Nr. 399
Zinsverkauf durch Anna von Mochau und ihre Kinder an Propst, Dekan und Kapitel des Stifts zu St. Peter in Basel über 155 Pfund Basler Währung
Basel, 1545, 2. März

fehlt

Ich^a Anna¹ wylennd des Hochgelerten hernn Anndreas Bodennsteins der heiligen gschrifft doctor unnd predicanten der stifft sannt Peter zu Basel glosne witwe mit dem fromen furnemen und wysen hern Jacobum Rüdin² des Rats unnd stattwechsler zu Basel
minem rechtgebnem Vogt³, dem ich ouch der Vogtye⁴ bekinntlich bin⁵, unnd ich derselb Jacob rüdin In vogtlicher wys mit ire, Sodann ich Joß märkel⁶ der dischmacher Burger zu Basel, als ein rechtgebner Vogt Adams, Jacobs, Daniels, Kůngolten unnd Gertrůten,⁷
wylend obgemelts hernn Anndresen bodennsteins seligen unnd Anna siner efrouen elicher kinder. Bekhennen und thund kund mengklichem mit disem brief, Demnach ich Anna bodennstein unnd Joß märkels vogtkind⁸, nachgeschribne Zins unnd gultenn
jerlichenn ingend und fallend gehept⁹, Namlich uff Baltasar schoulin¹⁰ von wyl unnd Elßbethen märxin¹¹ siner efrouen fůnf pfund unnd Nůn schilling gelts, jerlich uff sannt Martins tag fallend, koufft und widerkouffig mit Hundert unnd Nůn pfund hoůptzins
nach sag der houptverschribung daruber uffgericht dero dathumb wyßt Montags nach sannt Marci des heiligen Evangelisten tag¹², als man zalt nach Christi unssers liebenn herren gepurt Funffzehenhundert unnd Viertzig Jar, an welliche suma houptgüts
achzig unnd Nůn pfund widerumb erlegt, unnd damit vier pfund Nun schilling gelts wider abgelößt, also das die ubrige sůma hoůptgüts noch zwentzig pfund, die nun hinfur durch hannsen hodel¹³ von wyl¹⁴ mit viiii pfund gelts jerlich uff sannt Mathis tag fal-
lennde, verzinst werden, Sodann uff Ulin¹⁵〈,〉 schnider vonn Krenntzach¹⁶, dryssig fůnf schilling gelts jerlichs uff sannt Marthins tag fallennd, koufft unnd widerkoůffig mit dreyssig unnd fůnff pfůndenn hoůptguts, lut der hoůptverschribung darůber
uffgericht, dero dathůmb lůtet uff sant Martins tag als man zalt nach der gepůrt Christi unnsers liebenn herrenn unnd erlösers Thusennt fůnffhundert Viertzig unnd ein jar, Und zuletst uff Quiwin wenck¹⁷ vonn Tannenkilch¹⁸ und
Bryda rup¹⁹ siner husfrouenn Funff pfund gelts jerlichs uff mitfastenn²⁰ gfallend koůff und widerkoůffig mit Hundert pfund hoůptzins vermog²¹ der hoůptverschribung deshalb uffgericht dero dathumb lůtet uff Monntag nach dem Sunntag Reminiscere
Inn der Vastenn. Als man zalt nach Christi unnsers liebenn Herrenn gepurt Funffzehennhundert dryssig unnd Nůn Jar, sampt ein ubergab brief, wysennd wie diser zins vonn Heinrichen Zeller²² dem kufer²³〈,〉 burger zu Basel an unns inn koůfs
wyss komenn, des dathůmb lutet uff Monntag nach sann Marthins des heiligenn Bischofs tag, Als man zalt nach der gepůrt Christi unnsers liebenn Herrenn unnd Erlosers Thusennt Funfhůndert Viertzig und drii Jar,²⁴ Das da
wie Namlich ich Anna Bodennstein, mit gewaltsame bestimpts²⁵ unns Vogts, fur mich und mine erbenn, Sodann ich Jos märkel²⁶ fur mine vogtkind unnd derselben erben, mit guter vorbetrachtůng umb unnsers bessern nůtzes und notdůrfft willen
merern unnsern schadenn damit züverkennen, inn eins uffrechtenn redlichenn koufs wyß, wie wir dann das nach recht unnd gewonheit aller rechten unnd gerichten aller formlichest thun sollen konnen und mögen, Den Wurdigen Wolgelertenn
unnd Ersamenn hern Propst²⁷ Dechann²⁸ unnd Capitell der stifft sanntPetter zu Basel unnd allen derselbenn stifft nochkomen, umb Hundert Fůnffzig unnd funf pfůnd güter stebler baßler werung, die sy unns bar bezalt unnd usgricht, daran
unns wol benügt²⁹ hatt, die obgemeltenn hoůptbrieff, mit irem innhaltennden unnd gepůrenden zins unnd hoůptgut, recht unnd redlich〈,〉 wissenntlich unnd wolbedachtlich inn krafft unnd mit Urkhund dis briefs geben unnd ubergeben habenn. Also das
genempte hernn Propst Dechann unnd Capittel der stifft sannt Petter und wo nachkomen, solliche zins die Sybenn pfund unnd fůnffzehen schilling gelts, nůn hinfůr sollenn unnd mögen innemen vordern heůschen³⁰ und innziehen, und die mitsampt
irem hoůptgüt nutzenn unnd messenn, besetzen unnd setzen, versetzenn verkoůfenn, Sonnders damit unnd mit den hoůptbriefen daruber sagend handlen schalten waltenn, thun unnd lossen, wie mit irm eigenntlichen und fryen güt, on Irrůng unnd
Inntrag min Anna Bodensteins und miner erbenn, ouch min Jos Markels Vogtkindenn unnd derselbenn erben, und sunst menigklichs, Dann wir uns vermelten zinsen, hoůptgüts unnd hoůptbriefen, ouch aller ausprach vordrung und rechtsami³¹
so wir daran gehept habenn, ader fůrer habenn soltenn konnten oder mochtenn, wissenntlich und wolbedachtlich entzigen unnd begebenn, Habend der gemelten hern Propst Dechann unnd Capittel zu sannt Peter und ire nochkomen sollichs uber-
gebenns zinsen houptguts unnd hoůptbriefenn, inn nůtzlich gwalt unnd gewer gesetzt, Ouch ich Anna Bodennstein mit hand můnd unnd gwaltsami obbestimpts mins Vogts fur mich unnd mine erbenn, Desgleichenn ich Jos markel fur mine
Vogtkind unnd derselbenn erben, by unnsernn güten truwen an eid statt geben glopt unnd versprochenn, den obgnannten hern Propst Dechann unnd Capittel, und iren nachkomen, bemelter ubergab zins houptguts unnd hoůptbriefen halb, das sollichs
bis uff hůttigenn tag unnser fry lidig eigen, vormals niemanden zinshafft nach verfanngen, Sonnders ouch das die hauptbrief kröfftig syen, güt sicher redlich unnd nůtzlich werschafft zuthün fur allen abgang unnd abgewynnen, vor allem
lutenn richtern unnd gerichten, geistlichen und weltlichenn, an allen stetten und eiden, Wa wenn und wie dick sy des notdůrfftig sind werdenn, one allen iren costen und schadenn, Desglichen dis ubergab verzihung³² innsatzůng unnd
was hierann gschriben stat war stat vest und unverprochelich zühalten, darwider niemer züreden noch züthünd, weder mit noch one recht heimlich noch offenntlich sunst nach so inn dhem wyss noch wäg, Mitt verzihung allem unnd
yeder gnadenn fryheitenn, rechten unnd grichtenn geistlicher und weltlicher, uszugen³³〈,〉 funden³⁴〈,〉 lestenn³⁵ unnd geverden³⁶, so sie wider zu schirm³⁷ fůrgwennd werdenn, sampt der gnadenn so wyblichem gschlecht vonn Velegiano³⁸ dem Romischenn Rat ver-
lichen, oder das Jemannds sprechen möcht, gemeine verzihůng one vorganng einer sonndrůng were unverfengclich, Geverd³⁹ hierinn vermitten⁴⁰, Unnd des alles zu warem Urkhund ist diser brieff durch min Anna Bodenstein
Ouch mins Joß Markels als Vogt unnd Innamen Ernempter miner Vogtkindenn vlyssigen unnd ernnstlichenn pitt wegenn, mit obbestimpts hernn Jacobenn Rüdins⁴¹ eignem annhandem Insigel, mich Anna Bodenstein und mine erben desgleichs
min Jos märkels Vogtkind unnd derselbenn erbenn, obgemelter dingen damit warhafftligklichenn zübezugennd, doch ime herrn Jacobenn Rudin unnd sinen erbenn inn allwag one schadenn bewart unnd geben uff Monntag nach dem Sontag
Reminiscere^b Als man zalt nach der gepurt Christi unnsers lieben Herrenn unnd Erlosers Thusennt Funffhundert Viertzig unnd Funff Jar,

fehlt

^cLargaris⁴² C 58.^c

^dUbergob brieff uber iii Zinss zů Tannenkilch⁴³, Wyl und Grentzach⁴⁴
von der Carolstadin⁴⁵, und Iren kindern Erkaufft a'nn'o 1545.^d