Wir Theodor Brannd , Burgermeister und Rhat der Statt Basell. Thůnd khůnd, und bekhennen offenlich mit disem brieff Das an hůt dato vor unns erschinen ist die Ehrenrych frou Anna Mechin vonn Wittemburg wyland des Ehrwůrdigen hochgeleerten herren Andresen Bottensteins, von Carelstatt doctor der heiligen schrifft seliger gedechtnůs, gelaßne eeliche Hußfrau. Mit dem Ehresamen unserm getruwen lieben Rathsfrůnd Jacoben Ruede irem mit Recht gegebenen vogt. Unnd hatt unns angezeigt, wie sy irer hohen nothůrfft nach sich mit iren kleinen kinden, dern sy one Adamen Carlstatt , der in unserem Stipendio erhalten, noch viere hatt, die sy alle by irem herrn Carlstatt seligen eelich erporen , zu erheben und widerumb in ir vatterland zůreisen inn willen khommen. Unnd darůff das wir iren, gesagten irs herren und gemahls, und iren selbs wolhaltens, unnd eerlichen abscheidens, glaůbwůrdigen schin unnd urkhůndt, mittheilen wolten, underthenig gebetten. Dwyll nůn dises begern ganntz zimblich. wie oůch die warheit zefůrdern nit minder geneigt dann schůldig. Haben wir unns dis beder Eegemechtens halb ires haltens erinnert. Unnd befindend. Demnach Doctor Carlstatt seliger vergangner jarn durch die herrn Depůtaten, so die geschefft der Kilchen unnd schůlen zůverwahren , verordnet uff unserm bevelch erstlich an die Predicatůr ins Thůmbstifft. Oůch zum ordenlichen leser in der heiligen schrifft, berůefft, unnd nachmals in Sant Peters Stifft zům Pfarherren ordenlich erwelt worden. Das sich der genannt doctor Carlstadt, an des beden der Kilchen unnd schulen diensten, wie sich einem fromen Gotsforchtigen Cristenlichen Predicanten unnd Kilchendienner geburt, ayn Cristenlichen leeren, unnd erbarem leben Ehrlich, unnd redlich gehalten hatt, bys in syn end. Wellicher am dienst des pfarr ampts by Sant Peter Cristenlich und seligklich im herren geendet und beschlossen. Da wir im, wo es Gott gefallenn gern lenger haben mögen. Es hat sich auch die gedachte Anna meuchin by zyt irs herren unnd gemahels seligen zustender Ee unnd nachmals als der herr irn Eewirt uß dem zyt dis Jammerthals zu den froůden ewiger seligkeit berůefft, in wyttwen stand so Cristenlich eerlich und wolgehalten, das wir iren alle eer unnd gůts erwiesen, auch aller warheit wie einer fromen unversprochnen person, vertrůwen und gloůben. Sy ist auch mit unserm gutten gůnst, wissen und willen redlich unnd eerlich von unnts abgescheiden. Das alles geredenn und sagen wir by unsern Rathspflichten, niemand zů lieb noch zů leid, sonder allein umb blosser warheit willen. Das alles zů warem urkhůndt, haben wir gesagter Anna meuchin uff ir dienstlichs bitten disern Abscheidbrieff mit unser Statt anhangendem Secret Insygell vertruth? zegeben erkannth, uff montag den xvi tag Mertzens Anno 1545.