Nr. 217
Hugold von Einsiedel an Andreas Karlstadt
Eilenburg, 1522, 3. Februar

117^r Mein willig dinst zuvor〈.〉 Hochgelarter, unnd wir-
diger, lieber her doctor〈,〉 besonnder guter freundt〈.〉

Es lanngt mich an, wie ir unnd andere, So zu Witten-
berg dem christlichen Volckh predigenn,¹ zu weyllen der
laer unnd underweyssung uneynig² unnd uber das
sachen furnemen solt, dadurch der gemein〈,〉 unversten-
dig mann geergert³ unnd nicht gebessert, und das der-
wegenn auffrur, unnd entberung⁴ zubesorgenn.

Wie ich auß mancherley ansagen gehort, das sich albe-
reyt an solchem vill leut geergert habenn,⁵ Dieweil
dann euch unnd andern, dye das Ewangelische worth
fhurenn, gantz gneigt unnd je nicht gern erfarn
wolt, das durch predigen ichtes⁶, undinstlich⁷ und erger-
licher Neuerung solt furgewandt werden,⁸ So ist
an euch mein freuntlich bitt, wellet euch in eurem
Ambt der geschickligeit⁹〈,〉 als ich mich zu euch gentz-
lich vorsyhe〈,〉 haltenn und ertzeigenn, domit das
gemein volckh nicht geergert, sonnder gebessert.

Wue ir auch zuverkundung des worths nicht
sunderlich werdt geruffenn,¹⁰ So wolt euch dazu nicht
einlassenn, domit es von etzlichen nicht dafur geacht,
als hettet ir zu fordrung eurs Rhumbs mehr
begir, dan der menschen heill, und frucht, durch
das worth gots zusuchenn〈.〉 Dafur ich euch und andere
auß christlicher liebe, will gewarnnet haben〈.〉

117^v Wollet solche erynnerung vonn mir in gutem
vormerckenn. Das wil ich freuntlich verdinen〈.〉
Datum Eylenberg Monntag nach unser lieben fr'auen'
tag. purificationis Anno etc. xxii.

An doctor Carolstat.

Hugolt von einsidl