Uns hatt der Gestreng und Bhest Christoff von Mochow, eine klegliche schrift gezeigt, die ihm die tugentsame Frau des Doctoris Andreae Carlstadts gelassene witfrau seines brudern seligen tochter zugeschickt, Darin die betrubte frauw ihm als ihrem nehist vorwanten vettern ihr elend zu wissen thut, Nach dem ehr aber dabey gebetten, das wir an Euer Ernveste und weißheit schreiben wolden, haben mir ihm solche nicht wollen abschlagen. Denn wiewol wir nit zweifeln, ihr als eine verstendige, lobliche Oberkeit werdet selb bedacht haben, was sich in diesem fall gegen eins pfarrers gelaßne weib und kind zu thun geburt, denn ihr jetzund als vatter und furmunden zu achten seit, haben wir gleichwol nit unterlassen wollen, an Eur Ernveste und weißheit zu schreiben, als die wir die tugentsame Fraue unnd ihr freuntschafft kennen, unnd von wegen ihr tugent ein christlich, billich und groß mitleiden mit ihr haben, Bitten derwegenn gantz vleissig, Eur Ernvest unnd weißheit wollen sich der armen witfrau und waisen annemen, ihnen hulf und gutes erzeigen. Denn wir bericht worden, das sie kein aigen behausung, auch sunst nichts haben, dazu sey ehr viel schuldig blieben. Dweil sie denn frembd sind, und keinen trost oder zuflucht sonst wissen, und ehr dennoch ein kirchenn diener bei euch gewesen, so wollet christliche erbarmung an ihnen beweisen, Welches one Zweifel der ewig Godt gnediglich belohnen wirdt, der witfrauen und waisen unnd besonder der kirchen diener mit großem ernst der oberkeit bevohlen hatt, Und bitten, Eur Ernveste und weißheit wolle uns widerumb gelegenheit der armen witfrauen und waisen, auch was ihren halben Eur Ernveste und weißheit bedencken, zu wissen thun. Und Euer Ernveste und weißheit zu dienen sind wir willig. Datum Witebergk montags nach Pentecoste, Anno ec. xlii.