Nr. 57
Andreas Karlstadt an das Kapitel des Wittenberger Allerheiligenstifts
[Wittenberg], 1517, 19. April

70^v
Dem Erwurdigen wurdign Hochge-
larten und Achtbarn herren Probest
Dechent und gemeinem Capitel
meynenn gunstigen herrenn

69^rMein frunthlich willig und bereitte dinst allezeit zuvor〈.〉 Erwirdige
wirdige Hochgelarte und Achtbaren gunstige liebe herrnn/

als
ir^a deß durchlauchtigisten hochgebornen fursten und herren
herrnn/ Friderich hertzogen zu Sachßen/ deß Heyligen Romischen
reichs Ertzmarschalgk/ und Churfurstn Landtgraven inn
Doringen/ und marggravenn zu Meysßenn/ meynes gnedigisten
herrnn/ schrift der pfhar halben zu Ulstedt entpfhangen/ und mir
vorgehalten/ habe ich/ zu sampt hochgenants meins g'nedigi'stenn
herrnn schrift auch insunderheit derwegen an mich gelanget/
mit allem weiter inhalt dinstlich vhleis vornomen/ und
nach dem/ dan die pfhar zu Orlamunde/ und der pfarrer von
wegen derselbigen pfarh undte andern iren zcinßen/ rendten/
fruchte/ und nutzung/ etzliche andere pfarren und geistliche
lehenn/ als ir zustendig fruchte und gerechtikeit/ szo die ledig
gewordenn zu presentiren hatt/ uber die zwey ader dreyhundert
jarh her/ und nun bemelte pfarre/ mit allen iren zugehorunge
und nutzung/ dar under dan auch die presentationes sein mit
begriffen/ durch anregung und vorfugung hochgenants meynß
gnedigistn herrnn meinem archidiaconat alhier zu Wittenberg
eingeleibt/ und incorporirt sein/ allein ausgeschlosßen/ Sovil
in bebstlichen bullen/ doruber ausgangen dem Vicario zu-
erhaltung der selesorge und gewonlicher gotlicher amptenn/
der selben pfharkirchen von solchen fruchten vorbhalten ist/
noch vormeldung berurter bullen/ Und mein vorfarer im
Archidiaconat derhalben auch eyne pfarre ßo bey ime vorledigt
presentirt/ der auch an einige einsage/ dorauf investirt
und eingeweist ist worden/ und ich also nach vormugen
bebstlicher bullen rechter/ und bedachter besitzunng/ alszo auch
meynes untzweivelligen trosten zu rechte/ so offt daß/ der falh
gibt zu gedachten pfarren und lehenn/ den eygenthumb unde
daß possessorium¹ zu presentiren/ fur mich hab/ ist ewrn Erwurden 69^v
und achtbarkeit gebeten/ mich bey meinem genedigisten hernn dem
Churf'ursten'/ unterdeniglichen zuvorbieten/ daß sein Churf'urstlich' g'nad' mich
bey erstem standt/ daß wil ich gemeynt haben/ nach dem
die pfarre meinem archidiaconat/ mit aller irer gerechtikeit
nach ausweisung bebstlicher bullen/ ist incorporirt gewesen/
gnediglichen wollen bleyben lasszenn/ und bedenken wie ich
auf trostlich forderung bey seiner Churf'urstlichen' g'naden' zuerlangen mich
alhie in seiner Churf'urstlichen' g'naden'stadt und universitet habe nyder-
gesetzt und magister Licentiat und doctor der Heylign schrift
mit darlegung² meyneß veterlichen erbs/ auch alhie gewordenn
dorauf von seiner Churf'urstlichen' g'naden'/ die gnade erlangt das ich
zu dem Archidiaconat und prebenden presentirt und
providirt bin worden des ich mich dan bey sein Churfurstlichen -
gnadenn vil demutiglichen bedancken und nochmalß unter-
deniglich zuvordynen erbotenn/ mich auch vortrost habe/ sein -
Churfurstlich gnad werden mich bey solchem Archidiaconat und aller
gerechtikeit so darzu und eingehorenn gnediglichen schutzen
handthabenn und in dem stande/ alß die mein vorfarh gehabt
bleyben lasßen/ Wan ab ich gleich nicht pfarrer zu
Orlamunde genandt were/ habe ich doch aus gedachter ein-
leybung alle der pfarren und deß pfarres gerechtikeitenn
fruchten und eynkommen/ allein ausgeschlossen wie berurt
des vicarien vorsehung/ und dieweil dan solch presentationes
ein zustendige gerechtikeit gnanter pfar sein/ wil ich
mich zu Ewern Erwurden und Acht'barkeit' vorsehenn ir werdet
die bey der pfar auch bleiben laßenn und sie dovon
nit bringen/ nach³ die an euch durch eine statuarium zcihen^b
und usurpirenn/ als ein fremdes guth und gerechtikeit
das auch solchs ewer/ wye^c mein gemuth nie geweßen
anderß/ dan ßovil recht ist/ dorumb ich auch so eß
in einen tzweivell solt vallenn recht allewegen leyden 70^r
kan und wil/ Bittende mich auf solch mein zcymlich
rechtbodt nochmals bey meynem gnedigisten herrenn
zuvorbiettenn/ und daß ir euch meiner gerechtikeit nit
wollet undertzihenn/ das wil ich mich zu hochgenantem
meinem gnedigistem herren unterdeiniglichn vortrosten/
und umb E'wer' Erwurdenn und Acht'barkeit' frunthlich geschickt
sein zuvordynenn〈.〉 Dat'um' Sontags quasimodogeniti Anno etc xvii〈.〉