Dise botten kamend, brachtend mit inen den Carolstat, es sach grad als were diser handel langest überdoplet, Ich aber als der ain gute gwüssne hatt, und der warhait wol trüwet, wartet also nit dister minder wenn man mir zur verantwurtung verkunte, versach mich und hoffet man wurde mich nit onverhört verdammen, wust ouch wol das ich, von gots gnaden also glert und glept hat, das ich mich vorm rechten nit must forchten. Do nun Carolstad anfahen wolt predigen, verharret ich zu Altstetten, wolt also der sach usswarten, und vor der ersten predig, wie Carolstad schon in der kilchen was, gieng ich zu im grüsst inn, batt dar by (dann ich versach mich etwas) ob im wurde von mir, angebenn wort oder werck, damit ich geacht strafwirdig, solt er mich vorhin hören, und nit lichtlich, böses von mir glouben, were urbütig ouch im rechnung zegeben etc.

Das volck ward hie zwüschend unwillig. Carolstad was ime der sprach halb seltzam, der Furtmuller noch nit jederman erlaidet, hatt sich ouch danocht dermassen ghalten, das der warhait gunstige noch nit so übel von im hieltend, so wolt er ouch nit wychen sonder dess rechten erwarten und sich verantwurte, Carolstad fieng an, an der Cantzlen, mich stupfen, maint mich dem volck zelaiden, liess sich (doch noch nit so offentlich.) merken als ob ich von unserm herren Christo gnug schlechtlich geprediget, die lüt uff die werck meh dann uff den glouben gewysen, und hat mich aber nie gehört predigen, noch spräch mit mir ghalten von den dingen, so ich gedenck traduciert sin , stupft so hefftig das ouch der gmain man, die sach anfieng mercken, und ward Carolstads sach, hiemit nit besser, die kilch hat sich gspalten, der furtmuller was noch vorhanden etc. ich aber hielt mich still, gieng aber nümen zpredig, sorget, ich möcht etwan Carolstads luge nit ertragen, die er anfieng offentlich über mich uß schryen, ich wer gern abzogen, so kont ichs eeren halben nit thun, wolt das liecht nit fliehen. darob aber Carolstad je lenger je wunderlicher ward, und maint, er welt das volck unwillig machen, das (wie er sait) an mir hanget, das er mich deshalb in ainer predig, mit namen nampt, und unwarhafftigklich mit luter stimm und hessigen worten, sprach, der Furtmüller hatt üch antichristisch verfürt, O lieber Michel schow was für unrath hieruss ist entstanden, gät noch hütigs tags, wie es vor ougen ist, der armen kilchen zu Altstetten um die hennd,

Do ich nun nit wychen wolt wie ich ouch nit kont, maint ouch wie fürgeben ward, der Carolstad were nun gen Altstetten gelichen, bis ich mich verantwurtete, understant Ama vogler mich mit hunger abzetriben, dann wie mir von hoptman Fryen anwalten zu S. gallen, das predigen ward verbotten, saitend sy mir danocht die narung oder pfrund nit ab, der Vogler aber, lacht wol uss sin selbs gwalt one alle recht und verhör, nam und brach mir min narung ab, wolt ich essen und leben, must ich min handtwerch tryben und an den tagwan gon, mit grosser arbait, min narung gwünnen. Da was bim Vogler und Carolstad, wenig barmhertzigkait, ouch by ander lüten, Den Vogler forcht jederman, hat sin gwalt, by namhaften lüten, ouch bim landvogt der massen erzaigt, das er mencklichen ein schrecken was, Ach lieber Michel, ich entwirff dir den handel bloß, wüstestu den rechten grund, du wurdest dich noch jetz uber mich erbarmen. Da der herpst zuher kam und man schier wimen solt, ward mir der wingart, darin ich min armuͤtli glait hat entweert, krutgart bomgart, darin ich vil hat pflantzet ward mir uss ama Voglers befelch, in Carolstads und Voglers bysin, vom waibel, vor oder one recht, desshalb mit gwalt gnommen, es bekumert mich ouch, lieber Michel das Carolstad so unmilt gegen mir was, by welchem man doch, als by ainem fürtreffenlichen glerten man meh beschaidenhait solte funden haben.) doch schlug untrüw sin eignen herren, Carolstaden hat Ama Vogler in sin aigen hus gsetzt, ainem schloss glych, ich aber sass in der herren von Altstetten hus, die haltend mich noch nit geurloubet, Aber ich erlebt und sach, das der Vogler und Carolstad, so unains ward, das sy gar von ainander tailtend zoch Carolstad in ain armes hüsli uss des Voglers palast, bis das er gar erbermklich, vom stettli Altstetten hinweg für wie ain armer bettler etc.

Do ich nun sach das ich zu Altstetten nit mocht zurecht kommen ouch mit Carolstaden, siner schmachred halb, zoch ich gen Zürich, hie zwüschend hat sich vil mercklichs noch verloffen, lass aber das selb ston bis zu siner zyt, Und erlanget von minen gnädigen herren ain tagsatzung, uff welche ich antwurten solt uff die Voglerschen articul, dess ich mich von hertzen frowt, dann gott hab lob, die warhait ist uff miner syten, In dem aber, ach gott, do fiel der ellend krieg yn, bald kamend zu end dess kriegs die fünf ort gon Altstetten .