42^r

Was den von der Universitet und Capittel zu Wittenberg soll furge- halten werden〈.〉

Anfenngklich zuvermelden, das unns unnser
gnedigister herr, durch ein schrifft, An Ern
Hugolten außganngen¹, bevelhen leßt, sie
zubeschigken, Und auff die sach, darumb
etlich vom Capittel an sein Curfurstlich gnad
suplicirt², mit in und anndern Herrn der
Universitet zuhanndeln〈.〉

Darauff mocht in³ unnsers gnedigisten
herrn bevelh gelesen werden,
deßgleichen der vom capittel suplicacion〈.〉

Nach verleßner suplicacion
ist inen zu sagen〈:〉⁴

das sie als die verstenndigen selbs abnemen⁵
und ermessen mogen, das die zwyspaldig-
keit, so auß irem schreiben⁶ vermargkt, bey
menigklich fur ergerlich und schimpflich
geacht, und wir hielten es dafur, das sie
sich dieser artigkel, daran vil gelegen, selbs
gemeyner cristenheit zugut, vorlanngst⁷
42^v unndter einannder selbs solten vergleicht⁸
haben〈.〉

Zuforderst bedacht, was unnsers gnedigisten-
herrn gemuth und meynung gewesen, wie
sie auß seiner curf'urstlichen' gnaden bevehl unnd
schrifft offtmals vermargkt, das sie kein
neuerung solten furnemen, sonnder
davon disputirn, schreiben unnd predigen〈,〉
bis so lanng anndere euch auch anhengig
weren worden.⁹

Was aber dennoch begunst unnd furgenomen〈,〉
haben sie gut wissen, Und ist die neu-
erung, unnd etwa ein unbedechtig zulauffen
zum Sacrament,¹⁰ neben annderm bisher un-
gehalten form, und gebrauch, schier im
ganntzen reich erschollen, Daraus erfolgt,
das man gleich schimpfflich von den von
Wittenberg redet.

Und seind alle Neuerung, unnsers Er-
messens des ansehens, das daran nit vil
gelegen, ob es gleich bey dem alten form
geblieben were,

43^r Erstlich

Der billd halben. Wu die gleich nit also blutz-
lich weggebracht, zuhauen und verbrannt,¹¹
und Wu die jhenigen, den es zu thun geburtt,¹²
gleich willenns weren gewest, die bild auß
einem gutten bedengken abzunemen, dennoch
solt man solchs offenlich nit außgeschrien
haben, auff welchen tag, das wergk hett
sollen furgenomen werden.¹³ Und hat
zu nicht annders gedient, dann das man den
gemeyn Man zu einer auffrur ader
hitzigen gemuth hat wollen reytzen〈.〉

Das aber die bild nach innhalt der schrifft
sollen verbrannth werden,¹⁴ wissen wir
nicht zurychten, Wollen es euer disputa-
cion bevelhen,¹⁵ So dann doctor Felldtkirch¹⁶
seyn meynung unnserm gnedigisten herrn
auch ubergeben,¹⁷ So wollen wir dieselben
Euch, die in der heiligen schrifft erfharen〈,〉
davon weytter zu hanndeln, zustellen.

Wer auch nit ungeschigkt¹⁸ gewest, man het
mit den sachen, daran nit sovil gelegen,¹⁹
dieweyl der gemeyn Man zu Wittenbergk
43^v davon ein zimlichen verstant, auß den
vilen predigen entpfangen hat, nicht als
fast geeylett,

Was auch fur furderung geberen will, das
so schimpfflich mit den bilden²⁰ umbgegangen〈,〉
ist leichtlich abzunemen, Und wu ein
ergers darauß entsteen wurd, wie zu be-
sorgen, wurd die schuld dem²¹, die^a
so unschigklich²² davon gepredigt, allein
zugemessen,²³

Wer billich bedacht, das dennoch noch gar
vil sind, die noch nicht in einem rechten
glauben bevestigt, umb der kranngken
willen²⁴ muß man dennoch ein gedullt
tragen〈.〉

Ist auch zu besorgen, das ir das am maysten
prediget, das zuletzt solt furgenomen
werden, wenn die Cristen im glauben wol
geubt, Aber der gemeyn Man treibt damit
ein leichtferttigkeit, unnd wirdet Ny-
mants davon gebessert, Soltet ye den
außgang bedengken,

44^r Dieweyl dann ir, herr doctor Karlstat, von^b
den im capittel angetzogen werdet,²⁵
wie ir zu dieser Neuerung faßt ursach
gegeben, wiewol ir durch der rethe schrifft²⁶
dafur gebeten seyt, ist unnser bitt, ir wollet
euch in diesem mesigen, unnd euch hierinn
unverweißlich halten, damit zwispaldig-
keit und auffrur und unnser aller
schimpff und gespött verhutt,

Von den anndern artickeln, der Monichen
Bettelns und Bruderschafft belangend,²⁷
wollet euch hierauff unndterreden unnd
die weg furnemen, damit gottes Ehr unnd
aller seelen hayl gesucht, Auch Ursachen
antzeigen, warzu die Bruderschafft
unnd der Monichen betteln dinstlich²⁸, ^cader
worumb sy domit nicht zcugelassen sollten^c〈.〉

Auff die annderung der Meß, wollet uns
auch berichten, warumb ir diese Neu-
erung furgenomen, wie es auch damit
gehalten werden, was ir auch hierinn fur
Cristlich und gut ansehet〈.〉

^dVon erhebung daß sacraments
Dy wort consecracionis
worumb nicht wesper gehalten
ader psalliert^e werde〈.〉^d29

44^v Es wolt sich auch nit schigken, wu einer den
anndern auff der canntzel schmehet
oder angriff mit außdrugkung seins
Namens.

Nota.

Die vom capittel, so sich unndterschrieben,³⁰
mussen abgesundert werden von den von
der universitet,

Es ist auch gut〈,〉Phillipus³¹ zuvorn auff diese
sach werd gefragt, wie es im doch allent-
halb gefall〈.〉

Darauff ist zu arbeitten, das sie sich mit
einannder vereynten, oder genugsam
ursach antzeigen, warumb die annderung
in etlichen stugken nit sein^f oder sein sollen.

Das 〈man〉 auch uffs aller ordenlichst und crist-
lichist mit dem Sacrament umbging,
unnd sunderlich das das Sacrament
wurd gereicht und nit genomen,³²

45^r Die bild in der kirchen zu bleiben lassen, bis
auff weytter bedenngken〈.〉

Was nutz in der messe, das nicht abgethan
werde〈.〉³³

Nyemants meß zu halten zu dringen ^gader doran zcu vorhinder〈n〉^g〈,〉 sonnder
das solchs frey werd^hieinem itzlichenⁱ〈.〉

Wu man Karolstat vermocht, das er nicht
prediget, so were es nit ungut, dieweyl er
sich zuvorn des Ambts zuweylen geeussert,³⁴

In summa〈,〉 das sie die sach dahin richten, damit
wir unns nit zu vil, unnd ane notturfft
außzurichten³⁵ aufflegen³⁶, Es ist genug
auff ein malh auff den rocken gewuntten.³⁷

Wu auch der pfarrer³⁸ oder sein^j Caplan³⁹
nicht geschigkt⁴⁰ meß zu halten, das sie einen
anndern dartzu liessen komen, damit es
von etzlichen nit dafur gehalten wurdt〈,〉
als were es in⁴¹ selbs nit hertzlich⁴², sonnder
mer fur mietling dann hirtten gehalten〈.〉⁴³

^kDas sacrament zcu elefiren⁴⁴
verba consecrationis〈.〉^k

45^v Das auch dapffer⁴⁵ leuth zu Reichung der
sacrament wurden geordent〈.〉

Beschließlich hierinn zu rathschlagen, was
seligklich, unergerlich und nutzlich〈.〉