An den Durchlüchtigen Hochgebornen Fürsten und herren/ Herrn Allbrecht/ Marggraven zů Brandenburg/ in Prüssen etc. Hertzogen etc.

Gnad und frid von Gott unserem vatter durch Jesum Christum unseren heyland. Durchleüchtiger hochgeborner Fürst/ es ist kurtz verruckter zyt ein sendbrieff an Uwer Fürstlich Gnaden vom Luter ußgangen/ in dem er understadt Uwer Fürstlich Gnaden zebereden/ das sy unverhoͤrter sach die jhene/ so syner leer des Nachtmals halb/ widerwertig/ des lands verwyse/ mit inen nüt ze schaffen habe: inen nit lose/ dann syn leer und artickel sye haͤll/ klar/ rein und ungezwyflet/ und imm Evangelio der maß gegründt/ das im den niemand moͤge umbstossen. Der gründen aber zeygt er keinen an/ sunder facht bald an/ nit allein uns unschuldigen jaͤmerlich und grusam schaͤlten/ heißt unser blůt (warlich nit uß apostolischem geyst) vergiessen/ sunder understadt sich ouch Uwer Fürstlich Gnaden angeborne senfftmuͤtigkeit ze bewegen und zereitzen wider die/ die in Uwer Fürstlich Gnaden fürstenthůmb unserer meinung sind/ ze wuͤten/ sy zů durchaͤchten und des lands zeverwysen. Und wiewol wir einmuͤtiklich by uns beschlossen/ uff syn bůch im nüt zeantwurten (dann es des selben nit waͤrdt ist: wirt ouch sich selbs by allen vernünfftigen/ recht verstendigen und gůthertzigen gnůgsamlich schenden und zenüte machen) so hatt uns doch nit woͤllen für gůt ansaͤhen/ gantz unnd gar zeschwygen/ bsunder gegen Uwer Fürstlich Gnaden die er mit soͤlichem ruhen unnd ungeschickten schryben (wo sy Gott nit verhůte) understadt ze verbitteren und wider die frommen unschuldigen ze verhetzen. Deßhalb wir in diser vorred nit dem Luter (der syn gmuͤt verhertet hatt/ und in syner bekentnuß sich thür verpflichtet/ wo er anders bekannt/ das mans für ein unsinnigkeyt halten soͤlle/ deßhalb er uns nit hoͤrt) antwurt geben/ sunder ein demuͤtige trungenliche und haͤrtzliche bitt an Uwer Fürstlich Gnaden thůn woͤllend/ mit ableynung der schmach und schaͤltwort/ die Luter nit allein uff uns/ sunder uff die warheyt hatt getrochen. Uwer Fürstlich Gnaden aber woͤlle uns gnaͤdigklich losen/ unnser verantwurtung hoͤren und gedultig vernemmen/ damit wir nit unverhoͤrt und unverantwurtet unschuldigklich verdampt und verurteilet werdint. Dann es sich ye nit zimpt/ das Luter der klaͤger/ der urteylspraͤcher und züge sye/ des er sich in dem sendbrieff an Uwer Fürstlich Gnaden undernimpt: wiewol er an dem teil/ da er kuntschafft wider uns solte dar thůn/ wenig grund unnd warheyt ynfuͤrt/ und gadt aber die klag scharpff/ und das urteyl gar grusam wider uns.

Wir aber habend syn bißhar (wie alle gloͤubigen wüssend) in vil waͤg verschonet/ und im syn fraͤvel und ungerympt schryben nie woͤllen mit glycher maß widerlegen: und noch uff den hütigen tag begaͤrend wir frid und einigkeit (so ferr sollichs mit Gott und der warheit syn mag) mit im zehaben. Aber über das alles schmaͤcht/ schmützt/ schiltet und verlümbdet er uns/ tastet uns an mit schantlichen uneerlichen nammen: nennt uns schwermer/ rottengeyster / kaͤtzer/ tüfelskinder/ unnd andere schmachwort tricht er uns uf/ deren er doch (ob Gott wil) mit der warheit keins zů eewigen zyten nimmermee mag bewysen. Es waͤre billich hochgeborner Fürst und Herr/ das ein leerer der warheyt/ ein diener Gottes/ nüt anders dann das geschaͤfft synes Herrens/ der in gesaͤndt hatt/ fürnaͤme/ schuͤfe/ und ußrichtete/ und den mund/ den Gott syn warheyt und wort ußzekünden bereit und gesübert hatt/ nit so mit bitteren falschen schmachreden und lesterungen/ nit so mit ungegründtem ytelem und laͤrem gschwaͤtz befleckte/ dann ye soͤlichs einem botten gottes und der warheyt übel anstadt.

Was schwermer sygind/ wissend wir nit/ rottengeister aber und kaͤtzer mag er uns mit keiner warheyt nennen/ dann wir uns der goͤtlichen gschrifft/ der warheyt und einigkeit der kilchen Christi allweg beflissen und gehalten/ habend kein irrige noch falsche meinung vor uns/ sunder das goͤttlich wort/ grund des gloubens und der gschrifft/ ouch den verstand der alten leereren/ die von der heiligen kilchen adprobiert und angenommen sind/ deren leer für kaͤtzerisch und irrig (in disem artickel) nie gehalten: wie es dann Oecolampadius saͤliger gedaͤchtnus: gnůgsamlich bewaͤrt unnd bezügt hatt/ und es sich an imm selbs klarlich wirt erfinden. Ouch wirt Uwer Fürstlich Gnaden in disem buͤchlin/ das garnach vor sibenhundert jaren/ ein frommer man/ mit namen Bertram / uff ansůchen Keiser Karles/ zů dess zyten sich diser span vom Nachtmal ouch zůtragen/ gemacht hatt/ wol saͤhen/ wie warlich der Luter uff uns rede/ das wir soͤliche meinung nüwlich erdacht/ oder uß einem finger gsogen habind/ und wie war es sye/ das syn meynung fünfftzehenhundert jar von der kilchen sye gehalten worden. Dann diser Bertram hatt gelaͤbt zů den zyten des Keysers Lotharii / imm jar als man gzelt hatt achthundert und viertzig jar/ weliches sich yetz fast loufft uff die sibenhundert jar. Deßhalb wir nit moͤgend verdacht noch beschuldiget werden/ als waͤre sin bůch von uns erdacht. Zů Koͤln ist es funden unnd gedruckt im 31. jar/ durch Johannsen Prael / von unserem diener einem Uwer Fürstlich Gnaden zů gefallen vertütscht.

Vor viertzig jaren ist Bertram von dem hochgelerten Johanne Tritemio Abbt zů Spanheim under die fürnemen gelerten maͤnner gezelt / und sin leben beschriben worden/ also das man nit findt/ das sin leer und meynung vom Sacrament/ yena sye vonn der kilchen weder verworffen/ noch für kaͤtzerisch verdampt/ sunder vil mer vom Keyser Karle angenommen und gelobt worden.

Uß woͤlichem Uwer Fürstlich Gnaden erleernet und ougenschynlich sicht/ das Luters meinung niena so lange zyt/ wie er fürgibt und ruͤmpt/ geweret hatt/ ouch unsere warhaffte leer nie von der kilchen verworffen ist. Das widerspil aber findt sich gar klarlich/ das von der zyt Jesu Christi und siner Apostlen/ vil hundert jar/ das Nachtmal Christi von allen gloͤubigen/ wie wir leerend/ gehalten worden ist: und so offt dise ungegründte meinung uff die ban ye kommen/ so offt sind allweg fromme geleerte gotsfoͤrchtige maͤnner gsin/ die iro widerstrebt habend. Und mag Luter nit einen einigen bewaͤrten leerer anzeigen/ der siner meynung gsin sye/ biß uff Innocentium den Bapst den dritten des namens/ der von der schůl zů Pariß1215 soͤlichen artickel gesogen/ imm Concilio Lateranensi bestaͤtet hatt. Dann er was ouch magister noster/ dannenhar er siner schůl ze gefallen/ soͤliche falsche irrige unnd schaͤdliche meinung der kilchen für einen artickel des gloubens uffgetrochen/ und dem Roͤmischen stůl vil rychtag domit angerichtet hatt: dem doch aller Künigen und Fürsten rychtumb nit gnůg warend. Es hat ouch Luter selbs nit einmal geschriben/ diser artickel sye das buwfellig und krafftloß fundament des Bapstthůmbs/ das von not wegen fallen muͤsse/ so es weder uff Christum den waren grundstein/ noch uff sin leer gegründt ist. Und ist warlich spoͤtlich/ ouch hoͤchlich ze erbarmen/ das Luter, ein soͤlicher geleerter man/ ein soͤlich groß unnd schwaͤr houptwee überkommen hatt/ das er sprechen gethar / wenn er glych nüt umb syn meinung haͤtte/ waͤr im gnůg/ das es die kilchen so lange zyt gehalten hatt. Woͤlche kilchen, o Luter? die kilchen Christi? Nein nein/ das wirt sich mit warheyt nimmermee finden. Des Bapsts kilchen? die gadt unns nüt an, o Luter. Saͤhend Gnädiger Fürst und Herr/ soll des Luters argument hie gelten von lenge der zyt/ so stadt das Bapsthůmb noch styff/ dann sy immerdar uff die kilchen/ und laͤnge der zyt bochend: denn aber wurde alle leer des Luters zboden gstossen/ dann er ye anders leert/ dann es die Roͤmische kilchen so lange jar gehalten hatt. Wo bringt der zanck einen menschen hin? Luter solt ermaͤssen/ das sich die kilch uff Gottes wort gründet/ nit uff lenge der zyt.

Und ob er glych vermeint haͤlle dürre und ungezwyflete wort zehaben/ so muͤßt er die selben ouch nach der meinung des geysts/ nach art des gloubens/ und verstand der gschrifft ußlegen und verstan: sunst haͤtte der Bapst ouch haͤlle wort sines irsals/ namlich/ uff disen felsen wil ich min kilchen buwen. Aber so er dise haͤlle wort/ der gschrifft gemaͤß nit ußleyt und verstadt/ wirt erfunden ungetrüwlich mit Gottes wort handlen: woͤliches dem Luter ouch gschicht in den haͤllen worten Christi (das ist min lyb der für üch gegeben wirt) woͤliche er wider den sinn des geists/ wider die art des gloubens/ wider die gschrifft ußleyt und verstadt. Warend das nitt ouch klare haͤlle wort/ do Christus sprach: Es sye dann, das ir min fleisch essen und min blůt trincken/ werdend ir kein leben in üch haben? noch verstůndends etlich letz und wurdend vom Herren gestrafft. Also do Christus sprach: Loͤsend uff disen Tempel/ inn dryen tagen wird ich in wider uffbuwen. Diß warend ja haͤlle wort/ aber sy wurdend im zůr kuntschafft wider syn laͤben uffgerupfft und fürgeworffen. Ob den worten des Herren (das ist min lyb) sind wir nit uneinß/ wir verstond aber die wort Christi geistlich und wie dem glouben gemaͤß/ nit lyblich wie der Luter/ dann Christus selbs redt/ sine wort sigend geyst und laͤben. Wiewol Luter grosse arbeit hat Uwer Fürstlich Gnaden zebereden/ das sechst capitel Johannis ghoͤre nit ins Nachtmal / des wir uns hie yetzmal nit beladen/ aber was die alten leeren schrybend/ lyt am tag/ und ist wider den Luter. Ouch sind wir nit so geschickt/ nit so geystrych/ das wir von geistlichem essen reden koͤnnind noch moͤgind/ als Luter unns bezycht. Aber alle schmach unnd schand die er uns zůleyt/ woͤllend wir gern tragen umb der warheyt willen/ und umb des willen der für uns ouch geschmaͤcht ist/ werdend umb siner bitteren und gifftigen worten willen/ nit ein har breyt von der gfaßten und bekanten warheyt yena wychen noch abtretten/ ob glych Luter noch so vil pluderet/ woͤliches er uns ufftricht/ unnd ers aber warlich thůt. Dann was ist sin red imm sendbrieff an Uwer Fürstlich Gnaden anders/ dann ein hochmuͤtig/ stoltz/ verachtlich/ fraͤvel/ unnütz/ eytel unnd ungegründt gschwaͤtz und pluderen? Wir aber die uff die warheyt Gottes gegründt sind/ lassend uns mit pluderen nit abtryben/ sonder man můß gschrifft und warheyt bringen. Darumb lassend wirs alles fallen/ und verantwurtend allein das/ das wir keyne kaͤtzer noch rottengeister sind/ dann wir noch nie mit gschrifft überwunden/ noch des irrsals in einicherley bewyßt und überzügt sind worden. Wir erbietend uns ouch noch hütbytag/ waͤr uns mit gschrifft und goͤttlicher warheyt bessers moͤge berichten/ woͤllend wir wychen/ das aber biß har nie geschaͤhen. Aber Luter wil nit mitt gschrifft wider uns fechten/ sunder mit dem schwerdt/ ruͤft und schrygt Keyser/ Fürsten/ Herren und Stett an/ das man uns durchaͤchte/ vertrybe und toͤdte: ob das goͤttlichem geyst gemaͤß sye/ laß ich alle gloͤubigen urteylen.

Dwyl wir dann mitt der heiligen kilchen sind/ und mit der warheyt/ und mit dem warhafften verstand goͤttlicher gschrifft übereinstimmend/ von keinem nie mit goͤttlicher geschrifft des irrsals bezigen und widerwisen: wie koͤnnend dann wir rottengeister oder kaͤtzer verurteylet werden? Warlich, durchlüchtiger Fürst und Herr/ Luter brucht mit uns so gar kein Christliche liebe noch erbermd/ das wir ouch by unseren fyenden mee erbermbd und mitlyden findend. Ists aber nit ein grusam ding/ so vil kilchen/ in denen vil tusend frommer gloͤubiger menschen sind/ dem tüfel geben und verschetzen? Ulm/ Memmingen/ Eßlingen / Augspurg/ Costentz/ Lindouw/ Zurich/ Basel/ Bern/ Glariß/ Soloturn/ Schaffhusen / Appenzell/ Mülhusen/ Biel/ all dry pünd/ Sant Gallen/ das Ryntal/ das Turgoͤuw/ Straßburg/ und andere vil Stett/ Land/ Fürstenthůmb/ die in disem artickel dem Luter nit anhaͤngig/ die alle ja also verschetzen und hochmuͤtigklich verwerffen und dem tüfel geben/ wil sich christenlichem geist nit zůziehen. Und ob wir glych in üsseren dingen zwyspaltig werind und irrtind/ muͤßte man darumb glych die schwachen bruͤder also dem tüfel geben? woͤliches Evangelium leert doch das? wo hat man ye soͤliches von uns gegem Luter und sinen anhaͤngern vernommen? wiewol wir unsere meinung uß Gottes wort/ mit starcken gründen der gschrifft/ offt wider in erhalten habend/ und noch/ wo es not ist/ erhalten woͤllend. Wir moͤgend ouch sin meinung der geschrifft ungemaͤß/ gnůgsam anzeigen/ ja das sy wider die art des gloubens ist/ ein uffheben unnd entloͤsung des gantzen lydens und opffers Christi am crütz gethan. Noch habend wir in und die im anhaͤngig/ weder mit worten noch hertzen nie gekaͤtzert/ nie dem tüfel geben/ nie heissen veriagen noch toͤdten. So die Apostel zů Hierusalem radt hattend der beschnydung halb/ gab Petrus ein radt, der naͤher sich zů Christlicher fryheyt und warheyt zoch/ weder der radt Jacobi/ noch laͤsend wir nit das Petrus darumb Jacobum verschupfft/ oder so gar schmaͤchlich verachtet habe. Paulus der volkomner verachtet nit den radt Jacobi/ der aber den ceremonien etwas zůgab/ laßt sich beschaͤren und richtet die glübt uß/ damit die liebe nit zerrüttet werde. Unnd diser volkommen man ward alles allen menschen umm Christus willen. Moͤgend dann wir umb Christenlicher liebe willen/ umb fridens und eintrechtigkeit willen/ nitt geduldet werden/ so wir doch mit gschrifft nie berichtet noch überwunden sind?

Wie ist aber der tüfel unser meister? so wir uns allein uff Gottes wort buwend? Wir besorgend warlich/ der Luter houwe zů wyt über die schnůr christenlicher bscheidenheit/ er solt billich des spruchs Pauli gedencken: Wer stand der lůg das er nit falle/ und wüssenn das hochfart dem Herren/ deß diener wir sind/ seer mißfalt. Mag doch Luter (dann er ouch ein mensch und menschlichen anfechtungen nit gar on) ouch fallen und irren. Hat in dann Gott anfaͤnklich zů sinem werckzüg gebrucht (das wir ouch bekennend) solt er dest mee demuͤtig syn und danckbar/ solt darumb uns nit so gar stoltz unnd hochprachtlich verschupffen . Dann wenn man vons tüfels schůl solte reden/ bsorg ich er wurde in siner bekanntnus ouch etwo ein stuck daruß genommen haben: dann alle frommen wol wissend was es für ein bůch ist/ wie es der warheit und glouben zůstimpt. Wir lassends aber hie von züchten waͤgen blyben mit sampt anderm hitzigem zornwuͤtigem schryben/ so er imm saͤndbrieff trybt: als so er den frommen Carlostad so gar verachtet/ das er im ouch sin hertz und gwissen urteilet. Item das er den thüren und frommen man Ulrichen Zwinglin/ nach sinem tod/ mit so laͤsterlichen worten antastet/ das doch hyn Heyden nit gebrucht/ und schantlich gehalten wirt. Wir erkennend Andream Carlostad für einen frommen biderben man/ der weder siner leer noch laͤbens halb straͤfflich by uns wont. Wir versaͤhend uns ouch (so vil wir usserlich urteylen moͤgend) sin hertz und gwissen sye froͤlich in Gott. Den Zwinglin haltend wir für einen frommen thüren leerer der warheyt/ beruͤmend unns sines namens nitt/ den man uns zů schmach ufftricht/ dann wir uns niemants ruͤmend dann Christi. Wir erkennend in für einen waͤrchzüg Gottes/ durch den uns Gott siner warheyt berichtet hatt: inn sinem laͤben hatt er grosse sorg/ muͤhe und arbeyt gehebt/ wie er die warheyt und eer Gottes pflantzte/ wie er die nidergfalne geraͤchtigkeit und fromkeit/ die inn einer Eydgnoschafft ze grund gangen/ wider uffrichtete/ umb des willen hatt er alles moͤgen lyden unnd thůn. Und domit er soͤlichs volfuͤrte/ ist er gstorben/ und hat sin blůt umb keiner mißthat willen vergossen/ sunder das er Gottes eer und gmeyne geraͤchtigkeit moͤchte wider uffrichten: des sind zügen alle frommen inn der gantzen Eydgnoschafft. Warumb woltend dann wir in nit moͤgen einen marterer/ das ist einen zügen der warheyt nennen? so er die warheyt biß inn tod bekennt und verjaͤhen hatt/ ja umb der warheyt und geraͤchtigkeit willen erschlagen ist?

Das aber die Baͤpstischen uns angesiget/ und die unseren erschlagen habend/ nimpt Luter zum argument und bewaͤrung/ das unser gloub nit geraͤcht sye. Wie aber diß sin argument in der gschrifft grund habe/ gib ich allen raͤchtverstendigen ze urteilen. Was Josias gloub darumb ungeraͤcht/ das er imm krieg umkam? Hatt der Türck darumb den raͤchten glouben/ das er vil Christen erwürgt und inen ansiget ? Hatt Nabuchodonosor den raͤchten glouben/ darumb das er die Juden gfangen hinfůrt? Ach wie ist uns doch der man so gar verwaͤchßlet ? Wir bekennend zwar/ das wir billich von unser sünd waͤgen gstrafft sind/ und von des gloubens waͤgen/ nitt das er ungeraͤcht sye/ sunder das wir im nit gmaͤß gelaͤbt. Und wiewol soͤliche straff groß/ ist sie doch minder dann unser mißthat erforderet: und ist ouch nit so groß/ dann das wir die vaͤterlichen růten und hand Gottes/ ja sin vaͤterliche trüw gegen uns noch erkennend/ und inn siner leer und gnaden mee dann vor ye zůnemend und bevestnet sind. Es soll unns ouch soͤlicher fal von unserem Herren und Gott/ dem wir noch styff anhangend/ keins waͤgs abfaͤllig machen/ so wyt faͤlts das Luters Prophetzy und zeychen düten waar sye. Wir sůchend aber nit unser eer/ woͤllend ouch uns hiemit nüt ruͤmen: das wir sind/ sind wir uß Gottes gnaden. Begerend ouch hiemit dem Luter sin eer und namen keins waͤgs zeschmeleren noch zeverkleyneren/ verachtend im sin leer nit/ haltend in für einen thüren diener Gottes/ erkennend daß Gott vil unnd grossen nutz durch in inn aller waͤlt geschafft hatt. Das woͤllend aber wir in ermant haben/ das er gedencke/ das er ouch ein mensch sye/ und das es nit alles geist sye das er schrybt/ redt und handlet: das er ouch irren moͤge/ das er sine armen mitarbeiter imm waͤrck Gottes (uns) nitt so gar verachte. Dann ouch Petrus nach dem empfangnen geist/ geirret/ und von Paulo straff geduldet hatt. Wir sollend ye fleisch nit für geist verkouffen. Saul was von Gott erwelt/ irret ouch in vil dingen. Des glychen David ein mensch nach Gottes willen/ wie kan der sinen eebruch under dem geist verkauffen? Es hatt doch Moses der getrüw diener gefaͤlt und gestruchlet. Darumb bittend wir den Luter/ er woͤlle uns für bruͤder erkennen/ sich nit von uns abtrennen/ uns nit verschupffen/ wir erbietend uns alles fridens und liebe gegen im/ allein er tringe uns nit von erkannter warheit.

Und dwyl aber Luter uns, den übelthaͤteren/ die umb ir mißthat hinuß an die richtstat gefuͤrt werdend/ verglychet/ ist unser demuͤtig bitt an Uwer Fürstlich Gnaden ouch an alle frommen Fürsten und Herren/ Stett und alle Staͤnd des heiligen Roͤmischen Rychs/ man woͤlle nitt glych uffs Luters schryben/ einen biderben man mit wyb und kind ins ellend tryben/ der nit glich kan glouben was der Luter gloubt. Oder wo habend wir deß yena byspil in der leer Christi und der Apostelen? Uwer Fürstlich Gnaden woͤlle vil styffer sin/ dann das sy sich ab einer soͤlichen gschrifft eines menschen lasse wider fromm unschuldig lüt verwilden. Nun vermeynend wir ye ouch Christen sin/ ob wir glych in disem artickel und mit den bilden dem Luter nit koͤnnend zůfallen. Die liebe mit dem glouben der worten Gottes ist uns der thürest schatz. Den glouben der gschrifft haltend wir thür und hoch/ forschend im taͤglich flyssig nach/ bittend Gott das er uns die gschrifft ufschliesse. Wo wirs ergryffend/ sagend wir im danck/ und lassend uns davon nit abtryben/ wir woͤllends ouch weder gemeert noch gemindert haben. Der heiligen vaͤtteren gschrifft nemmend wir mit aller zucht und eererbieten an/ verglychend sy flyssig mit der gschrifft/ und haltend sy inn denen eeren inn denen sy begerend gehalten werden: was die gschrifft nit verwirfft/ verwaͤrffend wir ouch nit: wir bietend allen menschen liebe an/ und nemmend sy ouch an von anderen. Und so glych etlich irrend/ verwaͤrffend wir sy darumb nit glych/ sind alle zyt bereitet mit senfftmuͤtigkeit bscheid der leer zenemmen und zegaͤben. Wir spraͤchend nit das es schlaͤcht brot und wyn sye/ redend ouch nit verachtlich darvon: sunder nennends mit Paulo ein brott des Herren/ ein brot der dancksagung/ nennends den lyb und blůt Christi mit Christo. Aber die zůgethanen wort vom Luter und anderen/ uß woͤlichen zangk und strick gefaßt moͤgend werden/ vermeinend wir unnoͤtig/ ergerlich/ unnd gfarlich sin. Wir bekennend ouch und gloubend das der lychnam Christi/ der für uns in tod gegeben/ unnd sin blůt das zů abwaͤschung unserer sünnd am crütz vergossen ist/ warlich imm Nachtmal zegegen sye unnd vonn den gloͤubigen genossen werde: aber der gstalt wie es dem glouben und gschrifft gemaͤß ist: wie es von den gloͤubigen verstanden und genossen mag werden/ und so vil es ein spyß der seelen syn mag. Wir begaͤrend offenlich und klarlich vor unseren kilchen von disem handel zereden/ unnd der maß, das uns die kilch verstande. Wir gand mit warheyt umb/ und begerend nieman zebetriegen/ nieman zeverfuͤren/ darumb schücht unns ab dem liecht gar nüt. Diß sye, hochgeborner Fürst uf des Luters anklag unser kurtze antwurt an Uwer Fürstlich Gnaden und alle gloͤubigen: die wir umb Gottes willen bittend in disem handel nit zegahen. Volge man dem rat Gamalielis / ist unser sach nit uß Gott so mag sy nit bstan: ist sy uß Gott (deß wir nit zwyfel tragend) mag sy nieman ußrüten noch temmen. Was wil man sich dann eintwaͤders vergaͤbens bemuͤgen/ oder wider Got verhouwen?

Des Bertrams buͤchlin/ so wir Uwer Fürstlich Gnaden zůschrybend / ist von uns nit ußgangen/ das wir ütz unserer meinung zebevesten darmit woͤllend ynfuͤren/ sonder darumb das Uwer Fürstlich Gnaden und alle menschen sehind/ das vor zyten unser meinung von den frommen leereren ouch gehalten ist. Es woͤlle sich ouch nieman ab etlichen worten die von etlichen leerern in disem buͤchlin gebrucht werdend ergern/ als consecrieren/ opfferen/ altar/ wasser in wyn thůn etc. Dann sy uf ir zyt doch in gůtem verstand also zereden gepflegt habend/ vil mee saͤhe man uf den zwaͤck daruff der fromm Bertram yemerdar tringt: namlich/ das der lyb und das blůt Christi/ das am crütz für uns geopffert ist/ nit lyblich waͤsenlich da sye/ sonder allein imm glouben/ in der gedaͤchtnuß/ in mysterio et sacramento. Nit on gefaͤrd/ sunder uß goͤttlicher fürsichtigkeit ist diß buͤchlin yetz zů unseren zyten herfür kommen: dann wie es vormals Keiser Karle zůgeschriben ist/ also verhoffend wir/ Keyserliche Maiestat werde soͤlichs buͤchly nit verachten/ sunder, dwyl der namm mit einstimpt flyssig laͤsen/ und sich der meynung ouch halten.

Wir bittend Uwer Fürstlich Gnaden woͤlle uns armen unwirdigen unser schryben nit verargen/ sonder es der meinung, wie es geschaͤhen von uns empfahen und zů guͤt halten. Geben uf den sibentzehenden tag Brachmonadts.

Uwer fürstlich gnaden willige/ diener des worts zů Zürich.