Wie ein wolcken verschwindet/ und dahin faart. Also wer zu der hell hinunnder faart/ der kumpt nit wider heruff/ und kumpt nit wider in syn husz/ und er wird syn statt nit me kennen.

Also hand wir disen sententz Job im sibenden capitel vertolmescht. Ich weiß/ lieben frommen Christen/ das dise leere by ettlichen seltzam lutet/ darumb woͤllent wir gemaͤhlich thůn/ und eyns nach dem andern/ wie die ordnung diser reed gestelt/ ußstrichen und endecken. Vor allem/ ist zů wissen/ das die glichnussen und byspilen der gschrifft manifeltig sind/ und das wir uß umbstaͤndigkeyt der gschrifften/ und art der personen/ und eygenschafft der dingen/ von welchen sy schribent/ zum ersten ermaͤssen sollend/ ob die glichnuß gantz und vollkummen sye/ oder ob sy uff etliche teyl gestelt sye/ und uff wie vil/ und uff welchem teyl die glichnuß stande. Denn welcher das nit achtet/ der wirt sich und andere übel letzen/ das muͤssent unß kundschafft geben dise reden. Der Sun des menschen/ oder der tag des herrn wird Matt. 24. 1. Thes. 5. 2. Pet. 3. kommen wie ein dieb in der nacht. Item es was ein gottloser Richter in eyner statt/ der waͤder vor Gott noch vor der weltt sich beschempte ec. und andere diser art/ Derhalben meniglich behůtsam syn soll/ und lůgen wie feer die glichnuß gange. Wie vil sy teyl habe/ und das syn ynleitung andere heyttere sententzen Gottes nit braͤche noch zů nüt mache. Also ouch in diser glichnuß/ und wie wol dis byspil nit ist so faͤrlich und sorglich als yetzt firgelegte/ so stats doch laͤtz und übel wenn man naͤbent uß schlegt/ und faͤlet da man sollt traͤffen. Man kan aber die kunst recht zůbruchen/ lernen. Als ist in disem zůsaͤhen, das der fromm Job vom end/ und nit vom anfang der wolcken redet. Er spricht ye nit/ wie die wolcken gmacht wer dint / sunder wie sy verschwinden. Derglichen sagt er ouch nit/ wie die wolcken da oben ynherfarend/ und was wunder sy tribend/ sunder wie sy vergand, und zů nüt werdent/ Also gang es mit dem menschen/ wann er staͤrbe und inß grab faare. Diewyl er nun nüt meldet/ wie die wolcken gemacht werden/ so gebürt mir yetz ouch nit zü leeren/ wie wol das die gschrifft leeret/ wie die wolcken von der irdischen füchtigkeyt und nidersten dünsten uffgezogen/ ußfüchte und stoub dort oben gemacht werdend im lufft/ der die obristen wasser tregt/ und ein hymmel oder underschlacht ist/ der obersten und nidetsten wassern. Psal. 148 und 134. Der heilig Job sagt ouch nit wie die wolcken/ oben werdent zůsamen gfuͤgt: darumb ists on not allhie zůmelden/ wie wol die gschrifft meisterlich leeret und Job selbs sagt: Wie der herr die wasser daIob. 29. oben zůsamen binde in den wolcken/ uff das sy nit zůglich ungestymiglich ußbrechend und huffetglich heraber fallend. Und ein ander/ Wie der herr die wasser in die wolcken/ alsProve. 30 in ein kleyd fasse und verbinde/ und aber ein ander spricht: Wie Gott der herr in dem obren ort des hymmels die wasserPsal. 103 so uffgezogen seind/ zůsamen taͤfle/ wie uff einer büne eyn braͤt zů dem andern stosse und lege/ und ein decke druß mache. Es spricht ouch nit Job yetz/ wie der herr da oben in denIob. 37. wolcken inherfare grosse und erschrockenliche ding thuͤe/ und die wolcken jage das sy die erden befüchtigen. NochPsal. 134. und 104. das/ Wie der herr da oben fücht und wasser zůsamen gselle und mit führ unnd wasser straaffe syne fiend/ darumb soll ich yetz nit da von reden/ wie wol die geschrifft traͤfflich davon redet. Exod. 9. Diewyl ouch der heylig Job nit sagt/ noch syn glichnuß daruff grundfaͤstiget/ wie Gott der herr syn hoheDeut. 33. mayestet und maͤchtige stercke da oben in den wolcken derPsal. 67 und 88. welt kundt thuͤe/ und wie die wolcken syne kleyder seind/ in welchen der herr sich laßt saͤhen/ noch wie sy sine hütten/ und wonung sind: darinnen er wandle/ rede/ antwurt gaͤbe. So waͤr es vergaͤbens so ich yetzdann das teyl woͤlt darzů naͤmen unnd leren/ Wie der mensch hinweg gang unnd nit wider kumm. Ja es waͤr eyn gespoͤt und narren stuck wiewol es eyn grosse Goͤttliche wyßheit ist/ wissen warumb und wie der herr soliche dinge geschaffen. Und der herr in dem ort des hymmels da die wolcken louffend/ ein hütten und tempel hab nit ungewisser noch minder denn er herniden gehebt. Kürtzlich zů reden/ es sol meniglich des orts gůt sorg haben/ uff welchen teyl die glychnuß und byspil gegründt/ und nit ußschlahen/ sunst wirde er nüts buwen. Nicht meer denn wenn ich yetz üch woͤlt leren/ das der herr etwann uß eynem wolcken/ dunst/ führ/ wasser/ und hagel steyn waͤrffe oder andere steyn/ und das der dunst geschwinder und schnaͤller abhaͤr kemme denn der blitz: und den menschen ehe toͤdte: denn er blitzen sicht/ wiewol die ougen in den hymmel gesehend/ und das ist ye eyn Goͤtlichs und meisterlichs stuck/ Der halben ein red ist. Welcher den blitzk gesicht/ der ist sicher vor dem straahl und donder schlack/ nüt deßmynder dienet es nit da haͤr. Dise ding hab ich ußschweiffiglich geredt/ uff das wir uns lassend recht wysen/ und zů wissen das darumm nit alles fuͤglich ist/ was die warheit ist/ und das wir alle ding zů syner zyt in gebürlicher statt redend/ und nit alles mit allem über birtzlend oder über waͤrffend oder zůsamen rasplend was etwann nit zůsamen gehoͤret. So stat nun unser fürgestelte glichnuß in dem verschwinden/ vergon/ und hingan der wolcken/ da gebürt zů melden/ Wie sich die wolcken vertzerend/ zerdünnent/ und ablüterend. Das aber geschicht uß vilfaͤltiger ursach/ diewyl die wolcken vilfeltige natur hand/ etliche dragent wasser/ etliche führ/ etliche steyn: etliche wasser und führ vermischlet. Die wasser fuͤrend sind ouch nit eynerley/ diewyl etlich raͤgen/ die andere schne die driten hagel. Vom touw und ryffen/ waͤr ouch zů sagen.

Alle dise wolcken vergand/ aͤben mit dem wasser das sy/ aber gyessend/ denn wie das sprüch wort lutet/ so ists auch/ Nach dem raͤgen kumpt heytere. Also luterent sich die führwolcken/ und vergond wen sy redlich blitzgen/ wie geschriben stat. Vor dynem glaste oder schyn sind die wolcken Psal. 17 vergangen/ Wie aber vergand sy? Also das du ir statt nit baß magst anzeygen/ wo sy gestanden oder gefaren sind/ dann ich dir den waͤg in eynem grossen und wyten wasser mag zeygen des schyffs/ welches durhin gefaren/ und den waͤg im lufft durch welchen ein vogel gestern geflogen. Du kanst auch mir weder end noch stuck der verschynen wolcken wysen. In disem teyl und ort stat dise glichnus oben angezeigt/ Und wiewol die ursach und manigfaͤltigkeyt des verschwindes der wolcken ouch nit not ist alhie gesagt waͤrden/ so ist sy doch dienstlich/ und das naͤchste. Ich bekenn ouch das es nit also stat/ wie/ eyn wolcken sonder schlaͤchts Eyn wolcken vergat ec. Also der mensch. Aber das ist die art der Hebreyer/ das woͤrtlin/ wie/ das ein glichnuß bedütet etwan nit schryben unnd doch dem verstand ynbilden/ der halben ichs/ wie die andere uß getruckt/ in sonders wyl das ander glichnuß woͤrtlin/ also/ hernachmals ußgetruckt ist/ waͤr es nit da gschriben/ so hets ouch unß tütschen glich golten/ denen es glich gyelt wenn ich sagte. Der ist eyn loͤw/ und das/ Der ist wie eyn loͤw. Nach disen allem volgt nun die ußlegung des anderen stucks angezochner red des heyligen Job also: Waͤr hinunder zůr hell faart/ kumpt ouch nit wider/ ec. Wie die wolcken sich verzerind und vergond und nüme mee wider kommend/ also stats mit dem menschen. Stirbt eyner und kumpt in die grůb/ so faret er so gar und gantz von uns das wir nit mee/ dann eyn verganges wolcken haͤnd/ er kumpt ouch nit wider/ als eyn wolcken. Diewyl aber ich anfencklich den sententz des heyligen Job mit soͤlichen worten angezogen/ wie er vertütschet ist/ so forderet die not/ das ich alles erlütere/ was in selben worten dunckel ist/ oder den anderen/ gschrifften widerig sin vermeyndt wird. So aber nun da selbst geschriben/ welcher hinunder in die hell faret/ ec. Und das woͤrtlin hell/ im Babstumb für eyn ort und ende der verdamnus geprediget ist/ unnd meniglich die hell für die verdamnus verstat/ so gebürt mir anzůzeygen/ das der heilig Job von eynem ort maͤlde/ an welches er solt faren. Diewil aber offentlicher ist/ dann ich bewysen muͤsse/ das der heilig Job nit verdampt/ ouch nit zů den verdampten gesellet/ noch an das ort ewiger verdamnus geschmeckt habe. So ist/ ein haͤller falscher verstand/ Hell. In sonders so doch durch das woͤrtlin Scheol / welchs im Job staat/ die wonung ist anzeügt/ in welches Abraam Isaac und Jacob Gen. 37. und 44. und vil andere heiligen genommen sindt. Denn Jacob dick gesagt. Er werde in Scheol stigen. und David. Wird ich in die hell stigen/ so bistu da. Scheol heysset eyn grab/Psal. 138 grůb und vergrebnus/ und obs schon eyn ort der verdampten an etlichen enden der gschrifft moͤcht heyssen/ so heysset es doch an disem end und vil anderen/ ein grůb/ vergrebnus/ oder grab. Wie nun dise/ hell/ das ist grab oder grůb gestaltet sey/ wil ich durch des heyligen Job erklerung darthůn. Der also spricht. Der herr lasse doch von mir/ das ich michIob. 10. eyn kleyn erkicke/ ehe dann ich hingange und nit wider kumme/ namlich ins land der finsternüß/ das eyn land ist/ des liecht eyn dicke dunckele ist/ Da ouch keyn ordenungen sint/ da es schynet wie das tunckel. Da sagt der heilig Job das er selbs in ein soͤliches land gon muͤsse/ und begaͤret eyn wenige labung oder fristung ehe unnd es geschaͤhe. Er sagt ouch mit haͤllen worten wie da oben gehoͤrt ist. Das er selbs waͤrd hingan und nit wider kommen/ synen ernstlichen und unzwyfelten glauben damit offenbarend/ dann die wider aͤferung einen ernst bedüt und authoritet mitbrengt. Drumm ich hernachmals vom selben/ nit wider kommen zreden/ verhoff. Jetzt muͤssent wir die gstalt des grabs und grůben laͤrnen. Er spricht/ es ist eyn erde der finsternus und ein schatten des tods. Iob. 10. Das vertolmetschen/ etliche eyn erdtrich des abgangs/ des elendes/ und arbeitseligkeit/ das nit wunder/ das unsere Bischoff/ die sich nit fast der Goͤttlichen urteylen erkündigen die ewige verdamnus verstandend/ aber laͤtz. Und ist ye war das eyns uß dem andern volgt und wachßet: seytmal finsternuß ellend und arbeitseligkeyt mit ir zügt/ und ist nit an das Rabi Joseph ein ander ort verstadt: welches keyn Sonn nymer mee beschynet/ und achtet/ es sy eyn land am end etwann der erden/ aber ich soll und will in disen und allen faͤlen der geschrifft nach reden/ und sy mynen meyster/ und ich ir leerknab syn. Diewyls ouch fast nütz ist vor allem/ des leerers ußlegung annemmen/ ob des worten wir zwiflend/ Derhalben wellend wir den Job selber hoͤren/ wie er syn grab oder hell ußlege. Er spricht/ er muͤsse in eyn land der finsternusIob. 10. gon/ des jamers/ des elends/ in eyn grüselichs und erschrockelichs land/ da das liecht glich der tunckele ist/ oder da die finsternus fast dunckel/ schier wie wir von der Aegyptischen finsternuß laͤsend/ welche doch die diener Gottes gar nüt latzte noch umbgriff/ noch betruͤbte. Unser alte Exo. 10. Latinische translation haltet also. Ubi perpetuus horror inhabitat : Da eyn ewige/ schuderung/ grüseliche/ erschrockenliche gestalt ist. Es sind hie mangerley/ und im schyn widerwaͤrtige ußlegung/ Denn es duncket eynen das dise zwo reden/ da das liecht glich der tunckele ist/ und dise/ Da die finsternuß dunckel ist/ wider einander sind/ aber es hat yeglich ußlegung iren grund/ diewyl das Hebreisch wort topha heisset erlüchtet und verdunckelt syn. Derhalben eyner also tolmetschet. Da das erdtrich erlüchtet ist wie die dunckele. Der ander/ da das land dunckel ist wie finsternuß. Der dritte/ da ewiger grüsen oder schuder inwonet/ der letzte lůgt uff die anhangende art der finsternuß/ Mir gefalt die erste ußlegung/ diewyl sie das glichnußzeichen/ wie/ erwaͤgen hat/ mich duncket ye/ das nit am baaste lut/ das dunckel ist wie finsternuß/ und aber das baaß/ das liecht ist wie finster nus. In massen ouch der herr spricht. So dyn liecht Matth. 4 finsternus ist/ wie wirt die finsternus syn? und wir ouch sagend/ das liecht glantzet/ wie eyn schwartzer khol/ Ich name alle dry ußlegungen an/ und sint mir/ mit eynander/ nit wider spenstig. Was ist nun das grab/ in welchem der verstorben ligt anders/ denn eyn aͤrde der finsternus und schatten des todes? Denn alles liecht schinet in/ als ein finstere tunckele. Da die dunckele nüts anders dann eyn stockfinstere dunckele ist. Volgt aber nit der finsternus nach drurigkeit/ kummernus/ erschrockenheyt/ als widerumb dem liechte froͤligkeit und ergetzligkeit? Was froͤüwet aber das liecht der Sonnen des Mons und der sternen die verstorbenen? Wenn aber wir aller diser liechter mangelend/ was froͤüd hand wir? Wa ouch kein liecht ist/ da ist kein trost und kein ordnung/ denn ob schon alle ding so umb eynen stond/ ordenlich von Gott unnderscheidet sind/ so weißt dannocht der in stockfinsternus ligt/ gar nüts von der dingen art und ordenungen. Er kan ye nit spraͤchen. Das ist das/ und yens eyn anders/ er weißt ouch nit wo ein yeglichs stande ob es oben oder under im/ zůrrechten oder zůr lincken sie. Wie sich das eroͤugen thůt gegen denen so in finsteren und unbekanten orten gond/ die nit wissend wo die thür und wo andere ding sint. Als ouch der do by singklicher nachte über faͤld wandlet/ der hoffet uff den schyn des Mons/ mag er in nit han/ so lůgt er nach den staͤrnen/ uff das er sinen schritt nach irem liecht anrichte. Hat er gar kein liecht/ so ist er gantz trurig/ und hat ouch keyn ordenung/ waͤder der ding die by im ligend/ noch deren die ob im schwaͤbend/ ja er hat ouch keyn ordenung der liechter und staͤrnen am hymel/ und er mag nit reden/ das stadt vor/ mir/ das ander hinder mir/ denn im manglet des liechts durch welches alles offenbar und underscheidet wirt/ wasEph. 5. man erkennet. Also stadts by den todten koͤrpeln/ welche im grab/ als in der finsternus ligend. Sy moͤgend waͤder die ding so iren lyb anruͤrend/ als würm steyn und haͤrd/ noch die ding so feer von in sind/ als Sonn/ Mon/ staͤrnen noch andere ding erkennend. Denn wiewol die Son bym tag schynet/ und der Mon und staͤrnen des nachts/ so hilfft es und froͤuwet sy nit/ gesaͤhend ouch nit baaß/ dann by eynem schwartzen kholen/ und ist in der schyn aller liechter grad als eyn tunckele finsternus. Da selbs hand sy ougen und gesaͤhend nüts. Hend/ unnd gryffend nüts. Oren/ und hoͤrend nüts. Mund und redend nüts/ ec. Und ist eynem yeglichen syn grůb/ die aͤrde der finsternus/ do keyn ordenungen gespürt waͤrdent/ dan das liecht ist in wie finsternus. Derhalben gar unnot/ eyn besonders ort erdichten/ als hinder Norwaͤgen / oder anderschwo. Da die Sonn sechs Monet nit schynet/ als obgemelter Rabi schribet. Der ouch in dem irret/ das er von eym land schribet/ da die Sonn in sechs Monaten nit schinet/ diewyl er das dran knüpfft/ das darrumb nümer mee da selbist schine. Denn die historien gaͤbend kundtschafft/ das die Sonn darnach sechs moneten da selbst schyne/ und eyn langen tag mache/ wie die finsternus eyn lange nacht. Moͤcht aber eyner sagen/ was ligt dem Job und dem heiligen dran/ das ire körpel/ und lyb im grab/ und in tuͤffer finsternus ligend? Antwort/ der heilig Job hat gar einen herrlichen verstand gehebt der schoͤpffung Gottes/ und wol gewüßt/ das die menschen durch Adams faal und ungehorsame zů soͤlicher finsternus/ und in die not des todtes kommen/ und das wir soͤliche finsternussen nit haͤttend muͤssen schmecken/ noch die bitterkeit des todts versůchen/ so Adam des hern verbott unverbroͤlich gehalten. Zů dem beduret sy/ diewyl sye wissend das ir lybe Gottes tempel ist/ das sy billich soltend bliben syn voller liechts unnd froͤligkeyt. Unnd die glider ires lybes zů dienst der gerechtigkeyt gaͤben soltend/ als die oren/ dasRom. 6. und 10. sy Gottes wort hoͤrtend/ dann durch die oren/ der gloub in ir seele fiel/ ire zungen bruchtend zům lob und briß Gottes/ zůRom. 10. reden Gottes warheit/ vom naͤchsten gůts und eer. Das Heb. 13. alles aber manglet in/ wenn der lyb in der grůben ligt. Darumb bedurets den Job/ der im zyt syns laͤbens/ syn fleisch syn koͤrpel und glider gezaͤmpt/ und unnder oͤgig gemacht zům dienst Gottes/ und zůr hilff des naͤchsten geuͤbt hatt/ wie er selbs betzüget. Ich trost (sagt er) das hertz derIob. 29. witwen/ Gerechtigkeit was myn kleid/ Ich was dem blinden eyn oug/ des lamen fůß/ der armen vatter/ der vertruckten erloͤser/ Und wenn schon soliche hilff nit haͤt stat gehan im stande der unschuld/ so gibt das aber eyn gůt antzeyg/ das den gerechten Job draͤffenlich geletzt hat/ das er die glider syns lybs im grab zů Gottes eer nit regen mag.

Also han ich durch des heiligen Jobs eygne wort/ die art und form des grabs/ so etwan eyn hell genempt/ offenbaret/ das er aber hoffenung gehebt/ uß sollicher singklicher nacht und groben finsternus/ und unordenungen zůkummen/ bewysen dise syne wort: Ich weyß das myn erloͤserIob. 19. laͤbt/ und er wirt mich uß der aͤrden uffwecken. Sind das nit heyttere wort/ damit betzüget wirt/ das Job eynen ungezwifleten glouben gehebt/ unnd gewißt habe/ das in Gott würde erloͤsen uß dem land der finsternussen? unnd merck das wort/ Uffwecken/ durch welches er rund usser sagt/ das in der Herr wurd erwecken/ das thüt er ouch mit disem wort: Waͤr gibt mir das/ das du mich in der helleIob. 14 oder grab verdeckist/ biß dyn zorn übergaad? Denn er bekennet/ das eyner sye/ der in schützen moͤge im grab/ biß sich Goͤttlicher zorn lege/ welchem aber das zů schwaͤr ist/ der stütze sich uff das. Ich weyß das myn erlöser laͤbt/ und er wirt mich erwecken. Daruß volgt aber/ das der heilig Job/ keyns wegs die hell der verdampten/ da keyn erloͤsung syn wirt/ gemeynt habe/ da er spricht/ Waͤr zůr hell hinnunder faart/ der wirt nit widerkommen. So bestat nun die glichnuß/ wie die wolcken verschwindent unnd dahin gand/ also wenn der mensch hinab in die grůben faart. Denn glicherwyß die wolcken zů nüt werdend/ wenn sy sich ablüterend/ und oben aber fallind. Also wenn der mensch stirbt unnd ins grab kumpt/ so verschwindt er/ das etwan waͤder synes fleyschs noch gebeins über blibt/ diewyl er fuler haͤrd und stoub worden (wie denn das Gott der herr umb der übertraͤttung willen erkennt hat) vor haͤt er fleisch/ beyn/Gen. 3. blůt/ und eyns menschen gestald. Aber was gestald hatt er/ so er ist zů stoub und haͤrd worden? Du hast mir/ O GottIob. 10. (spricht er) hut und fleisch angetzogen/ mit aderen und beynen hastu mich zůsamen gefuͤgt/ was bin aber ich so ich wider zů haͤrd bin verwandlet? Die wolcken so sy aber gefallen uff den haͤrd hand ouch eyn andere form. Also ist der mensch/ wenn er ins grab gelegt wirdt/ wie eyn stromm wassers derIob. 14. ußloufft versiget und vertrocknet.

Das ist eyn seltzame reed/ nit alleyn by den Christgloͤubigen/ sonder by/ den Phariseern/ uß welchen Paulus/ ja by allen so Gottes krafft und die geschrifft verstand. Denn istsPhil. 3. waar/ das der mensch/ wider uß dem grab nitt kumpt/ so wird er ouch nit ufferston. Nun straͤbend aber dise wort/ ufferston/ und nit ufferston/ gegen eynander/ und eyns zergengt das ander/ als ouch dise reden/ uß der grůben stigen/ und nit ußerstygen. Aber der heilig Job red/ das vilmals/ wir hands zwyret daoben gehoͤrt/ da stell ich das drit dar/ Wenn sich der mensch gelegt hat/ so wirt er nit uffston/ undIob. 14. wirt nit uff wachen/ ja so lang der hymmel blibt/ wirt er nitt erwachen von synem schlaaff. Heyßt das nit/ er wirt nit widerkommen/ so weiß ich gar nüts was es heißt. Aber es ligt am tag/ und lüchtet wie die Sonn/ das der fromm Job die ufferstentnuß gloubt/ und er selbs druffgehofft habe/ diewyl er saget. Ich weiß das myn erloͤser laͤbt/ und er wirt michIob 19. haͤrnach in der aͤrden uffwecken/ unnd wird mich darnach mit myner hut umbgaͤben/ und ich wird in/ in mynem fleisch gsaͤhen. Den selben wird ich mir gsaͤhen/ und myne ougen waͤrdend in schouwen/ und keyns anderen. Was begaͤrestu schinbarlicher/ denn/ das der fromm Job hie sagt? Sind das nit klare unnd offenbare wort: Myn herr laͤbt der mich in der aͤrden oder stoub erwecken wird? Laß das etlich also tolmaͤschen. Der herr wirt ob mynem stoub uffston/ so sinds andere wort/ und ist aber doch eynerley sinn/ das nun etliche dise wort/ er wirt darnach mich mit myner hut umbgeben/ also ußlegend/ wenn er myn hut zerknützschet hat/ so wirt er ouch. Das/ namlich myn gebeyn zerknützschen. So ist der anfang und das end diser reed also angefengkt und volendet/ das keyner anders verston kan/ dann das Job die ufferstendtnus vom stoub und toden/ verjaͤhe. Lieber was ists gesagt. Myn erloͤser laͤbt der ob mynem stoub wirt uffston. Denn aͤben das/ Er wirt mynen stoub/ in welchen myn fleisch verwaͤsen ist/ off wecken? Das end lut also. Ich wird Gott uß oder in mynem fleisch gsaͤhen/ und den selben wird ich mir saͤhen/ und myne ougen waͤrdend in schouwen/ mit disen worten verstopfft er alle lucken durch welche eyner dise red uff ein anderen waͤg moͤcht zyechen. und sagt abermals. Schow uß disem fleisch/ welches die würm/ vor waͤrdend fraͤssen/ wird ich Gott mynen erloͤser anschowen/ und wirt in mir/ zů gůtem und zům ewigen laͤben/ saͤhen. Denn das ist das ewig laͤben/ GottIoan. 17. den vatter und synen Sun Jesum Christum erkennen/ nun spricht er schinbarlich. Ich wirt in in mynem fleisch gesaͤhen/ unnd der herr wirt mir myn fleisch wider gaͤben/ ob ich schon verwaͤsen und die würm myn fleisch vertzert hand. Doben hat er antzeygt/ das er wysse/ das er staͤrben und aͤschen waͤrden můß. Allhie sagt er. Ich weyß das mynIob. 10. 17. und 19. erloͤser ob mynem fleisch ston/ und mirs wider schencken wird. Doben schribt er also/ Wenn ichs schon lang verzüch/ so ist doch die grůb/ myn huß/ und in der finsternus ist myn bett uß gespreydet/ zů der verwaͤsung/ sagen ich/ du bist myn vatter/ zů den würmen/ myn můter/ und myne schwoͤster/ was beyten und warten ich? Waͤr wirt myn warten erstatten? Ich můß hinunnder ins grab/ da waͤrdend wir im stoub ligen/ das stadt alles im bůch Job geschriben/ in welchem hernachmals ouch stadt/ Ich wirt Gott den hern uß mynem fleisch und in disem/und nit in einem froͤmbden fleisch saͤhen/ und laß mich nit verhinderen/ das mich die würm fraͤssen werdend, und ich nit blibe der ich yetz bin. Das sind nit würm/ wie in der hellen der verdampten/ deren würm nit stirbt/ noch staͤrben vermag/ Es ist ouch keyn Esa. 66. verwaͤsung in der verdamnus/ denn wie die straaff und peen ewig/ so ist ouch der lyb ewig/ der ewiglich gepyniget werden soll. Ins heiligen Job hell/ ist die verwaͤsung syn vatter/ die würm syn můter/ die richtend in dahin/ das im waͤder adern noch fleisch noch gebein überig blibend. In der hell der verdampten naget der wurm/ und toͤdet nit/ des bitteren tods angst/ not/ forcht und alle macht des todes entpfindent die verdampten/ und woͤlten gern/ und moͤgend nit staͤrben/ das ewig führ brennt sy ewiglich/ und sy brennent/Matt. 22. und verbrennent nit/ diewyl ir führ ewig ist. In der verdampnus ist ouch usserste finsternuß und yemerlich zaͤnklaffen/ aber im grab unnd hell/ oder heyligen/ ist die verwaͤsung. Ouch staͤrbend ire würm/und ist der Job schon tod/ so empfind er nüt/ und waͤret alles eyn zyt/ was in yetz dann bedruͤbet/ und zwiflet nit/ das er Gott synen hern in synem fleysch gsaͤhen wirt/ drumb laßt ers im nüt zůschaffen gaͤben/ das die würm syn fleisch waͤrden anfallen unnd uff aͤssen/ ErIob. 12. 19 weißt das im der Got syn fleisch wider kann und wil uß stoub machen/ wie es der herr zům ersten gemacht hatt. Unnd er underwyset und vermanet uns/ das wir gar nüts zwyflen soͤllend an der krafft Gottes/ der alle menschen Dan: 12. Ioan. 5. 2. Thes. 1. widerumb erwecken wirt/ etliche zům gericht und verdamnus/ die anderen zům laͤben und ewiger herrligkeyt. Die boͤses thůnt zů der understen hell/ die gůts thůnd zů dem hoͤchsten hymelischen waͤsen. Die weder hoffnung hand der ufferstendtnuß/ nach der krafft Gottes verdrüwend/ das er sy moͤge und welle uff wecken/ sind der boͤß boum/ an welchem keyn gůte früchten wachsend/ und diewyl sy gloubloß/ und boͤß sind/ ists unmüglich das sy gůts thuͤnd/ und dem herren gefalend/ denn der herr hatz geredt. Welcher nit gloubt der ist verdampt. und Gloubend ins liechte das eüch die Ioan. 3. 8. finsternussen nit erwitzschend/ und Paulus: One glouben ists nit müglich dem herrn anmuͤtig syn/ und Den ungloͤübigen sind alle ding befleckt/ ec. Demnach soltend wir glouben/ unnd uns nit mit seltzamen zwifelstricken verwicklen/ als doch etlich thůnt/ die ob diser materien versůchen ritter zwerden sagende also. Wenn myn fleisch zů graß ist worden/ oder mich eyn wolff/ oder gyher/ und vogel/ oder visch vertzeret hat/ so verwandlet sich myn fleisch in natur und waͤsen des graß/ des wolffs/ des gyhres/ vogels oder visches/ und bin ich nimme der ich was/ und myn fleisch ist nit fleisch im graß: aber im wolff/ ists wolff fleysch/ im gyher/ gyher fleysch/ und im visch/ visch fleisch. Darumb ists nit müglich/ das mich der herr erwecke. Das ist der muͤssig genger subtile dispution/ welche ghrad thůnt/ sam hettens sy erfunden/ und der heilig Job nit hett vor langest geleert/ das die würme syn fleisch zů irer narung naͤmen/ und in ir art unnd natur wurdend verwandlen. Das aber leeret der fromm Job grüntlicher denn sy/ wiewol sin leer by inen ein torheit ist/ Dunckt sye das nit naͤrrisch/ das er die würm syne můter nennet? welche můter frysset ire kind? frysset aber keyn můter ire kindt/ volgt/ deren eyns/ eyntwaͤder das die würm in der grůben das fleisch Job nit essint/ oder sin můter nit sind. Gaͤlt das schmecket in torlich? Der fromm Job aber hat mit solchen metaphorischen worten nit allein woͤllen leeren/ das die würm sin fleisch werdend essen/ sonder das er der urteyl Gottes gnůg wurde thůn/ welcher allen menschen/ in Adamen/ gsagt. Das sy zů stoub und aͤrden soltend werden. Also muͤssend alle menschen der würmen spyß werden/ on die/ so der herr gefryet hatt/ Das alles hatt der geistrych Job kürtzlich verzelet/ da er spricht/ Der verwaͤ/sung han ich gesaͤyt/ myn vatter/ den würmen/ myn vatter Iob 17. und schwoͤster/ was ist die verwaͤsung? Sy ist das grab/ welches verderbet/ oder die verderbnus selber ist/ wie das der inhalt des Hebreischen woͤrtlin Schahath vermag: Nun spricht er aber zuͤ der verwaͤsung. Myn vatter/ und zeygt an/ das er sich in aller gehorsame soll ergaͤben/ und da selbst zů nüt waͤrden/ derhalben er die würm ouch syn můter heysset/ damit antzeygend/ das er syne elteren/ das ist vatter und můter/ mit synem fleisch und blůt/ aderen und gebeynen weiden sol/ Syttemal Gott gebotten/ das die kinder ireMatt. 15. hungerige Elteren mit spyß sollend versorgen/ und inen ire notturfft zů tragen. Das wil er ouch thůn/ und uff das selbExo. 20. gibt er sich der verwaͤsung/ als sinem vatter/ und syn fleisch den würmen als syner můter. Aber den würmen ouch als syner schwoͤster/ Warumm nennet der heilig Job die würme syn můter und schwoͤster? Ist aber nit eyn grosser underscheid zwischen schwoͤster und můter? Es ist. Diewyl aber die würm/ wie gesagt/ zů letzte ouch in der grůben sterbend und verwaͤsend/ in welcher der mensch verwaͤsen můß/ so sind sy/ des menschen schwoͤster/ denn sy in eyner grůben wonend/ von eyner verwaͤsung zerstoͤrt werdend. Die ussere gestald ist glich/ aber das end unnd die ursach unglich. Der mensch und würm hand eyn gliche verwaͤsung/ und also eynen vatter/ deßhalben sy bruͤder und schwoͤstern ouch ge achtet. Aber der mensch traͤit syne myssethat/ wenn er Eccle. 31. verwaͤset/ die würm aber hand nit gesündiget. Das end des menschen ist ouch unglich/ des geist obsich flügt/ der würmen vergadt. Das alles leeret mich der heilig Job hüpschlich/ und verjochtzet nit destminder klaͤrlich. Das er synem Gott (in dem selben fleisch/ welches kranck was/ und die würm hernachmals fressen wurdend) waͤrd gesaͤhen. Der im syn verwaͤsens fleisch wider uß dem stoub ußher ziehen/ gebeyn/ adern/ blůt/ fleisch und hut gaͤben waͤrd/ und gloubt das stiff und vest. Aber die disputierer gloubend wol/ das er sie uß stoub gemacht/ wenn aber sie wider sind stoub worden/ gloubend sie nit/ das sie widerumm uß stoub zů menschen gestalten koͤn. Kan der Herr hymmel und erden machen/ und hats gemacht/ so kan er ouch das/ warumb gloubestu aber das groͤser/ und zwiflest am mynderen? Etlich werffend eyn andere frag übertzwaͤrig in waͤg/ sagend. Wie ist es aber moͤglich/ das Gott eyns menschen zerstuckte glider/ so an tusend oͤrten der waͤlt/ und wydt von eynander zerstroͤüwet ligend/ widerumb zůsamen trage/ und eyn gleych zů dem anderen fuͤge? Als wie vermag der Herr der heyligen glider, die in den vier enden der waͤlt getzeygt werdend/ zůsammen bringen? Item es kumpt dick das eyner eyn hand im Moͤr stryt verlüret/ die andere über hundert myl vergraben wirt/ und ein oug am dritten ort/ oder eyn finger uff eynem hohen berg/ den anderen in einem anderen land/ den dritten im wasser/ wie kan gott soͤliche wyt zerstroͤüwte glider samlen/ und an einander hencken? Nar/ fragstu so ungeschicklich/ gedarestu Gotts machte und groͤsse uß dyner schwacheyt und kleyn fuͤgligkeyt maͤssen? Ich vernimm/ das du das erdrich gegen Gott verglichest/ wie es gegen dir ist/ ist aber das nit eyn grosse torheit und schantlicher ungloub? Wenestu das dem unentlichen und ewigen Gott etwas feer und wydt stande oder sye? Ist er nit eyn Gott derHier. 23. nah ist/ Ist er nit an allen orten/ da alle dise stuck ligend? Laß eyns in der hell syn/ das ander im hymmel/ und so feer von eynander verworffen syn/ das du in tusend jaren von eynem stuck zům andern nit kaͤmist/ waͤnestu das ouch also by dem Herrn stande? Oder laß die stucke so kleyn syn/ oder in soͤlicher finsternuß ligen/ das du sie nit vermoͤgest ersaͤhen/ ob du schon aller menschen gesichte/ und ouch ougen als ein Adler haͤttest/ oder wie der Lynceus gesaͤhist/ woltestu darumb dynem Got/ der alle ougen gemacht/ eyn soliche dunckele zůschryben/ und Iob. 39.d sagen/ er muͤste arbeyt und vil zyt zů setzen als du? O arbeytseliger mensch/ O groser ungloub. Ich foͤrchte du siest uß der Gotlosen rott/ die iren rathschlag und wyßheyt in der finsternuß bruchend, und spraͤchend. Der Herr gesichts nit. WeystuEsa. 29. aber nit das Gott der Herr hymmel unnd erdtrich in syner hand dreyt/ und umbgriffet/ und das alle ding dem Herr ja die Deut. 32. grosse welt kleyn unnd so nah ist als eyn kleyner oͤpfell? Wie sind vil stucke eyns oͤpfels in dyner hand? Muͤsestu aber feer und wyt sůchen/ und vil zyt und grosse muͤh erlyden/ wenn du die stucke des oͤpfels in dyner hand woltest zůsamen sůchen/ setzen/ oder finden? Ich meyn nein. Nun aber hat Got der Herr alle hymmlen/ und alles erdrich/ alle thier und fische/ und alles was im mehr und uff und in der erden ist/ in syner hand/ und hats gewisser drynnen/ und baaß/ dann du des oͤpfels stucke in dyner hand haͤst. So gsicht er schoͤrfer/ und thůt alles wie er wil schnaͤll/ namlich durch synen willen/ dartzů dir arbeit und zyt von noͤten waͤr. Es wenig ouch eyn mensch ußreysen unnd feer wandlen můß/ damit er erlange/ was er in syner hand hat/ und weißt das ers hat/ und gesichts alles was er drinnen haͤt. So wenig můß der Herr wandlen/ forschen/ und nach fragen/ so er die wyteste ding der erden wil zůsamen brengen/ ja unverglicher wyß ist das byspil gaͤben/ diewyl der Herr alles baas weyßt/ gewisser hat/ und in syner machte hat/ und naͤher hatt. Denn wie der Herr die ding/ so nit sind/ wol erkennet/ und benamset sie/ sam waͤrend sie. Und by im gegenwürtig ist/ was unnß zůkünfftig und nit gegenwürtig ist. So sind dem Herren alle/ zerstroͤüwete glider nah unnd gegenwürtig/ in syner hand. Also ouch die verwaͤsene und vergangne glider/ koͤrpel und fleisch sind im gegenwürtig. Das han ich den fraͤve len fragen/ und toraͤchtigen fragern/ die vor geilheit und muͤssigang ire wyßheit nit anders moͤgend ertzeygen/ denn in soͤlichen fragen/ woͤllen antworten. Ist aber yemands der also zwyflet uß bloͤdigkeit/ der leerne Gottes groͤsse/ krafft/ macht/ wyßheit/ uß synem heiligen wort/ recht erkennen/ unnd so wirt er hilff finden/ und verstand erlangen. Doch das er syn hertz zů dem Herrn unnd brunnen aller wyßheit wende/ unnd begaͤre/ durch syne Goͤtliche gnad/ und heiligen geist/ in gefuͤrt waͤrden in die warheit der heiligkeit und Gotsaͤligkeit/ So hoffen ich der Herr waͤrde dem selbigen syne ougen erlüchten unnd uffthůn/ das er die machte und krafft Gottes/ in soͤlichem hohem handel/ zů sampt syn Goͤtlichs wort/ zů welchen uns unser Herr Jesus Christus leytet und vermanet/ gründlich und gewißlich verstan. So hand wir/ das der Herr unß widerumb uß haͤrd machen kan/ wie er erstlich Adamen geschaffen/ und gilt dem Herren glich/ uns widerumb zů buwen/ er finde etwas oder gar nüts me von uns/ es blibend ouch beyn oder verschwindend in der verwaͤsung zů aͤschen/ wie deren von ye welten haͤr vil zů aͤschen verbrennt sind. Denn dis eyn gewonheit by vilen heyden ist gewesen/ der verstorbenen lyb zuͤ aͤschen verbrennen/ und wir ettlichen umb straff willen zů aͤschen verbrennend/ dise kan der Herr so schnell und wol uß irer aͤschen/ oder was sie yetzt worden sind/ wider machen/ und uffwaͤcken/ als haͤttends ir gebeyn im beynhüßlin/ oder uff eynem wyten faͤld ligen/ und er spraͤche zů den thürren und wißlaͤchten beynen/ Lossend ir thürre beyn/ naͤmend waar/ ich wil mynen geist in eüch senden/ eüch geaͤder und fleisch gaͤben/ mit einer hut Ezec. 37 überziehen/ ja ich wil eüch einen geist gaͤben/ das ir laͤbind/ und uff das/ die beyn zůsamen lüffend/ ein yegliches zů synem geleich/ und noͤmend aderen und fleisch/ hut unnd geist/ und stündend uff/ wie das dem Propheten Etzechiel/ in eyner gesichte geoffenbaret. So dann der heilig Job dise reed. Welcher hinnunder faart der kumpt nit wider heruff drymal/ und dise: Ich wirt mynen Herrn in mynem fleisch gsaͤhen/ ec. eyn fart/ aber doch mit so vil worten/ unnd ernst geredt/ das sie so vil giltet/ sam hett er sie hundertmal geredt/ Volget das er gar nit dise meynung gaͤben wil: Welcher hinnunder inß grab oder hell faart/ der kumpt nit wider heruff/ sonder er můß ewiglich da selbist blyben/ und er wirt in synem fleisch waͤder den Herren gsaͤhen/ noch in synem fleisch ein urteil empfahen/ synen wercken gemaͤß. Denn sytemal er spricht/ das er Gott in synem fleisch waͤrde gsaͤhen. So zeyget er an/ das er in synem fleisch waͤrd herfürgon/ und den herren saͤhen. Aber in der gstalt/ darynn der Adam yn/ und unß alle durch syn ungehorsame gebracht/ wirdGen. 3. er nit ufferston/ sonder in soͤmlicher form/ krafft und herrliche wie der Hymmelisch (der nit verwaͤsen/ ist/ ufferstanden) waͤrd er uffston/ Vormals ist er staͤrblich gesin/ hatt einen schwaͤren toͤdtlichen lyb/ staat aber uff in einem lichten untoͤdtlichen lyb. Wie der heilig Paulus gar syn von der schoͤne und herligkeit der lychnam/ so zům laͤben waͤrdend ufferston schribet/ sagend: Es wirt gesaͤyet verwaͤsenlich und wirt ufferston 1. Cor. 15. unverwaͤsenlich: Es wirt gesaͤyet in der uneer/ unnd wirt ufferston in der herrligkeit: Es wirt gesaͤyet in der schwacheyt/ und wirt ufferston in der krafft: Es wirt gesaͤyet eyn natürlicher lyb/ und wirt ufferston eyn geistlicher lyb. Item der geistlich1. Cor. 15. lyb ist nit der erste/ sonder der natürlich/ darnach der geystlich. Der erst mensch ist irdisch/ der ander himmelisch. Item diß verwaͤsenlich můß anlegen die unverwaͤßlicheit/ und das staͤrblich/ die unstaͤrbligkeit. Und wenn das volbracht ist/ denn wirt erfüllet waͤrden das wort. Der todt ist verschlunden in dem sig/ O tod wo ist dyn stachel? O hell und O grab/ wo ist dyn sig? O verwaͤsung was hastu geschafft? und ir würm was hand ir gefraͤssen? Da bin ich/ aber nit mit bloͤdigkeit/ nit mit verwaͤßligkeit/ nit mit eynem vertzerlichem/ schwaͤren/ groben/ traͤgen/ fulen lyb/ sonder mit eynem herrlichen und krefftigen/ mit diser krafft/ an der ir nüts vermoͤgend/ hat mich myn erloͤser bekleydet/ und mit soͤlicher herrligkeit vernüweret. Diewyls nun das fleisch ist/ mit welchem Job ins grab hinnunder gefaren/ in welchem er den herren gesicht/und aber in nüw art verwan dlet ist/ so hat er nützit widerwertigs geredt/ und syn leer nit vernütet/ sondern krefftiglich angezeygt. Das der ußerwelten lychnam ufferston wird/ aber mit Goͤttlicher krafft gezierd vil mit hymmelischer herrligkeit bekleydet. So kompt er wider/ und kompt nit wider: Er kompt wider diewyl er synen geist unnd fleisch bringt/ so er vorhaͤtt. Und kompt aber nit wider diewyl er in anderer art und gestalt kompt. Er kumpt vernüwert inwendig und ußwendig. Er kompt nit in dem vorigen staat/ wie er ouch nit mit dem alten vorigen laͤben kumpt/ sonder mit vernüwertem coͤrpel und geist. Wenn einer von dir in frembde land wandlete mit boͤsen sitten und krancken glidern/ als mit ussetzigem lyb/ und lamen glidern/und khem widerumb mit gůten sitten/ mit reinem lyb/ mit geheilten glidern/ so spraͤchestu zů im: Wo hastu den alten menschen gelassen? Du bist nimme der du vor warest/ und er waͤre doch der mensch/ welcher von dir gegangen. Nun gibt aber die ufferstentnus zům laͤben tusentmal bessere tugenden unnd sitten/ und überschütt den lyb mit hymmelischer reynigkeit/ und legt in an mit ewiger gesundheyt. Das man wol sagen mag. Der Job wirt nit wider kommen/ oder also widerkomen das syn widerkunfft so saͤlig syn wirt/ das ers syn wirt/ und nit syn wirt. Also hatt ouch Christus nach syner ufferstentnus mit synen jungern geredt/ und under anderem gesagt: Das sind die wort/ welche ich zů eüch gesagt/ doLuc. 22. ich noch by eüch was. Myn Herr bistu do zůmal nie by dynen lieben jüngeren gesyn? Hastu nit mit inen geredt? hastu mit inen geredt/ so bistu gewyßlich by jnen? Welcher redt mit einem und ist nit by im? Ist er schon feer/ so ist er doch so nah als die stimm langen kan? Was reden ich von der stimm und gespraͤch? Drats nit der Herr mitten under sie/ und sprach: Saͤhend myne hend und fuͤß/ das ichs selber bin? Grifend mich unnd saͤhend mich. Sind das nit wort eynes der mitten under den jüngeren was? Noch dannest spricht er. Das sind die ding welche ich eüch gesagt/ als ich noch by üch was. O myn Herr bistu nit by in? Hastu dich inen nit offenbaret? Bistu nit wider zů in kommen? Wie du es versprochen hast? Gewyßlich bistu wider zů in kommen. Warumb sprichestu: da ich bey eüch was? Myn Herr du warest by inen in der bloͤdigkeit/ unnd bist wider kommen in der krafft. Das ist zweierley. Also spricht Job: ich wird nit widerkommen/ und ich wird den Herrn in mynem fleysch gesaͤhen. Wiltu O Job den Herrn in dynem fleisch gsaͤhen so müst ye wider kommen. Aber diewyl dyn eygen fleysch in eynem nüwen laͤben widerkommet/ so gilt es glich/ du sagest. Ich kumm nit wider/ oder ich kumm wider/ und ist einerley/ darumm das du von zweyerley redest. Du kumpst nit wider in der toͤdtlichen bloͤdigkeit/ in welcher du by unß warest. Und kumpst selber wider das du mit nüwer gestald und form wider kummest. Namlich in der herrligkeyt dynes erloͤsers. Dise ußlegung und vereynbarung der gschrifften/ hatt uns der heilig Job mit disen woͤrtlin. Ich wirt den Herrn in mynem fleisch gesaͤhen/ verborgenlich/ aber doch gewißlich dargelegt. Unnd wirt meniglich spraͤchen/ das er sich selbs also wil verstanden han. Denn er es wol gewißt hat/ das kein mensch Got in toͤdtlichen fleisch würde gsaͤhen/ wie das der Herr hernach durch Mosen klaͤrlich ussergesagt hat: Welcher ouch Gott den Herrn im fleisch oderExo. 33. vom fleisch gsaͤhen woͤlte/ das der selb muͤßt eyn vernüwerts fleisch han/ eynen geistlichen lyb/ eynen hymelischen und herrlichen koͤrpell/ und in summa: Eyn soͤliche klarheit besitzen/ Dem1. Joan. 3. nüts zů verglichen/ ouch keyn lyden der selbigen waͤrd und Rom. 8. wirdig syn würde/ Das alles bringt das wort. Ich wird in gesaͤhen/ ec. Und/ myn ougen waͤrdend in saͤhen: Denn welcher den Herrn wird saͤhen/ der wirt im glich. Glichförmig/ das er 1. Ioan. 3. unstaͤrblich/ herlich/ geistlich und wie die Sonn am hymmel schinen wirt: Also widerkummen/ fasset zwo muren zůsamen/ Matt. 13. widerkommen und nit widerkommen und zů den synen kommen/ und nit wider zů den synen kommen: Als ouch die eelichen personen inLuc. 20. jehner welt zůsamen/ und nit zůsamen komend. Uff dise wyßMatt. 20. kumpt eyn verstorbner zů den synen und kumpt nit zů den synen. Das sagen ich nit darumb/ das ichs achte/ das eyner yetzt uß den todten ufferstande/ und in erklaͤrtem lyb sich den synen oder anderen menschen erscheyne/ Sonder das soͤliche zů der zůkünfftigen welt/ und nit zů diser vergencklichen welt gehoͤrend. Der aber zů der zůkünfftigen welt gehoͤrt oder kumpt/ der ist hinnab kummen/ und kumet nit wider/ da er vor was/ denn er ist nümer der selbigen welt/ als eyn alter mensch nit der jungen waͤlt ist/ Wiewol er aͤben das fleisch und beyn/ welche er in der jugend gehebt/ und von můter lyb bracht/ denn zůmaal hat. Darumm und also stat der verstorben wol an dem jüngsten tag uff/ und kumpt wol in dem vorigen fleisch/ unnd kumpt doch weder in die vorige welt/ noch zů den sinen/ umm synes nüwen waͤsens halben kommet er nit wider/ und kumpt doch das syn fleisch nüw worden ist/ darums hats gar nit die meynung/ das die todten yetzund widerkommend. Nun diewyl wir der künfftigen welt sint ingedenck/ ists billich das wir eyn wenig von ir redend. Die künfftige heysset die der gegenwürtigen nachvolgt/ und hatt von diser eyn absonderung oder unnderscheyd. Theylt sich bald in zwo art/ eyne ist der ußerwelten die ander der verschůpten. Also theylet der Herr die künfftige welt uß/ und Daniel der also geschriben: Und es werdend vil/Dan. 12. uß denen/ so im stoub der aͤrden schlaaffend/ ufferston. Etliche zům laͤben/ eiliche zůr schmach und schand. Ioan. 5. Mat. 24Also spricht Christus/ das die todten waͤrden uß den greberen uffston. Etliche zům laͤben/ die andere zů dem gerichte. Item das die Englen Gottes die ußerwelten Gottes waͤrdend samlen von den vier winden/ und ouch alles unkrut werden ußyetten/ und in bündilen binden/ und mit fhür verbrennen. Das ouch der Sun des menschen alle voͤlcker vor im versamlen/ und in zwey theyl von eyn ander scheyden/ glich als eyn hird die schaaf von boͤcken scheydet. Und die schaaf zů syner rechten stellen/ unnd die boͤck zůr lincken/ unnd den zůr raͤchten eyn froͤlichs/ denen zůr lincken eyn erschrockelichs urteyl schoͤpffen waͤrde. Ouch sagt der2.Thes. heylige Paulus: Wie der Herr gegen synen heyligen/ und gegen synen fienden sich waͤrd stellen.