlichen/ naturlichen und
menschlichen rechten³⁷ zugelassen ist/ desz ich mich hiemit
offentlich bedinge fur eins³⁸.

A2^v
Zu dem andern/ betracht ich/ das itzt gar wenig
Bischoffen sein/ die die heyligen Biblien durchleszen
haben/ und vil weniger/ die gotis Evangelium/ Prophe-
ten und Apostel vorstehen/ dan es ist dahyn^e kommen/
das man keinen Theologum zu einem Bischoff itzt er-
welt/³⁹ das auch doctor Eck mit schmertzen bekondenn
musz/⁴⁰ dann das froeszlich⁴¹ recht/ ist de pane lucrando/⁴²
wie man aber seelen gewinnen sol/ ist den Decretalen
brieffen nit grosz angelegen. Sie wolten dan sprechen/
das hiesz seelen gewinnen/ wan sie sunde umb gelt vor-
geben/ odder lerenn wie man geystliche lehen in wech-
seln/ leyhung/ reservation/ und vorkeufung erlangen kan.
Der wegen/ weil die Bischoffen und prelaten/ keinenn
grund und gutten verstand/ der schrifft haben/ und
kan yhe nit geseyn/ das einer ein gut urteil/ uber ein unbekan-
te sache/ schopff und auszprech. Beding ich mich aber-
mals fur das ander/ radt zu suchen/ szo ich geladen wur-
de. Aber damit man nit kan sagen/ ich konde keynenn
Richter und erkentnisz leyden/ angesehen/ das die leyen
predigen und Biblien fleyssiger horen/ und gruntlicher
vornehmen/ dan die Prelaten diesser zeit.⁴³ Mann findt
auch viel mehr leyhen die die Biblien haben/ dan geystli-
che regirer. Erbiet ich mich in unverdechtiger stadt/
unnd vor leutten/ szo ich zu der zeit/ als vorstendige des
wort gottis/ nennen und kyeszen wil/ vor etlichen prela-
ten/ szo mir auch ungefer/ und ein stadtlich gnugsam ge-
leyt geben werdenn/ meyn leer/ in heyliger Biblien zu-
deutthen/ und szo man das fur gut/ das ich doch nit von
noetten/ acht/ auch nach vormugen in den heyligen le-
rern zuweyszen. Wo aber yemandts sagen mocht/ das
den leyhen nit zymet heilige schrifft zu wissen/ und dar-
ausz zu urteylen/ ob einer ein Christliche leer hab odder
nicht/ dem wil ich/ mit szoviel worttenn antwurten/ A3^r
unnd gesagt haben/ das er widder got unnd sein gesetz
klappert⁴⁴/ das ich zu bequemer zeit beweyszen wil.

Zu dem dritten artickel/ beding ich unnd wil zu-
vorbehalten haben/ das ich keinen Prediger und Par-
fuszer Monichen leyden kan/ dan ich hab yhr heylickeit
angeruret/ derhalbden sie meyn feynd seinn.⁴⁵ Nun hat der
bapst Clemens selber gesagt/ es sey widder die natur/
das sich yemandts in seynes neyders unnd vorfolgers
schosz legenn sol/⁴⁶ auch halt ich furwar/ weyt von denn
buchszen/ hilfft fur bosze schusse.⁴⁷ On diese sache/ hab
ich eine die Christlich ist/ nemlich/ disse Monchen und
yhr gleychen/ haben die unglaubige^f/ das ist/ die heyd-
nische schrifften/ mit heyliger schrifft vermeelt/ unnd ist
offenbar/ das ausz solcher vormelung/ rodtwelsche⁴⁸ kin-
der odder wort gewachsen sein/ derhalbenn sollen sie/
als die yene/ die nicht Christliche gotliche wort reden/
auszgestossen und vortrieben werden/ dan Sonochias⁴⁹
als sich die Juden/ mit heydnischen weybern vorhey-
ret/ und kinder geboren hetten/ die nit Judisch redenn
kunden/ gab er ein solchen radt/ das man weyber und
kinder hynwegtreyben solt.⁵⁰ Es ist auch ausz dem pro-
pheten Hieremia unlaugbar/ das gottis wort ist wie
ein feur/ und menschenwort wie spreuhen.⁵¹ Die weyl
sich dan feur und spreuhen ubel betragen/ ist kein wun-
der/ das wir/ ich und meine gesellen/ von einem/ und die
Prediger und Barfuszer holtschuch am andern teyl/
nit wol voreynen konden/ dan wir wollen die schrifften
sunder spruchen geniessen/ und gut gereyniget brot essen/
so vormengen sie das brot der seelen/ mit solchen hauffen
heckerling/ das ein pfert schwerlich erleiden mocht, es
kümet auch/ das sie keinen lust zu der reynen/ claren/ und un-
vormischten schrifft haben/ derhalben sie/ die ewige disputi-
rer/ vordechtig/ und nit zuleyden sein/ des ich mich be-
ding/ weil auch die Theologen zu Loven/ szo mein leer A3^v
als ketzerisch vordampt/⁵² und mich doch nit dartzu be-
ruffen/ in yhren schulen Thomas Aquinas⁵³/ Bonaven-
turas⁵⁴/ Scotos⁵⁵/ und Capricornos⁵⁶/ die vormengter
schrifften weebel⁵⁷ und hauptleut seind/ mit hoher emsi-
ckeit leszen und verteydigen/ kan ich sie/ und yhrer gley-
chen/ auch nit leyden.

Zu dem vierten/ hab ich zuvor/ das Bapst Innocen-
tius geschrieben/ keiner ^gmagk ein^g ketzer gehalten werden/
wan er redet/ wie die heylige schrifft.⁵⁸ und an einem andern
endt/ alszo/ Man darff und kan auch nit/ eynig bewey-
sung widder ehegedachte geschrifft auffbringenn^h/ das
sollen meyne kunfftige verhorer wol mercken.⁵⁹

Zu dem funnften/ behalt ich mir zuvor alle termin
hinderdrit/ und dilation zubedencken/ und recht zu ant-
worten/ die mir ym rechten und Biblien zugelassen sein.⁶⁰

Zu dem sechsten/ sprech ich/ Szo die heylige schrifft
verborgen und dunckel/ odder eine widder die andern
ym schein stossen ist/ wert ich Bepstlicher heylickeit und
Bischofflicher wirdenn/ nit mehr nachlassen/ heylige
schrifft ausztzulegen/ odder zu vereynen⁶¹/ dan ich einem
fleyssigen leyhischen zuhorer des wort gottis/ gestatten
werde/ es sey dan das Bapst und Bischoffe/ ernstlichenⁱ
beweysen/ das sie die heyligen geschrifft/ in yhrem ey-
gen safft⁶² wol versucht und gelernet haben. Sunst sag ich/
das sie durch yhre hohen/ nicht gelerter sein/ und geschicht
viel mals/ das ein handtwercks man/ mehr vonn der
schrifft/ den ein Bischoff weysz. Dartzu weisz ich/ das
der Bapst auch yrren kan/ und sol affterglaubens und ke-
tzerey halben/ seiner wirden entsetzt werden. Weyl dan
diesem also/ folgt/ das der bapst die schrifft zeitten bosz-
lich glossirt/ und zu seinem forteyl auszlegt/ und das yhnen
nit zu glauben/ ehr hab dan die stimme und wort Chri-
sti/ in seiner leer.⁶³ Christus ist allein der/ der in hymeln
und erden gefunden/ der das beschlossen buch/ welches A4^r
mit sieben anhangenden sigeln/ besigelt/ aufgeschlossen/
und den furhang des tempels/ das ist der geschrifft/ ab-
genommen hat/ wilcher mir den selben unsern herren nit
antzeigt/ dem werd ich sagen. wie Esaias/ das buch wirt
einem der gelert ist/ zulesen furgelegt/ der selb wirt sprechen
ich kan nit lesen/ dan^j das buch ist vorschlossen/ es wirt
auch einem ungelarten gegeben/ der wirt sagen/ Ich bin un-
gelert/ darumb kan ich nit lesen.⁶⁴ derhalben/ gestehe ich
Bepstlicher und bischofflicher hohen und wirden gar
nicht/ das sie mich odder einen andern Theologen ver-
suchen/ odder glossieren die schrifft/ es sey dan/ das sie
den Eckstein⁶⁵ Christum unsern herren/ der alle uneynickeit
voreynet/ unnd zusammen macht/ das ist/ sein wort in
yhrem furnehmen vor den augen haben/ das ist/ es ge-
schehe dan/ das der bapst oder bischoffen/ alle spen⁶⁶ und ir-
rungen/ so zeitten in der schrifft buchstaben vormerckt
werden/ durch das wort Christi zusammen brengen/ und
erleuchten alle finsternisz der geschrifften/ durch des reed/
der alle menschen erleuchtet/ szo sollen sie/ nach^k67 glossieren
nach^l concordieren. Sie nehmen yhn nur yhe nit fur/ das
sie mich mit einem andern schwert/ mit recht fellen wer-
den/ dan mit dem wort gotis/ das ist ein eyniges schwert
das ich forcht/ damit ich fechten/ dem ich in allem gehor-
sam/ gefolgig sein wil/⁶⁸ das mir alle Christen billigenn
mussen. wo auch vormerckt/ das bapst oder bischoffen
dem wort gottis zuwidder sein wurden/ wil ich sie ketzer
und vorfolger Christi/ und des reichs gotis feynd ach-
ten und halten. Sollen auch billich/ von meniglichen/
als zurstreyher⁶⁹ christlicher samlung vermeydet/ abge-
setzt/ und mit gepurlicher peen gestrafft werden. Amen.
Dat'um' Wittemberg/ In doctor Carolstats hausz/ Im
^mTausentfunffhundert/ und .xx.^m Jar.