Frid unnd erkantnis der gestrackten gerechtigkeyt Gotis/ von Gott dem lebentigen vater Christi Jesu unsers herren. Euch bruͤdern/ die yr mich berufft. Amen.

Bruͤder/ ir wundert das ich still sweig/ unnd nichts schreib/ und beschuldigt meine faulheyt do mit/ und thut als ettliche/ die teglich uber mich schreyhen. Ich verlaß ein bessere arbeyt der lection/ und ube mich in eusserlicher leihischer arbeit/ und unthersteht euch mich zum schreiben zedringen/ als wer ich euch pflichtig mit schreiben zu dienen/ gleich als moͤchte solcher dienst one ferligkeyt und nachteyl des geystes gescheen. Ich will aber (hoff ich) euch genugsame ursachen antzeigen/ unnd euch mit schrifftlichem gezeugnis fahen/ und do hin fuͤren/ do ir bekennen muͤst/ das keyn eusserlichs bekentnis (als schreiben und predigen der warheit) one ferligkeyt/ und one schwinde anfechtung des geystes gotis geschicht. Drumb auch mir nutzer wer/ still stehn/ unnd alleyn hoͤrenn die stym des preutgams / dan auß dem schlaff und gehoͤr lauffen.

Vor allem wisset yhr die uberschwenckliche boßheit diser zeytten in wellichen die lieb erkalt und erloschen/ das die welt keyner muͤh spart/ keynes scheltworts sich schemet/ wider Gotis wort zu pellen. Man hoͤrt grymmig zeen klappern/ unnd sihet die auffgesperte rachen der Lauhen unnd Beren/ derhalbenn die Evangelische prediger vorursacht/ widerumb etwas zů vil scheltenn und hoͤnen. Vorgessen auch das sie nit ubel reden sollen/ sondern nur ubel hoͤren/ und schemen sich nit das sie yhr buͤchleyn mehr mit scheltworten erfuͤllen/ dan mit goͤtlichen reden und schrifftlichen ursachen ires syns und vorstands/ doher dan der grosse schade (als ich acht) ist herkhomen/ das der gemeyn man so spitzige und Ygelische zungen erlangt/ das wenig von tapfern und ernstlichen sachen/ ernstlich reden/ alles darumb/ das sie gut unnd boͤse/ mit gleychem fleyß ingesoffen haben. Dadurch ist auch zum teyl bruͤderliche liebe/ in der Aschenn erstickt/ und die schreiberey geneygter zů spotten und hoͤnen/ dan zů untherweisen und leren.

Darin aber beschuldig ich den leser mehr/ dan den schreiber/ das der leser on urteyl und erkentnis/ alles ins maul und in bauch raffelt/ das ym in den buͤchern/ furgetragen ist und hellt das boͤß als gut.

Die aber geschriben haben/ seind durch ungestymikeit der frevelichen widerparten bedrungen/ sich in werken der finsternis zu uͤben/ und boͤsen lust mit unlust zudempfen. Noch heut hat der unlust kein ende. So seind die auserwelten auch nit itzt zusamen bracht von den vier winden und die boͤsen nit außgeworffen von den guͤten/ ya die welt fuͤrt teglich ir boßheit ins groͤste wesen/ und bauhet berg der boßheit/ do sie zevor nur kleine huͤgelin bauhen tet/ und steht aller mutwill und duͤrstikeit in seiner glud und hitz. Man betracht nit was zuthun ist/ sondern so vil yeder man boͤß thun magk/ so vil thut er. Sie vorlachen Hiere. 48. Israel als hetten sie es unther den dieben begriffen und zerpflockens als ein Weyh die jungen huͤnlin/ unnd springen uber yhm/ als ein geyl kalp uber frischer weyde/ und uber neuem suessem graße. Sie tund nit wider Israel nach irem vermoͤgen/ sonder uber ir vermuͤgen/ und mehr dann sie thun kondten/ mit zungen/ mit worten/ mit teten und als Moabitische kinder.

Lieben brůder/ wen einem uber seinen hals ein Moab oder ein Babilonischer knecht koͤmpt/ so ist es schwer das er sich in schultiger messikeit kegen ihm erzeig/ und vor holhippelischem fluchen und vormaledeyhung enthalte.

Ir wisset auch/ wie sich die spothafftige Philistyner umb uns gelagert/ und auß iren gezelten/ fur uns her tretten/ gleicher massen sie/ in vorigen zeiten/ auß iren hůtten/ wider Gotis volck mit puchen und trotzen theten unnd plerten/ als wer der got des Israhelischen volckes taub und hoͤret nicht/ blindt und sehe nit/ oder ßo krafftloß/ das er sein volck nit koͤnt schutzen und erretten/ oder in der massenn als wer der lebentig Got/ so liebloß unnd grimmig/ das er sein volck wolt verlassen und in ewickeit mit yhm zoͤrnnen. Euch ist kund/ das wir mit den Moabitern. Amoniter. Babyloniern und andern vilen feinden gotis/ als mit heres krafft umbgeben/ und nichts gewisser haben/ den zuhoͤren wie sie uns vorspotten/ unnd schmehen werden.

Auch ist es euch unverborgen/ das ich mich schwerlich vor inen bergen kan/ und das ich uff ir unuͤtze scheltwort one uppikeit nit antworten kan/ dadurch ich den unverstendigen/ einen strick ires erkentnis moͤcht legen (als etlich than haben) unnd mich ein ursach setzen/ des abbruchs Osee. 4. goͤtlicher liebe unnd der spottworten/ welche die narren mit den guͤten einlesen/ das dan got und seinem volck/ zu unehren und nachteil gereichen moͤcht.

Da habt ir ein ursach/ worumb ich biß her/ in gutem frid unnd still gesessen bin/ unnd hinfůrt sitzen wolt. Nemlich das ich one hoͤnreden schwerlich schreiben/ und durch boͤse wort/ meine bruͤder ergern moͤcht/ das yhnen nicht fromen/ und mich ins gestreng gericht moͤcht brengen/ in welchem meniglicher/ vonn itzlichem unnuͤtzen wort/ rechenschafft geben/ und umb ein gering woͤrtlein Racha oder Narr/ ein unertreglich hitz des feurs leyden muß.

Die ander sach ist/ derhalben ich nit gern schreib/ das ich den grossen unfleyß/ in druckung meiner bůcher/ nit one beswerung/ vermerckt hab. Ir wisset wol das mir ettliche/ nit alleyn wort vorwechselt/ sonder dartzu die sententzen vorfinstert/ unnd mit nebell der blindtheyt uberschuttet haben/ und das mehr ist/ in ettlichen meinen bůchern/ haben sie Columnen vorsetzt/ und den synn und inhalt derselben bůcher/ gentzlich vorstoͤrt.

Nů weyß ich/ das sollicher unfleyß/ mir zu vil nachreden und dem nechsten zu keyner furderung und dienst komen ist/ drumb hab ich auch an mich halten woͤllenn/ und nichts mehr schreyben.

Weyl ir aber sprecht/ unnd geredt mir / das ir selbert notturfftigen fleyß woldt furwenden/ unnd vorschaffen das alle ding mit gnugsamer rechtfertigung auß gehnn sollen/ wil ich diese ursach faren lassenn. Sonderlich dieweyl ir disse ursach wider mich furwendet/ unnd sagt/ das ich dester lieber soldt schreyben/ uff das solche seumigkeit/ unfleyß und mangel/ durch euren grossen fleyß erstatt und erfult werden. Das fur die andern ursach.

Was werdet ir aber zů dem sagen/ das niemants schreyben/ ader predigen/ ader irgent ein offentlich ampt Gotis eusserlich thun solt/ es wer dan/ das yhne Got darzů erwelt hette. Das yr unnd andere meyne bruͤder/ mich beruffen und auß schicken/ ist ein menschliche und eusserliche sendung/ die yhm grund vor Got nichts werdt sein magk/ ja auch wider Got.

Und in der warheit/ ist solche menschliche beruffung/ ein ferlich und betriglich pfandt/ und die nachvolgung uff menschen beruffung/ ist vormessen und frevelich/ so offt Gotis innerliche beruffung nit zu scheubet/ und den beruffenen nit vorsichert/ inwendig/ als ein uffgedruckter sigill und gewiss pfandt. Dan es ist ein erlogene und gleißnerische nachvolgunge/ voller sauerteygs der Pha riseyer / wenn sie allein vonn creaturen ist/ unnd nichts drunter ist.

Und wen sie nit vormessen und frevenlich/ oder ferlich und betriglich wer/ dannest must der rum in Got vorloren sein und der beruffen koͤnt nit (als Paulus) sich in Got ruͤmen und freyen. Seintemal Paulus unverholen spricht. Ich byn nicht von menschen beruffen/ nach durch eynen Gall. 1.eintzlichen menschen/ sondern durch Jesum Christ/ und Got den vater gesetzt etc.

Das bedingt sich Paulus gar herlich und gar noch/ im anfang aller sendbriefe/ das er nit durch menschen/ noch irgent von eynem menschen ein Apostel erwelt sey/ und troͤstet sich des/ unnd trotzt darauff/ nemlich in beyden Episteln zu denn Corinthern/ onfencklich sagt Paulus. Ich bin ein Apostell beruffen durch Gotis willen/ zů den Ephesern/ Collossern/ an Timotheon/ ein Apostel nach dem befelh Gotis/ in der ersten und in der andern saget er/ ein Apostell nach dem willen Gotis.

Meint ir das Paulus vorgeblich sich beding/ das er von Got/ durch Gotis willen unnd befelh ein Apostel Christi sey? Was koͤnen aber moͤgen sich ettlich ruͤmen/ die Gotis lebentige beruffung abschneiden und vorlachen? Wie woͤllen sie ir knechtschafft Christi und Apostell ampt troͤstlich und frey vor Gotis augen fuͤren/ wen sie weder von Gotis willen noch bevelh wissen? und mussen sich allein des ruͤmen/ des sich Paulus schemet/ nemlich menschlicher beruffung. Wen ich von nichts anders dan von eurer fodderung wisset/ was wurde mir Gott sagenn? ungetzweyfelt Hiere: 23.das. Er laufft und ich habe yn nit gesandt/ er redet unnd prophezeyt in meynem namen/ unnd ich hab yhm nit zůgeredt/ als Got den Propheten sagt/ die sich yre eygen dancken und dreume liessen beruffen und jagen/ und saget. Sie lauffen und ich sandte sie nit. Sie prophezeiten/ und ich redet yhn nit zů etc.

Ap ich gleich Gotis wort predigen und schreiben wolt/ hett ichs doch nicht macht offentlich zethun/ one Gotis befelh/ den Got moͤcht mir sagen/ als er den ungesandten saget. Sie gehn oder lauffen etc.

Setzt es do hin/ das ich Gotis wort/ one wandel/ sonder gestrackt vorkhundiget/ tet aber das vorkundigen nit auß Gotis geheyß und willen/ muͤst ich nit foͤrchten das mir Got moͤchte sagen/ hab ich dirs bevolhen/ das du mein wort von dir selbert/ in deinen mund setzest/ und vorkuͤndigst dem volk? das weis ich furwar/ predig oder schreib ich offentlich/ one Gotis erkanten willen/ unnd gepot/ das ich ein freveler und streflich bin.

Rho. 10.Es spricht Paulus selberst/ wie koͤndten sie predigen/ ehe sie gesandt sein? also auch/ wie kan einer fruchtparlich schreiben/ zu dem volck/ wen er nit ist von Got dazů verordent?

Die Aposteln seind nit so vormessen gewest/ das sie an Act. 1. Judas Iscarioths stadt/ einen andern erwelten/ der Christum zeuget und vorkuͤndiget/ eh sie durch ein loß/ gotis willen erkanten. Dürfft ir nů so frisch und keck sein/ das ir mich zuschreyben noͤtigen doͤrfft Gotis willenn unerfaren?

Es ist fast ein ding von Christo tzeuknis geben unnd schreiben/ oder predigen/ denn der geist gibt alle disse getzeugnis / es vermagk auch keiner von Christo zeugen/ es sey dann das Gotis geist erstlich yhm getzeugnis gebe/ als Christus spricht. Er wurt getzeuknis von mir geben/ und ir werdet auch zeugen von mir. So auch kan keiner in der Johan. 15.warheit von Got schreyben oder predigen/ wenn yhn Gotis geist nit zůvor in die warheit gefurt/ und betzwungen hat tzů schreyben/ reden/ oder beteuren.

Wir alle wissen auch das die Aposteln ir bekentnis und zeucknis und lahr Got zůmessen/ und unverholen sagen das gotis geist sie zů zeucknis getriben/ als Christus spricht. Ir werdet die crafft des heiligen geistes enpfahen/ und werdet mein zeugen sein. Das Gotis geist treib und dring zu bezeugen Christum/ weiset auch an die historien Pauli/ den Gotis geist zwanck zubezeugen in Corintho den Juden Jesum/ und am andern ort vorstopffet Got Paulo seynenn mundt/ das er nicht von Christo reden vermoͤcht.

Nů ist Paulus vom geiste Gotis gefurt und bezwungen/ das er Christum zeugen must/ und wo der geist nit treyb/ do kont Paulus auch nicht zeugen. So solt ich ein laher auß dem vorgangen geschicht ziehen/ das ich auch von Christo nicht zeugen solte/ ich wurd dann durch die kreffte des geists Gotis getriben unnd nicht vonn euch menschen.

Wie es mit dem zeugen zugeht also geths mit vorkuͤndigung Gotis wort/ weil die Aposteln/ als dann Gotis wort mit freidikeit redten/ als sie des heiligen geistes vol waren.

Summa summarum/ sollen wir fruchtparlich und unstreflich predigen oder schreiben von Got unnd Christo/ so muß uns Gotis geist datzu bereitten/ und verordnen/ troͤsten und treiben/ und wir muͤssen den befelh von got durch Christum enpfahen. One gotis befelh und one erkanten willen Gottis/ ists eittell vormessenheit/ wenn sich einer in ein solchs hochs ampt setzen lesset. Es wer dann/ das got stum wer wordenn/ unnd doͤrffte nit mehr leren oder ziehen/ unnd Christus nit mehr bey uns seyn woͤlt/ biß zum ende der welt. Ap gleich engeln und menschen/ einen/ zu predigen oder schreiben/ uffweckten/ es wer dannest vor got nit gut/ und den menschen unerschislich.

Das aber got allein seine knecht auffweck/ und uff ire fuesse stell und zů offenbarung gotis herlikeit dring/ und fruchtpare arbeiter oder schniter in seyn erndte schicke/ und kein andere gewalt/ hauffen/ gemeinde/ oder eintzellige person/ weyset die warheyt/ welche spricht. Ir solt den herren der erndten bitten/ das er arbeiter oder Matth. 9.diener in sein erndte send. Stuͤnd es in menschen gewaldt diener in die erndten zůordnen/ wer die erndt ir/ und nit Gotis/ und menschen weren herren daruber/ unnd nicht got. So wer auch die lahr Christi unnutz/ der sagt. Bitt den hern der erndten etc. Wer do bitten soll/ der hat das nicht in seiner macht/ das er mit gebet erlangen muß. Nů aber weyl got allein ein got und herr seines volcks unnd seyner erndten ist/ zymet es nicht denn menschen in ein frembd erndte diener zůschicken. Sie sollen Got bitten das er hyrtten setze/ uber seynen schaffstal/ unnd sollen sich der herde Gotis nicht mechtigen.

Auß dieser ursach halt sich keiner fuͤr einen Pastor/ ecclesiasten oder Bischoff/ er sey dann von got/ dem selben volck/ erwelt/ dem er obligt. Ich weiß das sich keiner ruͤmen darff/ das er eines volcks Pfarrer sey/ er wisse dann fur war/ das er von got gesetzt sey/ des die erndte ist/ und der die arbeiter allein dreyn gibt. Als wenig einer ein hirt ist/ wenn yhn Got seinen scheflein nit geben hat/ unnd so wenig einer gewißlich weiß/ das er von got ein hyrt vorordent ist/ wenn er nit eigentlich gotis willen und gemuͤt erlernet hat/ das yhnn Got erwelt hab.

Das werck der arbeyter und hyrtten erinnert mich/ das ich an mich halt/ denn die rechten hyrtten und schnitter der ernden unnd volcks habenn ein oberkeyt/ uber die/ tzů denen sie got schickt (nicht das sie boͤses gewinß halben/ den leuthen sollen herschen) sondern sie seind uber das volck/ in der weyse/ das sie Gottis wort mechtigklich/ und mit freydigkeit fuͤren/ und rauffen auß/ unnd tzerbrechen/ und tzerstreyhen/ unnd tzerknirschen mit gotis wort/ als mit eynem scharffen schwerdt und wichtigen hamer/ ein igliches hertz/ darnoch es geschickt ist/ und darnoch es trifft. Widerumb sollen die rechten hirten das tzerstraut sameln/ das zerbrochen gantz machen/ das fluͤchtig und irrige widerbrengen/ das krancke gesundt machen/ unnd durch Gottis wort alles außrichten/ das sein eygenschafft foddert/ unnd nymer one frucht wider keren/ unnd der gleychen tausent wircken und thun/ der ich keines vermagk. Weyl ich dann die fruͤchte nicht in mir befinde/ wer mirs besser/ das ich mich des baumes oder der wůrtzeln nicht untherstuͤnd/ und wartet noch/ biß ich wunderbarlich angetzundt unnd uffgericht wuͤrd/ von dem geist/ der iglichen treybet zuͤ offenbarlicher verkuͤndigung/ und alle hertzen in seiner handt hat/ und iglichen hyrten bewegt/ und reden macht/ und auch stillet/ wenn er wil. Das aber sich keiner fuͤr einen hirten oder Pastor halten magk/ er pruͤfe dann solliche kraffte/ des wort Gottis in sich/ ist in der schrifft angezeygt. Ezechielis. 3. Hieremie. 1. 33. Johannis. 10. und doher gehoͤrt der spruch Pauli/ der geyst der prophetzeyen ist den Propheten untherwurffen/ wie wol es den fleischlichen augen frembdt ist.

Die innerliche beruffung ist koͤstlich/ sicher/ und nœtlich / denn sie gibet ein warhafftig getzeugknis/ das der beruffen / des herrn und gottis/ ein knecht ist/ des die schefflein seindt. Wer sie befindt unnd recht versteht/ der geht durch die thuͤr ein/ der sie aber nicht kan befinden/ der geht uber die mauer ein/ unnd durch den weegk/ durch welchen dieb und moͤrder eingehn.

Wir seind aber unbedechtichge leute (ich so wol als ein ander) das wir in gotis sachen so bald furt faren/ unnd lassen uns als ein roͤr einen kleinen wint uff heben/ und tzu knechten gotis machen/ unnd gehn tzů groͤssern oder faͤrlichern Tyrannen/ oder ye zů gleichen/ dem Pharaoni/ und Sedechie/ und Nabuchodonosor/ und wollen nicht behertzen/ wie schwer sich Moses. Hieremias. Ezechiell und in gleicher sach Gedeon machten/ als sie got beriff und zum volck schicket/ die uns billich ein exempell seyn solten/ das wir mit grosser bedechtickeit/ das ampt und schwert gottis fuerten/ dann ichs meines teyls/ biß her gefurth hab.

Nůh versteht doch fleisch und bluͤt/ das die geystliche nit verstehn wollen/ unnd schemet sich mehr frevelicher that/ dann die geistliche. Sih/ es ist keiner/ der sich/ fur eines Fursten oder Koͤnigs diener halten darff/ er versteh dann/ das yhn der Fürst oder Koͤnig darfur hab angenommen/ wenn er nit von einem hern muͤntlich gefordert oder sonst den willen des hern gewislich verstanden hat/ wil er sich fur keinen diener des Fuͤrsten halten/ geht er aber ins fursten ampt/ so ist er ewiglich forchtsam/ und in seinem gewissen unfridsam/ und zappelet so lang biß er seines dinstes ein gewisse antzeig versteht/ das thund die kinder der welt/ und seind kluͤger den die kinder des lichtes. Den unser lauffen vil tausent hin uff ein schlecht geschrey/ und stellen uns in das ampt gotis/ und haben kein eusserlich tzeichen/ das uns got datzů beruffen hat. Wissen auch nichts von der innerlichen beruffung/ und schemen uns das nit fur got zů thun/ des wir uns vor den menschen schemen muͤssen. Dise ursach ist bey mir beweglich und erschrecklich/ wie frembd und seltzam sie ist/ denn gotis will solt billich verstanden seyn.

Du sprichest. Ich versteh gotis willen. Ich schreib oder schreib nicht/ ich predig oder predig nit/ so weis ich das gotis will ist. Wenn one gotis willen vermagk ich nichts/ welt es got nicht haben/ das ich predigt oder schrieb/ so muͤst ich still haltten. Antwort.

Der uff solchen verhencklichen willen gotis schreiben wil/ der thuns uff seine unkost/ ich wils nit thun. Der teuffel und verthuͤmpte menschen/ diebe und moͤrder/ ertichte schoff und reissende woͤlffe fussen uff solichen willen Gotis/ und thund/ das Got nit haben wil. Hett doch der teuffell nit moͤgen ligen/ wens yhm got nicht verhenckt. So auch hett Judas der verrether Christum nicht verraten wens yhm got nit gestatt hett. Sie suͤndigten aber/ unnd wůrden Gotis gerichte schuldig. Ich wil Got bitten/ das er mir seinen geist der barmhertzigkeyt geb/ der mich Gotis wolguͤnstigen willen verstendigt/ dem wil ich gern gefoͤlgig sein/ der mich vor seynen augen angenem machet. Das beduͤrffen alle hyrten/ die wol und recht weiden/ unnd sollen sollichen geyst auch verstehn/ wenn sie rechte hyrten sein. Ursach. Sie muͤssen ye den vetterlichen tzuck/ der an Christum/ den warhafftigen hyrten der selen/ tzeucht/ befinden/ und das werck des geistes Christi verstehnn. One das werenn sie wyder geistlich noch warhafftige hyrten.

Das ir/ bruͤder/ die ordenung Pauli fuͤrwendt/ welcher zů dem Tito sprach. Du solt die stedte hin unnd her mit priestern besetzen/ und wellet mich durch die laͤher Pauli auffwecken/ und reitzen/ das ich one furchte/ und unerschrocken herfuͤr treht/ uff eure und andere beruffung/ und unthersteht euch mich mit dem zu uberwinden/ das Titus ein eintzele person war/ und hett dannest den befelh unnd die macht/ das er knechte in die ernden dem volcke Gotis moͤcht geben. Das vil mehr der gemeyn befolhen oder yhe solt erleubt seyn/ eynen zů bestellen der ein offentlich ampt gotis trieb.

Ich aber gesteh euch nicht/ das ir Paulo den gewalt thut/ denn/ so das der synn und will Pauli wer/ muͤsten vil andere sententzen Pauli/ unnd etliche schriefften untuͤglich und zů nicht werden. Ich wil einen nemen. .1. Timo. 5.Du solt nyemandt bald die hende uff legen. Die macht Titi ist bestrickt/ durch das gebot Pauli/ du solt nymant bald ufflegen. Drumb ist das die meynung Pauli. Das die Christliche gemeyn oder eintzele personen/ sie seindt hoch oder nider/ sich zuvor umbsehen sollen/ ehe sie ire hende uff legen. Was ist aber das anders gesagt/ dann das. Ir solt/ vor allem die leuthe erkennen/ und euch der innerlichen beruffung und Gottis heymlichen willen erkuͤnden und Gottis gnad in dem spůren/ dem ir eure hende wolt auff legen.

Das einer Gottis gnade/ in einem andern menschen erkennen mack/ das ist nyemants frembd/ denn nur dem/ dem Gottis geyst/ oder schrifft/ unbekant ist/ den ein Pharao erkandt Gottis gnad in Abraham/ der ander Pharao in dem Joseph. Nabuchodonosor im Daniel/ und das ich auch eines von den heyligen breng/ der Jacob im Effraim. Sihe die hystorien auch der Apostolischen geschichten im .6. Capitel.

Das aber/ die Christliche gemein nicht schnell faren sollen/ oder ires eygen willens und synns nicht geleben moͤgen/ sondern das sie zůvor die personen erkennen/ und Gottis innerliche beruffung/ tzů sampt seinen goͤtlichen willen erfaren unnd verstehnn sollen/ ehe sie eynen/ zů eynem hyrtten oder pastor erwelen/ das wil Paulus/ in dem/ das er verbeut hende bald uffzůlegen. Also theten Acto. 2.die Aposteln in der erwelung Matthei/ und Samuel vor der salbung Davids. Man sol goͤtlicher heymlicher .1. Reg.16.beruffung gestrengklich und ernstlich nachforschen/ mit grossem fleyß/ mit innigem gebet/ mit hertzlichen seufftzen. Das sie Gott inwendig unnd außwendig well verstendigen/ wer der ist/ den er seinem volck geben/ und den er in sein erndte geschickt hat.

Darnoch sollen sie ire hende ufflegen/ unnd do durch antzeygen/ das der selb/ dem/ ire hende uffgelegt seyn/ gnugsame goͤtliche weißheyt/ und guͤten willen hab/ und von Got bereitt und begnadt sey/ Gottis schaffen treulich furtzůstehn. Des haben wir geschicht und exempell. Der geist Gottis sprach zů den Aposteln. Sunderet mir auß Barnabam und Paulum zů dem werck do zů ich sie beruffen hab. Die Aposteln fasten und betten und legten yhnen die hend auff/ und lissen sie gehn unnd do sie in die stadt Salmin kamen/ verkuͤndigten sie gottis wort. Acto. 13. Das werck datzů gott Barnabam unnd Paulum absonderet/ ist die verkuͤndigung gottis wort/ und der geyst rieff und sonderet sie/ ehe ab/ dann die Aposteln. Und die Apostolische sendung volget goͤtlicher sendung/ unnd die Aposteln erfuren tzůvor Gottis willen/ ehe sie obgenante tzwen Aposteln abfertigten. wie sie grossen ernst gehabt haben/ das tzeiget ir fasten/ gebett und ufflegung der henden an. Man soll mercken/ das nicht geschrieben steht/ der geyst sprach in gesichten/ im schlaͤff/ oder im traum/ sondern one tzůsatz/ der geyst sprach/ derhalben vermuͤtlich ist/ das Gottis geyst die Aposteln innerlich angeredt/ unnd gelert hat/ wie sie Barnabam und Paulum absondern solten.

Es volget klar/ das die yhene/ so hyrtten verordenen oder setzen/ unnd ymant tzů verkuͤndigung gottis wort ruffen wellen/ gottis wolgefallen verstehn sollen/ ehe sie welen/ uff das sie nit wider gottis willen eynen erwelen/ den Got verworffen hat.

Die fleyschliche/ kuͤnden nicht verstehn/ gottis willen unnd gnad als die geystliche/ drumb solten die jene nur welen/ ruffen/ unnd setzen/ welche Gottis geyst datzů treybt/ die auch den geist Christi des alleroͤbersten hyrtten haben.

Des habt ir allenthalben ein tapfer beyspeyl und exempell der Aposteln/ die zů den andern juͤngern sprachen. Sie solten ynen menner/ zů der handreichung des tysches erwelen/ die do beruͤmpt woͤren/ das sie voller heyliges geystes und weißheit weren.

Act .6. Darumb habt ir Paulum nit wol herfür bracht/ noch in seynem synn gebraucht/ datzů mich unweyßlich angeredt/ das ich uff menschen forderung widerumb/ als vor/ schreiben soll. Paulus hat Tito ein form und weyß geben/ wie er prediger und andere verkuͤndiger gotis erwelen sol/ unnd wie er die innerliche beruffung und geschickligkeit vernemen moͤg. Derhalben hat er Tito die artickel und stuͤcke fuͤrgemalt/ wie der sein sol/ und was er fuͤr gaben von got sol entpfangen haben/ welcher laster unnd verhindernis er ledigk sein muß/ den er zu einem hyrten setzen soll.

Demnoch solt yr niemandt bald hende ufflegenn/ er sey wer er woll/ gelart oder ungelart/ hoch oder nieder/ junck oder alt. Ir solt zů vor sehen/ ab er gotis gaben hat/ oder ein menschliche weißheyt hab. Platzet nit bald tzů/ der mensch kan nicht schnell in grundt sehen/ lasset die wercke unnd fruͤchten wol außschossen. Etliche dringen sich selber/ durch gepettelte furschrifft oder furbit/ tzů dem Apostell ampt/ etliche umb gelt/ etliche ehre halben/ etliche aber treibet Gottis wort unnd zwinget sie/ und lesset yhn kein rug/ biß sie es offentlich bekennen/ des wir vil Historien haben geschrieben. Aber der menschen erkentnis ist mißlich und betriglich/ denn der reissende wolffe seind vil mit scheffen peltzen bekleidt/ und etliche fruͤchten als weren sie gůte peumen/ die alle das ende des werckes offenbar machet/ und der erfaren geistlich man verstehn kan/ der alle ding urteylet oder richtet.

Das mir meine bruͤder/ den grauhen und meine forcht mit dem brechen wellen/ das man die yene hoͤren magk/ die uff dem stůl Mosi sitzen/ und wercke wider Mosen wircken. Wirt sie nit helffen/ mich auch nicht bewegen/ denn die schaͤfflein hoͤren sie mit grosser ferlickeyt/ sie hoͤren auch gleych so bald etwas wider den stuͤl Mosi/ als etwas das Moses stuels wirdig ist. Datzu find ich nit/ das Got irgent ein schefflein (das nach gottis gerechtickeyt duͤrstigk was) tzů eynem solchen fressigen Ecclesiasten oder geyrischen Bischoff geweyst oder geleydt/ als die seind/ die ein wider Christlich leben fuͤren.

Cornelium weyset Christus zů Petro/ das er den selben hoͤren solt. Und wie gott Cornelium zů Petro weyset/ also weyset Gott alle seyne schaͤfflein tzů den hyrtten/ die Christus geyst erliden oder geschmeckt. Wenn derhalben Ezech. 34.spricht got. Ich wil meine schaͤflein auß denn henden der falschen hyrtten erloͤsen/ und wil sie meinem knecht David lassen weyden/ der Christus ist/ auß David geboren. Der ursach halben sagt auch Christus. Huͤttet euch vor denn falschen Propheten. Huͤttet euch vor dem sauerteigk der gleyßner. Meine schaͤfflein hoͤren einen frembden nicht. Drumb seydt weyß als die schlangen/ spricht Christus. Weyl dann Got solliche außerwelte menschen forderet/ die seyn wort verkuͤndegen sollen/ moͤcht ir one arbeyt verstehn/ das ich billich mich ins stillschweigen begeben solt und warten biß mich Got tryeb. Dem kein macht widerstreben kan.

Uber obertzalte ursachen/ so mein stillschweigen belangen/ wil ich noch eine setzen/ disse/ Gottis wort ist rein und lauther/ und die lauthere und reine soltens allein handeln/ unnd kein unsaubere. Denn der geyst Gottis Psall. xi.spricht. Gottis wort ist rein/ als ein silber das sibenmal gefeget ist in einer kapelln/ der erden. Das aber hat Gott nicht vergeblich gesagt/ sondern unsert halben/ das wir verstuͤnden/ wie man gottis wort fuͤren sol. Wer es fuͤren soll. Welcher sich sein enthalten soll. Es ist yhe nit one ursach gesagt zů dem sunder/ warumb nimpst du mein wort in deynen mundt? und warum vertzelestu meinen bund? Nun welcher darff sagen/ vor Gott. Ich bin rein? welcher also/ rein ist mein hertz? Nů setze auch/ das eyner ungestrafft sey von seynem gewissen/ wer er drumb gerecht? Paulus hat sich des nicht vermessen/ der doch ein außerwelt faß war/ der auch keyn gewissen hett der boßheit. Ist nit das hertz boßhafftig und unerforschlich? Genn. 8.Seint nit unser gedancken und willen/ von jugent auff zů dem boͤßen geneigt? Mit gedancken aber gehn wir auß/ so offt wir gottis wort reden oder schreiben. Wie kan es dann moͤglich sein/ das wir gottis wort/ das rein und lauther ist/ unstreflicher weyse handeln? Wenn gottis wort nicht die hoͤchste lauterckeyt hett/ mocht noch hoffnung sein/ das es ein mensch/ one schuld/ handeln kuͤnt. Nů ists aber das aller lauterist. Seintemal der geyst Gottis/ durch die hand Davids/ saget. Gottis wort ist rein/ als ein rein durchfeget Silber das siebenmal ist gefegt. Wer rein und heilige dinge unschultigklich wil handeln/ der sol rein und heilig sein/ als die ding/ so er begreyfft unnd handelt.

¶ Dem nach solt ein yglicher mensch siebenfeltigklich gefegt seynn/ der Gottis wordt mit reden/ predigen oder disputirn/ wil handeln. Ursach. Das silber ist siebenmal gefegt/ welchem gottis wort vergleicht ist/ Levi.das ist nit umm sonst gesagt. Als wenig die figur Mosi umb sonste gepotten ward/ von der siebenfeltigen besprengung.

¶ Ich weis das der priester seynen finger ym blůt one ursach nit teufft/ und darnach siebenmal kegen dem furhanck mit dem eingetunckten finger sprenget. Dann wir mussen auch die besprengung des blůttes Christi/ siebenfeltigklich verstehn/ und erleyden/ ehe unsere fuͤrhenge allenthalben abfallen/ unnd ehe wir auch ein rein und weiß wolgefegt silber werden/ welchs siebenmal durch fegt Hie. 6.ist. Wir mussen ym feuer gefegt werden/ als Zach. 13.silber/ denn got furet sein volck durchs feur. Der im ersten oder dritten feuer nit besser wirt/ der ist ein verworffen Silber. Der aber seine boßheyt faren lest/ oder seine unreinigkeit im feuer verbrendt/ der wirt rein. Idoch ist er nicht gnugsam reine und sauber/ biß er durch sieben Luce. 9. feuer gangen/ unnd durch siebenfeltige fegefeuer besser ist worden und rein. Die weyl Gottis wort ein volkomne reynigkeit haben wil/ als es selbs ist.

Ir wisset das wir unser kreutz/ des haß und neides zů eigner selen/ teglich tragen muͤssen/ und das sich der verderbet/ der es einen augenblick von sich leget. Die weil Christus spricht/ welcher seine sele findet in diser welt/ der verterbt sie. Und der sein kreutz nicht tregt unnd mir nochfolget/ der ist nicht mein Junger. Dem nach solt ich meyne sele/ on auffhoͤren/ hassen/ meyn kreutz one untherloß tragen/ und Christo volgen. In sonderheyt/ wenn ich Gottis unvermackelts wordt verkuͤndigenn wolt. Denn ich hab gar nichts dran. So ist es gottis und nit mein.

Aber es kuͤtzelt die sele so das wort gelobet wirt/ als wer es yr eygen/ und sie dunckt sich besser dadurch/ derhalbenn solt ich sie ernstlich hassenn. Ich aber befindt nichts in mir/ dann nur willen unnd begerung. Dann ich wolte/ das die liebe meyner selen tzerfroren/ und als aschen verweht were/ und stund an irer stadt ernster neyd/ unnd gestrenger haß.

Ich wolt auch das ich Gottis wort one findung meiner selen kunt handeln/ als ich pflichtig bin.

Aber wie fern vonn mir ist die macht unnd that/ zů thun/ das Gott foddert/ unnd ich gern wolt. Yhe nehr ligt mir an das ich thun muß/ das ich nit wil/ unnd verstehe/ das ichs nit vermag zů thun/ das ich thun welt.

Nů mercket wie ferlich der außgangk ist/ unnd setzt mirs ans ander.

Wenn ich gleych ernste und außgestrackte froͤligkeit hett in verkuͤndigung gottis wort/ dannest ubertrifft die innerliche froͤlickeit die eusserliche in unsaͤglicher weyse und masse. Und es ist stedts besser heymlich im geyst auffspringen/ dann mit eusserlichen fuͤssen. Und sicherer/ forchtsame glidmas/ und nider gedruckte gebein/ und demuͤtige krefften uff heben (wenn got redet) den wenn der mensch außgeht mit goͤtlicher predig oder schrifft. Innebleiben ist altzeit unferlicher/ dann außgehn. Nů ist doch grosse ferligkeit/ bey der inwendigen handlung des wort gottis/ wens die sele frisch von Got hoͤret. Solte dann nit grosser ferligkeyt in dem sein/ wenn eyner mit Gottis wort außbricht/ und durch seiner feinden heer dringt/ das ym entkegen leufft/ das ich doch mir in ewigkeit nit zůmessen kan.

¶ Idoch wie dem allen ist/ ich seh rath. Gottis willen sol gescheen/ und ich wil ym gehorchen/ denn boͤsen lůst und die ungelassenheyt oder lieb meiner sele/ werden die spotworte der gotloßen Philistiner und Moabiter meysterlich verbratten/ unnd als ein hitzig fegefeuer abfegen/ oder yhe dempffen unnd beseuren . Denn ich weiß/ das ich nicht freier sein werde/ denn mein meister Jesus Christus war/ der mirs auch zůvor gesagt/ das ich mich des erwegen muß/ das ich spott und hoen leyden sol/ als er erlitten hat. Es ist yhe kein wunder/ das sie den knecht Beeltzepub heissen/ wenn sie den gerechten hern also gescholten haben. Ich wil unnd beger auch/ das mir mein schedlicher wollust/ durch unlust. Und die findung meiner sele/ durch meiner hesser stocherwort und neid verprand werd/ und die gebresten meynes schultigen hasses/ den ich tzů klein unnd wenig hab/ wider meyne ßele/ durch yren heuffigen haß unnd neid erstadt und erfullet werden. Also (hoff ich) wirt meyne ferliche außfart dem innebleiben fast vergleicht. Denn mein leyden kan widerbrengen/ das ich durch einen ungelassen außganck verderbt hat. Drumb laß herfaren ich beger/ wider des teufels frid/ noch geselschafft/ noch frideliche und freundtliche wort.

Wir můssen yhe allesampt christformig sein/ und Christo nochfolgen/ und uns des befleyssen/ das wir unsers vatters ehre und heyligkeit preysen/ als Christus gethan/ ein yglicher noch seynem pfunde. Dem nach/ solt jhe eyner dem andern Gottis namen offenbaren/ und den namen gottis unsern bruͤdern verkuͤndigen/ nicht in einem winckell/ sondern im mittel der gemeyne Gottis/ auff das sie verursacht wůrden/ gottis gestrackte reden anzůnemen und zů loben. Denn es ist der guͤtwill gottis/ das ein yglicher mit seynem pfunde/ dem andern wucher und wilfar. Ich soll umb des hern willen/ nicht allein kegen mir/ mit seynen guͤttern treulich handeln/ und einen gewin uber die hauptgabe widergeben/ sondern auch kegen andern meinen mitbruͤdern/ die ich lieben sol/ als mich selber. Einer bedarff auch des andern/ seintemal gottis gaben mancherley seind/ und ist keiner/ der sie alle hat. Der aber etwas hat/ der solt yhe dem mitteylen/ der es bedarff/ und den selben gewinnen/ und yhn mit dem pfunde widergeben. Ich forchte mich vor dem urteyl das Christus wider den faulen knecht setzt/ der sein pfundt vergrub und forchte sich/ in dem er frisch solt gewest sein. Ich hoer wie yhn Christus einen schalckhafftigen knecht nent/ wie er auch yn verthuͤmpt / das mir und allen knechten gottis/ ungezweyfelt/ tzů einem mercklichen exempel ist gesetzt/ das wir uns alle/ in hohen ernst und bereyttem willen/ muͤhen sollen/ mit den geschenckten pfunden kegen uns unnd unsern bruͤdern.

Gehorsam ist besser dan opffer/ unnd es ist stets besser man thu das Gott haben wil/ und bekenne die gebresten des werckes/ denn das man des gebrechens halben gottis gebot nachlaß/ als Saul thet/ und darob seynes Koͤnigk reiches fellig unnd verlustig wůrde. Do steht Gottis Deu.6. gepott zů allen haußvettern/ das sie yre kinder unnd gesinde leren sollen/ und ein yederman ist schuldig/ das er gottis wort predig ym hauß/ ober tysch/ des morgens/ des abendes/ im acker/ in der scheuͤnen/ er stee můssig oder arbeite/ so sol er gottis wort betrachten/ und erfuͤr tretten/ und verkuͤndigen den yenen/ so umb yhn stehn oder sein. Man sol gottis wort scherffen/ das ist den meysterlichen inhalt zů dem nehsten brengen. Das ist ein gemein gepot zů allen geredt/ die gottis wort verstehn/ und got hat sie alle/ durch das gepot/ prister gesetzt/ alle menschen in gemein/ welchen er sein Offenbarung than hat. Dann niemants ist auß geschlossen/ die weyl gotis gebot alle menschenn/ und gottis unnd des nehsten lieb und ehre belangt. Welcher das gebot umb eynes bessern fursatz willen nachleßet/ der ist ungehorsam/ unnd hat nichts gewisser zů warten/ denn das yhn Got entsetzen werde/ von Christlicher ehre/ als er Saul von koͤnigklicher ehre umb des ungehorsams willen entsetzt hat. Wir můssen unser gedancken/ und sorg/ oder forcht/ zůsampt den bessern fuͤrsatz schlachten oder hindan setzen/ und gotis willen volbringen.

Darumb ist es besser/ ich speise meine hungerige bruͤder/ mit der gebenedeyung gottis/ und das ich Christum unnd seinen geist/ und got seinen vater bekenn/ und/ so vil mir moͤglich/ verkuͤndig/ denn das ich vonn gottis angesicht verstossen wurd/ oder das mich Christus leucket / on welchen keiner fuͤr gottis antlitz gehn darff. Wenn ich/ der sunden halben/ gottis wort wolt helen / die ich nicht umbgehn oder meiden kan/ solt ich wol/ ein klein wasser flihen/ und ins mere fallen. Ein sunde mit willen thun/ umb der sunde willen/ die ich mit unwillen thun muß/ wenn ich wol thun wil. Aber besser ist es/ ich thu/ das ich nit wil/ denn das ich nit well/ das ich thun kan. Und ist unschedlicher und vergeblicher/ das ich/ meinen bruͤdern/ gott bekenn/ und on fursatz/ und wider meinen willen/ sunde leide/ dan das ich gottis namen/ mit stillschweigen verberg/ und vorsetziklich sunde wircke. Auch ist es Christlicher/ das ich den schaden gůtter werck erkenn und klag/ dann das ich gottis gebot gewaltigklich durch forchte und ein boͤß werck willigklich verprech. ¶ Des bin ich sicher und gewiß/ das Gott das aller kleinste fuͤncklein des glaubens nit lesset verterben. Ich sehe/ das Christus den wolt unverhindert Mar. 9.haben/ der ein klein funcklein hett des bekentnis Christi. Nemlich den/ der teuffel auß treib/ und volgt den Aposteln nit nach/ unangesehn/ das die Aposteln drumb murreten/ und Christo klagten/ das er yhn nit nach volgt. Christus hat den kleynsten glauben versichert/ das er nit sol verterben/ noch verlassen werden. Es kan auch nit gesein/ das gott einen gůtten willen verterben laß (wie wols war ist/ das der kleinste glaub in gottis reich nit gehn kan/ biß er das hertze/ in die aller kleinst niderkeit und kintheit brengt). Matth. 18.Gůtter will zuͤ gott thut nit ubel/ ab er gleich ubel thut. Als ein kleyn unmuͤndig kindt nit sundiget/ abs gleych sundiget. Gottis furchte thut nit ubel/ sondern sie ist ein bron des lebens/ und behuͤtt vor dem fall des todes/ und wirket einen grauhen oder flůchte von dem boͤsen/ und macht das hertz sein boͤß verstehn/ und bekennet das er thut.

Esa. 43.Drumb wil ich mich des troͤsten/ das gott zůkeer fordert/ und bereitt und guͤtwillig ist/ aller sunden zůvergessen/ und ir nit mer gedencken/ so wir armen sunder uns erkennen oder der sunde gedencken. ¶ Ich weis auch/ so ich gottis wort mit gůttem willen furen werd/ das michs nicht Joan. 15.mynder wirt reinigen/ denn der glaub. Denn Christus hat seyne Juͤnger reyn gemacht durch sein wordt/ was solt denn dem wort gottis felen/ das die reiniget/ die es in goͤtlicher furcht handeln? Weyl gottis wort ist als ein feur/ das brend und feget. Derhalben gehn ich in gottis namen auß/ in vertrauen zu gott. Ist ymants der mich weysen wil/ der hat es guͤt macht. Bittet gott fur mich. Datum Orlamuͤnde. im December. Anno M.D.xxiii.