Nr. 51
Kurfürst Friedrich III. von Sachsen an Andreas Karlstadt
Torgau, 1517, 8. März

48^r
Von gots gnaden Frid'rich'

Unnsren grus zuvor Wirdiger
hochgelarter lieber Andechtiger〈.〉
Nachdem wir bericht/ ^adas
der pfarrer zu Ulstet/ mit tod/
verschiden/ haben wir den
geschikten/ so am jungsten
von wegen des Capitels zu -
Witnberg/ alhie gewest¹/ under
anderm bevolhen/ erkundung
zuhaben/ ob dieselb pfarr
verlihen sey etc. Darauf ir
uns itzt geschriben und ange-
zaigt/ das ir solche pfarr
verlihen/ wie dan dasselb
euer schreiben² weiter meldet/
habn wir/ sambt angehaften
ursachn darumb ir des fug³
zu haben vermeint etc. alles 48^v
inhalts horen lesen Und tragen/
nit wenig befrombden/ das ir
euch solicher^b verleihung
zutun understanden Nachdem
euch/ an der pfarr zu Orla-
mund/ wie wol die aller gottes -
hailigen stiftkirchn zu Witnberg
eingeleibt/ nit mer/ dan ain
Namhafftige pension/ zustendig
Und ob wol/ ain pfarrer zu
Orlamund/ die pfarr zu Ulstet/
invorzeitn/ zuverleihn gehabt/
halten wir doch nit darfur/ das
ir ain pfarrer zu Orlamund seyt/
dieweil ir/ derselbn namen/
und titel nit habet/ dan dieselb
pfarr/ mit ainem selsorger
der dahin/ als perpetuus Vicarius
presentirt/ und investirt
ve〈r〉s〈e〉hen^d und wo die pfarr zu Ulstet von ainem pfarrer zu Orlamund sold verlihn werden so beschee es durch denselbn billicher dan euch^e〈.〉 Derhalbn ir euch
und sonderlich auch^f/ weil ir/ in dem 49^r
unser gemut/ aus bescheener
handlung/ der statuta/ darzu ir von ainem Capitel geschikt und verordent gewest^g
genuglich vermarkt/ solcher
hinleihung/ billich enthalten
dan wo dise pfarr/ in Bebst-
lichem Monat⁴ verfallen/
wurden/ die Cortisan/ eurem
angeben nach/ nit ausge-
schlossen/ sondern^h mer ursach
gegeben/ darnach zutrachten
welchs doch/ so die presentacion
von uns beschiet/ genuglich
vorkemen〈.〉 Darumb ist unser
Begeren/ ir wellet solch euer
furnemen abstellen/ und dise
pfarr/ nach laut der begriffen⁵
Statuta/ von gemeinem
capitel/ an uns zu nominiren
bes〈c〉h〈ee〉nⁱ lassen/ darauf wir
uns dan/ mit geburlicher pre-
sentacion/ wol zuhaltn wissen/ 49^v
dan wo es von euch verechtlich
ubergangn Gedenken wir
solche pfarr zu Ulstet/ auch
ainem zuleihen/ und darauf
zu presentirn/ Wo er dan
〈k〉ain^j Investur erlangen
wirdet/ so wollen wir/ als
vil verfugen/ das er bey dem
pfarrer zu Orlamund/ gleiche
nutzung/ als dy pfarr Ulstet/
ertragn/ von eurer pension
bekomen mag/ das haben wir
euch darnach zurichten
nit verhaltn wollen/ datum
Torg'aw' Sontag Reminiscere
Anno etc. xvii