Edeler wolgeborner/ gnediger her/ E'uer' g'naden' gebe ich tzuer-
kennen/ das der almechtig lebentig/ und starck gott/ un-
ßerer regenten⁷ hertze erweigt⁸/ und sein werck in yenen ge-
wirckt hat. Alßo das sie freytags nach Sebastiani⁹/ eyn
nottliche reformation/ und ein alten loblichen Christlichen
gebrauch/ vorgenhomen haben.¹⁰ Nemlich das hynfuͤro
die Messe einhelliger^d weiß und form. in yrer pfarre. soll ge-
halten werden.¹¹ Zum andern/ wollen sie die betruͤgliche
bilder und Olgetzen¹² wegnhemen und abthun/ welche lang
tzeit uff den altaren gestanden/ wende/ hohe/ lufft/ und vil
stell der heußer gotis frevelich besessen und ingehabt haben.¹³

Darnach haben sie beschlossen (alles in beysein und tzu-
thun unßer ettlicher)¹⁴ das hynfuͤro keiner alhie nach brot
darff lauffen/ eß soll ouch kein bettler hye erhalten werden.
Arme leuthe wollen sie williglich neren. Aber bettler mo-
gen sie nit mehr leyden.¹⁵ Sie hoffen ouch/ nach verfa-
hung¹⁶ gemelter dreyer artickell/ noch mehr Christliche stu-
cke furtzunhemen/ und das beste auff tzebrengen/ unther
welchen/ diser/ hoch von noten ist/ das Christliche obir-
keit/ auß eygner Christlicher pflicht und bewegnis/ ernst-
lich und emsig auff sehen sollen haben/ uff Witwen/ Weßen/
und andere uberdrenckte¹⁷ personen.¹⁸ Sie vor gewalt und un-
recht zu verhuͤten/ und wu yhn etwas schadens/ von ymands
an leib oder gut tzugebracht/ die yene/ gestrenglich zustra-
ffen/ ßo den bedrengten injuriert haben.¹⁹ Disser artickell
A2^r wirt (gotwil) auch fuͤrgenomen/ alß eyner/ der warhaff-
tige und Christliche ordenung erhelt/ on welchen gott kein
gebeth/ ader vermeint gut werck ye gefallen hatt.

Gnediger her/ die weil aller welt ougen/ uff uns sehen/
unnd unßere werck unnd leben betrachten. Etliche vor-
bild und exempel tzehaben. Etliche nach reed tzu erden-
cken/ wie gottliche sachen ye und ye nach reed gehort haben.

Demnach/ wyl ich E'uer' g'naden' von den tzweyen letzten arti-
ckeln Christliche ursachen (auß gottlicher und unbetryg-
licher schriffte genhummen) furlegen. Und antzeigen das
des Erbarn und achtbarn raths fuͤrnhemen eherlich/ und
gottlich ist/ dem alle Christen sollen nachvolgig werden/
ehere/ und lobe/ nachsagen. Den ersten artickell wie ehr
mir gefelt/ hab ich/ ym buchlin von dem Herlichen abend-
essen/ tzum teyll endeckt.²⁰ Drumb wil ich nicht von der
Evangelischen Messe ytzo schreiben. Und hoff die Christen
werden nit ein klein frucht aus diesen beyden artickeln scho-
pffen/ und das E'uer' g'naden' mein bereit und gewertig gemuͤth
E'uer' g'naden' nach meynem hochsten vormogen tzu dienen auch
durch diß tzuschreiben werden vermercken. Da tzu ich E'uer'
g'naden' geboten mich hiemit erbiet tzu unthergeben. Meinem
g'nädigen' hern Christoffelf²¹ wunsch ich alles gut durch Chri-
stum amen. Datum Wittenberg Montags nach
Conversionis Pauli²² ym xxii. Jar.
E'uer' G'naden' diener Andres Boden-
stein von Carolstatt.

Von abthuhung der Olgotzen.

i Das wir bilder in Kirchen und gots heußern haben/
ist unrecht/ und wider das erste gebot. Du solst nicht
frombde gotter haben.²³

ii Das geschnitzte und gemalthe Olgotzen uff den al-
tarien stehnd ist noch schadelicher und Teuffellischer.

iii Drumb ists gut/ notlich/ loblich/ und gottlich/ das
wir sie abthun/ und ire²⁴ recht und urteyl der schrifft geben.²⁵

A2^v Gots heuser/ seind heußer/ daryn got allein geeheret^e/
angeruffen/ und angebet soll werden. Alß Christus spricht.
Mein hauß ist ein hauß des gebets/ und ir macht ein gruben
der morder daraus.^f26 Betruͤgliche bilder ermorden alle ire an-
beter und breyßer²⁷/ alß geschrieben steht. Sie seind got fre-
mbd/ und voller schand beschutt/ und greuͤlich geworden
wie die ding/ welche sie gelibt haben/ Osee. ix.²⁸ Wir kon-
den ye nit leucken/ das wir die genante heyligen in die kir-
chen. auß lieb/ gestelt haben/ hetten wir sie nit geliebet/ ßo
hetten wir sie nit dahyn gesetzt^g/ do gott allein soll wonen
und herßen²⁹. Weren wir yhn feind gewest/ wir hetten sie mehr
geflogen³⁰ dan angenumen. Unser tath ubertzeuget uns/ das
wir bylder geliebt/ haben wir nit yhn die ehere ertzeigt^h/
die wir grossen hern ertzeygen und tzu messen? War umb
haben wir sie mit Sammot³¹? mit damast? mit silberin? mit
guldin kleydern lassen malen und ferben? warumb behencken
wir sie mit gulden kronen? mit edeln gesteynen?³² und tuhn
yhn das tzu ehren und lieb/ das wir unßern kindern/ wei-
bern/ eltern/ obirsten/ fursten unnd hern nit gern tetehnⁱ?
wehr kan uns nur glauben/ ßo wir sagen. Wir haben die
Olgotzen/ geschnitzte und gemalte bilder/ nit lieb? ßo uns
unßere geberde uberwyndten? Got hasset und neydet
bildnis/ wie ich sagen werd/ und achtet sie fur einen grauell.
und spricht/ das alle menschen in seynen ougen sollen sein/
wie die ding/ welche sie lieben.³³ Byldnis seind greulich.
volget/ das wir auch greulich werden/ ßo wir sie lieben.

Also wurgen sie yre anbeter oder eher geber.³⁴ Drumb
mogen unßere tempell billich morderß gruben genenth
werden/ das unßer geyst in yenen ertodt und erschlagen
wirt. Der Teuffell lone den Bepsten/ die uns alßo tot-
ten und wurgen. Ehs wer tausent mall besser/ sie stunden
yn der hell/ oder feurichten offen/³⁵ dan in gotis heußern.

Nhu hore furth eygenschafft und ursprungk des er-
bauten gottis hauß. Salomon sagt alßo. Dein hauß/
o gott/ ist allein derhalben gemacht/ auff dastu ansehest
A3^r das gebeth deynes knechts/ und annhemst die bitth/ ßo
ehr vor dir außschutt/ und thuest deyne ougen tag unnd
nach〈t〉 auff uber das hauß/ darin deyn nham soll angerufft
werden. ii. Parali. vi. 3. Regum viii.³⁶ der gleychen stuck
ertzelt Salomon vil/ die gott eyniglich sollen tzugeaygt³⁷
werden. Das ich mich in sonderheit vast verwunder.

Wie got unser grosse boßheit hat gedult und erliden biß her.

Sih gottis hauß ist derwegen gemacht/ das got allein/
in dem selben soll herschen/ und seyne ougen alß ein helffer/
uff unß notdurfftige^j auffthun sall. Item das got allein
angebett soll werden. Item das gottis nham allein soll
angerufftt werden. Ich wolt gern sehen/ was wir den
warhafftigen Christen konten antwurten/ oder den Juͤ-
den/ die verstand der Biblienn haben/ aber gott/ dero
uns seyne laher durch den heiligen geyst geben hat/ wan
sie oder ehr fragten. Wie bistu ßo durstigk³⁸/ dastu bilder
und Olgotzen in mein hauß lassest stehn? Wie darffestu
ßo kun und keck gesein/ dastu dich in meynem hauß kegen
bildnis neygest und buckest? welche mensche hende ge-
schaffen haben? Dieße ehere steht mir tzu. Du tzundest
yhn lichtlin an. Und du soldest mir das thun.^k So du ye
licht wilt brennen oder bornen³⁹. Du brengest yhn wich-
ßen⁴⁰ opffer⁴¹/ in gestalt/ deiner krancken bein/ arm/ ougen/
kopff/ fuͤeß/ hend/ kuͤh/ kelber/ ochßen/ schyff⁴²/ hauß/ hoff/
ecker/ wißen/ und der gleichen/ gleich alß hetten dir solche
bildnis gesunde bein/ arm/ ougen/ kopff etc. gemacht/ oder
hetten dir ecker/ wißen/ heußer/ ehere/ gut und hab bescheert.

Alßo bekent yr fromde gotter. Ich mach euch gesund.⁴³
Item.^l Ich hab sie ernerth/ und in meinen henden
getragen/ und sie haben nit gewist/ das ich sie gesund ge-
macht und yrer sorg ertragen hab. Osee. xi.⁴⁴ Ich hab
sie erlost/ und sie haben luͤgen wider mich gereht. Ich hab
sie gelereth und yre arm starck gemacht/ und sie er-
dichten boßheyten wider mich. Osee. vii.⁴⁵ Ich hab
sie ernereht und hochgemacht/ aber sie verachten mich.

A3^v Ochs^m erkand seinen besitzern/ und der langsam Esell die
krippen seines hern. Aber Israhel (das ist mein volck)
kond mich nicht/ und mein volck versteht nit was ich ym
guts gethan hab. We dem sundige volck etc. Esai. i.⁴⁶

Ich kan nit leucken/ ich muß bekennen/ das got in allem
rechten/ wider unßere vermeinte Christen magk sagen/
das ehr tzu den Juͤden gesagt. Dan sie lauffen tzu den Ol-
gotzen/ wie kreheln und raben nach einem Oße⁴⁷/ und tzu einem
toden schelmen⁴⁸ flihen⁴⁹. Sie suchen sie in sunderlichen stellen.
alß in der Marck⁵⁰/ ym Grymtalh⁵¹/ tzu Rom/ und der gley-
chen. Brengen yhn schyff⁵²/ silber/ golt/ wachß und gut/ alß
yren gottern/ die sie erloset haben/ die sie verhutt haben/
und seind vil blinder den der Ochß tzu Leiptzig⁵³/ oder Esell
tzu n. n.⁵⁴ die doch erkennen was und von wem yhn
guts geschicht. So ruffen sie Olgotzen an/ in gotis hauß
und suchen gesunheit/ hilff/ unnd rath/ von unsynnigen
narren. Und schmehen got alßo in seinen haus/ dass ein
wichtige gnugsame ursach wer/ sie auß den kirchen tzu
schleppen. Laß eß was sein/ das maniger sein kappen ab-
nimbt/ die ehr auffbehielt/ wan seyn geschaffner got nit
ym weeg wer. Ich achts nit gering/ das sie knye bigen
vor den heiligen. darvon wirt volgend gesagt.

Das. ehrliche halthung der bildnis. wider das erste gebot
ist/ sol keyner von mir/ sonder auß der schrifft lernen. Exo.
am xx〈.〉 steht alßo geschriben. Du solt nit frombde gotter
haben.⁵⁵ id est. Du solt gottis guͤtikeit/ hilff/ gnad/ barm-
hertzikeyt und endthaltung⁵⁶/ nymand anderß/ dan dem
gerechten got tzu erkennen. Das lerne durch eyn exempell〈.〉
Got hat die Juden aus Aegypten gefurt/ und aus dem
kerker der dinsparkeitⁿ erloßet⁵⁷/ die selbige gutheit solten sie
keinem frombden got tzu gemessen haben. Aber sie machten
yen ein kalp/ und sagten. Das seind die gotter Ißrahel/
welche dich aus Aegypten haben gefurt. Exo. xxxii.⁵⁸

Das kalp waß ein frombder got/ das die Juden nit hett
erloßet/ und sie sprachen doch. Eß hette sie aus egypto gefurt〈.〉
A4^r Szo machen alle menschen frombde gotter/ wan sie emp-
fangen woltath ymand anders tzurechnen/ dan dem war-
hafftigen got. Das ist/ des sich got yn der schrifft vil malß
beklagt/ wie ich oben gesagt hab. Das ist das got Ißrael
furwurfft/ das sie yenen⁵⁹ einen konig erwelten i. reg. 8. Osee. 13.⁶⁰
¶ Eß kan ym eyner eynen menschen tzu eynem frombden got
machen. Eß kan sich ym eyner selbst fur eynen frombden
got auffwerffen/ alß geschriben steht. Vermaledeyheitt
ist dero/ welcher hoffenung yn eynen menschen setzet/ und
macht starck seinen arm. Widerumb gebenedeyheit ist
dero in got hofft/ welches hoffenung der her ist. Hiere. 17^o.⁶¹
Das ist eyn ursach das sich Propheten offtmalß bedingen.
sagende. Ich werde kein hoffenung uff meinen bogen setzen〈.〉
Mein schwert wirt mich nit selig machen.⁶² Ir solt nit
in die fursten vertrauhen⁶³/ das thun sie derhalben das sie keynen
frombden got wellen machen/ das sie keyn bild yn yrem
hertz wollen haben/ sie wollen den allein bekennen/ der un-
verbildlich ist. Dan gott kanß nit leyden.

Der wegen saget got bald darnach (alß ehr das gebot
gab. Du solst nit fromde gotter haben) Du solst kein ge-
schnitzte oder gehauben⁶⁴ bild machen. Du solt kein gleich-
nis machen/ das oben/ ym hyemel ist/ oder das unthen
in der erden ist/ oder das ym wasser ist. Du solst sie nit
anbeten. Du solst sie nit eheren. Ich byn dein gott/ ein
starcker und rachsamer gott/ ein eufferer/ dero boßheiten
der vetter in yren Sonen strafft. Exo. xx.⁶⁵

Sih/ wie got allerley bilder verbeut/ darumb das men-
schen leychtfertig seind/ und gneigt/ sie antzubeten. Der
halben spricht got/ Du solt sie nit anbetten/ du salt sie auch
nit eheren. Damit verbeut got alle ehererbittung/ und
bricht der Papisten schluffwinckell/ welche alletzeit durch
yre behendigkeit/ der schriff gewalt thund/ und machen
schwartz/ das weiß ist/ boß das gut ist.⁶⁶ Ob einer dorfft
sagen. Ja ich bette die bilder nit an. Ich thun in nit ehere
von yren wegen/ sonder von der heiligen wegen/ die sie be-
A4^v deuten. Antwort gott kurtzlich und mit lichten worten.

Du salst sie nit anbetten. Du salst sie nit eheren. Gloßiers
wie du kanst/ du salt sie stracks nit anbeten/ du salst kein
knye vor yhn byegen/ du solst kein licht vor yhn antzun-
nen. Wan ichs haben wolt. spricht gott. dastu mich/
oder meine heiligen/ solst in bildnis eheren/ ich wolt dirs^p
nit verbotten haben/ bildnis und gleichnis tzumachen.

Nhu wil ich beweißen/ das Christen bekennen mussen〈/〉
das sie yren Olgotzen ehere geben. Ursach. das sie vor ye-
nen (von wegen/ der vorstorben heyligen menschen) sich
krumen und biegen/ damit wil ich vestiglich beschlißen/
das sie/ den bilden ehere ertzeigen. Dan wan ich einem Mar-
schalck ehere geben teht/ von wegen seines fursten/ ßo eheret^q
ich yhn und seinen fursten. Den diener als einen furst-
lichen diener/ und den fursten tzuvor an. Ehs kan^r auch
keiner leucken/ das im/ alß einem diener/ eygen ehere beschicht.
Alßo wen ich ein bild ehre von gottis wegen/ ßo ehere ichs
doch warhafftiglich.^s Das got verbotten hat.

Nhu wil ich ferner fragen. Ist das ein kleine ehere/ das
wir bilder/ heyligen nhennen? Wen wir uns recht endsin-
nen welten/ wurden wir befinden/ das wir/ der warhaff-
tigen heiligen/ ehere/ nyder biegen thun/ und legen sie auff
yre betruͤglich bildnis/ darumb nhennen wir bilder/ heili-
gen/ und geben yhn alßo heiligkeit.

Ferner. Keiner kan verneynen/ dan das ein groß ehre
ist/ auff den altaren tzu stehn. Ja der Babst achts fur ein
solche ehere/ das ehr keinen frumen Leyhen gestatt/ uff einem
altar tzuligen oder stehn. Ehs ist warlich vil/ und hoch-
lich eheren/ wan du yemand do hin stellest/ da der leib Chri-
sti gehandelt ist/ da got allein soll angeruffen werden/ das
got tzu sonderlichem lob/ tzu eygner ehrerbittung auffge-
richt ist.

Die altahr seind der halben erfunden/ das man uff yhn
gottis nhamen soll anruffen/ yme uff yhn allein opffer/ und^t
B1^r ehere geben soll. Szo hat Nohe seinen altar gebauwett
gene. viii.⁶⁷ Szo Abraham gene. xii.⁶⁸ Szo Moyses. Exo.
xvii.⁶⁹ Szo hat got ursachen der altharien angetzeigt. Exo.
xx.⁷⁰ Das sein nhom gebreist/ und ym opffere sollen geben
werden/ die eyner ye opffern wolt. Disse ehere. geben wir
den olgotzen/ wan wir sie uff althar stellen und vor yen⁷¹ lich-
tlin antzunnen. Wan wir sie anruffen/ umb irer heiligen
willen. Alles das wir uff altharien handeln/ sollen wir
gott thun. Deu. xxvii.⁷² Drumb ists ye nit muglich. das
wir sie uff den altharien haben/ und wollen leuken/ das wir
sie nit eheren.

Die weill nhun altarien/ yn anruffung des nomen gottis
yn sonderheit auffgericht seind/ ists vill teuffelischer/ das
man der heiligen bilder uff altharien stellett/ dan an meu-
ren⁷³ nagelett/ wie der ander artickel⁷⁴ ob meldet.

Gregorius der Bapst/ hat seiner bebstlicher artt nit
vergessen/ und den bildern die ehere geben/ die got seinem
wort geben hat/ und spricht/ das bildnis/ der Leyhen
bucher seind.⁷⁵ Ist nit das eyn recht Bepstlich laher.
und teuffelisch tzugebung? Das die schefflin Christi ver-
botten und betrugliche bucher oder exempel mogen gebrauchen〈.〉

¶ Christus spricht〈.〉 Mein schefflin horen meine stuͤm.⁷⁶
Ehr sagt nit. Sye sehen meine/ oder der heyligen/ bilder.

¶ Gott spricht. Meine schefflin/ seind schefflin mei-
ner weyd/⁷⁷ das ist meiner laher/ nit meiner bilder.

¶ Moyses spricht. Ihr solt eure kindern gotis wort
von yugend auff leren.⁷⁸ ¶ Aber Gregorius spricht. Die
Leyhen sollen bilder gebrauchen/ fur bucher.⁷⁹ ¶ Sage
mhyr lieber Gregori/ oder laß mirs ymand sagen. Waß
kunden doch Leyhen auß bildern guts lernen? Du must ye
sprechen/ das man eytel fleischlich leben und leyden darauß
lernet/ und das sie nit weider furen dan yns fleisch/ ferner
mogen sie nit brengen. Exemplum/ Auß dem bild des
gecreusigten Christi lernestu nicht/ dan das fleischlich ley-
den Christi. wie Christus seine heubt geneigt/⁸⁰ und der-
B1^v gleichen〈.〉 Nhu sagt Christus/ das sein eygen fleisch nit nutz
sey/ sonder das der geist/ nutz sey und lebendig thun machen.⁸¹
Szo spricht auch Petrus. Das Christus/ worte hat ge-
habt/ des ewigen lebens und gaistes.⁸² Dieweil nun dye
bilder stum/⁸³ und taub seind/ konden weder sehen noch ho-
ren.⁸⁴ weder lernen oder leren. und deuten/ auff nichs anders
dan uff lauter und blos fleisch/ das nicht nutz ist. Vol-
get vestiglich. das sie nicht nutz seind. Aber das wortt
gottis ist geystlich/ und allein den glaubigen nutze.

Drumb ists nit war/ das bilder/ der Leyhen bucher seind.
Dan sie mogen kein seligkeit aus yhn lernen/ und gar nichts
aus bildern schepffen/ das tzu der seligkeit dienet/ oder tzu
Christlichem leben notlich ist. Ich welt nit groß nemen⁸⁵
und den bildern soliche ehere tzumessen/ die Gregorius sey-
nen olgotzen tzulegt. Ich mercke aber/ warumb die Bebst
soliche bucher den Leyhen fur gelegt haben. Sye haben
vermerckt/ wan sie die schefflein/ yhn die bucher furtten/
yhr grempell marckt wurd nichst tzunhemen. Und man
wurt wellen wissen was gotlich oder ungotlich. recht oder
unrecht ist. Paulus spricht. Das wir yhn der laher
Christi sollen bleiben⁸⁶/ ßo rumett sich Christus das er sei-
ne Jungern seines vaters sermon gelert hab. Joan. xvii⁸⁷
Sye haben keynes bildes nye gedacht.

Christus spricht auch/ das die warheit letig macht und
seine Junger macht. Joan. viii.⁸⁸ Das kan kein bild thun.
Drumb ists gleich ßo vil gesagt. Bildnis seind der Ley-
hen bucher/ alß hette er gesprochen: Die Leihen sollen kein
Junger Christi sein/ sollen auch nymer frey werden vons
teuffels panden/ sollen auch nit in gotlich und Christlich
weßen kumen. Paulus der leret auch/ das wir kein ge-
meindschafft mit den solhen⁸⁹ haben/ die bildnis eheren. i. Cor.
v.⁹⁰ und spricht noch eines. Ir solt die bilder nit eheren. Ir
solt flihen vor ehererbietung der bildnis .i. Cori. x.⁹¹ Sih wie
Paulus eere erbietung der bilder hasset/ und wie wir nichts
gemeine mit denen sollen haben/ ßo bilder eheren/ ap sie die sel-
be gleich nit anbetten.

B2^r Ja sagen sie. Paulus spricht/ das bilder nicht seind .i.
Co. viii. Wir wissen auch wol das sie keine gotter seind/ und
das nur ein got ist.⁹² Antwort. Wolt got/ das/ das die ye-
ne hertzlich wisten/ die bilder fur⁹³ bucher gebrauchen/ das
ich nit glauben kan. Horestu aber ouch nit/ das Paulus
spricht das wir flihen sollen/ vor eher erbitung der bilder?⁹⁴

Weistu nit/ das Paulus spricht/ die solche ding thun/
die werden nit selig.⁹⁵ Wie kanstu Leyhen selig machen/
wan du bildnis/ diße ehere gebst/ die got seynem wort allein
hat geben? Wan du sie in der stell haldest/ darynne gott
allein soll geeret und angeruffen werden? Ich wil dir
dein hertz/ o Pfaff/ o Monich/ bald ruͤren/ und beschlissen.
dastu an bildern klebst/ und hast eynen warhafftigen abt-
got an dem bild〈/〉 das menschen hende gemacht haben.

Jetzo solstu endlich auch das eynnhemen. Das ich gar
nicht rhaten kan/ das sich die tod krancken an geschnitzte
oder gemalt Crucifix haltenn. Ursach/ das sie tzu⁹⁶ nicht
dienen/ wie gesagt/ und konden den krancken nicht weider
brengen/ dan an fleischlich leyden Christi/ das tzu nicht nutz
ist/ als Christus selber spricht/ das fleysch ist nicht nutz
Joan. vi.⁹⁷ Daß gefelt Paulo nicht〈/〉 dastu Christum nach
dem fleisch erkennest. Drumb spricht ehr. wir kennen Chri-
stum nit nach dem fleisch.⁹⁸ Aber unßer bildpreißer wellen
den leyhen Christum ym fleisch tzuerkennen geben/ das nicht
nutz ist. sie wellen lieber leren. wie Christus gehangen hat.
dan warumb er gehenckt ist. Seinen leip/ bart und wunden
leren sie. Die krafft Christi leren sie gar nit. On die krafftt
Christi wirtt nyemand selig. On leyplich gestaltt Christi
werden vil taußent selig〈/〉 das fur eins. ¶ Fur das ander
sag ich〈/〉 das bilder ingemein/ verboten/ und Propheten wider
bildnis gepredigt haben/ Ab〈ak〉uck^u .2. spricht got: Weh dem
dero tzu dem holtz spricht. Wach auff. Und tzu dem
stilschweigenden stein sagt. surge. stehn uff. Wie kahn
ein holtz oder stein lerenn? Ehr ist woll mit silber oder
golth getzyrtt/ aber keyn geyst ist yhn yhm. Abakuck ii.⁹⁹

B2^v Sih da/ wie got die yene/ mit we und we besprengt/ die tzu
eynem holtz sagen.¹⁰⁰ Wach uff. Das ist bald¹⁰¹ gesagt〈/〉 wan du
andacht tzu eynem holtz hast. Auch spricht got: We/ dem
dero spricht tzu eynem steyn. Steh uff/ das ist/ kum mir
tzu hilff. Das sagen die narren tzu den todkrancken menschen〈/〉
wan sie yn tods stricken tzappeln. Sagende: Sih da nim
den hern Jesum yn deine hende.¹⁰² ¶ Abakuck spricht. eß
ist kein geyst in dem bildnis.¹⁰³ Wan got auffgeht ßo fallen alle
bildnis. Wa bilder sitzen/ da kan got nit sein. alß Michee
am .v. geschriben steht. Ich werde eure bildnis/ in eu-
rem mitell verderben/ yhr solt nicht mehr anbeten/ das
werck eurer henden.¹⁰⁴ Czu dem dritten. wan ich gleich
bekennet/ das bildnis erleubt weren/ das doch keyn Crist
kan bekennen. Doch¹⁰⁵ ist kein trost/ dan¹⁰⁶ in dem wort gotis.
darin der gerecht lebendig gesund und selig wirt. Drumb
ists unvergleichlicher weiß mer/ das du einem beide evangelien
fuͤrsagest/ welche der her tzur letzt/ und vor seinem tod geben
hat. Nemlich dastu eynem krancken vorsagest inhalt und
meynung dißes trosts. Mein leip wirt fur euch gegeben〈/〉
Mein bluth wirt fur euch yn vergebung der sunden ver-
gossen.¹⁰⁷ Disse evangelia haben eynen lebentigen geyst. Das
bild¹⁰⁸ Christi hat nichts dan holtz/ stein/ silber oder gold
und der gleichen.¹⁰⁹ Fur das viert muß ich den Gregeri-
sten¹¹⁰/ Bischoffs Epiphanii¹¹¹ tath furwerffen/ welcher vor-
tzeiten Hieronymi/ ein tuch auß der kirchen genomen hat〈/〉
Drumb das ein bild eines heiligen oder gecreutzigten Christi
wider verbot der schrifften/ dar ein gemalt waß. Darab
ist wol tzu mercken〈/〉 wie die frumen Christen bildnis vor tzei-
ten gehaßt haben/ und auß den gots heußern verweist haben.

¶ Epiphanius ist kumen gen Anablatha¹¹² und do selbst in die
kirchen gangen/ und hatt eynen furhanck in der thur gesehen〈/〉
geferbt und gemalett/ der eyn bild gehabt hat gleich alß
Christi oder eynes heiligen. Ehr spricht das ehr nit eygen-
lich wiß/ weß das selbige bilde gewest sey. Doch hat erß
nit yn der kirchen wollen leyden/ drumb das wider die sch-
rifftt yn der kirchen hing/ derhalben tzuschneid er den furhang〈.〉

B3^r Das steht in buchern Hieronimi geschriben Tomo .3. fol.
Lxx3. l'ite'ra c.¹¹³ Sih/ ap ich tzugobe/ das Leyhen ehtwaß
nutzes und seligbarlichs aus bildern kondten lernen. Dorfft
ich doch das mit nicht¹¹⁴ gestaten/ wider verbot der schrifft
und wider gotlichen willen. Die schrifft spricht klarauß〈/〉
das got bilder hasset und neydet/ welche papisten/ bucher
nennen. Ich frage dich. Wan du eynem bilde aus hertzen
feynd werest/ und mogest eß weder sehen noch horen/ wie
wol wurd eß dir gefallen/ wan dich eyner yn eynem solichen
hessigen¹¹⁵ und greulichem buch wolt lernen erkennen und dich
ehren? Du wurdest one tzweiffel mich/ mit dem buchlin
oder bild/ hassen und flihen/ wan ich dich in dem welt eren〈/〉¹¹⁶
dastu verbeutest/ dastu hassest/ dastu fleugest. Nu spricht
gott〈/〉 das ehr keyn bild mag leyden/ das wir machen/ und
das ehr alle die yene neyde und haß/ die bilder lieb haben/
wie obberurt ist. Und Esaias schreibt .c. xl2. Sie sollen
mit schanden geschmacht werden/ die dem bilde vertrauhen.¹¹⁷

Sih got ließ ein bild machen eynes brandes.¹¹⁸ oder schlan-
gen/ das waß ym nit gleich/ waß auch tzu nicht anders
auff gericht/ dan das die/ ßo von den schlangen gebissen
oder verwunt waren/ das selbe bild solten ansehen/ auff das
sie gesund wurden. Numeri .xxi.^v119 Das bild gab got selber
und waß nit von menschlichem hirn auffgericht/ ydoch lo-
bet die schrifft den konig Etzechiam .4. reg. xviii. das ehr
die selbe schlangen abthett/ darumb das yhr/ die Juden
opfferten.¹²⁰

Unßere bilder haben keynen ursprung von gott/ ya sie
seind von got verbotten. noch¹²¹ wellen wir sie verteydigen/
Unangesehen/ das sich vil arme menschen an yenen besche-
digen/ und verletzen/ die lichte¹²²/ und pfenig opffern/ und
biegen sich/ und thund yre heubter vor yhn endblossen.

Noch dorffen wir die olgotzen und bilder verteydigen/ yn
den kirchen behalten/ und die arme einfeltige schefflin gotis
lassen verderben. in solichem greulichem myßbrauch. Und
wellen sie ehren als^w bucher.

B3^v Drumb muß ich weidersagen von unutzikeit der bil-
der/ Idoch alles wie die schrifft meldet/ dan ich beger nit〈/〉
das yemandt auff mich bauhe/ oder mir gleube. Ja der
teuffell danck dirs/ wan du mir gleubest/ oder auff mich
fussest. Kere dein oren und augen auff die schrifft. welche
alßo saget. Die scheffner¹²³ des bildes seind nicht/ und das
allerkostligist und allerliebstes ist nicht nutz yn yhn.

Sie seind selber getzeugen yrer bilder/ das sie nicht sehen/
und nichts versteend. Esaias .xliiii.¹²⁴ Hye mercke du
abgottyscher unchrist/ das der schaffner/ eynes byldes
nichts ist/ und das ir allerbestes zu nicht nutz ist. Ja gewiß
seind sie nicht nutz zu der seligkeit. Du must selber bekennen〈/〉
das du keynen bild macher wilt fragen/ was dir tzu der seli-
keit nutz ist/ yhn dem〈/〉 dass ehr eyn bildmacher ist. Wye
ist den der bapst Gregorius ßo kecke/ das er darff sprechen.
Bilder seind der Leyhen bucher?¹²⁵ Wan yre meyster unß
nit konden leren. was uns nutz ist tzur seligkeit? Sih yre
meistern sehen/ horen und versten/ und geben tzeugknis
das yhre bylder weder sehen/ noch horen/ noch verstandt
haben. Und du wilt/ und solt/ die bildmacher/ nit fur
bucher haben. Wie darffestu dan bilder fur bucher halten?^x
Wie konden dir bilder nutz seyn alß bucher?

Wehr kan leucken/ das bucher nutz sein? nyemand. Wer
darff sagen/ das bilder nutz seind. wan yre bildmacher
unnutz seind? nyemand. Nhu will ich kurtzlich beweißen
das auch bilder yhn sich selber unutz seynd/ alles durch.
Esaiam .xliiii. Der ein Ewangelischer Prophett ist.

Esaias spricht alßo. Wer hat got formirt oder gemacht
und das geschnitzte bilde tzesamen geplaßen? das tzu nicht
nutz ist. Nymb war¹²⁶〈/〉 alle teylhafftige/ und gesellen der
bilder/ werden beschempt. Sie werdenn alle sampt tzesa-
men komen/ und sich forchten/ und ehrschutt¹²⁷ werden etc.¹²⁸

Und meldet ferner^y vast spottlich und spitziglich/ wie
die Olgotzen gemacht werden/ und tzu nicht nutz seyn.

¶ Das kan ich auch nit verschweygen. Das gott knye
bigen/ kruͤmen/ und buͤcken/ nit kan leyden/ welchs wir
B4^r den Olgotzen ertzeygen. Gott spricht alßo durch Esai.^z
Der bildmacher macht eyn bilde/ und kruͤmet sich vor
yme. Er kruͤmet sich vor yme und bettet eß an/ und sa-
get. Mache mich letig/ erlose mich/ dan du bist mein got.¹²⁹

Alßo haben sie vergessen/ das die augen der bilder nicht
sehen/ und das sie in yrem hertze nicht verstehnd/ und be-
dencken nicht/ das sie vorgesagt haben. Ich hab die helffte
des holtzß verbrand/ davon ich dießen got gemacht hab.
Und hab mit der selben helfft/ des baumeß/ mein fleisch
gekocht/ und den offen eyngeheytzt. Von dem andern teyll
hab ich dißen abtgot gemacht. Vor dem klotz dißes holtzß/
wil ich nyder fallen.¹³⁰ Am ende des selbe capitelß spricht
gott. Ich bin der her/ welcher alle ding tueth/ und nye-
mand mit mir. Esai .xliiii.¹³¹

Hett ich weil und raum/ gern welt ich Esaiam han-
deln/ aber kurtz halb/ wil ich vom ende anfahen/ und tzu
dem anfangk kumen/ und damit tzu angefangner mate-
rien wider keren. ¶ Sih und mercke wol/ das bilder in
kirchen/ wider das erst gebott seind. ¶ Unnd das gott
mit nicht magk dulden/ das wir eyne creatur nebent yen
stellen. Drumb beschleusset ehr alßo. Ich byn der her/
welcher alle ding allein macht/ und keyner mit mir.

Das solt/ yhr heylige fresser/ eben mercken/ das got al-
lein alle hylff tueth/ und keyner mit ym/ oder nebend ym.
Das muß ye war sein (soll anders die warheit war sein)
das unß kein creatur/ nebend gott/ hylffet. Nhu sage
mir du Olgotzischer anbeter oder eeregeber/ wan dir Hei-
ligen nit konden helffen/ was konden dir yre betruͤgliche
bilder helffen? Du wilt den heyligen ehere thun in bil-
dern/ und gleich die ehere/ die sie in yrem leben geflogen
haben und verbotten. Sie haben ym leben nit mogen
leyden/ dastu yhn opffer gebest/ oder sie anruffest/ alß Pe-
trus spricht. Eß ist nur eyn nhom unther den menschen/
in welchem yr must selig werden. Acto. iiii.¹³² Ist nur ein
nhom/ warumb machestu (Olgeck¹³³) vil nhomen unther
den menschen/ in welchen du seligkeit verheischen thuest.

B4^v Weystu nit das sie Petrum ansahen und verwunderten
sich/ und Petrus sprach. Ihre menner. waß verwundertt
yhr euch? und warumb seht ir uns an? alß hetten wir das
aus unßer krafft und macht getan/ das der lahm wandelt.
Wir haben den selben/ durch vertrauhen yn den hern Jesum.
welchen der got Abraham Isaac und Jacob gesendt hat.
gesund gemacht. Acto. 3〈.〉¹³⁴ Sih du kugilichster¹³⁵ und veist-
er bildemacher/ das Petrus ym leben verbotten hat/ dastu
ym nach seinem tod darffest tzu messen. Weynstu¹³⁶ das er
itzt unß ein andere laher wurd geben/ und wider die/ die
ehr uns ym leben hat geben? Du bekendest das ehr aus dem
heiligen geist alhie geredt und geleert hat/ war aus leret ehr
ym tod? Petrus spricht〈/〉 yhr solt unß nit ansehen.¹³⁷ Ja/ hie
antwerstu bald. Wir sollen bilder nit ansehen eß¹³⁸ tetten sie
etwaß aus eygner krafft.

Aber hoer zu. Wolt got das du war sagest. und dastu nit
eynen eigen olgotzen hettest/ welcher yn grosser macht bey
dir ist. Was wiltu aber tzu dem Pachantten vers¹³⁹ sagen〈.〉
Christoffore sancte virtutes sunt tibi tante/ qui te mane
videt de nocte ridet oder vivet.¹⁴⁰ Sage mihr wie vil tau-
ßent menschen ein tzeitlang sanct Christoffels bild/ der hal-
ben/ angsehen haben/ das sie vor dem gehen¹⁴¹ tod behut wur-
den? und auff den abend frolich mochten leben? Haben die
selbe nit yn yrem ansehen des gemalten Christoffels grosse
hoffenung und trost gesetzt?

Du solst von des ergernis wegen/ im glauben/ rathen/ das
alle bilder tzu dem Teuffell geschlept weren. Sih nu/ ap
die selbige/ sanct Christoffels bilde. nit fur eynen got achten〈.〉

Du must mir auch tzugeben/ das vil Leihen/ der massen
yn andern bilder/ mit trost und hoffenung hangen.

Heist nit solchs ansuchen/ anbeten? Lieber domine her. her.
ist nit das gesagt/ liebes bilde mach mich ledig? oder er-
loß mich? aber¹⁴² behuͤt mich vorm gehen¹⁴³ tod?

Sih du lessest gescheen/ das Leyhen vor den bildern S'ancti'
Pauli. Petri und Barnabi¹⁴⁴ .etc. licht antzunnen/ und ihn
opffer furtragen/ die sie. wie Pestellentz. ym leben geflogen
C1^r haben/ noch bystu der grob kluͤgell¹⁴⁵. Bystu der hochge-
larthe gesellh/ ßo byt ich frunthlich/ sag mir/ Ab Petrus
Paulus und Barnabas yhn eygner personen hetten mogen
dulden/ das wir sie uff altaren stellen? Du must Neyn und
Neyn sagen.¹⁴⁶ Warumb setzestu/^aa yhre verbotten bilder uff
altaren? welch sie ouch nit angenomen hetten. Mercke
auch lieber freund/ das kruͤmen und knihe biegen eere seind/
die du wider gottis willen den bildern ertzeigest. Alß in
obangetzeigten .xliiii. c. Esaie berurt ist.¹⁴⁷

Mercke ouch/ wie tolh/ nerrisch/ und unsinnig die seind.
die den bildern soliche ehere geben. Dan Esaias spricht¹⁴⁸.
Sie kruͤmen sich vor yren gotten. und biegen sich/ und haben
vergessen und verstend nit/ das yre bilder nicht sehen oder
horen. Sie verstend nit/ das sie spehn und holtzer von dem
klotz gehauen haben (welches sie fur eynen heiligen hal-
ten) und haben yre fleysch mit gekocht/ und yre dornitzen¹⁴⁹
oder stuben warm gemacht/ das wellen sie nit betrachten.

Drumb werden sie geschendt werden/ sich forchten/ und
bywen¹⁵⁰ und tzerschutten. O Wye ubel wirt eß den/ in tods
notten/ ergehn/ die an olgotzen also kleben/ die sich vor yn
kruͤmen und biegen. Eß wirt sie gar nicht endschuldigen/
das sie das/ den heiligen thuen/ got erkendt yre hertzen besser/
dan sie selber/ und wirt sie mit seinem wort ubertzeugen das
sie den bildern ehere gethan haben/ nemlich mit dyßem. Du
solst sie nit eheren. Exo. xx〈.〉¹⁵¹

Nhu kum ich tzu dem anfangk/ und nheme Esaiam/
welcher spricht: Sie seind tzu nicht nutze/ Esa. xliiii〈.〉¹⁵²

Bucher seynd nutze den leßern/ Volget das bylder keyne
bucher seind der Leyhen. Wider Gregorium und seyne
gantze geselsschafft.

Horend yre Gregoristen und Papisten/ was Etzechiel spri-
cht.^ab Wan sich/ eyner von mir kerett/ und setzet olgotzen
yn seyne hertz/ und kumet tzu eynem Propheten/ und fraget
mich durch yhn/ Szo wil ich yme durch mich selber anth-
worten/ und wil ihn tzu eynem exempel und sprichwort machen
C1^v und verderben/ vom mittell meynes volcks/ Etzech. am
xiiii.¹⁵³ Sih da olgotzischer preyßer/ was Etzechiel/ von
den bildern redet/ und vergysse beleib nit/ wan du eynen
olgotzen oder bilde yn deyne hertze nymbst (wie das vile
thund/ alß von sanct Christoffels bilde gesagt ist) das
dich got verderben wil und verdammen. und wil dir selbst
antworten. Jetzo antwort uns got durch seyne aygen
wort/ du solst nit Propheten besuchen/ wil aber yemant
yn dyßen tzeiten Doctores/ Magistros und Baccalaurios
umb soliche sachen anlangen/ und der stuͤm gotis nit wil
glauben one wanckell.¹⁵⁴ der hore was in xiiii. c. Etze. volget.^ac
¶ Der Prophet/ dero irren wirt/ den hab/ ich got und herr/
irren gemacht/ und wil yhn vom mittell meynes volcks
vertilgen.¹⁵⁵ Sih/ wie got beyde vertilgt den Propheten/
der irret und irren macht/ und den rathfrager/ dero eynen
solichen Propheten rathfraget/ darnach wisse dich tzerichten〈.〉

Wan eyner gottis verbott und willen weiß/ soll er stra-
cks dem selben nach volgen/ und weder Engell/ noch heili-
gen/ noch Propheten horen/ die yhn von gotlichem gebot
wellen tzihen/ ap sie gleich eynen scheyn hetten/ guter mey-
nung. Das die historien. 3. reg. xiii. mit lichten worten leret.¹⁵⁶

Got schicket seiner diener einen tzu dem Konig Hiero-
boam/ und gebot ym/ das er weder essen noch trincken solt.
Das verbot wisset/ der selbe Prophet oder man gotis Se-
meas.¹⁵⁷ Aber er ließ sich durch eynen andern Propheten. ver-
furen. Welcher sprach. Ich bin ein Prophet gleich wie du.
Und der engel gots hat mich angeret. Sagende. Fuͤr yen
mit dir yn dein haus/ auff das er esse und trincke. Das
dett Semeas/ und waß dem munde gotis ungehorßam.^ad
Derhalben ließ yen got tzerreissen von eynem Lauhen¹⁵⁸.

Sih wan wir wort des hern haben/ und wollen gotis
mund ungehorßam sein/ unnd uns durch einen andern
lassen uberreden und betrigen/ ßo mussen wir sterben. Ab-
gleich der uberreder aber¹⁵⁹ betrieger/ gestalt hat eines Pro-
pheten/ eynes engels/ eynes lerers/ eynes Christen/ welcher
dir Christliche woltat pflegen/ essen und drincken geben
C2^r wil/ und seyne woltat verhindert dich an gottlichem ge-
bot und wort/ salstu ym mit nicht volgen/ ab er gleych
ein dicker/ starcker/ veister^ae Monich und doctor wer. Vol-
gestu aber yemand von wegen seynes standes/ scheynes/
schoner wort/ und fruntlicher ertzeygung/ und felst alßo
aus gotlichem verbot/ mustu gewißlich sterben (wie Se-
meas) von dem Lauhen/ dero die welt umbgeht/ eynen
tzu suchen/ den er verschlincken mog.¹⁶⁰

Alßo erwurget got die Sone Aaronis Nadab und Abiu/
Drumb das sie frombde feur vor gott opfferten/ das yen
nit geboten was. Levi. x.¹⁶¹

Sih/ wan einer ein feuer antzundet/ das dem feuer des
hern ym weßen und hitze gleich was/ dannest wan eß fro-
mbd was/ straffet got/ die yene/ die solchs feur opfferten.

Demnach sag ich/ ab gleich bildnis antzeig hetten eynes
guten dingks/ dannest sollen wir sie nit leiden in den kir-
chen/ und unther den glaubigen alß Balam hat mussen
bekennen. Sagend. Eß ist keyn bildnis in Jaacob/ und
keyn olgotz in Israhel. Nume. xxiii.¹⁶²/ und Exo. xx.¹⁶³ offen-
lich außgedruckt ist. Derwegen sol kein Christ oder glau-
biger bilder annhemen/ dan er horet klerlich: Du salst kein
bilder haben. Des worts sall der glaubig leben^af/ und kei-
nen scheyn achten/ wie der selb gestalt oder nhamen haben
mogt.

Kumpt eyner und spricht/ bilder leren und untherwey-
ßen die Leyhen/ gleich alß bucher die gelarten. Antwort
du. Got hat mir bilder verboten/ der wegen wil ich nichts
aus yenen lernen.

Kumpt eyn ander/ und saget/ Bilder vermanen und eryn-
nern uns des hern leiden/ und machen offtmalß/ das einer ein
vater unßer betet/ und an got gedenckt/ dero sonste weder
betet/ noch an got gedecht. Antworte du mein Christe.
Got hat bilder verboten. Item. Christus spricht〈/〉 das got ein
geist ist. Alle die got worhafftiglich anbeten/ die beten got
ym geist an. Joan. iiii.¹⁶⁴ Alle die got in bildern anbeten/ die
beten jen^ag in^ah luͤgen an/ ym schein und eusserlicher antzeig ge-
dencken sie an got.

C2^v Das hertz ist aber fromde von got/ und macht ym ein eigen
olgotzen ym hertzen/ und ist voller luͤgen/ Alß Esa. xliiii.
spricht. Ir nerrisch und tolh hertze betet sie an/ und saget
nit. Ich hab ein luͤgen yhn meyner gerechten hand.¹⁶⁵

Eß kan auch kein Christ leucken/ das geistlich gebet/ eyn
gotlich werck ist/ das got allein wircket/ alß Hieremie 33.
geschriben steht. Ich werde yhn offenbaren gebett und
anbethung des frides/ und der warheit.¹⁶⁶ Das got alleyn
wircket. das kan kein bild wircken. Du darffest auch nit
sagen/ das dich das bild Christi/ tzu Christo breng. Dan
das ist ye war. Keyner kumpt tzu mir/ eß sey dan/ das
yhn mein vater tzihen thun.¹⁶⁷ Sie mussen alle gottis schu-
ler sein/ die tzu Christo kumen^ai. Joan. vi. und nit von bil-
dern vermant oder gelert werden tzu Christo tzekumen^aj.

Laß alle bilder auff erden tzesamen tredten/ dannoch ver-
mogen sie nit/ dir einen kleinen seufftzen tzu got tzegeben.

Wan ich ye eusserlich vermanung und erynnerung wolt
haben/ soltt ich die begern/ welche die schrifft antzeygt/
nicht die sie hasset und verbeutt. Alßo Ich solt vil lieber
wollen〈/〉 das ich in anfechtung und betrubtnis/ mit wagen
und pferde viell/¹⁶⁸ dan das ich tzu eynem bild quem/ auß ym
selige vermanung tze schepffen/ dan Esaias leugt nit/ das
bilde tzu nicht nutz seind/ Esa. am xliiii.¹⁶⁹ Sye muͤsszen aber
tzu etwaß nutz sein/ wan sie uns vermanen mochten/ und
yhn warhafftige gedancken tzu gott fhuͤren^ak. Das aber
betrubtnis eusserlich leret und vermand/ und macht das
wir got erkennen/ anruffen/ und anbeten. Leret die schrifft
sagend. Uberdrenghung und vexation gibt verstand.
Esaias am. 〈x〉xviii.¹⁷⁰ Du^al hast mich gestrafft und ich byn
gelert worden/ Hieremias am xxxi.¹⁷¹ Gott geysselt uns
und lerett uns/ alß eyn vatter seyne^am Sone. Prover. 3.
Hebre. 12.¹⁷² Gott wil das wir/ tzu ym schreyhen ym tag
unßers anfechten. Psal.¹⁷³

Gott wil aber nit haben/ das wir tzu yhm ruffen/ wann
wir bilder sehen/ ehr wil das wir sie hassen und fliehen.

C3^r Ihn dem tag/ ßo der her erhocht wirt/ werden die menschen
yre bilder weg werffen und sie fliehen. Esa. 2 und xxxi.¹⁷⁴
Michee am v.¹⁷⁵ Daraus volget/ das bilder ye nit bucher
seind/ auß welchen wir lernen sollen.

Das bildnis keyne bucher sollen genant werden/ kan eyn
Christ alßo verstehn. Bucher leren. Aber bilder konden
nicht leren/ alß Abakuck. am 2. saget〈.〉 Ist eß muͤglich das
ehr leren kan?¹⁷⁶ Das saget Abakuck von eynem steynerin
Olgaffen.¹⁷⁷ Daraus volget one wiederred/ das bilder keyne
bucher seind. Dan wan sie bucher weren/ oder solten das
leren/ das bucher thund/ ßo musten sie leren und unther-
weyßen. Darab kan meniglicher erkennen/ das Gregorius
der Bapst ye bepstlich/ das ist unchristlich gelerth hatt/
wan er den Leyhen bildnis/ fur bucher gibt.

Dye schrifft vergleicht bilder^an und olgotzen/ den puben^ao/ und
saget an vil enden/ das die gotloßen mit bildern bulen/ wie
huren mit puben. Ich muß grob und unnuͤtz seyn. aber
scheme mich nicht tzu reden/ wye die schrifft redet/ unver-
tzumpffen¹⁷⁸. Ich hab yr hertz tzerbrochen/ welches von
mir ging. und yre ougen tzerriben/ welche mit den olgotzen
bultten und bubten. Etzechiel am .vi.¹⁷⁹ Item du hast
dir bilder gemacht in mans gestalten/ und byst unkeusch
mit yhn gewest.^ap Das gold und das silber/ ßo ich dir/ tzu
deyner tzyhr geben hab/^aq hastu gebenn tzu^ar den bildernn^as/
sie darauß tzu machen/ und hast mit yhn gebuelth. Du
hast deyn kleyder genumen/ und hast sie mit den selben.
bekleydt und tzugedeckt etc. Etzechiel am .xvi.¹⁸⁰ Das
thun wir den narren/ die wir nit fur frombde gotter ach-
ten wollen. Wollen auch nit horen/ das^at sie unßere got-
ter seind. Wie wol uns alle welth uberwindet mit unßer
reed und tath/ das wir sie alß gotter halten/ mit nhomen
und ehrerbiethung. Dan das gecreutzigt bild nennen wir
eynen hergot/ und sagen tzeiten¹⁸¹/ Das ist der herr Jhesus^au/
wir thund ym auch soliche ehere/ alß wer Christus selber
da/ dartzu haben uns die heiloße Bepst/ unsinnige Mon-
C3^v nichen gebracht. Wir sagen auch/ Das ist Sanct Sebasti'an'
das S'anct' Nicklas etc. und der gleichen. Alßo nhennen wir
sie/ wie die ding/ ßo got liebet/ und uberweißen¹⁸² uns/ mit
unßer reed und tath/ das bilder unser gotter seind/ das un-
ßere bildnis seind mit welchen/ unßere augen bulen/ und
puben/ und ist ye war/ das sie alle sampt huren und ehepre-
cheryn sein/ die bilder eheren/ oder umb hylff ansuchen
aber¹⁸³ anbeten. Osee .ii. Etzech. am xvi.¹⁸⁴ (Alhie wolte ich
eyn weib/ des Teuffels huren/ wol betzalen, ader ich hoff
sie werde/ dem rathe des heiligen geyste volgig werden/
das ist eyn parenthesis〈/〉 damit ich sie fur das ander mall wil
gewarnet haben.)¹⁸⁵ Die Teuffels huren die yre silber und
gold/ tzu bildern geben (^avund darumb/ das man bylder in
kirchen/ aus dem mache/ das got yen tzu eigner tzirung geben
hat)^aw seind gleich die huren/ von welchen. Etzech. am xvi.
capitell schreibet/ wie oben vermelt ist.¹⁸⁶ Die manß bilder
machen/ und bulen mit yen/ bedecken sie mit yren kleidern
und tragen yenen kostlichen geruch/ brot/ wein/ bier/ tzu/
huner/ genß/ und pferd. Ja dar tzu yre Kinder/ und ire
krancke frunde/ tzu welchen got spricht. Meynestu/ das
disse buͤberey klein und gering ist?¹⁸⁷ Der gleychen haben
wir/ nit wenig schrifften/ welche die olgeckische anbeter
huren und eheprecheryn schelten/ und beschlyssen/ das
kirchen/ billich hurheußer sollen geacht werden/ ßo bilder
in yenen gestelt und geert werden.

Wie wol auch alle bilder/ menlich^ax alß. S'anct' Sebalds und
weiblich/ alß S'ancta' Urßal und Otilien/ aber¹⁸⁸ yr gleichen ver-
boten seind/ und sollen mit nicht eyngelassen werden/ wie
Deutro. am iiii. geschriben steht^ay189/ dannest nhenneth die
schrifft solige ehergeber der bilder huren und ehebrecher^az/
und soliche betrugliche bilder menner/ uff das wir lernen.
wie hoch und achtpar solich olgotzen sein/ in der hertzen/
die sie eheren und anbeten.

Das ist auch die ursach/ das gott ym ersten verbot ge-
sagt hat. Ich bin eyn eufferer. Exo. xx.¹⁹⁰ Ehr wil un-
ßer lieber man allein sein/ und das wir yen/ alleyn/ umb
C4^r hylff anlangen und biten sollen/ alßo Osee 2. vii.¹⁹¹ und an-
dere Propheten leren. Esa. i. und xliiii.¹⁹² etc.

Gott weiß sehr wol/ wie ferlich¹⁹³ unnd schedlich bilder
seind/ und wie wir in eynem augenblick^ba/ uns an yenen
vergreuffen/ darumb hat ehr vil malß bilder verbotten/
durch Moisen/ offtmalß durch seinen Propheten lassenn
verfluchen.

Eß hylfft dich keyn endschuldigung und außreed^bb/ ap¹⁹⁴
du tausent mall sprechest. Ich ehere^bc die genanten heiligen
nit in yrem nhamen/ sonder in der nhamen welche sie an-
tzeygen.¹⁹⁵ Ach du haylose hur/ meynestu das got dein her-
tze nit tiffer und mehr erkenn/ dan du? Wan got nit wisset
das ymand/ ßo leichtlich eynen abtgot kond machen/ das
er selber kaum fuͤlet. ßo hett got lassen geschehen^bd/ das wir
bilder/ yn frombden nomen ehreten. Behilff dich/ decke
dich/ und verkrich dich yn alle schlufflocher/ und glossir^be
deine tat/ wie du wilt und kanst/ du wirst dannoch gotlich-
em urteil/ und gericht nit endlauffen/ das bilder schlecht¹⁹⁶
verbeutt/ und alle die vermaledeyheit die bilder schnitzen
oder preissen/ oder sie bewaren und eheren. Deu. xxvii.¹⁹⁷

Nhun wil ich/ und sal den frumen Christen sagen/ das sie
alle abtgotter yn iren hertzen haben/ die sich vor bildnis
forchten. Und wil mein heimlich gedancken/ gegen aller
welt/ mit seufftzen/ bekennen/ und geb mich schuldig/ das ich
kleinmutig byn/ und weiß das ich keyn bild forchten soll/
und bin gewiß das got von den seinen fodert/ das sie sich
nit sollen vor olgotzen forchten/ alß geschriben steht. Ir
solt frombde gotter nit forchten/ nit anbetten/ nit ehern/
und solt yen nit opffern/ sonder allein got/ etc. Judicum vi.
iiii. reg. xvii.¹⁹⁸ Und weiß/ das got bey/ mir ßo klein ist/ alß
gros mein forcht ist gegen den Olfratzen. Dan got wil eyn
gantz und voll hertz inhaben/ und magk in keinen weeg ley-
den/ das ich eyn bildnis vor meinen ougen hab. Item
wan ich gott mit gantzem hertzen vertrau. Szo mueß
ich seyne feynde ye nit forchten.

C4^v Drumb spricht got/ aber¹⁹⁹ sein geist/ yn heiliger geschrifft.
Ir solt frombde goter nit forchten. Ir solt sie nit anbeten.
Ir solt sie nit eheren. Und untherweißet uns/ das bey sich
ein ding ist. Bilder tzu eheren. oder Bilder zu forchten. Der-
wegen soll ich kein bilde forchten/ gleich wie ich keynes soll
eheren. Aber (got klag ichs) mein hertz ist von Jugend auff
yn eher erbiethung und wolachtung der bildnis ertzogen
und auffgewachßen. und ist mir ein schedliche forcht einge-
tragen/ der ich mich gern wolt endletigen/ und kan nit. Alßo
sten^bf ich in forcht/ das^bg ich keynen olgotzen dorfft verbrennen.
Ich hette sorg der Teuffelsnarr mocht mich beleydigen²⁰⁰.
Wie wol ich die schrifft (an einem teylh^bh) hab/ und weiß.
das Bilder nicht²⁰¹ vermogen/ haben auch weder leben/ bluth/
nach geist. Idoch helt mich forcht am andern teyll/ und
macht/ das ich mich vor eynem gemalten teuffell/ vor eynem
schatwen²⁰²/ vor eynem gereusch eines leychten bletlins forcht/²⁰³
und flihe das/ das ich menlich²⁰⁴ solt suchen.

Alßo magk ich sagen/ wan man eynen bey den horen tzeugt²⁰⁵.
ßo merckt man wie vest seine hare stehnd. Hette ich den
geist gottis nit wyder die olgotzen horen schreyhen/ und
sein wort geleßen. Szo hett ich alßo gedacht. Ich hab
kein bild lieb. Ich forcht kein bilde. Aber itzt weiß ich/
wie ich yn dyßem vall/ kegen gott und den bildern stehn/
und wie vest und tieff bilder yn meinem hertzen sitzen.

Got woll mir sein gnad verleihen/ das ich die teuffels kop-
ffer²⁰⁶ (ßo gemeinlich heiligen in der kirchen genant seynd)
nit mehr/ dan stein und holtz/ forchten thun. Und got
geb/ das ich stein und holtz nit/ ym scheyn und nhomen
der heiligen ehere. Amen〈.〉^{207 bi}Sih Hiere. am x. a.^bi208

Auß obvermelten schrifften volget/ das Christen/ got-
lichem rath/ willen/ und gebott/ stracks nach volgen sollen/
und keyne bilder mher leyden. Unangeßehen den^bj althen
boßen gebrauch/ Pestilentzische laher der Pfaffen/ unnd
das sie bucher der Leyhen mogen seyn. Dan gott hatt
machung und behaltung der bilder verboten.

D1^r Und gott beklagt sich^bk senlich und schmertzlich/ das wir
bilder besuchen/ in kleyner oder grosser tzuversicht. Und
spricht/ das sie seyn gotßhauß unreyn machen und beflecken.
Hieremi. xxxii.²⁰⁹ Alßo haben wir der ersten beyden artickell
glaubwirdige urkund/ und unbetruͤgliche beweyßung/
nemlich getzeugknis des Heyligen geistes.

Der dritt artickell fleusset aus eyngefurten schrifften/
und steht in yren grunden^bl und felßen. Ich wil aber des
dritten artickelß sonderlich getzeugknis aus der schriefft
auch furen^bm.

Alßo solt yr yen thuen spricht gott. Deu. vii. Ire alta-
ren solt yr umbkeren/ und umbsturtzen. Ire bilder solt yr
tzebrechen. Ire linden²¹⁰ solt ir abhauwen/ und ire geschnitzte
bilder solt yr verbronnen.²¹¹ ¶ Wir haben keyne gottliche
altaren/ sonder heidnische oder menschliche/ alß Exo. am
xx.²¹² tzu vermercken ist. Drumb sollen Christen sie abthun/
nach inhalt der schrifften. Ungeacht das eusserliche ding
seind. Dan wan du got eusserlich wilt eheren/ oder yn Ce-
remonien ansuchen/ solstu seine ceremonien und seinem ge-
setz nachvolgen. ¶ Bilder sollen die Obirste auch abthun
und tzu der peen²¹³ richten oder urteiln/ datzu sie die schrifft
urteilett.

Ich hette auch gehofft/ der lebentig got solt seine ein-
gegeben werck/ das ist guten willen tzu abtuhung der bilder
voltzygen/ und yns eusserlich werck gefurt haben. Aber
eß ist noch kein execution geschehen/ vileicht derhalben/ das
got seinen tzorn uber uns last treuffen/ yn meynung seinen
gantzen tzorn außtzuschuͤden/ wu wir alßo blind bleiben/
und forchten unß vor dem/ das uns nicht kan thun.

Das weiß ich das die Obirsten derhalben gestrafft werden.
Dan die schrifft leugt ye nit.

Hetten aber unßere Obirste yren gotlichem rath und
beschluß volendet/^bn und die pubische und verfurische klotzer
auß den kirchen tzu geburlicher straffe/^bo gejaget. Musten
wir sie loben/ wie der h'eilige' geist Etzechiam²¹⁴ lobet. Welcher
bilder tzerriben/ linden abgehauben/ und das bild das got
D1^v gegeben/ tzerbrochen hat alß am iiii. Reg. xviii.²¹⁵ Welte
got/ das unßer hern weren/ wie die weltliche frumen Konig
und hern gewest sein/ in der Judenschafft die der h'eilige' geist
lobet. Sie haben ye in heiliger schrifft macht. yn kirchen
tzehandeln/ und abtzethun/ das gleubige ergeret und ver-
hinderet. Sie mogen auch die pfaffen/ in gotlichem rechte/
dringen und treiben/ betrugliche und schedliche ding auß-
tzefhuren. Das sihet yderman .iiii. reg. xxiii. geschriben/
nemlich alßo. Der Konig Josias/ hat dem Obirste ponti-
fex/ und den andern pfaffen geboten/ auff das sie alle vaß/
linden/ und der gleichen Baal auß wurffen/ und er verbrandt
sie außwendig²¹⁶ der statt Hierusalem.²¹⁷ Darauß sal yderman
mercken/ wie die pfaffen/ den konigen untherdenig sollen
sein/ auß gotlichem rechten. Derwegen solten unßere
Magistraten nit erwarten/ biß die pfaffen Baal/ ire geveß/
Klotzer²¹⁸/ und verhindernis anfahen außtzufuͤren. Dan sie
werden niemer mher anfahen. Die obirste weltliche hand
soll gebieten und schaffen. Leyden sie aber bilder/ mussen
sie horen/ das sie Judam irrenden und sunden machen/ wie
in gleichem valh Manasses gehort hatt. iiii. reg. xxi.²¹⁹ Und
ßo sie wurden sagen. unßere vorfarn haben sie eingesetzt/
wir wollen yrem weeg nach volgen. So spricht die schrifft.
Ammon hat ubel gethan/ wie sein vater Manasses/ und
ist in dem weeg gangen/ darinne sein vater ging. reg. eodem〈.〉²²⁰
Wie die muter waß/ alßo ist die tochter. Eure muter ist
ein Cethea. und euwer vater eyn Amorreus. Etzech. xvi〈.〉²²¹
Gott kan nit dulden/ das wir uns behelffen mit furwen-
dung. Wie unßere eltern gangen seind/ alßo wellen wir
auch gehn.

Etliche bildekusser sprechen. Das alhte gesetz verbeut
bilder/ und das neuwe nit. Aber wir volgen dem neu-
wen/ nit dem alten gesetz.

Liebe bruͤder behut euch got/ vor diesem ketzerischen ser-
mon und wort. und das ihr ye nit sprecht. Wir volgen
dem alten gesetze nit. ader nhemen eß nit ahn/ dan das
D2^r gehort den unchristen tzu. und bricht und verkleindt die
laher Christi. Dan Christus beweyßet seyne laher aus
Moise/ und Propheten. Und spricht das ehr nicht ko-
men sey/ das gesetz tzu brechen/ sonder tzu erfullen.²²² Ehr
hat auch seyne Junger gelert/ wie das er hab mussen leben
und leyden/ auff das die schrifften erfulth wurden²²³/ Chri-
stus hat ouch nicht den aller kleynsten buchstaben/ ym
Moyse verbrochen.²²⁴ Ehr hat auch keynen tzusatz/ und
keynen abbruch dem gesetz Moysi gethan.²²⁵ Kuͤrtzlich〈/〉
Christus hat nichts nyder gelegt/ das gott ym alten ge-
setz behagt hat. Christus ist im willen und inhalt altes ge-
setzes bestanden. Wer disse tzwen spruͤch tzesamen
fuͤgen kann. Nemlich. Fide legem antiquamus. Fide
vel gratia legem stabilimus.²²⁶ Der versteht Moysen Pro-
pheten/ Christum/ und Paulum. In dem artickell. das.
alth gesetze unpundig²²⁷ ist. Itzo ists tzuvil/ das tzu er-
kleren so weyß ich auch〈/〉 das mich die gesetz feinde nit versten
wurden. Drumb wil ich obgedachten kegenredenern/
alßo antworten. Lieber gesell/ du sprichst/ das alte ge-
setz verbeutt bylder. Der wegen wiltu yhn stadt gebenn
in gottis heußern/ und wilt soliches verbott gering ach-
ten. Warumb sprichestu nicht auch/ das wir Vater
und Muter nicht schuldig seyn tzu eheren/ weyl das ym
alten gesetz gebotten^bp ist? Mher todschlagk/ unkeus-
cheyt/ dyeberey/ unnd der gleychen myssetath/ seynd yn
den taffeln²²⁸ verbotten/ darynn bylde verbotten seynd/
Und verbott der bylder statt oben ahn/ alß das meynste²²⁹
und groste. Verbott der unkeuscheyt und dyeberey etc.
steht unthen ahn/ alß das mynder unnd kleynste.²³⁰

Warumb sprichestu nicht auch. Wir wollen. Ehe-
brecherey/ dyeberey/ morderey und der gleychen verhen-
cken/ und ynn kyrchen dulden/ der halben das ym althen
gesetze verbotten seynd?

D2^v Christus tzeiget dem das gesetz/ dero froget. Waß sol ich
thun/ auff das ich/ yn das ewig leben gehn?²³¹ Warumb
solt ich dich disses fals. auch nit in das gesetz Moisi fhu-
ren? Du sprichst. Esaias und Hieremias seind evange-
lische Propheten. und sie verbieten bilder/ warumb miß-
haget eß dir/ das sie bilde verbieten?

Ich sage dir das got bilder nit weniger/ noch mit kleyne-
rem fleyß verbotten hat/ dan todschlahen/ stelen/ rauben/
ehebrechen/ und der gleichen.

Endlich du must tzugeben/ das Paulus/ ein reicher pre-
diger ist/ des Evangelien und neuen gesetzs. Der die tiffe
Moysi erreicht/ und tzu lichte gebracht hat. Der Christ-
liche verheischung uber die massen trostlich verkundiget.
Du must auch volgende sagen. wan Paulus bilder verbeut〈/〉
ßo wil ich sie flihen. Nhu hoer. Paulus spricht. Sie ha-
ben/ des unsterblichen gotis/ glorien/ durch gleichnis nit
allein eynes toden mensches/ sonder auch der vogeln/ der
vierfussichten und krichenden thirern verwechßelt. Ro. i.²³²

Horestu nhun/ wie boeß und schedlich Paulus bilder sch-
atzet? Ehr spricht. das bildepreißer gotis glorien stelen/
und geben sie gleichnissen der creaturen. Alßo verkleynen
sie got und honen yen. Drumb spricht Moises offt-
malß〈/〉 das got unßer bilder/ und gleichnis/ nit
kan leyden. Alßo stuͤmet Moises mit Pau-
lo. Auch hab ich/ auß den episteln
Pauli obangetzeigt/ das keyner/
zu got kumpt/ wan ehr
bilder eherett.

D3^r

^bqVon^br dem andern artickell
Betdler betreffend. ^bq

Czu vil/ und tzu wenig/ hab ich von den Olgecken
geschrieben. Der halben muß ich volgende/ dester kurtzer
schreiben. Und sage kurtzlich/ das ich ein gewiß tzeichen^bs
hab/ so ich/ yn eyne stat kum/ das keyne/ ader ye²³³ blode²³⁴/ und
wenig Christen/ yn der statt seind/ darinn ich menschen
nach brot seh gehn oder lauffen. Derwegen ist ein refor-
mation von noten/ das wir nit thund (alß wie die heillo-
sen sophisten) die in letzten tzugen/ und eussersten noten/
erstlich ire hende auffthund/ und wellen dan helffen/ wan
der notdurfftig/ keyn hilff fulen/ und wan yen nicht etzen²³⁵
und laben kan. Die greuliche menner sprechen/ das disse
schrifft. Beatus qui intelligit super egenum et pauperem²³⁶/
alßo tzu vernhemen sey. Selig ist dero/ welcher yn eusser-
stem und letztem hunger/ auff den armen achthung hat/
wan er niemer²³⁷ hunger leyden kan. Gleich ap²³⁸ wir nicht sch-
uldig weren/ Betlerey mit guͤtiger handreichung tzu ver-
huten/ und schmertzlichen hunger tzuverkumen²³⁹.

Ich hab gesagt/ und werde es noch/^bt on auffhorung sagen
das betler ein gewisse antzeig seind/ das keine Christen/
oder wenig/ und vertzachte Christen/ in der statt seind/ in
welcher betler gesehen werden. Das ist kurtzlich alßo tzu
begreuffen. Betdler seind/^bu die nach brot umbher lau-
ffen/ oder auff den gassen/ vor den heußern/ oder sitzen vor
den kirchen/ und biten umb brot. Soliche^bv leute sollen wir
nit leyden/ sonder vertreiben/ nicht unvernufftiger und
tyrannischer weyß/ sonder mit gutwilliger hylff/ alßo/
das wir Christen/ keinen/ in solich armut und nott sollen
kumen lassen/ das er verursacht²⁴⁰ und bedrengt werd/ nach
brot zuschreihen und gehn. Demnach sag ich/ das wir alle
tzeit arme bruͤdern^bw und schwestern haben/ Matth. xxvi.²⁴¹
Welche unßer hylff und steuer²⁴² bedurffen. Aber wir sol-
D3^v len fleyssig achten auff unßere nachpuren²⁴³ unnd mitchri-
sten/ und irer not tzu hilff komen. ehr sie tzu uns schreyhen〈.〉
Thund wir das nit/ ßo seind wir auch nit Christen.

Dan Christus spricht tzu den/ ßo an der lincken hand stehn.
Geht von mir/ yr vermaledeyten/ yn das ewig feur. Ich
bin hungerig gewest/ und yr habt mich nit gespeisset. Ich
bin durstig gewest/ und yr habt mir keinen drunck geben.
Ich bin bloeß und nackicht gewest/ und yr habt mich nit
bekleit. Ich bin eyn bilgerem gewest/ und yr habt mich
nit tzu haus oder herberig genomehn etc. und beschleusset
das ehr soliche gebresten tregt und leydet/ yn den seynen.
Matthei xxv.²⁴⁴ Disser text gibt alle dem teuffell/ die hun-
gerige nit speissen. Durstige nit trencken. etce. Und macht
sie frombde und unverwandte Christi. Daraus und an-
dern schrifften/ flechte ich/ und schließ/ das Christen key-
nen betler leyden sollen/ dan sie sollen/ den Hungerichten/
Durstigen/ und andern notdurfftigen helffen/ ehr sie nach
hilff lauffen/ und bethlen von eyner thuͤr tzu der andern.

Dan die warheit kan nit felen und betriegen. welche alßo
spricht. Ich bin hungerig gewest/ und yr habt mich nit
gespeißet. oder. Meyne verwandten haben hunger gelieden.
und yr habt yenen nit essen geben. Drumb geht yns ewig
feur/ das dem teuffell und seinen boten bereytt ist.

¶ Sollen sie tzu dem teuffell und seinem feur gehn. ßo seind
sie ye Christo unverwand/ und seind keyne Christen.

Derwegen volget/ das die yene keyne Christen seind/ die
hungerichte nach broth lassen lauffen/ dan sie solten soligen
fleiß auff hungerichte wendten/ das sie gespeist wurden/
ehr sie durch hunger bedrengt wurden nach brot zuschreihen.

Kurtzhalben wil ich eynen schonen text einfuͤren/ dero
licht²⁴⁵ ist. Deu. xv. und laudet alßo. Keyn betler soll tzwi-
schen euch sein/ auff das dich der herre/ dein got/ gebenedey
in der erden/ die er dir wurd geben/ tzu eyner besitzung.²⁴⁶

¶ Sih wie got seinen gleubigen/ betler verboten hat/ und
wie er gebenedeyhung verheyschet/ den/ die betler/ tzwi-
schen sich nit haben. ¶ Im text volget ferner.

D4^r ¶ Szo eyner/ von deinen brudern/ welche in den pforten/
deiner steten wonen/²⁴⁷ tzu armut kumbt. solstu dein hertz nit
verstopffen und hart machen. solst ouch deyne hand nit tzu-
tzihen/ sonder sie dem armen auffthun/ und yme das yenige
leyhen/ das er bedurffen²⁴⁸ ist.²⁴⁹ ¶ Disse schrifft ist hell/ klar
und licht/ und verstendiget uns alle/ das eyn yede statt/
auff yre einwoner soll/ achtung haben. Alßo wu eyner
in armut fielh/ soll ein yeder/ und die obirsten in sonderheit
sich des armuts erbarmen/ und keyner sein hertz verstopfen/
sonder seine hende auff thun/ und dem armen bruder/ das
leihen/ das er bedarff. Demnach sollen Christliche ma-
gistraten. yn sonderheit fleissig sein/ den armen zu helffen/
die in iren steten wonen.²⁵⁰ Dan vor allen/ sollen wir den
unßern helffen. alß Paulus leret²⁵¹/ und aller meinste²⁵² sorg
haben/ wie die unßere ernert werden. Nicht das wir
beschwerung und not selber leyden sollen/ und die andere in
wollust leben. Sonder ßo wir essen und drincken haben/
und unßere weiber/ kinder/ haußgesind/ und verwandte
auch alßo versehen seind/ sollen wir genuͤgig sein und tzu-
friden. und unßern mitburgern und nachpuren helffen/
Eyn yede statt sol ire burger versehen. Eyn yedes dorff
sein bauren/ alßo das sie iren armen brudern. das leyhen/
des sie bedurffen. Eß solten auch Fursten Amptleuthe.
Burgermeister/ Richter/ Schulteisen und ander magist-
raten/ bequeme²⁵³ mittell und weeg furnemen/ dadurch/ die
arme brudern und swestern/ yder nach seinem stand/ erhalten
wurden/ und das man keinen nach brot ließ lauffen.²⁵⁴

Derwegen gebuͤret yen/ die schuler zu iren eltern tzeschicken.
dan sie leren/ in der betlerey vil mher buberey und unge-
schicklikeit/ dan tugent und laher. Eß ist vil besser sie leren
yrer eltern handwerck/ dan das sie nach brot lauffen. Czu
nitzts²⁵⁵ anders dienen sie/ dan tzu papistischen/ ungelarten und
lugenhafftigen pfaffen.

Eß aiget²⁵⁶ sich ouch/ das obirste/ auff die starcke betler/
ßo arbeiten mogen/ ire augen auffteten/ und tzwungen sie tzu
der arbeit/ sich domit tzu nheren.

D4^v Doch alßo/ das sie yen steur und hilff geben/ ire handwerck
ader arbeit antzefahen/ wolt eyner eyn Buchtrucker/ eyn
goldschmit/ becker/ schneider/ schuster sein oder der gleichen^bx
handwerck leren/ oder anfahen tzebrauchen und treiben/
solten sie yedem/ nach seyner erfoderung helffen. Dan
sie sollen das yrenn bruͤdern leyhen/ des sie bedurffen.

Kom dan eyner dartzu^by/ das ehr one beschwerung/ seyne
empffangen hylff mocht wider geben/ solten sie die selbe
nhemen/ und andern domit helffen.

Szo aber eyner beschwerth were/ das yene wider tzuge-
ben/ das ym gelyhen/ sollen die wolteter nicht dafur fo-
dern/ oder von den gewarten den sie wolgetann haben. ²⁵⁷

Dan ym text volget alßo. Deu. xv. Huͤtte dich das
dir dießer ungutiger gedanck nicht eynfall. Itzt neyget
sich das Jar/ der nachlassung aller schulden. Und dastu der-
halben/ deyne augen/ von deynem armen bruder abkerest/
und wollest yme derhalben nit leihen/ des ehr bedarff/
Beleyb huͤte dich vor soligem unguͤtigen gedancken/ auff
das der arme/ nit wider dich tzu dem hern schrey.²⁵⁸

Wir Christen haben²⁵⁹ alle tag fur eynen tag/ dan Chri-
stus hat keyn untherscheid tzwyschen tagen unnd tagen
gemacht. So seind ouch alle jar eyn jhar.²⁶⁰ Drumb haben
wir alle volkomenlicheit der tzeit. Und das sybende Jar
ewiglich/ welchs Jhar/ eyn Jhar ist/ der remission und
nachlassung aller schulden/ das allen schuldigern/ quit/ le-
tig/ und loß macht von yren schulden. Derwegen seynd
wir schuldig/ unsern armen bruͤdern tzuleyhen/ das yene/
des sie bedurffen/ ane tzuspruch und hoffnung/ das unsere
aus gegeben woltatt/ widerumb tzu uns kuem. Wir dor-
ffen auch nit klagen/ oder vor den richtern handeln/ wie
uns Christus gelert hat. Derhalben haben wir das Si-
bende Jhar/ teglich und alle tag/ und konden nichts/ mitt^bz
recht/ von dem armen fodern.

War ists/ das sie schultig seind uns in noten wider-
umb/ und auch sonste tzu helffen/ ßo sie vermoglich seind.
Aber wir haben das sibende Jhar/ und konden nit fodern.

E1^r Wir sollen auch unßere augen/ keyne tzeit/ von den ar-
men bruͤdern und schwestern abtzihen/ sonder sollen yenen
leyhen/ des sie bedurffen.

Kur〈z〉lich wir sollen eynfaltiglich/ one alle geferde²⁶¹ oder
liestigkeit den armen tzu hylff komen. Deu. xv.²⁶² Domit
verbeut die schrifft grosse disputation tzemachen/ ab ye-
mands hilff wol bedarff oder nit. Das ist war/ wir sollen
alle arbeiten/ und das brot unßers schweiß essen²⁶³/ und keiner
sich armuts lassen mercken. Aber wan gott eynen arm
macht/ sollen die reichen wissen/ das sie den armen neren
und erhalten mussen.

Das ist die ursach〈/〉 das gott eynem tzeiten/ das brot vor
dem maul abschneitt/ und losset yen not leyden/ auff das der
reich/ dem armen hulff thun soll/ und wissen〈/〉 das er helffen sal.
Derha〈l〉ben gebeut gott/ das keyner seinen kornacker/ gar/
und biß auffs erdtrich sol abschneiden/ uff das/ der arme
und frombde/ mensche ehren pflocken²⁶⁴ und samelen kan.
Levi. xxiii.²⁶⁵

Im text (Deu. xv.²⁶⁶) volget. Ihr werdet stetz arme leu-
the haben/ in der erden eurer besitzung. Drumb gebiet ich
dir/ dastu deine hand/ deinem armen und notturfftigem
bruͤder solst auff thuen. Sih das got spricht/ das wihr
stetz armen bruͤdern werden haben. Wir sollen aber doch keyne
bethler haben. Daß ist der text und das gotlich gebot/ das
Christus verneuwet hat/ wie obberurt ist. Das wir key-
nen bethler sollen haben. Wie woll wir altzeit arme bruͤ-
dern haben. Gott wil unß auch in allen dingen und tzei-
ten gebenedeyhen/ ßo wir mit freywilligen hertzen/ den armen
dienen. Das ist das man sagt/ Almußen tilget sunden auß.

Im text volget/ So dir ein glaubiger verkaufft ist/ und
das sibende jhar komen ist. solstu yen frey geben und lassen.
und ome²⁶⁷ dartzu wegkostung/²⁶⁸ von deiner benedeihung. welche
dir got hat/ geben. nemlich von deinen herten²⁶⁹ der schaffen. etc.
von deinem solner²⁷⁰ oder boden do du getreid uff hast/ von dei-
ner weinkaltern oder keler/ da du wein und dranck liegen
hast. Deu. xv.²⁷¹

E1^v Dißer text leret uns/ das wir unßere knecht mayd unnd
allerley gesinde nit leere und letig von unß sollen gehn lassen〈/〉
sonder sollen yenen gelthilff thuen.

War ists. das ym hebreischen steht. Szo dir ein hebreisch-
er verkaufft ist.²⁷² Jdoch hab ichs alßo verteutzschet. So
dir ein gleubiger ist verkaufft. Dan die schrifft nennet auch
die yene gleubig oder hebreisch/ ßo in dem hauffen der gleu-
bigen leben/ und ist tzeiten geschehen. das got/ von wegen
seiner glorien und seines nhomens/ veinde vertilgt hatt/
welche/ das vermeinte volck gotis geengstigett/ haben das
vor gotlichen augen nit ein gotlich und gleubig volck war.
und hat das derhalben gethan/ das gott sein glorien hat
wollen erhalten. Wie du in vil Propheten leßen magst.
Nemlich das got derhalben auffgestanden ist/ und rach-
ung umb sein vermeinde volck gethon hat/ das ym ver-
trißlich und beschwerlich war/ wan seine feinde sagten.
Sih das volck Israhel ist ein volck gotis/ und wir jagen
eß/ wurgen eß/. Soliche wort mocht Got nit lang dulden.
Dan wie wol ym/ sein genent volck nicht tzugehort/ dan-
nest wolt er seine glorien und seinen nhomen verteydigen
und nit gestatten〈/〉 das yem seine gotheit solt angerurt und
berembt²⁷³ werden. Derhalben spricht Moses/ oder gott
durch Mosen. Du solst nit yn deinem hertzen sagen. Got
hat unßer feinde vertilget/ von wegen unßerer oder mey-
ner gerechtikeit/ und uns yn das guth verheischen land
eyngefurtt. Sonder du solst wyssen/ das deyne feynde von
wegen yrer boßheiten flihen. Drumb solstu wissen (spricht
Moses) das dir got/ das reich und gut land nit hat ge-
ben/ von wegen deyner gerechtikeit/ dan du bist ein volck
des allerhertzten nackens oder halßes Deu. ix.²⁷⁴ Demnach
nenne ich die yene hebreisch oder gleubig/ die nuh auff der
gesagten gleubige seiten gehn. Und hab Mosy gevolgt und
gesagt. So dir ein gleubiger verkaufft ist.²⁷⁵ etc.

Nuh hoer auch/ wie disse verkeuffung geschicht. Vor
E2^r tzeiten mochten sich die menschen/ eynnander verkauffen/ und
sich des keuffers leib aygen machen. Unnd die keuffer/
dorfften yre erkauffte knecht weyder/ eynem andern verkeu-
ffen. Gleych wie eyner eynen Ochßen verkeufft/ unnd
dem keuffer/ leib/ eygen macht/ alß noch tzu Neapolis und
Rhom nicht ungewonlich noch frombd ist.²⁷⁶ Die selbe
verkauffte menschen/ tzusampt yre kinder/ nent^ca mann
knecht. Von solichen knechten sagt unser text/ und spricht.^cb
Szo sich ein hebreischer/ dir verkeufft/ und das sibende
Jhar kombt/²⁷⁷ welches eyn jhar ist/ der nachlassung/ frey-
hung/ abhendung²⁷⁸ und ablosung/ aller schulden. Alßo
das selbe jhar/ den schuldigern ein peremptorien exception²⁷⁹
gebar und gab/ das die/ ßo schuldig²⁸⁰ waren/ ire glaubiger
stil sweigen und dempffen konten/ nicht weider tzuklagen.
Alß Deu. xv.²⁸¹ geschriben steht. In dem selben sibende
jhar/ tzukam allen hebreischen knechten und maygden eyn
freihet/ das sie/ ire herren letig geben musten. Nemlich oder²⁸²
Wan ein hebreischer knecht maygd einem verkaufft waß/
und vi jhar dyenet. ßo must yen sein hebreischer her ym
sibende jhar frey und letig geben. und yem dar tzu hilff
und steur geben〈/〉 wie oben berurt.

Das solten der menschen verkeuffer zu Rom/ und in allen Chri-
sten enden ouch thuen. und sie letig und frey geben/ und
solten sie nit letig machen/ und darnach widerumb yn dien-
sperkeit fordern oder treiben. Dan sie ertzornen got/ und
beflecken das verbindtnis und den nhomen gottis/ dye
ßo betruglich und listiglich hebreische knechte behalten/
oder sie wider ruffen/ ßo sie letig gegeben seind/ Aber sie
one hilff lassen weeg gehn. Dan gott achts gleych/ alß
wan eyner seynen nhomen/ glorien/ und gebott veracht
und befleckt/ wan eyner listiglich domit umbget. Alß
Hieremias am xxxiiii.²⁸³ geschriben statt. Ließe Hieremi-
am durch das gedacht Capitell. ßo wyrdestu disse materi-
en auch finden.

E2^v Alßo und demnach solten Ebte/ Vicarien/ Provencia-
len²⁸⁴/ und Minister²⁸⁵/ und der gleichen Muͤnichen〈/〉 yre ver-
kauffte bruͤdern auch letig und frey geben/ Und nicht al-
lein/ auff ire begerung/ sie letig und frey machen. sonder yen
gelt oder andere hilff dartzu geben. und tzu den handwer-
cken helffen/ tzu welchen sie lust haben. Auff das sie sich in
Christlicher weiß mochten neren und erhalten. Und (ob
sie nit gelt hetten) solten sie vil lieber Kelch unnd Messe-
gewande verkauffen/ und ire hebraische. das ist. Christliche
knechte letig machen/ Dan Muͤnigisch leben/ wie eß itzt
von den heiligisten (unßers bedunckens²⁸⁶) gelebt wirt/ ist
nicht nutz tzu der selikeit/ eß behagt Got nicht/ Jha gott
hasset eß. Ursach. Ihre groste stucke/ darinne sie hangen.
stehend/ und arbeiten/ mißgevallen got. alß Esa'ia' und an-
dere Propheten und Christus klar außtrucken. Eß wer
den armen Monichen vil nutzer/ sie dienten eynem schlech-
ten²⁸⁷ mann/ dan das sie sich yn klostern neren und weyden.

Das ich von den Monichen gesagt hab/ das sag ich auch
von den Nonnen. Der selben armen kinder erbarmet mich
auß der massen sehr/ Sie mochten/ und wurden one tzeweiff-
ell gott besser/ yn der welt/ dienen/ dan yn yren vergifften
klostern.²⁸⁸ Alßo nenne ich sie/ dan sie seind alle boeß unnd
schedlich. voller affters glaubens²⁸⁹/ voller abtgoterey/ voller
gottis lesterung/ voller unreynikeiten/ voller boßheyten/
Wie woll ire gifft/ mit solchem honig beschmiert ist/ das
sie yre boßheyten nyt mogen erkennen. Aber eß ist des
endchristen schuld/ und des teuffels will und meynung.
das sie also wie die blinden leben.

Soliche Monichen und Nonnen solten die Obirste/ jetz
ym sibende jhar letig geben und frey machen. Solten yenen
auch steur und hilff verschaffen/ tzu elichem leben unnd
tzeytlicher narung. nach vermogen. Dan sie werden alß
knecht und maigde gehalten und genent/ und haben yhr
sibende jhar teglich.

Ihn sonderheit seind die bethler Kloster²⁹⁰ verbotten/
und sollen nicht mher sein. Dan betlen ist verbotten.

E3^r Eß hilfft sie gar nicht/ das sie willige²⁹¹ bethler seind. Ihr
will und handell ist unchristlich. Und betruglich. und
schedlich. Dan sie haben keynen schein²⁹² ires betlen in der
heiligen schrifft. Betrigen offtmalß arme und reiche umb
das ir.²⁹³ Und beschettigen²⁹⁴/ den armen man an foderung.²⁹⁵
der Keeße/ Korn/ Broth/ Byhr/ Wein/ Testament²⁹⁶ und
allerley. Reissen den armen kindern auß irem maul/ das
sie selber bedurffen. Soliche knechte. ßo an dem bettelstab
gehn/ sollen die Obirste²⁹⁷ bald lassen faren/ und yene tzu bess-
erm leben helffen.

Alhie hett man eynen loblichen weeg und mittel furge-
schlagen/ wan got sein gnad geben hett/ soliche weeg und
mittell tzu volbrengen. Und seind disse mittell furgeno-
men. Das man eynen gemeinen Beutell oder Kasten solt
auffrichten²⁹⁸/ und dar eyn/ das eynkomen aller bruderschaff-
ten brengen. Angesehen/ das Bruderschafften wider
gotliche glorien und ehere streben. Das sie tzerteylung
machen in Christlicher einikeit. Das sie/ ym fressen und
vollsauffen/ leben/ alß eyn fisch ym wasser/ und ein mauhr
auff eynem felsche²⁹⁹ steht. Das sie alle andere verachten/ voller
nachreden seind/ und haben unnutze und teuffelische ho-
ffenung.

Eß sollen auch tzinße der lehen³⁰⁰/ ßo vom rath alhie tzu lehen
gehn (wan sie sich durch abstehn³⁰¹ oder abgehn³⁰² der pfaffen
verlediget haben) tzu obgedachtem kasten kumen.

In betrachtung〈/〉 das vil lehen alhie auff Messe gewidembt
und gestifft seind. Das dan ein teuffelich dingk ist. Und
wider natur des heilige sacraments. Angesehen auch das
tzuvil pfaffen seind/ die weder got nach dem nehsten die-
nen mogen/ und wellen auch nicht lernen.

Den pfaffen/ welche jetz leben/ wellen sie weder heller
noch pfennig abbrechen oder nhemen. Dan sie wissen
das unchristlich ist. ßo ymand betlerey weren wolt/ und
wolt neuwe betler/ machen.

Auch hette ich gern gesehn/ das der stenerin³⁰³ kirchen yer-
lich eynkomen/ tzu obvermeltem kasten und bruderlicher
hilff wer gewand. ³⁰⁴

E3^v Aber/ gott sey eß geklagt/ dem ichs/ in tiffen/ seufftzen
klagen thun/ ich forcht/ und merck/ das der Teuffell nit
ruhet/ verleuset³⁰⁵ auch seine muͤhe nit/ und machet/ das wir
unß do forchten/ do keyn forcht ist/ und brengt tzu wegen
durch Pfaffen/ das er sonste nit mocht tzu wegen brengen.

Dan ich forcht/ das ouch in diesem notdurfftigem³⁰⁶ und
Christlichem artickell. nit werd gescheen/ das beschlossen
ist/ und solt gescheen/ ßo wir anders³⁰⁷ Christen genent und
seyn wollen. Ich hab das meyn gethan. Sie werden ire
belonung/ sonder tzweyffell bitterlich empffahen und fuͤlen/
ßo diesen beyden artickeln endkegen seyn/ und verhyndern
den rath und willen/ des lebendige/ starcke/ warhafftige
und rachsame gottis. Der almechtig got welle yre steyne-
rin hertze erweychen.³⁰⁸ Auff das seyne gottliche glorien und
nhomen in unß groß werd. Und gleych der selbe lebendig
und barmhertzig gott/ woll den Epten/ Monichen/ und
allen vermeinten geystlichen personen. Menliches unnd
Weybisch geschlechts/ seyne gnad/ und erkentnis gottli-
ches willens eyngeben. Domit sie sich endsynnen³⁰⁹/ und
yre geferbtes³¹⁰ leben/ mit besserem und warhafftigem leben
verwechseln/ und yre arme/ betrogen/ verfurten/ und ver-
dorben/ gefangen. letig geben wolten. Auff das nach yrem wol-
fischem³¹¹ und nerrischem leben eyn bruͤderlich/ Christlich/
freundtlich und weyß vernufftig leben/ mog endsprissen³¹²
und gesehn werden.

In kurtzen/ wil gott/ werde ich den Ebten. tzu Cze.³¹³
und Czy.³¹⁴ und andern/ Fur.³¹⁵ klo〈stern〉 meynen dinst anbieten/ und sie/
umb yre verkauffte knechte/ ansuchen/ sie letig/ tzugeben/
oder ire unchristlich und gleißnerisch³¹⁶ leben/ in eyn ander
leben tzustellen/ das got beheglicher³¹⁷. und Christlicher ge-
meindschafft einlicher³¹⁸/ und den frunden gotis nutzer und
tzutreglicher ist. Wil yen das thema erkleren. Nescitis
quid est. Misericordiam magis volo quam sacrificium etc.³¹⁹
Ihr wisset nit (yr Patres) waß das gesagt ist.³²⁰ Barm-
hertzikeit wil ich vil mher und lieber haben/ dan opffer. und
gotis erkentnis behagt mir hertzlicher/ dan gebrant opfer.³²¹

E4^r Euere lampeln und licht/ geheull und beten acht gott gar
kleyn. Aber seyn laher³²² und seyner endkentnis³²³ preißet gott
hoch. Eur insitzen³²⁴. Euͤre ruden streichen³²⁵. Eur stilschweigen.
Eure geruntzelte und traurige stirn. und eur eng ingehalten
leben veracht und verlacht got. Got wil haben/ das ir auff
anfechten/ not/ angst eurer bruͤder. ya aller menschen/ solt se-
hen und alle betlerey mit/ guͤtiger woltat solt vorkumen³²⁶.
Ihr helfft nymand besser dan eurem beutell.

¶ Auch bericht man mich/ das ir nicht lasset Predigen
yn euren klostern/³²⁷ Alßo gebt ir uns antzeig/ das ir weder
got/ noch der welt dient/ Das. und andere dingk/ wil ich
euch nach der weit und breit sagen. So ir mir nit werdet
verheischen/ das ir hinfuro gestatten und verschaffen wolt
das bey euch/ das wort gottis reniglich³²⁸ und lauter werd
geprediget.

Die grohen³²⁹ Klotzerschlepper tzu Lausigk³³⁰/ den die tzene
vor altem gifftigen otem³³¹ schlappern³³² und vor grossem wider-
pellen³³³/ wider evangelische warheit außfallen/ wil ich tzu
seiner tzeit mit gewichtem³³⁴ wasser besprengen/ mit welchem
etliche/ boße und mattichte³³⁵ wuͤrm auß den drinckwassern
verjagen.