A1^v

Wolffgang kuch¹ dem Christlichen leser.

Christlicher leser/ du seyst wer du wollest/ so du folgende predig/
mit dem urteyl des gaysts/ christlichem hertzen und gemuͤt/ wir-
dest lesen und ansehen./ Welche/ ob sie gleych nicht fast² mit hoͤfeli-
chen geschmůgten/ geferbten³ unnd weltweysen⁴ worten gezyrt. Ist sie
dennest⁵/ mit vollem/ reichen/ einfeltigen geyst und verstandt der schrifft
uberflüssig begabt/ Darauß du/ sonder zweyfel wirdest/ den stande
christglaubiger^e selen/ die schoß Abrae⁶ und das fegefeuer.⁷ Auch wie
fern wol von unsern vorfarn und hochgelerten/ hyrinn⁸ widder gottis
willen gestrebt/ all ir nachfolger bißher gestraucht⁹ unnd geyrrt ha-
ben/ erlernen und ermessen/ Dann das arme/ elende/ unselige freß und
geytzfolck/ muͤnch^f und pfaffen/ welcher etliche dem verstandt irer
blinden zurrissen^g vernunfft dem falschen untuͤchtigen lichte und ho-
hen kunst.^h Etlich dem geltsuchtigen fraß und ubermůtigemⁱ eergeytz.
Die andern auß unwissenheit der schrifft/ auß einfeltiger/ wolmay-
nung/ und auß bloͤdigkeit oder forcht der geystlichen obrikait^j/ dem gro-
sen hauffen der spitzhuͤdt¹⁰ und larven¹¹/ nachgefolgt/ den standt und
wesen christlicher abgescheydner selen/ arm elend unnd erbarmlich/
die schoß Abrae oder hymelpfordt hardt und enge/¹² das fegfeuer ma-
terlich unnd heyß gemacht/ damit den gemeynen man/ vom trost in
traurigkait/ von Abraams schoß in Lucifers rachen/ mit iren vigil-
ien/ seelmessen/ lichtbrennen/ opfern/ reuchen^k13 und sprengen/ gefurt^l
und abgeleytet/ so sie doch billicher/ das arm einfeltig unnd unvers-
tendigk volck/ sich nicht umb ire freundt in Christo verstorben/ zů-
bekuͤmmern in dem wort gottis solten getrost^m haben/ wie du dann fer-
nerⁿ klaͤrer und besser auß folgender predig wirst anhoͤren/ und dich
hynfuͤrter vil unnuͤtzer unnd unnoͤtiger fragen und bekoͤmmernuß/
dem gewissen beschwerlich^o/ entledigen/ Gott geb unns allen seynen
geyst unnd gnad Amen^p.

A2^r

^qS. Paulus in der i. Epistel Thes^r. iiii.^q14

Ich will nicht brüder^s (spricht Paulus) das ir unwissend seyt/
von denen die entschlaffen sein/ uff das ir euch nicht betruͤbt
wie die andern sich betruͤben/ die kain hoffnung tragen. Dann so
wir gleuben das Christus gestorben unnd aufferstanden ist/ Also^t wirdt
auch got die/ so durch Christum entschlaffen sein/ mit im furen. Dann
das sag wir euch im wortt gottis/ das wir/ die lebendig unnd uber-
bleyben werdenn/ in der zůkunfft des herren/ mit nichte werden für-
kommen/ die/ so geschlaffen haben/ Wann warumb der herr selbst wirt
vom hymel absteygen/ im geheyß und stym eines ertzengels/ unnd der
busaunen¹⁵ gottis/ und als dann werden die in Christo verstorben/ erst-
lich auffstehen/ ^uDarnach werden wir lebendige und uberbehaltne¹⁶
menschen/^u zůgleich mit den aufferstanden enzuckt/ unnd im gewül-
cken Christo entgegen kommen/ also allzeit mit dem herren bleyben.
Derhalben troͤst einer den andern in diesen wortten.^v17 Das ist die epi-
stel/ welche die vormeynte Christliche kirche den Selen zu hilff unnd
trost gestatt zulesen und zusingen. Dieselbige epistel helt zweyerley
sententz oder urteyl in sich/ Einen den^w sie in Sonderheit wil beschliessen/
Den andern der begriffen und verborgen ist. Der erst steht hie in/
das wir sollen wissen/ das wir unsere freund/ sovil ir in Christo ver-
storben/ werden widerumb haben. Derwegen sollen wir nicht betruͤbt
werden/ als die jhenen/ so keinen bewůst^x haben von der aufferstehung〈.〉
Dann ir solt wissen (spricht Paulus) das ir mit den verstorben in chri-
sto werdet auffgezukt und Christo entgegen kommen/ und stets mit dem
herren bleyben.¹⁸ Ist das nicht ein mechtiger und getreuer trost/ wel-
cher moͤcht sich bekuͤmern oder betrüben umb seinen gleubigen va-
ter oder mutter/ umb sein liebes weyb/ gehorsame kinder/ oder umb
andere freunde? wann er ein solche froliche und hochschetzige hoff-
nung hat/ das er weyß^y und verstehet/ das er nicht allein seine freundt
widerumb wirt erlangen/ sonder das er darzu mit seinen freunden
wirt im gewulcken auffgezuckt/ und Christo entgegen faren/ unnd
ewiglich neben jenen/ mit dem herren Jesu Christo bleyben/ das ist
ein guldener gewunschter trost/ welchen ein Christ dem ander soll
verkuͤndigen. Nun moͤcht einer fragen/ welche die andern werden
fürkomen/ Darauff spricht Paulus und antwort in einem wort got-
tis/ Also/ Wir lebendige werden die verstorbene in Christo nit fürfa-
ren oder ubereylen¹⁹ in der gegenfart²⁰ zů Christo/ sonder es wirt also zů
A2^v gehn. Der herr wirt im geheyß unnd stym eines ertzengels kommen/
und in einer busaůnen vom hymel absteygen/ und werden alßdann
die verstorben in Christo widerumb auff stehen.²¹ Darnach werden
wir auch zugleych mit jhenen auffgezuckt²² etc. Do^z hoͤret^aa ir freundt
gottis/ in welcher form/ maß und weyß/ das auffwecken werd gesche-
hen/ nemlich in einer stym und gedoͤne dadurch wirt got sein alme-
chtige sterck und macht beweysen/ und anzeygung thun/ das er der
alt got²³ ist/ welcher alle ding in seinem wort wircket/ schafft/ bewegt
helt und ordnet/ wie er wil/ und wann er wil. Darumb ists ein uppi-
ge sorg unnd bekomerniß/ das mann vil fragt^ab/ wie das auffwecken
werd geschehen/ Wann die solche frag thůn/ die vergessen goͤtlicher
macht/ unnd wollen nit betrachten/ das got die umblauffende hy-
mel und gantze welt/ engel und menschen/ mit seinem wort hat ge-
schaffen/ Da got sprach. Es soll werden der hymel/ da ward der hy-
mel. Deßgleychen hat er gesagt/ das creaturn sollen werden/ und es
seindt creaturn worden.²⁴ Dergleychen hat Christus zů den teuffeln ge-
sagt/ Geht auß/ und sie seindt außgangen.²⁵ Er hat bey der statt Na-
ym gesprochen/ zů dem son einer witben/ Ich sag dir steh auff/ und
er stundt schnell auff/ saß unnd redt Luce 7.²⁶ Er sprach zů Lazaro/
Kům herfur/ und er wurdt^ac lebendig Joan. 11.²⁷ Der exempel haben wir
vil/ auß welchen wir uns solcher unnuͤtzer sorg und frag solten bil-
lich entladen/ und nicht disputirn wie es mag geschehen/ es wer dann
das wir von got wolten gelart werden in rechter warhafftiger de-
můt unnd gelassenheit²⁸/ wie Ezechiel zů dem herren sprach. Herr du
weyst es/ Das sprach Ezechiel als yn got angreyff und füret/ in^ad ein
weyt feldt/ das voller dürren weyssen gepeyn lag/ und furet den Eze-
chielem im kreyß^ae umbher fragende. Meynestu/ das dise dürre kno-
chen widerumb lebendig werden?^af Darauff antwort Ezechiel/ Herre
du weyst es. Darnach sagt got. du solt disen gepeynen vorkundigen
dise rede und sagen. Ir durren knochen ader²⁹ gepeyn/ vernempt gotis
wort/ das hat got der her den knochen gesagt. Nemet war/ ich werde
in euch einen geyst senden/ und ir werdet lebendig werden. Ich werd
euch adern^ag geben/ und machen〈/〉 das fleisch auff euch wirt wachsen/
und ich werd euch mit einer haudt uberziehen/ und einen geyst ge-
ben/ und ir werdet leben und wissen das ich der herr bin. Unnd ich
prophetisirt/ als mir der herr ^ahhett geboten^ah (sagt Ezechiel) und als ich
verkundigt/ da wurde ein schall oder gedraͤsch³⁰/ und darzů ein bewe-
gniß/ und gingen peyn³¹ zů peynen/ ein yeglichs zů seinem glyd/ und
A3^r als ich mich ferner^ai umbsahe/ da sach³² ich adern und das fleisch auff-
geen und ein außgestreckte haut uberherr³³/ aber sie hetten alßdann key-
nen geyst/ Und got sprach zů mir (spricht Ezechiel) prophetisir^aj zů
dem windt/ und red also. Got hat gesagt/ der geyst sol von den vier
winden komen/ und in dise todten plasen/ auff das sie lebendig wer-
den/ und ich hab gepredigt (spricht volgendt Ezechiel) als mir bevol-
hen/ und ist der geyst in die toden gangen/ und sie seindt lebendig wor-
den/ und auff iren füssen gestanden/ und derselbigen was ein grose
mechtige schar/ Ezechielis 37.³⁴ Sehet da/ wie in schlechten Worten ey-
nes menschen (durch welchen got redet) die weyssen duͤrren knochen
adern/ fleisch/ haut/ seel und leben entpfangen haben. Solt es dan un-
muͤglich sein/ das ein geystlicher engel gottis in einer stymm und geheiß
gotis/ die todten nit moͤcht aufwecken und zusamen pringen/ got ist nichts
unmoͤglich.³⁵ Das aber got solche werck/ durch creaturischen gehor-
sam³⁶ zuwegen brengt/ ist im nichts von noͤten³⁷/ geschicht aber uns zů
einer sicher erfarung des glaubens/ den wir zů got haben. Got ver-
moͤcht mit einem athem die todten alle sampt auffwecken/ Ja mit ei-
nem gedancken ins leben und aufferstehung fügen/ Jdoch wil er es
thůn^ak/ in geheyß und stym eines ertzengels. Darumb sollen wir wey-
ter nicht fragen/ wir haben vil noͤtiger erfragung/ dann solch uppige〈/〉
die ich uppig und unnuͤtz nenne/ wan sie leichtfertiglich gescheen/
sonst nicht/ ursach. Hetten^al die Corinthier nit gefragt welcher gestalt
wir aufferstehn wurden/ wer das vorblieben das Paulus sagt/ Die
todten werden in einem augenblick/ und im gesang der busaunen/ un-
ersterblich auffstehn/ Denn diser vorgengklich leib můß sich mit un-
vergengklickeit^am bekleyden/ und der sterblich leichnam muß an sich ne-
men/ ziehen unnd rafeln³⁸ die unsterblickeit/ unnd alßdann/ wirt der
stachel des todes zů grundt unnd boden vorschwinden〈.〉 i. Chor. 15.³⁹
Dise leuterung moͤcht in der feddern vorbliben^an sein/ wann die Co-
rinthier Paulum nicht hetten gefragt/ Demnach wil ich hitzige fra-
gen unvorboten haben/ so radt von got wirt begert. Jdoch ist das
das gestrackt unnd fürtreflichst urteyl oder Sententz Pauli in der
heutigen Episteln^ao40 (als mann redt) das wir unns umb willen ob-
vermelter schetz^ap und reichtumb nicht sollen betruͤben/ so uns unsere
liebe fruͤndt absterben/ wann sie werden widerumb uffstehen/ die in
Christo entschlaffen seint/ unnd werden in einem bessern wesen auff-
stehen/ unnd bey unns alle zeyt mit dem herren sein Amen. Das sagt
Paulus zů den/ so Christen seind/ und Christliche bruͤder oder freun-
A3^vde verloren haben/ von den fleischlichen/ und von den/ so eynander
im fleisch lieben/ hat Paulus wenig zůthun/ wann in Christo lauter
geyst ist. Also müssen auch alle und yede den geyst Christi haben/ die
Christen sein wollen/ am fleisch ist in nicht gelegen.⁴¹ Der Ander
und heymlich begriffen innhalt/ oder vorstandt obbemelter Epistel
ist/ das wir uns von wegen der todten oder verstorben^aq in Christo/
nicht sollen bekůmmern/ als die jhenen/ so keine hoffnung haben/
dann wir haben freundt^ar/ welche durch Christum Jesum entschlaf-
fen und verstorben seind. Dieweyl nůn ir todt ein teuer hochschetzig
und kostlich ding in den augen gottis ist/ als die schrifft sagt/ sollen
wir mit nichte traurig unnd betruͤbt sein/ sonder uns hoͤchlichen er-
freuen/⁴² das sie got von dem leib und kercker hat erloͤset/ der sie gefan-
gen hielt/ unnd gefengklich ins gesetz der sünden furet. Roma. 7.⁴³ Der
sie alhie vermittelst der hymlischen einfluͤß vilfeldigklich verhindert
und von allem gůten gezogen/ und zů dem boͤsen genaigt hat/ dar-
umb solten wir uns mit den unsern/ in Christo verstorben/ hertzlich
erfreuen/ dan sie seind durch Jesum entschlaffen/ unnd schlummen
so lang/ byß sie got durch Jesum zů sich wirt fuͤren unnd prengen/
das ist ein begriffner^as heymlicher sententz oder urteyl/ in der Epistel
Pauli/ damit wir uns einer den andern trosten sollen. Nichts dester
weniger můß ich auff beyde^at sententz sagen/ das die tollen Pfaffen/
Baͤpste und Bischoffe/ alle warheit^au vorkert und umbgewendt haben〈.〉
Dann sie haben uns leren lassen/ das wir betruͤbt sein sollen/ wider das
das Paulus spricht. Brüder/ ich wil nicht das ir euch betrübt/ als
die jhene/ so keine hoffnung haben⁴⁴/ Wir legen den Paulum auß wie
wir moͤgen/ dannest⁴⁵ spricht er/ Ir solt euch nit koͤmern und betrüben/
als die jhene/ so keine hoffnung haben etc. Wir haben hoffnung das
unsere abgestorbne freundt in Christo verstorben seind (wann den ver-
storben ausserhalb Christo mag kein huͤlff ye geschehen/ als die histor-
ien von dem reichen berürt/ wie dann unden folgendt angezeygt) und
hoffen darzů/ das sie in Christo schlaffen/ wie Lazarus in der schoß
Abrae schliff⁴⁶/ und wissen/ das sie nicht todt vor gottis augen seind/
sonder lebendig/ dieweyl got kein got der verstorben oder todten ist.
Luce 20.⁴⁷ Auch wissen wir/ das sie Christus im letzten tage wirt auff-
wecken/ und bey sich behalten/ wes halben moͤchts gesein/ das wir
uns solten^av betruͤben? Ader^aw48 das wir sie aus dem standt wolten brengen〈/〉
der besser ist dann unser standt? Warumb wolten wir derhalben meß
stifften/ vigilien und metten singen/ und gelt außgeben/ das den seelen
A4^r zů abbrůch ires Standes moͤcht gereichen/ welchen sie von hertzen
gern haben/ und wunschen uns/ und biten got für uns/ das wir zů
inen komen/ und in rechter senlicher lieb und vorlanglicher⁴⁹ begerung
nach got rueten⁵⁰? Ist es nicht ein teuflisch sach/ das wir uns also ef-
fen⁵¹ lassen und am narren seyl furen/ das wir die unsinnigen pfaffen
und moͤnchen/ hoͤren also platern^ax52/ gebt gelt/ brenet^ay liecht und opffert/
helfft den armen selen/ loͤset^az sie auß irem fegfeuer/ gleich als^ba solche
hilff/ den armen selen nůtz und gůt wer/⁵³ und gefiel in/ das sie auß irer
senlichen begerung nach got/ solten gesetzt werden in ein kuͤle und un-
senliche begerung. Ader⁵⁴ ob die selen wolten/ das ir hitzige und brinnen-
de begerung nach got/⁵⁵ solt gelindert und kuͤler werden. Die selen in Je-
sum abgeschiden/ wollen und begeren/ das ir stat⁵⁶ und wesen von tag
zů tag mer und hitziger werd/ solang biß sie gereinigt werden. Eya
wol ein freund wer der gewest/ der Lazarum auß der schoß Abrae
het wollen erloͤsen/ darein alle menschen begern und eylen solten. Wir
haltens mit keinen selen/ dann mit den jhenen/ so durch Jesum Chri-
stum entschlaffen sein/ Mit den vordampten vermoͤgen wir nichts
handeln/ wir koͤnnen sie/ weder mit wasser/ mit opfer/ noch mit mes-
sen erquicken/ dann es ist ein solcher underscheyd zwischen jhenen und
uns/ das wir zů jhenen/ weder mit hilft/ noch mit radt moͤgen kom-
men/ als der figurirt Abraam spricht Luce 16.⁵⁷ Nun dieweyl hulff/
radt/ weyß und wege abgeschnitten sein/ duͤrffen uns die wanwitzi-
gen gleyßner⁵⁸ nit eingeben/ das wir denselben selen sollen zů hilff kom-
men. Weyl wir aber auch die selen in der schoß Abrae ligende (ader⁵⁹
durch Christum entschlaffen) nicht in ein geringere^bb oder kuͤlere bege-
rung sollen brengen/ folget stracks/ das alles thůn^bc meß/ opffer/ gelt〈/〉
gůt oder testament unnuͤtz ist/ das wir denselbigen selen zů gůt ver-
schuͤtten. Ich wil geren geschweygen/ das wir nichts anders von
got solten bitten/ dann das er wil/ und wann wir wolten anders bitten
dann got wil/ so wer unser gebet widder got und boͤß/ darumb sollen
wir nit wollen noch biten/ das die selen ehr in ein besser wesen genom-
men werden/ denn got wil und wolgefelt.^bd Auch wil ich yetzt vorhalden
das die selen alle ire gebrechen/ mangel und sund/ welche sie dort haben
durch ein feuer bessern und abfegen⁶⁰ (von welchen ich sagen werd) und
nicht durch unser furbit und wann wir daruͤber wolten biten/ wurt uns
Christus sagen/ als er zů den sonen Zebedei sagt. Ir wist nicht/ was
ir bittet⁶¹/ und wurd^be unser gebet billich von got voracht werden/ das
ich yetz laß berůhen. Nach dem wollen wir besehen^bf/ was die in Chri-
fehltsto verstorben haben/ des wir uns sollen erfreuen.^bg Mich bedunckt
das dise wort Christi alhie in sonderm fleiß sein zůmercken/ die er ge-
lert. Also/ Welcher mein fleisch isset/ und mein blůt trinckt/ der bleybt
in mir/ und ich in ime/ und als mich der lebendig vater hat gesandt und
geschickt/ und ich leb umbs vatern willen/ also ist es/ welcher mich is-
set/ der lebet von meinet wegen Joann. 6.⁶² Christus sagt〈/〉 das alle men-
schen/ die sein fleisch essen und sein blůt trincken/ in sein natůr/ art〈/〉 leben〈/〉
weis und wesen werden vorwandelt/ also/ das ir leben nicht mehr ir
leben bleybt/ sonder ein leben Christi wirdt/ das sie warhafftigklich^bh
moͤgen sprechen/ Ich lebe nit/ sonder Christus der lebt in mir^bi Gal. 2.^bj63
Unser leben geet zů poden und grundt nider/ und wechst das leben chri-
sti auff. Nun wie sie Christum essen/ also vorsterben sie durch Chri-
stum. Die Christum essen/ die leben umb Christus willen/ und haben
den einwonendem^bk geyst Christi in irem hertzen/ der ire seel hat leben-
dig gmacht/ und den leyp kuͤnfftiglich auch wirdt lebendig machen.
Demnach sein die verstorben durch Christum in warhafftigem leben〈/〉
wesen/ weysen/ und in der art Christi/ Doch einer mer/ dann der ander/
darnach einer ein pfundt empfangen/ oder mit empfangnen pfundt
sehr arbeit/⁶⁴ darnach komet einer in die tieff/ breyt/ weyt oder hohe chri-
sti〈.〉⁶⁵ Ephes. 3.⁶⁶ Alhie die Christum essen/ das ist/ die seine krefft und schetz^bl
erlangen/ die haben das leben/ und werden aufferweckt von Christo
Joan. 6.⁶⁷ Welche aber Christum nicht essen/ die haben kein leben in
inen/ sie haben wol ein fleischlich/ betrieglich/ vorgengklich lebenn/
aber das geistlich/ warhafftig und ewig leben/ haben sie nicht/ darumb
das sie Christum nicht essen/ das ist/ darumb^bm das sie Christus nicht
im grund irer selen⁶⁸ speiset und neret^bn. So aber yemandt Christum in
warhafftigem leben annymbt/ der hat das ewig leben/ Derhalben
wirt er in ewigkeit nicht sterben/ Joan. 6.⁶⁹ das ist/ welcher in dem her-
ren Jesu Christo lebet und glaubt/ der wirt nicht sterben in ewigkeit/
Wenn er aber gleich stirbt/ dannest lebt er/ nach dem Christus spricht〈/〉
Welcher in mich gleubt der lebt/ ob er glich^bo gestorben ist/ und ein yeg-
licher der in mich glaubt unnd lebt der wirt in ewigkeit nicht sterben
Joan. 6. xj.⁷⁰ Sihe wie der geist oder die seel mer ist/ ^bpdann der leyb ader⁷¹
fleisch/ also ist das leben der selen besser und edler/^bp dann das leben des
fleischs/ und gleicher weiß das vorgenglich gůt/ für nichts wirdt ge-
schatzt^bq/ wann es dem ewigen und unvorgengklichen gůt vergleicht
wirt/ Also wirt das fleischlich und vorgenglich leben unsers leibs fur
nichts geschatzt^br/ und der todt des leibes fur keinen todt gerechnet/ da-
B1^rrumb spricht^bs Christus/ welcher in mich glaubt der lebet/ ob er gleych
tod ist/ was ist das anders geredt/ dann welcher nach dem flaisch
todt ist/ der ist lebendig im gaist/ unnd hat das warhafftig/ ewig le-
ben/ das nymer in ewigkait vorgeht/ Es wirt woll besser und hoͤher/
und nympt zů/⁷² aber es vergeht nicht/ es wirt weder erger noch nider-
er/⁷³ derwegen ist es ein ewig leben/ als Jesus von Nazareth spricht
Joan. 6.⁷⁴ Welche in dem leben Christi stehn/ das ist/ welche Christo
leben und in got geborn^bt sein/ das sein die lebendigen/ davon Christus
sagt. Got ist nicht ein got der todten/ sonder der lebendigen.⁷⁵ Abraham
Isaac und Jacob etc. waren todt/ dennest⁷⁶ lebten sie/ und der herr war
ir got/ und bleybt ir got/ und wirt sie derhalben im letzten^bu tag auffwecken
und machen aufferstehn/ das sie das ewig leben haben〈.〉 Joannis. 6.⁷⁷
Das edel und ewig leben fecht^bv78 hie an/ dann ein yeglicher der in Chri-
stum Jesum glaubt/ der hat bereyt das schoͤn kostlich^bw und hymlisch
leben/⁷⁹ stirbet er also/ leiplich in dem selben leben/ das ist/ geht er leip-
lich ab/ und vorharret in dem leben/ so mag er in ewigkait nicht vor-
derben/ sonder er rastet und růhet in Christo Jesu^bx/ und wirt^by im das leben
ein suͤsser schlaff. Derhalben spricht Paulus billich⁸⁰/ das wir uns nit
sollen betruͤben umb willen unser abgestorben freundt/ denn sie sein in
Christo Jesu entschlaffen und verstorben/⁸¹ ir tod ist fast kostparlich in
den augen gottis/ dieweyl ir leben treflicher und kostlicher geworden ist
durch abkleydung^bz82 irer beschwerlichen leichnam/ alhie mustu orden-
lich mercken. Zům ersten/ was das ewig leben ist/ Darnach drey-
erley underscheyd des selbigen lebens lernen. Das ewig leben steht
in dem/ das sie den waren got allein erkennen/ und den geschickten Je-
sum Christum Joan. 17.⁸³ Diß erkentniß gottis geschieht nicht in der
vernunfft/ oder in dem falschen natuͤrlichen lichte/ als die grossen^ca do-
ctores von got disputirn/ sonder im grund der selen⁸⁴/ in goͤtlichem un-
betriglichem lichte/ und macht den menschen einen freundt gottis/ dann
es voreint die sele got dem herren/⁸⁵ als Christus sagt. Ich heiß euch
itzt meine freund/ derhalben/ das ich euch die ding offenbar hab ge-
macht/ welche ich von meinem vater gehoͤrt hab〈.〉 Joan. 15.⁸⁶ Derwe-
gen bitt auch Christus für die allein/ die sein wort annemen/ und war-
lich erkennen das er vom vater außgangen ist. Joan. 17.⁸⁷ Also ist das
ewig leben ein warhafftig erkennen gottis und Christi/ welchs der geist
allein eingibt und leret/ wann er sich mit der sele vereint und ein dingk
wirt. Das selbe leben hat drey weyte grad/ Nemlich alhie einen in di-
sem elende. Einen nach dem abschyd der selen vom leib/ und vor dem
B1^v eingangk in hymel. Den dritten im hymel. Alhie erkennen wir got und
christum im finsterniß/ und wundern von dem herren. Im andern
grad erkennen sie got/ gleich als die sonne in der morgen roͤdt (so⁸⁸ sie
auffgehet) und von uns gesehen wirt/ Im dritten grad/ sehen sie got^cb
gleich sam wir die klare sonne am hellen lichten mittag sehen.⁸⁹ Im er-
sten stat⁹⁰ oder grad ist vilfeltig finsterniß und verhinderniß/ Unnser
sterblicher leib beschwert die sele/ das sie sich nicht wol auffschwin-
gen mag/ und strebet alle augenplick widder den geyst/ So der geyst
gůte gedancken/ willen oder werck vernimpt/ bald^cc bricht das fleisch
mit seinen boͤsen gedancken/ willen unnd wercken auch herfür^cd/ und
macht das der geyst sein werck nicht kan ins wesen pringen/ Gal. 6.
Roma. 7.⁹¹ Wil der geyst gar glauben/ vertrauen/ got forchten oder
lieben/ so hebt das fleisch bald an zů zabbeln/ zweyffeln/ hassen/ miß-
trauen/ oder vor creaturischen dingen forchten/ und setzt sich gestren-
glich widder den geyst/ Unser flaisch hat ein sündt unnd boßhait in
sich^ce stecken/ welche allezeyt zů dem ergsten und boͤsisten zeucht〈.〉 Ro. 7
Gene. 8.⁹² Nun uber das ist die sele/ von wegen ires leibes/ den hymli-
schen einflussen und zůfelligen dingen underworffen/ yetz belust⁹³ sich
der leib und seel in creaturn/ yetz hat sie^cf schmertzen/ und sovil zůfell/ das
einer den andern linder und klainer macht. Sihe/ wann einem die zene
wee thůn/ so fület er denselben schmertzen woll und sehr/ felt^cg im aber
auch ein annder^ch kranckheit für/ als ein hitzige plattern⁹⁴ am pain/ So
wayß er nicht ^ciwelche schmertzen^ci am hoͤchsten ist/ Also wirdt auch
das ewig leben hie selten recht geschmeckt von wegen der vilfeldigen
zůfell und verhindernis/ das ich warhafftiglich moͤcht sagen/ wir ha-
ben das leben Christi in uns allein in hitziger begerung/ und nicht im
wesen. Idoch hoff ich/ das man ir vil moͤg finden/ die vast^cj95 hoch
sein in christformigen leben/ und Christus willen haben/ Gleich als
wol achte ich das ir vil mer sein die begereten sterben/ und mit Christo
leben/ dann die sagen doͤrffen/ Es lebet in mir Christus/ welche seufft-
zen manigfeltiglich beschwert/ wann sie in irem fleisch/ als in einem
kerker gefengklich ligen/ und on auffhoͤren sich nach einem andern le-
ben senen und verlangen.⁹⁶ Durch fleischlichen und todtlichen abgang
(so die sele iren beschwerenden leyb verlest) fallen mit ab alle verhin-
dernis des flaischs/ Seintemal das flaisch mit seinen begirden/ kreff-
ten und anfechtung ist begraben/ und wirt das ewig leben/ durch Je-
sum Christum untzelicher weyse/ rayner lichter/ gesamleter/ volkom-
licher/ dann es alhie gewesen ist. Derhalben moͤcht einer mit recht sa-
B2^rgen/ Selig sein die todten/ welch in dem herren verstorben sein/ der
geyst spricht/ das sie hinfür růhen sollen von iren arbeten^ck/ und ir werck⁹⁷
sollen in nachvolgen Apoc'alypsi' 14.⁹⁸ Warumb sein sie selig? Darumb das
ir ewig leben/ weniger finsternis und mindere verhindernis hat/ dann
es alhie im flaisch het. Derwegen sollen wir uns mit nichte umb unser
verstorbene freund in Christo bekoͤmern und betrüben/ sonder mehr er-
freuen/ das sie der manigfeltigen buͤrden und hinderlichen arbeten en-
tzogen/ und auß irem gefengnis erloͤst sein. Ir werck volgen inen nach
wenn das feuer urteilet ire werck/ und verbrendt den alle wercke die hol-
tzig/ heuisch oder stůpelich sein⁹⁹/ wie ich sagen werd^cl/ Selig sein sie/
das in nach der dunckel und finstern nacht/ die sonne in dem auffgang
als in der morgenroͤdt scheynet/ das in der tag Christi morgens zůko-
men ist/ Selig sein sie/ das in ir boͤß gifftigs^cm flaisch kein boͤse gedan-
cken/ kainen eygen willen/ kainen lůst in wercken oder creatůrn mehr
zůschyeben kann/ Nun aber sein sie selig/ warumb sprecht^cn ir pfaffen/
die selen sein unselig/ in jamer/ in elend/ in sunden? Ir stand/ leben/ und
wesen/ ist besser dann unnser/ wiewol ich sie aller sunde nit ledig zele.
Sie sein in starcker^co und hitziger senlickait oder verlangen/ und sein gern
drinn. Warumb wolt ir sie kuͤlen? Je hitziger und hefftiger ir leben ist/
ye nehr¹⁰⁰ sie zů dem allerlauterstem ewigem leben nahen/ gleichsam
das licht des auffgangs/ wie vil mer es dem mittag nahet/ ye lichter
und klerer^cp es wirt/ von dem zůnahen/ wolt ir sie zů ruck ziehen/ mit eu-
ern refrigeriis¹⁰¹. O o pfaffen/ sie sein selig/ das sie in dem herren verstor-
ben sein/ und ir todt ist kostparlich vor gottis augen/ welcher^cq teuffel
hat euch erlaubt/ selen unselig schatzen^cr/ und iren todt gering oder un-
schetzig machen/ Sie haben ein ewig leben/ und sein nicht tod vor got
und ir leben ist heuffiger und volkomlicher worden in irem standt/ den
wolt ir/ mit euern seelmessen/ vigilien/ opffern/ weyrachen/ lichten/
fasten/ und klappern/ myndern/ und sie wunschten uns/ das wir bey in^cs
weren/ und hetten die schetz und reichtuͤmer Christi auch fur augen in
einem frutag¹⁰². Von dem dritten grad des ewigen lebens wil ich yetz
nicht sagen/ dann ich hab furgenomen vom stand/ leben und wesen der
Christglaubigen selen zů sagen. Demnach ist zůmercken/ das der se-
len standt zwifaltig ist/ Etliche faren in die flammen/ als der reich
man fůr/ Etliche werden in die schoß Abraham getragen als Laza-
rus.¹⁰³ Welche ins feur faren/ den vermoͤgen wir weder mit rat/ mit ge-
bet/ půß/ noch that zůhilff kommen/ als oben gemelt ist. Derhalben
sagt Abraham. Es ist ein grose fern zwischen uns und euch/ das wir
B2^v zů euch nicht gen oder komen vermoͤgen/ Auch mag niemand von
euch/ zů uns komen. Luce 16.¹⁰⁴ Derwegen bittestu verdambter/ umb
sonst wir konden dir nicht raten oder helffen/ so kanstu auch nit hilff〈/〉
rath ader¹⁰⁵ that von uns holen/ Demnach ist dein geschrey umb sonst
und unnůtz/ du hast dich auch aller hilff follig¹⁰⁶ und verlustig/ und aller
hilff unbegreiflich¹⁰⁷ gemacht. Seintemal du im leben gůte tag und lu-
stig leben gehabt hast/ Gleicher weyß/ sprechen alle auserwelte zů den
verthümpten^ct108/ und erbarmen gar nicht uber iren elend und erbarmliche
qualung/¹⁰⁹ Es hat auch der Pabst nie dorffen sagen/ das wir durch
furbit/ gůte werck/ rathe oder tate/ solichen vertümpten^cu zůhilff kom-
men/ und gebraucht darzů dise schrifft. In der helle¹¹⁰ ist kein erloͤsung/
auß diesem grundt dorffen die pfaffen auch nicht sagen/ das sie den
verthumpten^cv selen ire ampte der vigilien oder messen nachhalten/ ob
die verthumpten^cw gleich schreyen. Miseremini mei saltem vos amici
mei etc.¹¹¹ Wann der reich auch zů Abraham schray^cx/ und nent in nicht ei-
nen schlechten frund/ sonder einen vater/ sagend. O vater Abraham
erbarm dich meiner etc.¹¹² Darab mag mennigklich abnemen/ wie der
Pabst und pfaffen/ ^cyzůvor an^cy die monchen^cz die heilig geschrifft brechen^da
und martern/ und suchen hilff/ farb/ mantel/ oder behelff irer kůnst/ in
dem da kein hilff/ farb/ mantel oder behelff vorhanden ist.^db Die an-
dern selen/ so in die schoß Abrae gefurt sein/ oder gefurt werden/ die
sein/ oder werden sein/ in der stat¹¹³ des trostes/ das leret Abraham mit
hellen worten/ sagende. Lazarus hat in seinem leben ubel gelyden/
darumb wirt er nun und yetz getrost.¹¹⁴ Es ist ye war/ das warhafftige
Christen alhie ein arbetsams und beschwerts leben haben/ dann weil sie
got lieb hat/ so strafft er sie mit seiner růten. Prover. 3. Heb. 12.¹¹⁵ Alle die
guͤtlich in Christo^dc begern zuleben/ die můssen verfolgung leydenn.
Auch můssen sie ir creutz alle tag tragen/ darauß mennigklich ver-
steht^dd/ das ein yeder Christ in disem leben das ubel/ boͤß/ peen oder be-
drugk leydet. Aber so er von disem leben scheydet/ fiert er als dann/ in
die stat¹¹⁶ und leben/ des trosts/ als Abraham spricht/ oder in růe^de/ als in
Apoca'lypsi' steht/¹¹⁷ und fület oder brufft^df118 der muͤhen und arbeiten nichts mer/
sonder er hat vollen trost/ Nun darumb wolt ich gern einen sehen/
der sagen dorfft/ das der selen standt und leben erbermlich und trostloß
sey? Oder das nicht besser sey/ dann unser stand und leben? Abraham
spricht ye das Lazarus alhie das ubel empfangen hab^dg/ aber im leben
und stand der selen sey er getrost. Wenn ich auch die schoß Abrahe er-
forschen kondt/ und erwegen/ was sein schoß bedeut unnd anzaigt/
B3^r wurd ich ungezweyfelt/ das edel und trostlich wesen der selen (durch
Christum abgescheyden) gruͤndtlicher vernemen.

Von der schoß Abrahe.^dh

Ich acht das die schoß Abrahe/ ein stat¹¹⁹ oder stell^di sey/ seiner geberen-
der und samlicher¹²⁰ krafft/ Wenn ich die geberende krafft Abrahe/ anfah
ermessen/ find ich/ das sie ubernatůrlich gewest ist/ von gott in son-
derheit verliehen/ und im starcken glauben Abrahe empfangen ist/ das
auch alle sone Abrahe/ sone des glaubens und verheischung sein ge-
nent/¹²¹ Auch das alle die in seiner schoß liegen/ son auß got geborn sein.
Abraham was hundert jar alt/ und sein weyb Sara 90. Gene. 17.¹²² als
im Got den son Isaac verhiesch/ was¹²³ aber ein solchs alter nicht so
unfruchtbar und hert^dj zůgeberen/ das es warlich moͤcht steynen ver-
gleicht werden/ und das einer warlich kondt^dk reden. Isaac ist auß ei-
nem felß gehauen/ und alle die in Abrahams schoß ligen/ die sein auß
einem herten felß gebrochen Esaie 51.¹²⁴ Nun dieweyl die gebůrt aller
selen (so in der schoß Abrahe getrost^dl sein) von got ist/ und sie sein sone
der verheischung/ volgt/ das die schoß Abrahe ein begriff und stat¹²⁵
ist/ der glaubigen/ und das allein die glaubigen selen drinn liegen unnd
schlaffen/ welche durch Christum entschlaffen sein. Es folgt auch〈/〉
das sie getrost^dm sein/ und sein dem samen^dn Abrahe gebenedeyt/ der chri-
stus Jesus ist/¹²⁶ und wirt ferner volgen/ das wir uns mit den getrosten^do
selen/ troͤsten/ mit den froͤlichen^dp erfreuen sollen. Auch folgt/ das sie
unser huͤlff/ unnsers rats nicht beduͤrffen/ dann sie sein in hoher weyß-
hait/ und mehr wircklicher krafft/ dann wir sein. Auch wirt mer volgen〈/〉
das ir lieb/ gerechtigkait und erkentnis scherffer^dq ist/ und weniger man-
gel hat/ dann^dr unsere lieb/ gerechtickait und erkentnis/ wenn die^ds selen ye
weder vom flaisch/ noch durch arbeit/ noch zůfellen verhindert wer-
den/ als wir in disem leben verhindert sein. 2. Corint. 5.¹²⁷ und ist ir ewig
leben (welches alle glaubige durch Christum haben) gruͤner und plu-
ender/ dann unnsers/ das wir alhie erlangen moͤgen/ wie moͤchten sie
dann umb hoͤlff/ radt und barmhertzigkait an uns schreyen/ das mer
den vertuͤmpten¹²⁸ oder tollen selen zůstet/ als die wort des reichen auß-
weysen〈.〉 Luce 16.¹²⁹ In der samlichen schoß Abrahe sein allein behalten
die auß got (uber alle natuͤrliche macht) geborn sein/ die^dt das ewig le-
ben alhie in seiner weiß entpfangen haben/ durch den glauben in chri-
stum Jesum.^du Darumb leben sie/ und sein nicht tod/ darumb schlaffen
sie und růhen in dem trost/ welcher die gantze welt getrost^dv hat/ dar-
B3^vumb sein sie selig/ und vom elende gefürt/ das ist von der schoß Abrae
gesagt/ welche got anfieng zůerfüllen/ als er sprach zů Abraham/ Sih
auff die stern am hymel/ also soll dein sam^dw werden/ Gene. 15.¹³⁰ Got er
erfült Abrahams schoß eer mit gerechtigkait/ weißhait/ lieb/ und senli-
cher begerung nach got/ dann er Abrahams schoß voller kinder macht〈.〉
Alle die auß der schoß Abrahe geborn werden/ die sein sone der gere-
chtigkait/ weyßhait/ lieb gottis/ und vor allem sone der verlanglickait
und senlickait nach got.¹³¹ Auch fert kain seel/ in die schoß Abrahe/ dann
die auß ir geborn und herkomen ist/ das ist das Christus sagt/ welcher
in mich glaubt der wirt nicht sterben/ sonder er hat das ewig leben¹³²/
oder ich geb^dx wasser zůtrincken/ welchs/ ins ewig leben sprengt^dy/¹³³ So
auch einer Abrahams schoß darauß wolt betrachten/ das er den tag
unsers herren Jesu Christi gesehen hat Joan. 8.¹³⁴ und das ein man vol-
ler tage und gutes frids gewest/ der moͤcht sagen/ das die selen in seiner
schoß Christum im auffgeenden tag sehen/ und das sie in gůtem frid
sein/ und voller jar allzeit/ darob er nichts minder schliessen kondt/ das
der selen standt und leben/ klarer/ schoͤner/ besser/ edler und geystlicher
dann unser stand und leben ist/ und das abermals unser leben/ ein yemer-
lich^dz und elendes leben ist.

Vom fegfeur der menschen und
abgeschyeden^ea selen.

Mann pflegt^eb zů reden〈/〉 das die selen (so durch Christum abgescheyden
unnd entschlaffen sein) im fegfeuer liegen/ aber man brengt kainen
grundt der schrifften/ das also sey/ so ist in auch die historien vom la-
zaro¹³⁵/ solchen rednern/ entgegen/ Seintemal allein die vertuͤmpten^ec136 se-
len/ in die flammen faren/ und die glaubigen in die stat¹³⁷ des trostes/ der
gerechtigkait/ wie oben berůrt. Auch ist wider die selben/ das zwo
stet¹³⁸ oder stend sein der selen/ unnd das kein feuer ist gefunden in der
schoß Abrahe/ Demnach^ed glaub ich nicht/ das die glaubigen selen
durch flammen oder feuer gequelt werdenn. Bevor an ist mir un-
glaublich/ das die selen in materlichem¹³⁹ oder elementischem feuer sol-
ten sitzen.¹⁴⁰ Darumb verlaß ich diese ungegruͤnte¹⁴¹ rede. Doch wil ich
nicht vermeynen^ee/ das der heylig geyst/ das boͤß und gůt volck zeyten
einem holtz/ und gottis wort einem feuer vergleicht/ Nach dem Je-
remias spricht/ Nym war/ ich geb mein wort in deinen mundt zů ei-
nem feuer/ und das volck zů holtz/ und es wirt sie verzeren^ef〈.〉 Jere. 5.¹⁴² Ein
B4^r solchs holtz ward darnach Jeremias/ unnd ein solchs feuer wardt
gottis wort in ime/ Dann das wort gottis wurd^eg im hertzen Jeremie
als ein auffprullendt^eh und rotblickendt feuer/ und verbrant den Jeremi-
am/ so durr/ das er es nicht lenger erleyden moͤcht/ Jere. 20.¹⁴³ Das wort
gottis ist uber die massen brennende/ Heb. 4. und durchgeht gepain
und marck/ und teylt den geyst von der selen/¹⁴⁴ wann es von got im grundt
der selen und gůtem acker auffgeht/¹⁴⁵ dann so es im glauben ist angeno-
men/ was ist es anders/ dann das feuer/ das Christus geschickt hat/
das brennen soll/ Luce 12.^ei146 Es gebirt^ej senlickait/ lieb/ gerechtigkait/
weißhait und neuhait des menschen/ solt es dann nit brennen/ anzün-
den/ fegen und reynigen? Demnach moͤcht ich verlanglickait/ unnd
verzerende senlickait nach got (welche auß dem lebendigen wort go-
tis komen) ein fegfeuer haissen/ und sagen/ das die brennende und hitzi-
ge begerung nach got/¹⁴⁷ alles holtz/ heu und stoppeln in den selen ver-
bren/¹⁴⁸ und allen mangel/ rost oder gebrechen abfeeg. Ich forcht/ das
etliche selen/ nach dem tod mangel und gebrechen haben in irer lieb go-
tis/ in irer gerechtigkait/ in irer weyßhait/ das^ek sie got nicht mit gan-
tzem und vollem hertzen lieben¹⁴⁹/ das ir gerechtigkait nach zů klein¹⁵⁰ sey
und ir erkentnis etwas zů dunckel sey/ und solang dunckel bleybt/ als
sie got nicht im hellem lichtem mittag erkennen/ ir hertz ist villeicht
nicht gentzlich beschniten/¹⁵¹ unnd hat ir hertz etwo ein unerfarenhait
des glaubens/ und ist villeicht ir auge nicht allenthalben gerainigt/
Nun moͤgen sie got nicht sehen von angesicht zů angesicht¹⁵²/ alle die
weyl sie unrainikait in irem aug haben.¹⁵³ Derhalben glaub ich das sie
etliche werck/ gedancken oder willen nach haben moͤgen/ die holtz/
heu oder stupfeln¹⁵⁴ haben/ welche das feuer anzünden und verzeren
můß/ weyl der lebendig glaub und sein wort nicht gemein haben/ mit
den stupfeln/ nachdem Jeremias spricht/ was haben die stupfeln mit
dem feuer? Jere. 23.¹⁵⁵ Es mag sein/ und ich glaubs/ das nicht wenig
selen seyn/ die in zůnemen und gemerung ires glaubens/ irer lieb/ irer
gerechtickait stehn/¹⁵⁶ und haben das in gemain mit unns/ das sie sich
senen nach got/ und hertzlichen verlangen haben/ das sie got mit ei-
nem gerainigtem aug sehen moͤgen/ mit vollem und gantzem hertzen
lieben/ der doch kains geschieht/ ehr alle creatůrische ding/ unnd die
umbstendige finsternis/ oder grobhait vom aug abgeryben und ab-
gewüscht werden/ Denn wo das augen ein steublein hat/ da kan es
got nit sehen/ gleich als wenig einer die sonn sehen kann/ wann er ein
puͤtzlin^el157 in seinem aug hat. Deßgleychen ist es mit der lieb/ das nye-
B4^vmandt got lieben kan/ er liebe dann got mit gantzem hertzen/ voller
sele/ und allen krefften¹⁵⁸/ ursach/ got foddert ein solche lieb/ unnd kain
andere lieb/ Demnach mag kain sele got recht lieben/ alldieweyl ein
lieb zů sich selber oder zů andern creaturen in ir hangt. Nun wolten
die selen (durch Christum verstorben) gern am lichten tag sehen/ und
mit vollem hertzen lieben/ und das sie got allenthalben erfult/ Senen
sich darnach/ und haben schmertzlichen verlangen darnach/ unnd
stehent^em also in gelasenhait/ und geschwinder langkweylickait¹⁵⁹/ unnd
werden in langkweyliger senlickait/ als die versengten oder verbren-
ten baumen/ von welchen die pletter/ mosich/ unnd die rinden sich
abreren¹⁶⁰ und abschelen/ also das sie ire klare und weyse stemme zů licht
prengen/ wenn ungezweyfelt die hitzige und inbrunstig senlickait nach
got ist in uns als ein feuer/¹⁶¹ das unsere aigne sele/ die welt/ und alles
das^en weltlich ist/ in einen gestrengen haß/ und grimmigen neyd brengt
und macht/ das uns unsere krefften/ weyßhaiten/ begirden und werck/
als ein feind werden/ den wir forchten und stets flihen wollen/ und
also ist dise senlickait/ in uns ein fegfeuer/ welchs durch neyd unnd
haß gegen eygner^eo sel/ alles das unser ist/ verdeut und zůnicht macht〈.〉¹⁶²
Aber das feuer wirt in unserm betrubten leben offtmals gedempfft/
und hat einen steten kampff mit unserm flaisch/ darumb kans nicht
so hitzig sein/ als in den selen/ die iren rock und beklaydung außgetzo-
gen haben/ und schlaffen von aller eusserkait^ep/ aber ir hertz wachet/
und hoͤret was der gayst gottis in inen spricht und leret Can. 5.¹⁶³ und
werden der ursach halben/ vil^eq tausentmal hitziger in der senligkait
nach got/ dann wir. Derwegen mag ich ein solche angstliche senli-
kait zů got in den selen ein fegfeuer nennen/ wiewol sie getrost^er sein/
und ein teuer goͤtlich leben haben. Wir arme leut erkennen Christum
im finsterniß/ unnd in der nacht/ darauß kompt ein kleine senlickait.
Die selen sehen die sonn/ das ist Christum fruͤ auffghen/ Derhalben
ist ir senlickait/ in unzelicher weyß/ hefftiger und geschwinder/ dann
unsere verlanglickait. Auch die pfaffen sollen solches feuer weder le-
schen noch dempffen/ denn Christus wil/ das sein feuer brenn/ und in
der selen stets blick¹⁶⁴ oder schymmer. Auch das es die selen feeg/ reyn/
schon¹⁶⁵/ unnd ein lere stat¹⁶⁶ mach dem heyligen gayst/ Demnach můß
das fegfeuer ein klar aug/ das ist/ rein urtail und erkentnis machen/
und zů voller lieb unnd gerechtigkait furen/ das ist ein auffgekeimdt
erdtrich/ das an^es167 wasser ist/ und wann sich die erden/ das ist/ der gayst
durch solche bewegnis auffthůt/ und ist gantz duͤrr/ so kompt got/
B5^r und verlesst es mit nichte/ sonder er erfult es/ mit seiner maiestat und
glorien/ und macht es im abgrundt sath und vol.¹⁶⁸ Darauß verstehent
ir/ wie die senliche begerung nach got/ ein fegfeuer mag genent wer-
den/ und wie dasselb feuer dürr und hitzig macht/ unnd alle werck
angreyfft/ und alles verbrent/ das hoͤltzen/ heuisch/ oder stupfelich
ist/¹⁶⁹ sonderlich in den selen/ in welchen es ein volle unverhinderte und
großblickende glud hat/ Es ist auch angezeygt/ das ein solchs feg-
feuer/ nicht on neydt und haß eygner selen/ und tadelung der gůtten
werck/ geschicht/ und das es nyemandts kuͤlen soll/ wiewol es die se-
len engstet. Ditz mag das feuer sein/ von welchem Paulus schreibt/
das ein yeglichs werck urteilt. 1. Corint. 3.¹⁷⁰ Nun kan es urteiln? so ists
vernunfftig und weyß/ und geystlich. Gleych als der ein geystliche
weyßhait hat/ der alle dingk urteilt oder schätzet^et/ und nymbt eins an
das ander verlest er/ also thůt das vernunfftig fegfeuer/ das ist/ die
brennende senlickait zů dem felß/ welcher Jesus Christus ist¹⁷¹/ wenn die
selbe senliche begerung gibt underscheyt zwischen wercken und wer-
cken. Sind sie holtz/ heu oder stupfeln/ so zünd sie dasselbig an/¹⁷² und
můß der mensch einen schaden leyden/ das ist verzůg haben/ und in
der langweiligen senlickait so lang bleyben/ byß die sele/ biß ir aug/
byß ir hertz/ byß ir werck/ gnůgsam rein und sauber geworden/ und
sie durch solche bewegnis recht auffgethan unnd bereyt ist/ got mit
seiner maiestet einzůnemen. Diß feuer macht nicht unselig/ sonder se-
lig/ Es hat auch den tag des herren Jesu Christi/ in welchen^eu alle
werck offenbar^ev werden/ Denn Christus geht solchen selen auff in der
morgenroͤdt/¹⁷³ mit seinen schetzen und gaben/ die uns zům tail verbor-
gen sein/ Darauß ich abermals schließ/ das wir uns nicht koͤmmern
oder bedruͤben sollen/ von wegen unser freunden^ew in Christo verstor-
ben/ dann ob sie gleich ein gaistlich fegfeuer haben/ als gemelt ist/
dannest werden sie in dem selbigem/ vernuͤnfftigem fegfeuer selig/
und gehn neher zů der sonn des mittentags dann wir. Auch wirt in
nicht geholffen/ dann durch solchs feuer/ darumb sollen wir sy nicht
wollen darauß bringen/ als wenig wir wunschen solten/ das uns un-
ser glaub/ hoffnung/ lieb und senlikait zů got solt kalt oder klainer wer-
den. Auch lest sich die sel und ire werck/ durch nichts anders raini-
gen/ denn durch haß und neyd eygner selen/ und verlanglickait nach
got/ das ist/ durch ein warhafftige senlickait/ als Christus spricht/
So das koͤrnlein ins erdtrich felt und stirbt/ so bleybts nicht allain¹⁷⁴.
Das ich von den selen hab gesagt/ nemlich/ das sie in hitziger senli-
B5^vkait oder groser begernus/ nach got stehn/ das wil ich von den selen
gesagt haben/ die alhie Christum haben leren erkennen/ und sein durch
Christum entschlaffen.^ex Aber von den selen/ die wenig urtail gottis ha-
ben/ und Christum nit wol erkant haben/ hab ich nichts geredt. Ich
halt es dafür/ das sie dort studiren¹⁷⁵ und leren¹⁷⁶ můssen (sein sie anders
versehen zůr selickait) und erkennen alle ware urtail oder sententz/ wel-
che got wil haben erkandt/ ee er sie in hymmel nymbt.¹⁷⁷ Auß dieser ur-
sach das Christus spricht/ Wer ich nicht komen/ so hetten sie die sund
nicht/¹⁷⁸ das verstehe ich nach S'ankt' Petrus sprůch/ der spricht/ Es mů-
sten auch die todten evangelizirt werden/ auff das er sie nicht urteiln
1. Petri 4.¹⁷⁹ Het Christus den toden nicht gepredigt/ oder seine trostli-
che botschafft lassen verkündigen/ so het er sie nicht koͤnnen richten/
oder urtailn/ weyl er aber berait ist lebendige unnd todte zů urtayln/
ists zimlich unnd billich gewest/ das Christus den verstorben hat
gepredigt/ oder predigenn lassenn/ die im flaisch bey den menschen
todt/ unnd im gayst vor got lebendig gewest sein/ das alles redt
Petrus von den gaysten die vor got leben/ und wil doch schliessen/
das got die toden nicht kont^ey urtailn/ wann sie nicht evangelizirt we-
ren/ darvon ist nicht weyt das wort Christi/ Es wirt komen die stund
das die todten in den grebern die stym des sons gottis hoͤren.¹⁸⁰ Nun/
wenn got nicht urtailn wil/ und spricht/ das die verstorben in grebern
gottis stym erhoͤren/ folgt/ das nicht wider die schrifft^ez ist/ wann ey-
ner sagt/ das die ungelerten selen dort studirn můssen/¹⁸¹ das sie alhie ver-
seumpt^fa haben/ Es wirt inen aber ein stund schwinder und schwerer/
dann hie etliche jar/ weyl sie alles leyden oder thůn/ on verhindernis^fb
leyplicher zůfellen/ leyden oder wircken. Auch wirt sie der gayst des
schlaffs/ oder der durchbeysenden^fc anmechtigkait (welchen man spi-
ritum conpunctionis¹⁸² et extasis nent)¹⁸³ in unvergleicher weyß geschwin-
ter antasten/ durchstechen/ und umbtreiben/ von welchem Esaias
am 29.¹⁸⁴ schreibt/ unnd welchen David erliden hat/ als er sagt. Mein
hertz ist in mir umb unnd umb gelauffen/ sam¹⁸⁵ einer der den schwin-
del oder das umbdreen leydt/ und hat mich mein krafft verlassen/ und
das lichte meiner augen ist nicht mehr bey mir Psal. 37.¹⁸⁶ Es moͤcht
auch kommen (welchs got am besten wayß) das zeyten die ungelerte
selen also umbher giengen/ und das etliche/ in solchem bewegnis und
engsten irer unwissenhait/ rasen/ das sy nicht wissen ob sie vertümpt^fd187
sein oder nit. Es moͤcht auch geschehen/ das etliche selen/ Messen/ al-
můsen/ gůte werck/ wandern zů den heyligen/ und dergleychen bey
B6^r iren freunden^fe gesucht¹⁸⁸ (alles auß unwissenhait/ die sie alhie gehabt/
und mit sich getragen haben) das sie auch endtlich nicht widerkom-
men sein/ als sie haben vermerckt/ das sie weder messen/ noch almů-
sen/ noch werck/ noch wallen¹⁸⁹ geholffen hat〈.〉 Gleich sams hie mit den
ungelerten leuten ist geschehen/ und solang^ff geschicht/ byß sy die kůnst
gottis gelernen und verstehen/ das die messen/ und das wallen zůn hai-
ligen widder got sein/ und das in nicht mit almůsen oder wercken/ son-
der mit der kůnst gottis mag geraten und geholffen werden/ solang^fg
sein auch die tollen und nerrischen selen in irem gefengknis/¹⁹⁰ und fürt sy
ir gewissen solang^fh gefangen/ byß sie gottis kůnst und erkantniß der
waren goͤtlichen reden erlernen. Die erfarung umblauffender selen/
ist so groß/ das ich sy nicht straffen noch verwerffen darff/¹⁹¹ Gleych-
wol gestehe ich/ das sich^fi der teuffel auch in gestalt eines umbwan-
delten gaysts verstelt/ und umb messen/ opffer/ lichte/ und der gleichen
schreyet/ auff das er die pfaffen in irem yrthůmb behalt/ und die leyen
umb gůt und leben brengt. Aber nicht desterweniger halt ich/ das se-
len auch moͤgen umbgeen/ und auß dem alten yrthůmb/ irrische und un-
nuͤtz huͤlff begern/ solang^fj/ byß sie gottis kůnst begreyffen/ welche got
mer dann opffer gefelt〈.〉 Osee 6.¹⁹² Nicht wil ich das sie uns půß und besse-
rung unsers lebens sollen verkündigen/ oder das sy derhalben erscheinen/
dann wir haben Mosen und propheten/ so wir denselben nit glauben/ we-
niger wurden wir den selen glauben. Aber ir anligende not/ angst und
schmertzen moͤgen sie nichts mynder verkündigen/ denn der reich man
dem vater Abrahe sein leyden und not verzelen thet〈.〉 Lu. 16.¹⁹³ Ein tail se-
len stehn in verwunderung¹⁹⁴/ und haben nicht solche grosse not/ als die so
den gaist der anmechtigkait leyden/ dieselben komen auch ehr in gottis
kůnst/ dann die negst berůrten/ Welcher aber der greulichen^fk angst und
den gaist der anmechtigkait/ nit wil fülen/ der gedenck/ das er alhie fleys-
siglich studir/ und gottis wort grundtlich begreiff/ und einnem¹⁹⁵/ und be-
war/ so wirt er bewart. Denn es wirt in¹⁹⁶ nichts auß unwissenheit füren
dann goͤtlich kůnst und weißhait/ sonst mag im wider^fl197 werck/ noch meß
noch gelt/ noch ainigerley sach furdern/ und auß dem gaist der anmech-
tikait/ oder auß verwunderung¹⁹⁸ in stilhait¹⁹⁹/ trost und frid brengen/ das wil
ich in wan^fm/ opinion oder weyß/ biß besser wirt/ gesagt haben. Auff dise
red Machabeorum Sanctum et salubre est exorare pro defunctis etc.²⁰⁰ hab
ich im bůchlein von biblischen bůchern²⁰¹ geantwurt/ wiewol ichs auch
dafür halt/ das der Schreiber die wort und handlung Jude^fn202 unbequemlich
gezogen und gebraucht haben/ wenn es wer im wol angestand/ das er hi-
storien gegen historien gesetzt und vergleicht/ und darauß sich erkundt
hett/ wie er die historien Jude geschicklich moͤcht brauchen.