A2^r
Allen und iglichen. die diszes buch-
lin/ sehen oder hoͤren/ leßen/ Empiet ich Andres Bo-
tenstein von Carolstat meynen dienst.

¶ Es seynt tzween bruͤder parfußer ordens/ nemlich bruder
Franciscus Seyler/ der sich ein unvordienten Gardian³/ in dem
scheynbarlichen⁴ kloster/ auff sant Anneberg/ schreybt⁵/ und Jo-
han Forchem⁶/ Vice Gardian daselbst^b/ ym predigstull/ der tzu
vorkuͤndung gottes wort und warheyt auffgericht/ gestanden/
und haben gesagt/ man sol sich nit keren an die neuen prophe-
ten/ die den Ablas in tzweyffel setzen/ aber⁷ untuglich schatzen/
dan die selben/ seynd vorfuͤrer des volcks/ Disse bruͤder haben
uns Wittenberger offentlich/ und teutlich/ in ob angetzeygter
stelh⁸/ genant/ und vor dem hauffen Christlicher menschen/ als
solche Propheten/ die Christo/ sein teuer gewonnen volck/ vor-
leyden/ mit starckem und freyhen geschrey vorurteylt.

Weyll ich dan/ die tzeyt doselbst gewest⁹ und treffelicher vor-
letzet und vorleumbt. Auch mich schuldig erken/ der berumpten
Universithet Wittenbergk/ eher/ preyß/ lob und nutz/ zu halten/
und nach vormuͤgen^c zuvordreten. Wie woll ich yhe und ye
mich bevlissen hab/ gar wenig/ oder nichts/ gegen dem Ablas
zusagen¹⁰/ Doch dringen mich die heyligen grohanmunchen^d und
vorgunden^e mir/ das ich stil schweyg/ dan sie ob genante Univer-
ßteet/ der glidmaß ich byn/ hochlich vorletzen/ und mich/ tzu-
sampt der Universitet handeln/ als solt ich/ eyn solcher prophet
sein/ der das volck gottes/ mit falscher leer/ gar abtziehe/ und in
eynen affter glauben¹¹ fuͤre. Nun geb ich^f yglichem^g zuerkennen
ob ich schweygen duͤrff/ die weyl uns allen gebuͤrt/ wider bedrie-
gische propheten auffzusteen/ schweyg ich/ ßo wirt/ graß und
laub/ holtz und stein/ hymel und erdtrich/ ym Jungsten gericht
gottes schreyhen/ und clagen¹²/ das ich mich/ nit hab lassen leeren/
in sunderheit/ das ich/ die schefflin gottes/ mutwillig durch
falsch leer vorleydet. Derhalben hab ichs von noͤten geacht/
eyling¹³/ abberumpten bruͤdern/ tzuvor an/ dem unvordienten Gar-
dian/ zufragen/ ob der ablas/ de iure divino sey/ das ist/ ab die
heylige schrifft¹⁴ clar außsag/ das der Ablas/ nach inhalt gott-
A2^vliches worts/ was vormug/ und ob der selb/ als ein mittel oder
tzeychen/ zuvorgebung der sunden/ zu suchen sey/ das soll in di-
ßem buchlin von dem heyligen bruder gefragt werden. Aber
von yhrem rosenkrantz/ und huͤltzerein boßkaulen¹⁵/ welche sie an
cleyn taffelin und kirch duren hefften¹⁶ und paterlogia¹⁷ nennen/
wil ich in aynem andern buch schreyben.¹⁸

Itzt frage ich lieber bruder Seyler und bitt/ wellest mir eynn
schrifft antzeygen darauß ich lernen mug was ablas sey. Und
damit wir/ nit zwu meynung/ under eynem wort/ hynn und her
bewegen. Soll das ein grund seyn^h/ durch die heylige schrifft/
vorstee ich keyn ander/ denn die/ in der Biblien/ als Canonica
und Catholica von allen angenummen ist¹⁹/ darumb darffstu
mir keyn menschen gesetz furwerffen/ mich damit zu pindenⁱ.

Der ander grund ist/ wir fragen hie nit/ ob ablas in der schrifft
gegrundt sey/ der ewige schuldt und peyn/ abnympt/ dann alle
ablas bullen/ behalten zuvor / das ein yglicher/ der ablas teyll-
hafftig seyn will/ der soll tzuvor/ reu und leyd/ uber sein sunde
gehabt und vorgebung ewiger schuldt und peyn erlangt haben.²⁰

Darumb begeer ich von dir zu lernen/ du wollest mir/ deynen
ablas/ den du predigest/ auß der schrifft beweren und war ma-
chen/ das du ein rechter prophet seyst/ der die warheyt leer/ und
wir Wittenberger wider das wort gottis geprediget.

Die vormeynte weyßen^j propheten/ welche mit tonner unnd
plitz/ wider uns Wittenberger brassen²¹/ sagen alßo von dem
Ablas.²²

Ablas nympt^k nit ab/ die ewige schuldt/ das ist/ die sund/ da-
durch eyner gott ewiglich ertzurnet/ und ewig straff leyden soll/
betzalt auch nit unvorgencklich peyn und leyden. Dan das
kan gott allein in seynem namen und wircklich/ und kein creatur
ym hymelreych oder erdtrich/ darumb gott durch Esaiam im
43. c. spricht. Ich bin der/ der die sunden vorgibt/ und gedenck
yr nicht mehr²³/ alßo vorgibt gott/ auß gnaden/ schuldt unnd
straff/ der wegen auch geschrieben. Als offt der sunder
uber seyne sund seuffetzet/ ßo offt mals^l werden ym seyn miß-
hendlung^m vorgeben.²⁴ Nun wan goth die sund nit strafft/
ßo vorgiesset²⁵ er der sunden/ alßo wirt ewig peyn und schuld al-
A3^rlein durch gott gnediglich abgenommen. Ewig schuldt
und straff/ ßo eyn uberfarer²⁶ gotlichs gesetzs zu ⁿleyden schuldigⁿ
seyndt zwey ding/ welche der ablas nit hynn wegk kan nhemen
wie dan die parfußer Monichen/ durch Alexander Heylisch²⁷
und andere ablas prediger zugeben und bekennen.

Das drit dingk/ das ablas hinweeg nympt ist bey den gemel-
ten lerern underschieden. Dan etzliche sagen/ das ablas/ die straff
und peyn ablesset/ die der priester/ dem eynfeltigen schefflein auff-
leget/ und dartzu er den beychtsohn vorpflichtet. Die selbe peyn/
pflegen etzliche beycht vetter/ den sundern^o/ baldt nach gethaner
beycht/ und vor der absolution auff zusetzen.

Aber etzliche ablas lober/ sagen das ablas/ den mangel und
gebrechen abnem/ welchen eyner hat/ wan er sein puß oder peyn/
und gottis gebott/ in cleyner lieb erfult^p. Aber dise meynung/ ist von
wenig predigern angenommen derhalben ich zu der erste opinion
kere.

Nym ein exempel/ von zeytlicher peyn und puße/ dartzu die
monich/ die beychtkinder vorpinden/ wan du gebeycht hast/ ßo
spricht der beychtvatter/ du solst ^qii tag wochenlich^q fasten/ und er
nennet dyr ein zeyt langk/ aber²⁸ du solst x rosen krentz beten.

Aber²⁹ iii pfundt wachs in ein kirchen geben/ aber xx messen ym
parfußer kloster lassen haltden/ und fur ein messe/ ein groschen
kuchenspeyß kauffen/ dan wir monich seindt heyliger dan welt-
liche pfaffen/ wir geen auff holtzschugen/ und trincken auß key-
nem tzyne gefeß/ wie wir dan alle wissen/ das unser beycht vetter
aygen nutz und gedeyen suchen/ und loben ire heylickeit/ wie ein
kauffman/ sein waer^r preyset wan er gern gelt erkauffen wil. Etz-
liche beschweren/ die beichtkinder mit gebeuh^s30/ und andere peynen/
die sie zeytlich straff oder peyn nennen/ dere ich itzt geschweyg/ da-
mit ich den unvordienten Gardian auffweeck^t.

Endlich der Gardian und etzlich sein anhenger sprechen/ das
der ablas/ solche peyn die/ der priester dem beycht kindt an halß
henckt/ abpindt/ unnd rathenn iren zu hoͤrernn/ sie sollenn
sich/ die Wittenbergische propheten/ nit lassen vorfuren/ und pre-
digen offenlich/ der ablas sey in der heylige schrifft gegrundet
und begriffen.

A3^vIch wil fur mein cleynheyt bekennen/ das 〈ich〉 vil grunde heyliger
schrifft noch nit angeruͤrt/ ich schweyg erlernet hab/ weyß auch
woll/ das meyner gleichen nit wenig seynd/ welche die schrifft
tag und nacht ym hertzen betrachten/ und doch den ablas nit
gefunden haben/ sunderlich³¹ die kleyn achtung thun/ wie sie das
gelt/ durch leerung³²/ den leutten auß yrm^u beuttel brengen. Weyl
aber obgenanter bruder Seyler an statt gots/ und in der stelh/
do man alleyn gottlich warheyt vorkundigen soll³³/ offentlich
gestanden und außgesagt/ die Wittenbergische propheten sein
got und der schrifft/ wie oben beruͤrt/ endgegen unnd tzu wider³⁴/
Hab ich durch ii bruͤder/ gedachten bruder Francisco entpotten
ich woͤl yhm meynen gruß von Wittenberg zu schicken/ in mey-
nung etwas von yhm/ das mir noch unbewuͤst/ zu begreyffen.³⁵

Das ist yhm gar ungefellig gewest/ derwegen hab ich von
stunden an sein ungekochten stichling³⁶ empfangen. Under an-
dern schreybt der Seyler alßo³⁷/ Soll man schweygen/ wan etz-
liche offenbarlich irren/ auff das/ das volck vorfuͤrt und betro-
gen wirt? Dißer frage antwort der Seyler selbst/ das sie fernn
von uns^v/ wir wollen nit hunde sein/ die nit bellen kuͤnnen³⁸.

Hatt nicht lieber bruder Francisce/ meyn doctor Martinus vill-
mals begert er wuͤlde sich gern/ durch die schrifft lasse^w weyßen/
Des gleychen byn ich noch erpuͤtig/ von eynem ungelarten kind-
lein zu lernen/ das mich von irrungen^x abfuͤren und underricht^y
magk³⁹/ ich geschweych/ das mir wider seyn solt/ von eynem zu
lernen/ der eyn seyl 40 iar umb den nabel gegurt⁴⁰/ und den Psalter
außwendig syngen kan. Behuͤtt mich der barmhertzige gott/
das ich fursetziglich/ meynem groͤsten feyndt/ ein yrrische leer ein-
gebe/ was darffstu dan/ Seyler/ uber die Wittenbergisch/ in ge-
meyn schreyhen/ als wider die ihene^z/ die durch yrthumb das volck
betriegen. Du zelest dich mit den hunden der schrifft⁴¹/ Nu bistu
nit ein schwirmischer oder irrischer hund⁴²/ den die hundßfliegen
und geltsaugen⁴³ beyssen/ so bylle und schrey uns/ ein geschrey/
auß der heylige schrifft/ und leer mich/ dan ich begere auß hertzen
zu wissen/ das der ablas de iure divino eingesetzt/ das ist in der
heylige schrifft eingeleybte sey.

Ich hoff auch/ meyn Seyler/ du werdest mir ein dapffere A4^r
schuͤtzred schicken/ dan⁴⁴ du auff S. Annebergk gethan hast. Du
sprachst/ frage dein Seniores^aa unnd ßo werden sie dich be-
richten⁴⁵/ ich meyn du hettest bereytt die pfeuffen auß dem hundts-
maull vorloren/ dan⁴⁶ werestu/ ein hundt gewest/ der bellen kan/
du hettest an tzweyffel/ mit der schrifft gebollen/ du weysest mich
aber zu doctor Ecken⁴⁷/ der mir hochlich vordechtig/ als eyner der
selber nit vill kan/ und meyn feyndt ist/ du hast gehört das ich
eyn schrifft⁴⁸ wil haben/ ich hab keyn zweyffell/ das vil Bebst und
vil muͤnich^ab vom Ablas geschrieben/ dan wo es dinlich were/
ich wuͤlde dich wol in die schul fuͤren⁴⁹/ aber ich lerne teglich/ das
den Christen^ac allen und yglichem/ er sey Babst/ Bischoff/ geyst-
lich oder weltlich/ kleyn oder groß/ hoch aber nyder/ die heylig
schrifft/ wie ein tryfeltiger strick/ den niemants zureyssen kan/ fur
gegeben/ auß der selbe vorstaͤndige/ mich wol und recht/ Was
darffstu mich zu menschen weyßen/ fure uns in die schrifft〈/〉 leer
uns durch gottliche schrifft.

Du sagest auch du woͤllest sicherer seyn/ ßo du/ den fußstap-
ffen der alten vetter⁵⁰ nach folgest. Hie wolt ich gern die selbe
heylige vetter hoͤrn/ zum andern dir furrucken/ das Augustinus
geschrieben/ sprechende.⁵¹ Ich gebe allein/ den schrifften/ die man
Canonicas^ad oder Catholicas/ das ist gemeynlich biblische genent〈/〉
Diß lob und preyß/ das yhrer keyner geyrret hab/ unnd glaube/
alles das sie sagen/ ob ichs gleych nit vorstehe/ aber alle an-
dere/ sie seyn heylig oder gelaͤrt/ leeße ich alßo/ das ich sie fur men-
schen achte/ die irren kuͤnnen/ ich glaub auch ynen nit/ das sie
recht und wol geschrieben/ das⁵² sie alßo geschrieben und gemeint
haben/ es sey dan/ das sie durch heylige schrifft aber⁵³ beweglich
ursachen/ yhr buͤcher befestiget haben.⁵⁴

Die rechten alt vetter haben ein vordrieß/ das yhr buͤcher/ der
heyligen schrifft gleych gewirdert^ae werden/ Wie Augusti'nus' sagt.
Noli meis.⁵⁵Was darffstu nun/ mit deynem Bonaventura⁵⁶/
Schoto⁵⁷/ Francisco Marenis⁵⁸/ Dorbellis⁵⁹ und andern schulvet-
tern⁶⁰ groß geschrey machen/ muglich ist es/ das sie alle geirret und
blind gewest/ und das/ der yn nach geet/ mit yhnen in die gru-
ben fall.⁶¹ Wiewol mir das alles von unnoͤten zusagen/ dan ich A4^v
beger noch/ du wollest mir schrifften brengen/ da durch du uns
Wittenberger/ zu falschen propheten kanst machen.

Bruder Seyler der unvordient Gardian/ begegnet mir ferner
mit eyner meysterliche gegen redt/ dan er schreybt also. Ich zwey-
ffel nit/ das der doctor mehr glaub/ dan in den heyligen buchern
geschrieben ist.⁶²

Ja lieber Seyler ich glaub/ das die parfuß monich gern gelt
haben/ ob⁶³ sie gelt nit antasten/ das ist nit geschrieben in Biblien
es ist auch vormutlich zu glauben/ das sie in grohen kappen⁶⁴
hoffertig/ und tzeyten gelt in holtzschuhen tragen/ und tretten/
das sie nit dorffen angreyffen/ ich gebe dir nerrisch exempell/
und ein questenn⁶⁵ / wie du ein badt man⁶⁶ bist/ hettestu dich furge-
sszen/ und^af unterlassen zu fragen/ ob ich an vatter und mutter ge-
born sey⁶⁷/ ßo wolte ich dir auch fruntlicher geantwort^ag haben.

Nu muß ich dich weyter furen/ und dohynn/ do du ungeren
ferest/ ist es nit/ das die Teuffel glauben und tzittern/ es glauben
auch vill holtzschuger^ah und hilfft sie nit. Ich glaub das Paryß
ein grosse stadt ist/ und glaub das die Theologen etzliche tzu
Lovanien⁶⁸ grob gesellen seint/ aber was dient uns solcher glaub.

Kurtzlich ich kan nit schweygen/ das du zumal ungelart
in der heylige schrifft bist/ dan so du gewist hettest/ was gesagt
ist/ ich glaub der heylige schrifft/ aber⁶⁹ ich glaub dem wort gottis〈/〉
du hettest gewißlich anders gebollen und geschriehen/ was aber
der glaub ist/ wil ich/ beystendig gottlicher eyngebung/ in kur-
tzen schreyben/ ym Buchlein vom glauben und wercken des ge-
rechten.⁷⁰

Doch soll eyn ytzlicher Christglaubiger wissen/ das in dy-
ßem falh/ do wir von handeln/ nemlich von vorheyschung^ai/ das
dem sunder schuldt und peyn vorgeben und abgenommen soll
werden/ das wir keynem wort oder geschrifften glauben sollen/
dan⁷¹ gottis wort oder schrifft/ darumb sprich ich recht/ ich glaub
keyner vorheyschung und vorgebung der sunden/ den die in der
heylige^aj Biblie außgedruckt aber begryffen ist/ gott der vorgibt
allein/ in seynem nomen/ sunden/ got vorheysset auch allein vor-
gebung der sunden. Es soll auch niemants am wort gottis
zweyffeln/ auch soll ein yglicher geyst/ durch gottliches wort.
in gott hangen und kleben/ festiglich glauben/ das er die creatur B1^r
sey/ der gott vorheyscheit^ak/ und helffen wil/ darumb sagt Christus
zu tzwen blinden/ muget yr glauben/ das ich euch sehende ma-
chen kan.⁷² Also von dem glauben zu reden/ sag ich frey/ das ich
keynem andern wort/ keyner andere schrifft/ keynem andern Evan-
gelio glaub/ dan das die heylige Bibel inheldet/ ich getrau
auch keyner erloͤßung/ meyner Seel. sie sey dan in der schrifft be-
schlossen. Hieremias spricht im 17. cap'itel' Vormaledeyet ist der/ in
menschen glaubt/ hafft/ aber⁷³ getrauet/ und sein hertz von gott
abweychet⁷⁴/ darumb sollen wir allein gottlichen zusagen unnd
vorheyschigung glauben/ getrauen/ und annemen/ wan bruder
Seyler vorstanden het/ wie das wort gottis sol geprediget wer-
den/ ßo hett er woll^al geschwigen. Weyl^am sie dan ablas/ ein vorh-
eyschung/ sunde oder peyn zuvorgeben/ nennen/ ßo muß von
noͤten/ ein Evangelische vorheyschung sein/ in der heyligen Bi-
blien begreyffen/ sunst sol niemants/ an ablas glauben.⁷⁵

Ferner denet^an der Seyler seynen strick/ und schreybet/ ich solle
ym/ in dem Evangelio oder Paulo weysen/ das ablas vorbotten
sey. Diße wort nehm ich mit bedingung an/ das ich sie gebrau-
chen will/ wider den ungelarten Seyler/ mit einfurung/ der Ab-
solution/ so von Christo bescheen seint.

Aber dißmal sprech/ das Moiseß/ zu welchem Christus wey-
set⁷⁶/ geschrieben hatt/ das man nicht/ zu dem gesetz gottis hencken
oder setzen soll/ man sol auch gar nichts da von nemen⁷⁷/ ya al-
so ist die heylige Biblien betzeundt⁷⁸ unnd bewart/ das der in
hochste vormaledeyhung fellet/ der an⁷⁹ das gegeben Evangelium
prediget/ als Paulus ad Gala'tas' 1 schreybt. si quis preter id/ quod
nobis Evangelizatum est etc.⁸⁰ er sagt nit/ welcher wider die gute
und trostliche zusagung oder vorheyschung gottis leret/ der sol
in die acht oder oͤbersten Ban gefallen sein/ sonder er spricht al-
so/ welcher anders prediget etc. Wiltu nu ablas loben/ als ein zu-
sag/ vorgebung der peyn oder der schuldt/ ßo ist dir/ als eynem
prediger/ von noten/ clar zu teuten/ wo dein vorheyschung ge-
schrieben steet.

Am letzten/ vorhoͤnet mich bruder Seyler mit solcher frag.
Sol man nit glauben/ aber in der kirchen thun/ dan das in der heyligen
schrifft geschrieben ist/ wie kumpt es/ das man wasser und saltz weyhet〈?〉

Auff dissen gegenwurff gehoret ein clein buchlein/ das wil ich B1^v
dem bruder auch bald schicken/ und nennen/ von geweychten
wasser/ wider bruder Seyler.⁸¹

Das er aber meldet/ man thue vil in der kirchen/ das in der
schrifft nit angetzeygt/ gesteen ich ym/ als wie man hundt auß-
iagen soll/ und die holtzschuch und nidercleyder⁸² in der parfußer
sacristen^ao ordenlich legen/ und sich alßo zu der meß/ bereyten/ man
hilfft auch den kertzen das sie nit schmeltzen/ und thut der gleichen
vil/ das spotlich zu schreyben.

Das seint des/ bruder Seylers helffred/ ich hoff er werdt hin-
fur bessere leer an tag brengen/ damit ich aber auch etwas von
dem Ablas sage/ sol dieser beschluß gesetzt sein.

Wan gott dem sunder/ sund/ schuld/ und peyn vorgibt/ ßo
bleybet nit meer/ das der mensch schuldig ist zuthun/ dan daß/
daran vorgebung der sunde hanget und steet. Das ist/ wan
gott/ dem menschen/ sund vorgibt/ ßo bleybt allein das/ darin
vorgebung/ der sunde steet/ das magk kein Engel oder beychtvat-
ter abnemen/ dan als bald/ der pußwircker/ von dem selben ab-
triet/ ßo kummen die sund wider.

Mocht yemants fragen/ was ist das selbe/ dem vorgebung
der sunde/ alßo innerlich und wesenlich eingebilt ist. Dartzu
antwort ich/ das ist/ das uns Christus zu eyner person gesagt/
gan hyn/ und sundige nit mehr⁸³/ in dem steet vorgebung und auß-
tilgung der sunde/ gehn von boͤßen aygen willen/ stee nit still/
sondern gahn^ap/ und sundige nit. welcher in dißem sententz bleybt
wirt an⁸⁴ ablas wol selig/ dan in dem wesen sterben sunde/ und
lebet der geyst/ nym das wesen hin wegk/ ßo wirstu sehen/ oder
auß der schrifft lernen/ das vorigen sunde wider wachsen.

Das hat uns Christus geleert/ durch das gekert hauß/ auß dem
der Teuffel voriagt/ welcher wider kame/ mit sieben arglisti-
gern gaysten.⁸⁵ Darumb alle/ die/ ablas dartzu brauchen. das sie
durch eynigen weeg oder weyse/ solche wesen/ itzt angetzeyt^aq ge-
ringer machen/ die selbe furen den menschen in alte und neu sund.

Dises wesen ist nit anders/ dan zu kere in got. und abkerung
von sunden/ Dise fruchtbare wort/ begreyffen vil fruchten/ wie
auch solige fruchten und gaben gottis geschehen/ ist uns durch
gottlich wort/ ym xviii. capitel Ezechiel. eroffnet alßo.

Unguͤtickeit des ungerechten/ sol uber ym sein/ ßo aber der un-
B2^rgerecht buß thuet/ und bereuet alle sein sunde/ die er gethan/ und
bewaret alle mein gebott/ und macht das urteyl und gerechtickeit
ßo wirt er ym leben bleyben/ und nit sterben. Alle seyne boßheiten
die er gewircket. werde ich vorgessen⁸⁶ und nit gedencken.

Diße schrifft ist clar und licht/ und leychtlich zu lernen/ erstlich
spricht gott/ das der ungutig und ungehorsam in seyner schal-
ckeit ersterben soll⁸⁷/ ewiglich straff darumb zu leyden. Darnach
leret uns die schrifft/ wie sich/ und welcher massen der sunder von
sunden abkeret/ nemlich. ßo er buß thut/ soll er alle sein sunde be-
reuen/ und alles sein ubel betrauren alßo.

Du solt sunden mit scharffen und hitzigen gedancken suchen
und vorurteylen/ dan wie woll^ar dem menschen unmuglich ist/
sein hertz auß zulernen/ als Hiere'mias' im xvii. capi'tel' sagt. Des men-
schen hertz ist boß und unergrundlich keyner kan sein boß hertz/
gar auß lernen⁸⁸/ eher du dich bedenckst/ so hat dirs ettwas ubels
geboren. Dan wie woll es unmuglich ist/ das der mensch alle
seyne sunde ersinne. doch sol er die mißteten/ die er/ auß fursatz/
gethon mit grossem ernst und vleys/ fur sein gestreng gericht und
urteyl tragen/ die mit seufftzen/ leyd/ wider willen/ vordrieß und
leyden beweynen/ also kerest du von den sunden. wie David der
spricht im ps. 50. Meyn sund ist stetz oder alletzeit wider mich.⁸⁹
ist die sunde wider dich. ßo mustu widerumb die sund auch vor-
volgen und hassen.

Wan der mensch alßo von boßheyten abkeret/ ßo ist gott
also barmhertzig/ das er/ nit mehr der sunden gedencken wil/ wie
gott durch Esaiam im 43. cap'itel' geschrieben. Gedenck du deyner
sunde/ ßo wil ich yr nit gedencken.⁹⁰ Ja in dem nun/ wan der sunder
spricht/ ich wil meyn sunde/ wider mich bekennen/ als baldt. vor-
gibt ym gott die sunde/ das hat gott (wie itzt gehort) durch Esa'iam'
vorheyschen/ und David bekant ym 31. ps'alm' sagende. Ich hab ge-
sprochen/ ich werde meyn boßheit/ wider mich beychten/ und du
hast meyn sund vorlassen.⁹¹ Der heylig sant Joannes schreybt
also. Gott ist getreu und gerecht sunde zuvorgeben/ so wir sie be-
kennen.⁹²Nu steet offenlich geschrieben/ das got die sunde vorgibt
und gedenckt ir auch nit mehr/ wan sie der mensch gedenckt/ wie
dan auch Ezechielis ym. 33. capit'el'⁹³ geschrieben.

Wie magk es dan gesein/ das die kirchen/ oder prelaten/ der B2^v
bereuten sunde gedencken durffen^as. ¶ Ich waiß/ das offenlich
sunde/ offenlich straff haben/ aber ich wolte gern/ durch schrifft
lernen/ weyl^at alle ablaßbrieff/ reu und leyd der sunden/ wie ein
grundt bevor fodern^au/ warumb die Monichen/ erdacht haben/
das die prelaten/ der sunde gedencken die got vorgessen hat/ heyst
nit das auff erden bynden/ das got in hymmeln^av auff geloͤst.⁹⁴ Item
das/ hie straffen und gedencken/ das gott dort vorgeben und vor-
gessen hat? Es sey ßo gut und schoͤn als ymer gesein kan/ das
man heymliche sunde mit solchen straffen/ wie mit saltz/ einsaltz/
dennoch weer seer gutt/ ya vill besser/ das man sich solcher bur-
den messiget/ und betrachtet/ das Christus sagt. Wee euch/ yr
belestiget die menschen/ mit untreglichen burden/ die yr selber nit
anruret.⁹⁵

Nu las ich woll gescheen/ das man heymlich sunde
einsaltze mit zeytlichen straffen/ die ablas abnympt. Ich
weyß aber nit/ was ich sagen soll zu dem wort gottis. Esaia.
am xxix. capitell. Sie haben mich gefoͤrcht mit menschen
geboten und leren.⁹⁶ ¶ Gott will sich nit loben lassen/
oder das yn der mensch/ mit menschen gesetzen forchte/ dan gott
vorachtet unsere gesetze/ ya er vorderbt aller weyßen kunst⁹⁷/ und
saget ursachen/ das menschen gesetzen/ allein augen und maull
erfullen/ aber das hertz/ machen sie gott fern/ und froͤm^aw von got/
wie in gemeltem capitel Esaie steet. Appropinquat populus iste
ore suo et labiis suis glorificat me/ cor autem longe est a me et ti-
muerunt me mandato et doctrinis hominum. etc.⁹⁸

Es ist got auch schimpflich/ das er ein ungenugsam gesetz
und leer geben hett/ wan uns nit alles/ das wir thun sollen/ in
seynem gesetz angetzeygt wer.

Beschließlich ich bitt bruder Seylern er wol^axEsaiam und an-
dere propheten wol ansehen/ und wol^ay mich/ durch heilige schrift
vorstendigen/ das etwas von den beychtvettern/ den beychtkyn-
dern auffzulege^az sey/ das ablas vorgebe.

Wirt er aber kein schrifft brengen/ so mag ich nichts von dem
ablas halden. ¶ Man kan mir auch kein Ban^ba/ derwegen/ auff
den halß werffen. ¶ Kan^bb auch sagen/ ablas ist auß menschen
gedencken entsprossen/ huͤt dich vor den eesten⁹⁹. Das sag ich alles
an¹⁰⁰ frevel/ dan ich beger zu lernen/ das ich nit yrre mit ablas. B3^r
¶ Das ist von der abkerung von sunden gesagt/ das gott nit
gedenckt der sunde/ die der mensch neydet und hasset/ und vorfolgt〈/〉
das ist die er bereuet. Volgende^bc wollen wir von der zukerung
reden/ wie sich der sunder an gott keret/ und in welcher massen/
in gott klebet/ und ym anhengig bleyb.

In dem xviii. cap'itel'Ezechiel. Hab ich ein schrifft oben ertzelt/
diß lauts. So der unguͤtig/ alle sein sunden bereuet/ und bewart
alle meyn gebot/ und ubet sich in dem urteyl und gerechtickeit/
so wil ich keyner mißtat/ keynes ubels gedencken.¹⁰¹ Diß ist ein
troͤstliche gottis zusag/ da durch warhafftig zuker angetzeyget
ist/ und lauter gesagt/ was/ nach vorgebung der sunde/ der sunder
thuen und wircken sol. ¶ Gott furet den sunder/ nit zu men-
schen gesetzen/ sonder in sein gotliche gebott und vorheyschung/
er spricht/ wan der sunder alle meyn gebot behuͤtet/ und thuet das
urteyl und gerechtigkeit/ darumb ist es gar nicht von noͤten/ das
der absolvirt¹⁰² beychtsoͤn/ sich an menschen gebot und trost keer/ wie
gut sie ymer sein mugen/ dan got libet/ das er machet/ und zeucht
uns an sein wort und voracht unser gesetz. Sol nu der mensch alle
gebot bewaren/ so muß er sie wol lernen/ wan er dan begert/ die
gebot/ des leben zuwissen/ spricht Christus/ du sagst. welche ge-
bot/ zu dem rechten leben weysen/ ich frage dich/ was ist ym gesetz
geschrieben¹⁰³/ also furet got den menschen in gotliche gebot/ darumb ist
von noͤten/ das sich der sunder/ mit hochsten vleys/ auff die schrifft
leeg/ und hencke sich festiglich an gotliche zusagung und geen in al-
len geboten gottis/ er muß das kreutz Christi/ daryn alle gebott und
weyßheyt/ ßo zum leben dienen/ behalten sein/ auff sich nemen¹⁰⁴/ und
seinen willen/ auß dem creutz schopffen.

Der sunder lernet in der schrifft/ wie er sich neyden und hassen/
wie er sich vorleuchnen^bd soll/ wie er das creutz teglich tragen/ und
Christo nachfolgen sol/ wie in dem menschen nicht gutes/ eytel
vorlust/ und alles gute/ und alle huͤlff/ von got gnediglich ab-
fleusset. Alßo kumpt er in ein gerecht warhafftig urteyl und ge-
rechtickeit/ und also driet er/ in diser weyß/ in alle gebott gottis/
und in eusserliche und ynnerliche weerck/ er macht ym nit eygen
gesetze/ sonder er betracht/ wie er augenplicklich^be und zu allen zeyten/
gottlichen willen/ annem und erfull/ der dan manichfeltige in
allen augenplicken furfellt.

B3^vEtwan ruffet er gott an/ etwan lobet er gott als seynen erloͤser/
etwan bekennet er gottis gerechtickeit in widerwertickeit/ sprechen-
de. Du bist der gerecht gott/ und hast alles wee und ubel/ in dey-
nem gerechten urteyl uber uns gefurt/ dir sey glorien und lob/ uns
schandt und spott. Dartzu hatt er/ lib/ trost/ glauben/ und
hoffnung zu got. Er huͤttet sich vor argwenickeit/ er urteylt key-
nen zu dem^bf argsten/ aber sich urteylet er mit ernst. Also ist er gerecht
bey sich/ und dem nechsten〈.〉 ¶ Zeyten^bg steet er bey den weesen
und widwen. ¶ Zeyten^bh kleydet er die blossen. Zeyten^bi speyset er die
hungerigen. Zeyten^bj besuchet er die gefangen.¹⁰⁵Zeyten^bk fast er/ wan
ym ungluck furfelt. Zeyten^bl betet er/ alles nach gelegenheit und er-
forderung der zeyten/ stellen und personen. Diese werck wachsen
auß dem edelen baume¹⁰⁶/ auß dem creutz Christi/ das ein yglicher
alle tag tragen soll¹⁰⁷/ das Creutz soll niemants umb gelt aber¹⁰⁸
ablas ablegen. ¶ Ist aber eyner/ der sprechen darff/ das creutz
magstu mit ablas mindern/ der ist gewißlich eyn spottischer
Jud/ vor dem creutz Christi steende und sprechende. Bistu ein
sohn gottis/ so steyg vom creutz¹⁰⁹/ aber lieber gesel welcher abstey-
get/ der kumpt auß dem gebott gottis/ vorleust urteyll und ge-
rechtickeit und vordirbt ewiglich.

Endlich muß der bußwircker ein underscheyt zwuͤschen den
geboten gottes haben/ bewegen/ das Christus zu dem gleyßner
sagt Mat. 23. We euch phariseyern/ ir gebent den zehen^bm/ von anet
und tylh und hynderlassent/ die groste ding/ des gesetzes. nem-
lich/ das urteyl (von dem ich in der außlegung eynes wagens
geschrieben¹¹⁰) und barmhertzickeit/ lib und glauben.¹¹¹ Man muß
auch gewarnemen ob dich gott mit grossen oder cleynen wercken
besucht/ das man nit dem geringe oblige/ und nachlaß das groste
und mehrer. Es ist ein loblich werck geste¹¹² freundtlich handeln/
aber vil loblicher ist das wort gottis geystlich zu hoͤren. Nach
dem/ wir auß dem Evangelio leßen / das Christus gesagt.
Maria hatt den besten teyl erwelt/ der sol nit von yr genummen
werden.¹¹³Maria saeß bey den fuͤßen Christi und horet seyn wort.
Martha die was sorgfeldig/ bereyt feur/ und kuchen/ speyß und
gedrenck/ domit sie den hern neren wolt/ das was ein gut werck
aber do sie Mariam. yr schwester/ von zu horung und lernung des
wort gottis abtziehen wolt/ sprach Christus. Maria hatt B4^r
ein besser teyl erwelt/ darumb sol sie nit verhindert werden¹¹⁴/ aber¹¹⁵/
das groß nachlassen/ und das clein volbringen. Das ist dohin
geredt das ein yglicher Christ vleyßig lernen soll/ der gebott und
werck gottis unterscheidt/ und so yne got in grosse gebot brengt
sol er nit/ auß aygem willen/ abfallen/ und dez cleynen nachfolgen/
dan die grosse werck mussen gescheen/ und cleyne sollen nit nach
bleyben^bn/ ßo die grosse volendet sein. Paulus spricht er wol vill
lieber funff/ aber etzliche wort/ ym vorstand/ und geyst/ in der
kirchen sagen/ oder beten/ dan funffhundert vorsickel an¹¹⁶ vorstend-
nis leßen¹¹⁷/ wie dan vil monch thuen/ die den psalter wie die nun^bo
singen. Begibt sichs dan/ das ich etwar in ein erkentnis/ eynes
psalmen oder geschrifft kum/ dem sol ich zuvor nach suchen/ und
meyn lang pfaffen gebeet aufftzihen¹¹⁸. Weyl uns nu got/ zu den
grossen gebott/ vor allen/ vorpflichtiget/ und am tag ist/ das
gottis gebott mehr und grosser seynt/ dan menschen gesetz/ ßo
soll uns ye/ kein menschlich trost oder vorheyschung von got-
lichen geboten/ vorhyndern/ wie magk mir dan ablas/ fasten oder
beten/ dartzu mich gott/ durch vorfolgung/ reytzet und furet〈/〉 ab-
nemen. Derhalben ist abermals mein begerung/ bruder Seyler/
woͤlle mich durch die schrifft/ leren/ das ablas de iure divino sein^bp/
das ist/ in der schrifft gegrundt/ die weyl nicht bleybt ym sunder
dem gott sunde vorgeben hatt/ dan das der vorgebung wesen-
lich eingeleybt ist/ und zu dem gott vorpflichtet/ und an¹¹⁹ welches
kein auß tilgung/ der sunden/ geschicht. Wo aber der Seyler
ein menschen strick mir furwerffen wil/ ßo werde ich sagen/
ich byn ein Christ/ und frag dich¹²⁰ von gottlichem willen/ ob got
ablas ye hatt wollen haben/ das soltu auß der schrifft/ dar in
gottlicher wil scheynet/ underweysen.

Diß hab ich kurtzlich umb ursachen/ oben vormeldet/ ge-
zweyffelt von dem ablas/ und dich erynnert/ als eynen/ der die
Biblien tag und nacht frisset/ und außbillet¹²¹/ Wiewol ich dich
nit ßo gelart acht/ als koͤndestu diser sach gnug thun/ dennoch
voracht ich nit die grohen floͤhe/ die weysse schild auff yrm^bq ruͤck
furen/ du hast zu sampt etzlichen deynen bruͤdern/ mich und die
glidmas dißer universitett als falschen und neu Wittenbergische
propheten/ offenlich gescholten/ nun uber weyß^br/ das durch schrift
und gibe mir nit holtzschuge fur haselhuͤnner/ nym alle deynn B4^v
holtzschug bruͤder zu hilff/ und helfferß helffer/ und leer mich/
das der ablas/ in der schrifft bewert ist. Du wuͤrest^bs mich vil-
leycht mit etzlichen historien anfallen/ als mit der/ von Ezechi-
as. 2. Parali'pomenon' 32.¹²² Uber den gottis zorn nit kam im leben/ und der
von David. 2. Reg'num'〈1〉2 das gott David/ sein sunde vorgab/ und
sterbet doch seynen son¹²³/ Auß gemelten historien/ brechen etzlich
ein kunstlich behelffred/ und sprechen/ das etwas ym sunder bleib/
als ein straff/ die der mensch leyden muß/ nach erlangter vorge-
bung der sunde/ und sagen das solch bleybende straff/ durch den
ablas abgekaufft magk werden. Weyl aber yr schutzwort
dunckel ist/ und noch nit den ablas beweeret/ wil ich warten was
Bruder Seyler/ darauß flechten kan/ den ich bitt/ er woͤl bald
hilff suchen/ und anworten/ damit ich etwas von ym erlernen
mug/ dan ich erbiet mich den ablas groß zu machen/ ßo er in der
schrifft getzeygt wuͤrd/ wo aber ich alßo ungelert bleyb/ kan
man/ mir einfeltigen nit vorweysen und vorkeren/ so ich sagen
wuͤrt/ ich meyn/ das ablas ein erticht dinck sein/ damit die leut
von gelt und guten wercken/ in ein boße meynung vorleydet wer-
den¹²⁴/ das ich nit reden wil/ so ich erbarlich gelernet werde/ itzt zu
guter nacht/ ich wil dir wasser und saltz schicken.¹²⁵ Datum eylig
Wittenbergk Laurencii.¹²⁶ Im .xx. iar.

¶ Ich wil hiemit andere Bruͤder parfußer ordens/ dere
sehr vil/ vast woll/ sich in die heylige schrifft legen/ nit angegri-
ffen hab/ in sunder/ die/ den holtzschugern in geberden ungleych
seynt〈/〉 wollen sie aber mich ye haben/ alhie byn ich. Finis.

¶Gedruckt zu Wittenbergk durch Johan. -
Grunenberg .1520.