¶ Die geyster so man Engel nent/ seind unter sich spennig geworden/ und haben sich geteylet/ Etliche verdroß es das gott einen menschen erwelet hat/ unnd wolt den selben menschen mit seynem sůn personlich vereynen/ und über alle engel setzen/ und zů einem haupt und fürsten der gantzen gemeyn gottes machen/ von welchem sye allesampt Gottes schatz entpfahen und nemen soͤlten/ unnd sich gegen im neygen unnd krümmen/ der doch einen groͤbern leyb het/ dann sy/ der ein sterblich fleysch würd erstlich haben/ In sunderheit stach sy das in ire teüfelische nasen/ das sy den selben menschen solten einen gott heyssen/ unnd sehen solten/ das er an der gerechten gottes würd sitzen/ das machet die boßhafftige und neydische geyster wider Christum grimmig/ darumb würd auß dem engel ein teüfel und drach/ der von anbegin den selben menschen hasset/ und het in auch gern todt geschlagen/ so ers vermoͤcht hett/ unnd so die zeit were gewest/ als sy ward da er Judam Iscarioth wider das unschuldig lamb anzündet/ und die phariseier wider Christum reytzet/ und schlůg Christum todt/ Iohan. 8. Derhalben ist der teüfel von anbegin ein moͤrder gewest/ ehe er Adam betrůg/ denn er hat den willen vorgehabt/ Christum todt zů schlahen/ eher Adam fiel/ so war auch der teüffel eher ein drach und schlang/ denn Adam versůcht ward/ und er moͤrdet Christum ehe dann Adam/ und Christum ehe dann Christus geborn ward/ Derwegen Apo. 12. et 13 ist geschriben/ das Christus das lemblin von anbegin ist erschlagen/ nicht das im wesen erwürget were/ sonder in dem teüfelischen rath und fürsatz/ Als auch Collo. 1. Christus der erstgeborn ist vor allen creaturen/ Nit das Christus ehe er für uns inß wesen gebracht sey/ dann die andere creaturen/ geborn oder geschaffen seind/ wenn Christus ist nach vilen geschlechten der menschen/ auß David geborn/ sonder also ist Christus der erstgeboren/ das in Gott in seinem ewigen rath/ für alle creaturn erwelet und gesetzet hat/ und wolt das alle außerwelten von Christo und durch Christum seine goͤtliche schaͤtz nemen/ und durch in allein eyngehn solten/ Demnach ist Christus der erstgeborn im radt und willen Gottes/ wie er auch erst erschlagen ist im radt und willen des teüfels/ unnd in der weyse ist Christus das lamb von anbegin erwürgt/ unnd der teüffel ist des Christus moͤrder von anbegin.

¶ Es hat sich auch ungezweyflet der Teüffel beflissen/ alle Engeln in seynen hassz und neyd/ wider Christum/ zůfuͤren/ und er hatt inen vileicht fürgepredigt eine soliche meynung. Sehet/ wir seind engelischer und geystlicher natur/ unnd uns gebürt von recht diser vorzug/ den Gott Christo geben hat/ darumb lasset uns synnen und trachten/ das wir den sterblichen menschen erwürgen/ welchen Gott zů seiner rechten über unns und zů unserm oͤbersten setzen wil.

¶ Er hat sye auch alle so hoch versůchet/ und so subtil angesprenget/ das etliche des teüffels versůchung zům fall bracht hatt. Etliche aber seind bestanden/ und haben Apo. 12. den greulichen drachen/ im blůt Christi/ überwunden/ und die warheyt Gottes hat sy gestercket/ und fest gemacht wider den teüffel.

Aber wiewol die frummen engeln Christum annamen/ Apoc. 12.dennest hatt sy der drach etwas beweget/ und so weyt Accusator fratrum. gebracht/ das er sy all beklagen kan vor Gott/ und das sy alle sprechen muͤssen/ Wir haben im blůt des lambs überwünden/ oder von wegen des blůts/ unnd von wegen des gezeügniß der reden überwunden/ als ob sy sagten/ Apo. 17.Hetten wir unns nit ans blůt des unschuldigen lambs gehalten (Welches lamb mit dem teüffel streyten und in überwinden würd/ denn er ist ein herr der heeren / und ein künig der künig) so weren wir verloren gewest/ Apo. 5. Aber dieweyl das lamb rechtlich und redlich den drachen überwunden hatt/ so ist sein gerechtigkeit unser gerechtigkeyt/ unnd wir bekennen dem Christo/ das er uns durch sein blůt erloͤset hat/ unnd das er wirdig ist/ das wir in bekennen unnd im unser macht/ reychtumer/ sterck/ eere/ herligkeyt/ unnd gebenedeyung/ zůerkennen / Ephe. 1. wir und alle creaturen/ weliche ist in dem hymel/ uff erden/ unther der erden und im meer. Christus Collo. 1. hatt alle ding im hymel und erden/ durch sein blůt am kreütz versuͤnet und erstat. Darumb bekennen wir Christo sterck/ kampff/ und sig zů/ nit uns.

¶ Mit einem solchen bekantnis machen sye den teüffel klagloß/ und verstopffen das boßhafftig maul des teüfels/ der wider sye boßheit redet/ unnd spricht/ sye seind im gleich. Denn sye seind im ungleich in der boßheit/ ob sye gleich schwach würden im kempffen und streyten/ Der drach hasset Christum/ und vergündt im/ das in Gott so hoch setzen wolt/ über alle Engelische krefften. Die bestendige Engelen gündten Christo sein eere und fürzug/ namen in gern an als einen fürsten und ir haupt/ drumb seind sye dem beschuldiger ungleich.

¶ Aber die andern so dem teüffel und drachen zůfielen und recht gaben/ unnd sagten/ Gott ist ungerecht/ das er einen sterblichen menschen über uns setzet/ unnd bewilligten in den todtschlag Christi/ und wolten die rede des gezeückniß Christi falsch machen/ als sye hofften/ Wenn Christus todt ist/ so wirt er nit über unns sitzen unnd herschen. Alle die darzů hulffen/ die seind botten Apo. 12. des teüffels unnd Satane/ diser verfuͤret die gantzen welt/ und widerstrebet dem reych Christi/ und ein oͤberster Capitaneus der teüffel/ welche sich samptlich uffgeleynet haben gegen den andern Engelen/ welche Christum annamen/ und wolten sye wider Christum anzünden und uffwecken.

¶ Apo. 12. Und da ward der groß streyt im himel/ da streyt der Drach und seyne Engel uff einer/ unnd der Ertzengel Michael unnd seyne engel uff der andern seyten/ wider einander/ und der drach verluͤre seyne statt im hymel.

¶ So seind die Engel gezweyspalten/ als auch die menschen/ die auß Gott waren/ die horeten gern vonn der große herligkeyt Christi/ und überwunden von wegen Iohan. 8. der rede dises gezeügniß. Aber die auß dem teüfel waren/ der in der warheyt nit stůnd/ die horten es ungern/ das Gott Christum der massen über alle creaturen setzen wolt zů einem haupt unnd erloͤser/ drum namen sye die verheyssung von Christo nicht an/ unnd verachten auch das blůt Christi/ unnd den warhafftigen und gerechten Gott.

¶ Der Teüffel uͤbet sein ampt und art/ wider uns alle die Christum annemen/ als er vor im hymel than hat/ wo er einen findt dem Christus blůt koͤstlich ist/ den versůchet er/ unnd wil in wider Christum/ mit hassz unnd neydt reytzen und brengen/ so bleibt er ewiglich ein verfuͤrer der welt und widerstreber Christi/ und zerstrauer des reych Gottes.

¶ Nu merck der Teüffel ist so mechtig/ das er heüt des tags/ den bestendigen Engeln arbeyt machet/ und hinderet/ das sye nit fürkommen/ unnd můß zeyten ein engel des andern hülff zůlassen/ als Gabriel von dem teüffel Daniel. 10. der Perser gehindert ward und solchen widerstand het/ das im Sanct Michael zů hülff kommen můst/ Darab zůnemen ist/ wie grosser sterck wir bedürffen wider den teüffel/ der yetzt umb uns ist/ in dem lufft/ und uns versůchet und verfuͤret als sein gewonheit ist/ Wir bedürf fen eygentlich grosser sterck/ unnd das wir uns fest ans blůt und Evangelium Christi halten/ Derhalben hat uns Paulus treulich vermanet und gebetten/ das wir uns bekrefftigen in dem herrn Jesu von Nazareth/ und Ephe. 6. starck machen mit seiner sterck/ uff das wir in allen dingen gerüst sein/ und bestehn künden/ wider den subtilen feynd und listigen teüffel. Denn wir haben mit den teüffeln zůkempffen/ welche fürstenn seind diser welt. Dise boͤse geyster seind unther dem hymel/ und unsaͤglicher weyse stercker/ dann unser fleysch und blůt/ welchs auch nicht zů schaͤtzen ist gegen der grossen unnd scharpffen macht des teüffels.

¶ Drumb ist uns von noͤten das wir den harnisch und die streytwaffen der Engeln erwischen/ und setzen uns mit dem schilde wider die geyster der boßheit/ mit welchem die Engel wider den grausamen drachen bestůnden/ unnd fassen das schwerdt/ mit welchem Michael und seine Engelen den Satan auß dem hymel jagten eodem Apocalypsi unnd verstiessen. Nemlich Gottes wort/ das wort des gezeügniß von Jesu von Nazaret/ in welchem die Engel obsigten/ unnd den teüffel niderschlůgen/ als auch Christus den drachen unnd versůcher überwand und abweyset. Und unsere lenden muͤssen wir mit der warheit Matt. 4. umbgürten und zůsamen binden/ dann warheit ist das aller sterckst unnd bricht durch. Auch muͤssen wir alle macht im glauben haben/ Welcher glaub Gottes wort und die warheit fürwendet/ Und muͤssen die feurigen pfeyl des boͤßwichts verstehn/ durch den glauben/ und sye außleschen/ unnd die teüffelische spitz stumpff machen. Wir bedoͤrffen warlich grosser und Engelischer sterck/ und gleich das harnisch/ mit welchem sich die Engeln gewapnet haben und nach wapnen wider den subtilen feynd.

¶ Der teüffel hat sein alte macht unnd sterck noch/ die er vor im hymel hett/ und ist noch so mechtig/ das er eynen Engel alhie uff erden kan halten/ das er in seinem ampt verhindert oder verzogen wirt/ wenn er nit seinen geyst/ unnd Gottes verlihene sterck eben versteht. Das kanstu lernen auß dem geschicht des Engels Gabriel/ welcher Danielem leren solt die verwickelte gesichte uß zůfalten/ daruß wir ein sonderliche weyßheit des Engels Gabriel abnemen/ Unnd dannest war ein teüffel/ ein fürst über Persien/ so witzig/ scharpff/ clůg/ mechtig unnd starck/ das er den Engel Gabriel hemmet und hielt/ und der Gabriel (oder ein ander Engel seins ordens) bedürfft der hülff und beystant Sanct Michaels.

¶ Es kan meniglicher auß der selbigen historien verstehn/ das die hohe teüffeln den heyligen Engeln etwas künden abhaben/ Und es seind under den engeln starcke und sterckere und sterckste Engeln/ als under den menschen seind einer stercker denn der ander. Auch nach dem geyst ist einer mechtiger denn der ander. Also auch ist es under den teüffeln/ einer ist spitziger/ mechtiger denn der ander. Wann nun ein starcker teüffel über ein schwache seel oder geringeren Engel kumpt (denn er ist) so helt er in so lang/ biß er gleiche sterck erlanget/ als die obberürten Jude.historien anzeyget. Und so die historien und disputation des Ertzengels Sanct Michaels/ gegen dem Judas. teüffel gehalten/ warhafftig were/ als in der Epistel (welche man Jude zůrechnet) steht geschriben/ so koͤndten wir wol verstehn/ wie grosse mühe der ertzengel Sanct Michael/ mit dem Satan gehabt hat/ über dem leyb Mosy/ denn wenn im der teüffel nitt so scharpffe gegenrede gesetzet het/ die Sanct Michael schwerlich unnd nit wol umbstossen/ het er nit gesagt. Straff dich gott/ Satan. Weyl aber der teüffel Sanct Michael dahin bracht/ das der engel dem Satan ein straff von Gott wünschet/ ist wol zůmercken/ wie hefftig der Satan wider inen ist gewesen. Nun es sey oder sey nit das die gemelte epistel inhelt/ so ist das offenbar/ und keiner darffs leücken/ dann das ein starcker teüffel einen schwachen Engel und ein unstarcke seel halten kan. Und es mag wol sein das ein teüffel in der geschaffen natur/ geweltiger ist/ denn ein geringer engel in der genad gottes/ als auch ein grosse anfechtung einem schwachen im glauben zů Matth. 26. starck ist/ das alles uß der flůcht der junger Christi von Christo ist zůmercken.

¶ Das hab ich gesagt das der mensch achtung hab uffs teüffels stercke/ und lerne in erkennen/ denn die unwissenheit ist ferlich / und gemeyniglich steht der uffs teüffels seyten/ der seyne feurige und listige versuchung nit versteht/ das für eines.

¶ Für das ander hab ich das gesetzet/ das der mensch nit denck/ das des Satans boßheit jetzt geringer unther dem hymel sey/ dann sy droben ist gewest im hymel.

¶ Zům dritten/ das der ewig widerwil der teüffeln gegen den Engeln ewiglich bleybet/ des gleichen auch gegen gottfoͤrchtige seelen.

¶ Der teüffel stůnd nit in der warheyt/ sonder er fiel in Johan. 8. seiner eygenschafft/ und sprach auß die lůgen/ unnd ist worden ein vatter der lügen/ und alle seine macht steht uff lügen/ und sein listigkeit ist gericht einen Engel oder ein seel dahin zůfuͤren/ das der gottfoͤrchtige/ lügen faß/ und drinn bleyb/ und einen grauhen zů der warheit schoͤpffe. Er vermantelt aber die lügen mit einem scheyn der warheyt/ und leget in den engeln oder seelen zeiten auch in schrifften für als die warheit/ als der Satan Christo Matth. 4. schrifften fürleget/ und wolt Christum durch fürgelegte schrifften in ein lugenhafftige vermessenheit oder begirden bringen. Also auch greyffet der verfuͤrisch Satan selen und engeln an/ mit warhafftigen urteyln/ und verkeret sy doch als ein Sophist/ mit seiner sophisterey einen menschen versůchet und eyntrybet/ und würffet in durch den glantz der warheit in lugen/ und das ist ein groß mechtig übel/ wann sich einer der lugen gefangen gibt. Denn gleicherweyse die warheyt frey unnd ledig machet/ also widerumb machet die lugen einen gefangnen knecht des teüffels.

¶ Derhalben solt sich der mensch mit warhafftigen urteylen Gottis wapnen/ und den Satan überstreyten/ als Christus den versůcher auch mit warhafftigen reden Gottes verjagt.

¶ Mit nichte soltu vergessen/ das der teüffel ein fürst der finsterniß ist/ und erzeyget sich nicht allein in geystlichem finsterniß der warheit/ sonder in der nacht und eüsserlichen finsterniß/ da versůcht der teüfel einen menschen mit forcht/ und machet gepolder und gerumpel/ alles derhalben/ das sich der mensch vor im foͤrchte/ das dann wider Gott ist/ Wenn aber der teüffel sein forcht eingetryben hat in menschen/ und versteht durch eüsserliche geberden oder umbstend/ das sich der mensch vor im foͤrchtet/ so fert er fort/ und gibt dem menschen ein/ er sol von Gott zů den creatüren flihen/ und hülff nemen wo er sye finden kan/ also hatt der teüffel vil menschen dahin bracht/ das sye zů den goͤtzen gelauffen/ und sůn der finsterniß geworden seind/ das des teüffels sig und triumpff ist. Derhalben solt sich kein mensch vor dem teüffel foͤrchten/ denn so bald sich einer gegen seinen feind forchten thůt/ so geht etwas seinen krefften ab/ und sein feynd überwindt in. Weyl aber sich der mensch pflegt zu foͤrchten/ ist im von noͤten Gott emsiglich anzůruͤffen/ Mat. 14. unnd mit Petro sagen/ Herr kumm mir zůhülff/ uff das mich das wasser nit erseüff.

¶ Nun ist gesagt wie die teüfel worden sein/ wie sy engelen unnd menschen/ so in irem lande gefunden werden/ noch heütigs tags anfallen und versůchen/ und verfuͤren woͤllen/ das auch die engel zůzeiten den teüfeln zů schwach seind/ und künden inen allein nit widerstehn. Auch ist gemelt das luͤgen und liste des teüfels harnisch und pfeyl seind. Widerumb das der mensch einfeltig als ein taub/ und fürsichtig als ein schlang můß sein/ und luͤgen mit der warheit/ list mit goͤtlicher weißheit/ boßheit mit gerechtigkeit niderwerffen. Was das ampt des teüfels ist und seiner mitengeln/ ist auch gesagt.

¶ Der einfeltig man solt auch weyß werden/ das er sich nit alwegen uff seinen Engel verließ/ sonder alzeyt sein stercke in Gott sůchte.

¶ Es ist ein unsaͤglicher schade/ welchen ein erschrockner und teüfelforchtsamer mensch leydet/ und ein grosse und greüliche sünd/ die er thůt/ wenn er den teüfel anfaht zů foͤrchten. Denn warumb/ gott hat an vil enden dem menschen gebotten/ das er gott allein foͤrchten soll und nichts anders/ das aber hat gott dem menschen durch sein gebott angezeygt/ das er solchen grossen und jemerlichen schaden vorstehn/ und ein solchs greülichs laster werd verhuͤtt/ und gott seine eere unabgebrochen und unversprochen bleyb/ den schaden soltu also vernemen.

¶ Sihe Gott pflegt durch seine krefften in grund unserer hertzen absteygen/ und sich selbs nach seiner abgeender krafft offenbaren/ und außsprechen. Alles durch seinen lebendigen mund/ der ein eynblickend liecht ist/ und lasset sein werck im grunde der selen/ und das selb werck heysset der glaub/ welcher ein erkantnis gottes ist/ und verheyeratet das hertz mit gott/ und das hertz/ wird als bald starck/ wunnsam/ und voller freüden/ es verstehet/ und liebet gottes abgeende krafft die es verstanden hat/ und thůt im eere/ und schetzet die erkante krafft über alles das sein hertz erkennen kan/ und fasset das berlin/ und gibet alles das er besitzet drumb und verlasset alle sein habe für das/ und darinn hat Gott wolgefallen/ und in dem selben wirt Gottes namen heylig/ sein eere groß und voll.

¶ Als wenn sich gott außsprichet/ nach seiner sterck/ und macht das der geschaffen geyst seine goͤttliche stercke und macht versteht/ und weiß das gott stercker ist/ dann alle creaturn/ und das alle krafft macht und sterck von gott kumpt/ und das sich wider gott kein gewald/ oder oberkeit/ und herligkeit kan uffleynen/ und das aller creaturen krefften vor seiner macht schmeltzen und verfliessen/ so würt der creaturisch geyst über die massen starck und mechtig durch Gott/ und gegen allen widerspenstigen gewelden/ trotzig/ und gibt gott sein gebürliche eere/ als nemlich. Er ist sicher/ das mit seiner eygen sterck/ unnd alle creaturen macht/ nichts/ oder auß ist/ das an gottes Esai.finger alle creaturische krefften hangen/ unnd das gott sein sterck/ macht/ schild/ helffer/ zůflůcht/ felß/ bogen/ unnd alles ist/ das schuͤtzen/ schirmen/ verhuͤten/ oder sterck geben kan.

¶ In dem stehet der recht liebreych glaub der alle ding vermag durch Gott/ der auch alle teüfel die sich an in legen verjaget/ so er gottes willen vernympt als Christus vom glauben spricht/ wenn ir einen glauben hett als ein senffkoͤrnlin/ und saget zů disem berg/ verstürtz dich ins meer/ so würd er weychen etc. Das ist von dem nutz des menschen/ und von gottes eere gesagt/ von unserm schaden/ und gottes unere/ wil ich folgend reden/ denn ein gegensatz machet den andern vernemlicher.

¶ Gott ist ein liecht das im finsternis leüchtet/ aber es ist nicht geacht/ würt auch nicht angenommen/ sonder gehasset/ und ein finsterniß oder schatten darfür geliebet/ von den verkerten menschen/ das soltu durch die teyl verstehen.

¶ Sihe/ wenn sich gott durch sein einblickende stralen/ nach seiner macht und sterck/ als ein starcker gott weyset/ und der mensch gottes nicht achtet sonder lasset in faren/ und sein werck durch dreyffen . So kumpt dann uß mangel des liechtes/ unnd auß unwissenheit goͤtlicher sterck ein won und forcht/ das ein teüfel/ eine sele/ mensch/ schwerdt/ feur/ wasser/ oder etwas anders dem menschen schaden mag. Daher fleüsset zagheit/ bydmen/ angst/ und forcht gegen den creaturen/ und das das nerrisch hertz einen teüfel oder polder selen fürchtet/ als ob er gott were/ der toͤdten und verderben kan/ und weyß nit anders/ denn der teüfel sey so mechtig/ das er koͤnn was er will/ daher würt denn ein mensch krafftloß/ voller aͤngsten/ und schweyß/ und zweyfelt an goͤtlicher macht/ und steygen im denn wider gottes almechtigkeit/ gedancken auff/ im hertzen/ das der arm mensch gedencket/ der teüfel vermag was er will und gott koͤnn oder woͤll es nit hindern/ das ist gott nahe/ unnd wider sein eere/ und es wer keyn wunder das gott einen solchen teüfels foͤrchter in den abgrund der hellen stieß und zerschmettert/ oder zerscheytert in/ in tausent stuck.

¶ Auch sein ir etlich/ die das leyd/ über ir sünd vor grosser angste und forchte des teüfels verlassen/ und die allein in der glüde und hitze der forcht stehn/ verstehn aber nit das ir forcht wider gott ist/ drumb ist inen das nit leyd und bitter das sy sich vorm teüfel foͤrchten/ allein ist inen leyd und bitter/ das der teüfel gegenwertig ist/ wenn sye aber zů gott schreyhen mit seüfftzen/ und begeren hülff oder rettung von Gott/ so finden sy trost/ Dise werden in dem behalten/ das sye gott in irem leyden etwas wenig vornemen/ und nach seiner hülff schreyhen/ denn sye bekennen heymlich die boßheit ires hertzens/ das sye Gott zů nahe seind mit irer teüfels forchte/ und sagen verborgenlich / Ich woͤlt das ich mich nicht foͤrchtet vor einer creaturischen machte/ sonder allein vor Gott/ In der weyse sprechen sye/ Ich thů/ das ich nit will und das ich hassz/ das thů ich. In dem bekentniß gehn sy in Gottes reych ein/ ehe dann gleißner/ als auch hůren und bůben ehr ein geen.

¶ Das laster/ und ein soliche greulich sünde/ und einen solchen unerstattlichen schaden des menschen/ versteht der Satan/ und befleysset sich drumb von aller ersten/ ein forcht ins menschen hertz zů setzen durch boldern und rumpeln/ das er in von gott wende/ und mach/ das sich der arm mensch vor im foͤrchte/ wider Gottes vilfaltigs verbott.

¶ Dise sünd ist ein boͤse blindheit/ die gottes reych nit besehen kan/ oder ist der unglaub der etwas verthumbt/ und in die helle fuͤret/ Der den unglauben hat/ der widerspricht allen waren reden Gottes/ so im von gottes sterck und macht einfallen/ und hat einen verkerten sinn und willen.

¶ Aber die blind sein und uß unwissenheit hindern/ die muͤssen durchs fegfeur gehn und gefeget oder beschnitten werden/ biß sy klůg werden/ und iren schaden verstehn.

¶ Vor des teüffels reych sol sich der mensch hefftiglich huͤten/ und gott in sonderheit bitten/ das er in nit einfuͤr in versůchung/ sonder erloͤß von dem boͤsen/ das ist/ dem menschen sal mehr zů hertzen sein/ das in gott vor der sünd woͤll behuͤten/ uff das er dem teüffel nit anfahe zů foͤrchten/ denn das im der teüfel verdrieß thůn/ wenn das ist ein unsaͤglichs übel/ den teüfel mehr dann Gott foͤrchten/ oder gleich als Gott foͤrchten/ und der mensch sol ein solichen streyt senlich und ernstlich begeren/ und gott bitten/ das er im seine almechtige krafft offenbare/ die weyl der glaub unser sterck ist/ und gottes kunst vor allem Iohan. Esaie. Matthei. boͤsen bewaret/ als geschriben/ Es wirt sye weder feur noch wasser/ noch irgent ein macht beschedigen.

¶ Du solst nit gestracks bitten das gott den teüffel von dir nem/ als Paulus thet/ sonder das dir kein forcht einkomm / die dich von gott bring/ denn der teüffel kan dir zů einer růten und zůcht geschickt sein/ die du dultiglich tragen und leyden soltest/ als ein frommer sůne seines vatters zůcht leydet/ Aber ins teüffels reych dretten ist teüffelisch und abgoͤttisch/ und ein übel darin dich kein barmhertzig will Gottes brengt.

¶ Iohan. Den teüfel künden wir dapffer nider werffen/ und überwinden/ in dem/ der in uns ist/ und groͤsser und mechtiger ist/ das ist/ durch got der mit uns ist/ für uns her geht/ und streyt und umbstürtzet/ alles das uns beschediget.