Ich Andreas Botenstayn von Carolstat/ thů khundt yedermenigklich/ und bekenn offentlich in krafft dyser geschrift/ daß ich auff volgende artickel gefragt/ und betlich angesucht/ der warhait gezeügknuß zůgeben/ nemlich auf diß. Daß Maria die můtter Gottes ain warhafftige Mitlerin sey/ zwischen Got/ und uns armen sundern/ daß auch kayner selig mag werden/ er růff dann zu Maria/ unnd werd durch ire fürbitt behalten. Dyse ketzerische stuck soll ain vermaynter Prediger und můttwilliger pfaff/ villeicht Georg kirchner genant/ und soͤlche leer das volck geleret / unnd aynen frommen man/ der desselben Kirchners predigen/ hailiger geschrifft anzaigung erfordert/ hat zů gefengknuß gepracht/ daß ettlich gesellen reden. Daß aber der erstlich Artickel verfuͤrisch unnd Ketzerisch ist/ moͤcht ich durch vil schrifften beweisen. Aber ich will das mit wenig und gnugsamen bewerungen thůn. Erstlich irret der Kirchner/ unnd macht irren/ so er prediget/ daß diß oder jhenes sey not zur seligkayt/ und vermag kainen buchstaben hailiger schrifft zůbeweisen/ daß sein liedlein war sey/ und strafft also den hayligen gaist/ und gottes wort/ das ungnugsam lere hab/ wider das. Du solt kain wortlein darzů setzen. Deut. iiii. Apocal. ulti. wider Christum. Der antwort/ was steet imm gesatz geschrieben Luce. x Erforschet die schrifften/ und wider das. Sy haben Moisen. Und wider Paulum .ii. Timo .iii. am endt. und wider vil schoͤne liepliche schrifften/ welche ich kürtz halben nicht fürleg. Für das ander/ moͤcht ich Arguieren/ nach der weyße Pauli. Ist Maria ayn Mitlerin/ Gots/ und der menschen/ so hatt Christus umb sunst/ und vergebenlich gelitten/ dann Paulus spricht also. Ist gerechtigkait durch das gesetz/ so ist Christus umb sunst gestorben. Gala .ii. Demnach ist mir nicht verboten in gleichnuß zůsagen. Ist maria ain mitlerin/ oder yrgens ain haylig unser mitler/ durch welchen wir soͤllen oder moͤgen selig werden. So ist Christus vergebenlich/ oder ye unfruchtbar unser mitler/ dann daß durch Mariam kann geschehen/ darzů ist uns Christus nicht von noͤtten. Aber grober gesell/ soͤlst Schweynen/ nicht menschen/ die gern selig würden/ predigen. Es můß ain mensch nit auß verrucktem samen geboren werden/ der unnser sündt bessert unnd bůsset. Soͤllich sententz/ will ich lassen steen/ und die staynere harten kirchen mit klaren synnen hailiger schrifft/ als mit ainem hamer zerknürschen. Das Paulus spricht/ Es ist ain got und mitler/ oder versoͤner Gottes/ und der menschen. i. Timo .ii. Fürcht sich der arm kirchner nit vor dieser klaren rede. Nun/ ist es nit liecht und klar/ das Paulus sagt? Es ist ain mitler/ der halben/ welcher zwen mitler machen darff/ der darff auch Paulum lůgenstraffen. Daß aber alle listigkait stumm werd/ verglei chet Paulus den aynigen mitler/ dem aynigen got/ als ob Paulus woͤlt sagen Wie ain got ist/ so ist ain mitler. Darzů hat Paulus den selbigen ainigen mitler namhafftig gemacht sagendt/ der mensch Jesus Christus/ der sich selber zů ainer bezalung geben hat/ ist diser mitler .i. Timo .ii. Maria ist nicht für uns/ oder unser sünde gestorben/ sonder allain Christus/ wie darfstu dann sy ain mitlerin nennen. Es ist auch kain hailig für unser boßhait gekreützigt/ als Paulus sagt. Ist Paulus für euch gekreützigt/ oder seyt ir in dem namen Pauli getaufft .i. Corint .ii. Als wenig Maria für uns/ und unsere missethaten ist gestorben/ so wenig ist sy/ oder ain ander haylig unser mitler. Für das dritt sagt Paulus/ daß nur ayn namen ist/ in welchem wir selig werden/ der ist Jesus Christus Actuum .i. Maria hat nicht den selbigen namen/ sonder Christus Jesus ir herr unnd sun. Esa .liii. i. Pet .ii. sprechen/ daß Christus unser sünde und kranckhait hab getragen/ und daß got in in ain sünd und vermaledeyung für uns gemacht hab/ als Paulus leret/ der kaynes Maria gethan/ oder erlitten hat. Darumb maria kain mitlerin ist/ und der luͤgener prediget eytel luͤgen/ und hat jhenem man gewalt gethan/ wie der Votivejegern und der verfürischen Propheten art etwan was/ daß sy aynem kriegßhailigen uber den/ der inen nit etwas ins maul steckt. Michee .iii. und sy sagten. Ir thůn recht/ und was werdet ir den oder jhenen vervolgen oder fahen. Sy namen ayn handt voll gersten oder stuck brots/ unnd erwürckten ain seel/ die annder machten sy lebendig. Ezechi. xiii. daß versůchen auch unser Meß plerrer/ und patrocinen singer.

Mich verwundert/ daß die Votivisten/ und geltsüchtige Marien knecht/ Mariam Christo so vast vergleichen/ moͤchten sich doch wol an die wort Christi stossen/ die er zů seinen eltern saget. Was ist es/ daß ir mich gesucht habt. Wist ir nit/ daß ich in den dingen meines vatters sein můß/ ich main das ist nidergesetzt. Unnd am andern end. Die jhene sein mein můtter/ bruͤder/ unnd schwester/ welche den willen meines vatters thůn. Christus antwort seiner můtter hartigklich/ und vergleichet seiner můtter aynen yeden Christen/ arm oder reych/ jungk oder alt/ der gottes willen verbrengt. Er hatt auch sein můtter nit dahyn gesetzt/ da er sitzt/ und sein tag nye gesagt: Welcher an meyn můtter glaubt/ oder sy anruͤfft/ der wirt selig/ als doch Christus das von sich und got dick spricht.

Der ander Artickel verfecht auch auß angezaygten gründen/ wann so Christus unser mitler und erloͤser ist/ und er spricht. Welcher in mich glaubt/ der wirt selig. Joan. vi. und gedenckt seiner můtter nicht/ ist leichtlich abzůnemen/ daß wir fast wol selig werden so wir zů Christo růffen/ ob wir gleich sein werde můtter nymmer anrůffen. Auch ist nit gůt/ daß wir zů Maria růffen oder schreyen/ wie das ketzerisch gesang/ Salve regina/ meldet/ dann wir soͤllen alle zů Christo růffen/ durch welchen wir allayn zů Gott unnserm vatter kommen/ als Christus klar spricht. Niemant khumpt zů dem vatter/ dann durch mich. Ich bin der weg. Joan. xiiii. Und Paulus nicht verschweigt/ sagent. Durch Christum haben wir ainen zůgang/ in ainem gaist zů got. Ephe. ii. Darzů lautet die Epistel zum den Hebreern sprechende. Christus ist in hymmel gangen/ auff daß er ytzt vor dem angesicht gottes für uns erschein. Hebre. ix. Dyse schrifft würfft obgedachter Kirchner/ oder Gloͤckner gantz umb/ und tritt sy mit seinen mystigen fuͤssen/ wann er spricht/ daß wir on ruͤffung und zůflucht zů Maria / nicht moͤgen selig werden/ oder daß wir durch Maria fürbitt werden behalten. Weil es nit beysamen mag steen/ Kayner kumpt zů Got dem vatter dann durch Christum. Unnd daß ainer durch Mariam zů dem Vatter khommen moͤge/ oder daß von noͤten sey/ daß ainer auch durch Mariam/ und nicht allayn durch Christum/ zů dem vatter moͤge kommen. Also verwürfft die tolle Capeln die warhayt/ unnd macht Christum zů ainem luͤgener/ des gleichen thůt die boßhafftige kirchen dem hailigen Paulo/ der ge sagt/ daß wir alle durch Christum aynen zůtritt zů Got haben. Maria ist ye nit Christus/ ob gleich maria ain můtter Christi ist/ darumb muͤß volgen/ daß wir on fürbitt marie nit moͤchten behalten werden/ daß wir auch ainen zůgangk durch sy zů Gott haben. Wann die nerrische leut mit iren fabeln woͤlten hanndeln (wie sy dann sprechen) Will ayner zů ainem Fürsten khommen/ so můß er erstlich ain vermittelte person ansprechen/ als den Marschalck/ Camerer/ und der gleichen. So sy ye mit uppischen merlein woͤlten zůthůn haben/ soͤlten ir Parabol zů Christo/ und nit zů den hayligen oder Maria fuͤgen/ seytemal wir durch Christum ain zůgang zů Got haben/ und Christus der weg und vermittelste person ist. Aber der Gloͤckner geet gern mit schellen umb/ und gelüsten inen grossen glocken/ wie ainem narren grosse schellen behagen/ unnd macht dem armen volck spigelfechten vor/ speiset mit windt unnd luͤgen/ sagende/ kayner mag on fürbitt Marie selig werden. Maria ist auch der weg/ durch welchen wir zů got khommen. Er ist aber ain gelt narr/ tregt ain Eulen/ die nach gelt locket/ und fuͤret das volck auffs eyß/ in gottes vermaledeyung/ machend das Christlich gemayn volck vertrauen/ und iren trost auff ainen lauttern menschen setzen/ der allain mensch/ und nit Gott ist/ dadurch werden sy verdampt allesampt/ die im glauben. Hiere. spricht. Vermaledeyt ist der der in ainen menschen sein trost setzt. Hiere. vii. und xvii Ir soͤlt nit luͤgen vertrauen etc.

Ist es aber nit ain maisterlich lůgen/ daß wir on Marie fürbitt/ und vermittelung nicht koͤnnen haylig werden/ haisset das nit in Mariam vertrauen/ wann ainer wenet/ Maria sey seine mitlerin/ die in zů Got bring/ wann ainer auff ainen grundt oder felßen bauet/ dero nit Christus ist/ setzet er nit ayn fundament/ das Paulus nit gelegt hat? Got ist unnser zůflucht/ Christus unser felß/ auff welchem wir steen und wachssen/ und zů welchem wir fliehen soͤllen/ und der pfaff kirchner spricht/ wir soͤllen zů Maria fliehen. Ich Ere Mariam gern/ ich will aber irem Schoͤpffer und herren sein Eer nit abschneiden/ und marie das zů messen, das sy von sich scheuet. Also ist beruͤrt/ das faͤrlich und boͤß ist/ daß wir zů maria fliehen/ zů den hayligen ruͤffen/ und ich moͤcht noch vil schriffte fuͤren/ aber ich hoff der Gloͤckner werde sich entsynnen/ und gestatten/ daß in ain klain kindlein besser lere/ auff daß er besser werde/ aber wirt er herter und erger werden/ will ich in mit ainem buͤchlein grüssen/ daß im sein vermessenhayt erschottern moͤcht. Er hat disen spruch von dem Layen nit annemen woͤllen. Růff mich an in tagen deines leidens so will ich dich erloͤsen. Psal. xlix. gleich ob dyse schrifft unbequeme/ oder zůschwach sein soͤlt zůbeweren und befestigen daß wir die heiligen nit soͤllen anruͤffen/ und waist nit/ daß anruͤffung ain frucht des glaubens/ ist anders gerecht als Christus leret/ lest sich beduncken es sey nit gnug gesagt und so vil. Růfft mich an/ als/ Růff niemant annders an/ wann ich sag du solst den glauben nach hailiger Schrift uben. Were es nit gleich als vil/ als sprech ich/ du solst nach kayner anndern geschrifft den glauben probiern/ wann got spricht/ du solst mich mit gantzem hertzen lieben. Ist es nit so vil als du solst niemant anders mit gantzem hertzen lieben.

Item/ die schrifft erzelt das erst gebot in zwayerlay worten und ainer maynung. Also/ Israel deyn Got ist ain got/ und also/ du solt nicht frembde goͤtter haben/ oder nicht noch andern goͤttern geen/ wann auch die schrifft/ der ayns leret/ so will sy das ander mit eingeflochten haben. Des gleichen ist mit dyser Red. Du solst mich anrůffen/ spricht Got der herr. Daß wir auch dyse maynung soͤllen versteen/ Du soͤlst niemandt annders anrůffen. Auch will Gott/ daß wir zů im soͤllen schreyen/ darumb spricht er. Schrey zůt mir/ so werd ich dich erhoͤren. Hiere. 33. Wann auch ain volck sich versameln woͤlt/ got zůbitten/ wie die Christen in der Vasten zeit thůn/ soͤlten sy stracks zů got schreyen/ und nicht zů den hailigen/ als Johel leret/ sagent. Beruͤfft oder versammelt das volck in gottes hauß/ und schreyet zů got. Johel. i. Er spricht nit/ ir soͤlt schreyen zů Abraam/ Isaac/ und Jacob/ und andern hayligen Propheten/ die in der schrifft Canoniziert sein/ sonder zů got. Er sagt auch nicht. Ir soͤlt Abraam bitten/ daß er got für euch bitt/ Wiewol Abraam ain vatter aller glaubigen ist/ und alle soͤne gottes auß im/ und seinem weib Sara/ als auß ainem stain oder felßen gehauen sein. Aber die Pfaffen Baal und vermaynte Christen schreyen zů unsern hayligen/ und machen das versamelt volck singent. Sancte Petre/ Ora pro nobis. Item/ Omnes sancti dei/ Orate pro nobis. Wider Johel der spricht: Sy soͤllen zů got schreyen/ und stellen sich gleich/ als were got so unbarmhertzig/ unnd gefiel im die menig oder hauff der fürbitter so wol/ daß er sich des hauffen halben woͤlt lassen erwaichen. Was wirt in aber got sagen? nicht anders/ dann das. Jacob/ du hast mich nit angerůffen.

Gott rechnet auch soͤlch geruͤff oder geschray zů den verstorben hayligen für ain gespoͤtt und uneere/ als soͤlt er unrecht gesagt haben. Ich will mein barmhertzigkayt ins Tausent geschlecht außgiessen meiner liebhaber. Exodi. xx. Und soͤlten seine knecht gelogen haben/ die sprechen. Ain yeder der gottes namen anruͤfft/ der wirt selig. Ezechi. iii. Auch spricht Gott/ Daß ain yeder/ der seinen namen anruͤfft/ geschaffen sei zů seiner glorien. Esa. xliij. Welcher nun gottes namen nicht anruͤfft/ der verleürt gotes glorien und eer. Gottes glorien unnd eer/ soltu da bey mercken/ daß der herr ain got ist/ oben in den hymmeln/ und ain got hernyden imm erdtrich. Deut. iiii. Got ist in allen dingen/ und sein glorien erfült alles das da ist. Derhalben eeren die jhene got wol und recht/ die stracks on mittel zů got růffen/ dann sy bekennen mit irem gerichten růffen zů got/ daß er hernyden in der erden gegenwärtig ist. Diß bekentnuß schatzt got für ain grosse eer. Der wegen uneren die andern got/ so zun hayligen schreyen/ und stellen sich der massen/ als were der herr nit ain got auch in dyser erden. Als Helias zů dem Pfaffen Baal sprach. Sy thůn schier/ als were ir got nicht einhaymisch/ oder zum wein/ oder schlieff. Dann hielten sy es dafür/ daß got gegenwertig unnd barmhertzig ist/ sy würden sich messigen und entziehen/ und zů got in gaistlicher ainfeltig růffen. Dweyl sich aber ir hertz von got zeücht/ und macht sich got frembd/ darumb daß sy sich nit mit got veraynigen/ der halben schreyen sy auch zů den hailigen/ die schlaffen/ oder sein ye so ferr/ daß sy ir geschray nit koͤnnen hoͤren/ seind verseren gottes namen/ glori/ eer/ und barmhertzigkait daß got zů ainem spricht/ Růff zů mir/ so will ich dich erhoͤren/ schrey zů mir/ so bin ich gegenwertig. Psal. xlviii. Aber zů den anndern spricht got. Ich kenne euch nit/ euer sünde haben euch von mir gesetzt. Wann es gůt were/ daß wir die hailigen anruͤfften/ oder daß wir erstlich gottes Hoffmaister oder schlüsseltrager soͤlten bitten/ daß sy unser gebet zů got brechten/ ungezweiffelt/ Christus hett uns das in kainen weg verhalten/ er hett uns auch nicht gelernet/ daß wir gott unnsern vatter so bloß und schlecht bitten moͤchten/ und sagen. Vatter unser/ der du bist in hymeln. Were es gůt oder von noͤtten/ daß wir unser liebe Frau/ oder sant Peter/ oder Paulum zůvor soͤlten bitten/ so hett sich Christus verschnapt/ und uns unrecht gelernet betten/ und unns zůvil oder zůkeck gemacht/ daß wir den herrn moͤchten bitten on mittel/ der oben in hymmeln ist/ were auch der selb vatter nicht bey unns/ und auff erden/ so wir warhafftig glauben/ und imm hertzen sagen/ Vatter unnser/ der du bist in hymmeln/ so weren wir betrogen.

Christus ist allayn/ der uns zů seinem vatter gebracht hat/ und kayn ander haylig/ wes stat/ eer und lob erhalten mag. Christus ist der liebe Sun gotes/ alle die an in glauben und in annemen/ den hatt er geben gewalt gottes soͤne zůwerden. Welche got für ainen mechtigen/ gegenwertigen/ und günstigen herren halten. Es ist eyttel gaucklerey und uppigkayt/ daß wir uns soͤlche muͤhe auff unsere helß gelegt haben/ wir haben weder exempel oder geschrifft/ daß von noͤten sey/ soͤlche patron zůhaben. Daß aber das Ave maria zumtayl in der Bibel erzelt/ zum tayl begriffen/ das macht das Ave maria nicht zů aynem gebett/ weil nichts annders imm Ave maria ist/ dann ain erzelung/ was gůts/ und wie vil gnaden got Marie erzaygt hat. Gleicherweiße/ wann die schrifft das lob David erzelt/ so leret sy nicht zů David zůschreyen/ sonder/ wie und was David gewest ist/ und welche gnad im got geben hat. Und raytzet uns soͤlche beschreibung des lebens/ und der gnaden David ye nicht zů anrůffung/ und zů geschray Davidts. Das verstee also. So du ainen Kaiser/ oder man loben thůst/ so růffest du in dem ye nicht zů im/ sonder du erzelest lautterlich sein thugent. Also/ wann ich sprech Got Abraam/ got Isaac/ got Jacob. Aber got gedenck Abraams unsers vatters/ das hayst nit/ růff Abraam an/ oder schrey zů Isaac/ das ist gesagt. Du wunderbarlicher guͤttiger got/ du hast Abraam dir gemacht/ und du bist sein got worden/ du hast in gemacht/ daß er an dich und dein wort geglaubt hat/ und hast in wider aller natur leuff ainen vatter gemacht viler voͤlcker. Gedenck Abraams/ gedennck was du inen gůts und gnad erzaygt hast/ on sein verdienst. Hilff mir auch also/ wie du ime geholffen hast/ ich gedenck deiner wolthaten.

Also meldet die geschrifft auch/ wie die haylige Junckfrau Maria von dem Engel gegrüst/ von got/ voller gnaden geschütt/ und ain můtter Christi geworden ist/ und erzelet der gleichen vil/ nemlich/ wie die frucht ires leibes gebenedeyet ist/ welches sy auß dem glauben empfangen hatt.

Aber soͤlche vermeldung des lobs Marie/ hayst nicht anruͤffung/ oder schreyen zů Maria.

Wiltu aber daß bitten haist/ so bitt ich/ du woͤlst mir sagen/ was du imm Ave maria von Maria bittest oder forderst von der můtter Christi/ weil Christus spricht/ daß wir etwas bitten muͤssen wann wir betten. Quicquid petieritis etc.

Nun soͤlt ich das Salve Regina außstreychen/ woͤlt ich vil verfürisch und ketzerisch Sententz darinnen finden und straffen. Der Teüffel hatt sich maisterlich in die scheynliche hailigkait eingemischt/ derhalben woͤlle sich ain yeder fürsehen/ und betrachten das im nütz und seligbarlich sey. Ich lob und gruͤß die hayligen/ und ruͤme die můtter Christi/ aber daß ich ir fürbitt můß haben/ das widersprich ich. Ich wayß daß got allain seinen hailigen gnad geben hat. Aber ich will das wasser der gnaden auß dem brunnen trincken/ welchen sy getruncken haben.

An mich ist auch durch glaubwirdigen anzay ger gelangend/ daß man gedachtem Layen in sonderhait der halben/ hart gehalten/ und beruͤrt hab/ daß er ursach von dem Prediger gefraget seiner predig/ und das im verbotten sey hynfüro ainen Priester einzůreden/ oder bestendige uhrkundt auß hayliger schrifft zůfordern/ mit fürwendung/ daß kainem Layen gezymb/ ainen Prediger umb gezeügnuß seiner Predigen zůfragen.

Hett ich zeit unnd můß/ ich vermoͤcht nit wenig auff dysen artickel schrifft zůsetzen. Aber kürtz halben frag ich die klůgen Hansen/ ob nicht allain Christus zůfragen sey/ und daß sy sich in vleiß soͤllen verwaren/ daß sy kainen luͤgen glauben geben/ dann Salomon bitt in sonderhait got/ daß er im woͤlle verleyhen/ daß er ye kainer luͤgen glaub. Prover.

Auch spricht er/ daß wir nit aynem yeden wort glauben sollen. Prover. x. Der leychtfertig glaubt ainem yeden wort. Also haist in Hebräisch und ists wort (Peti) welches unser Translation/ yetzo eynfeltig/ ytzo unschuldig/ ytzo nerrisch nennt. Das ist aber die maynung und synn/ daß sy narren sein zů yedem wort glauben.

Nun hett auch Salomon unns das gesetz gern ernstlich bevolhen/ in dem selben zůpleiben/ warumb solt dann ain Layischer Christ seynen Prediger nit fragen unnd sprechen. Lieber herr/ zayget mir den grundt euer leer/ daß ich gewiß mag werden. Christus ist der weg und die warhayt/ und spricht das Moises unnd Propheten/ von ime gezeügknuß geben. Derhalben ich bitt/ ir woͤllet mich den weg und warhait leren/ dann ich soll nit yegklichem glauben. Wer spricht/ hie oder dort ist Christus/ ich můß das wort der warhait haben/ ain wort gottes/ daß alle menschen sein luͤgener. Darauß mag ain yegklicher lernen/ daß die Layhen freüntlich und unableßlich fragen moͤgen und soͤllen/ wann der prediger nichts klar und vernemliche schrifft fuͤret/ sonst werden Prediger unnd zůhoͤrer verdampt. Die geschrifft lobet die Thessalonicher daß sy Paulo nachsůchten/ und erforschten die schrifften/ ob es also was/ wie er Prediget/ und der arm pfaff Kirchener/ understeet sich zůweren/ daß die Layhen weder nachfragen/ noch nachsůchen soͤllen.

Daß aber die Layhen den Predigern dürften einreden/ unnd iren verstandt auch offenbaren/ dysen gewalt gibt Paulus/ sagend. Zwen oder drey moͤgen Prophetiziern/ das ist schrifften außlegen/ die andern soͤllen schweygen. So aber ain sitzender oder zůhoͤrer ain eroͤffnung hatt/ soll der oberst/ das ist der Redner und Prediger still schweigen/ und hoͤren/ was got dem Layen offenbar gemacht hat. i. Cor. xiiii. Liß Paulum/ und sihe/ ob nit alle Layen moͤgen ir offenbarung und kunst an tag geben. Merck daß Paulus spricht. Ich will daß ir all außleget. Darauß ist abzůnemen/ daß die Prediger unnd Pfaffen der Layhen verstandt nit soͤllen verlachen/ sonder gern hoͤren. Ich waiß daß vil Handtwercker in gottes leer mer wissen/ dann Pfaffen/ so die boßkugel und kegel werffen. Gott leret die Layen/ daß sy den gekroͤnten Doctorn und Maistern vorgant. Moises wolt ettliche die da Prophetizierten ungehyndert lassen. Nume. xi. und ain stoltzer kirchenerß pfaff/ darff das weren.

Was ist Amos/ was ander Propheten gewest/ seinds alle pfaffen gewest? Sy seind hierten gewest und haben die warhait verkündigt den Pfaffen.

Nun solt den Layhen verbotten sein/ iren Predigern einzůreden/ wie moͤcht dann ain Lay imm alten gesetz sein hand auff den Prediger legen/ unnd den ersten stayn in in werffen. Deute. xiii. Er můß ye wissen/ daß der Prediger das volck verfuͤret. Mag er inen bey der Carthausen ziehen/ und für das volck fuͤren/ inen zůstaynigen. Als dan Martinus Luther auch antzeygt in etlichen Artickel oder schrifften etc.

Darumb wem das predigt ampt auffgelegt wirt dem wirt das hohist ampt auffgelegt yn der Christenheyt/ der selb mag darnach auch teuffen/ meß halten und alle seelsorge tragen/ oder so er nicht will/ mag er an den predigen alleine bleyben/ und teuffen und andere unterampt andern lassen. Wye Christus thet und Paulus und alle Apostel Acttuum. iiii. Daran man aber sihet/ das unser yetzige Bischoff und geyslichen/ goͤtzen und nicht Bischoffe sind/ den sie lassen das hohist ampt des worts/ das yhr eygen seyn solt/ den aller geringsten/ nemlich Capellan unnd Monchen/ terminarien da tzu die geringer ampter/ auch/ als tauffen/ und ander seelsorger Sye aber fermelln dye weyl/ und weyhen glocken/ alltar und kirchen/ das weder Christlich noch Bischofflich werck sind/ von yhn selbs ertichter. Es sind verkerete verblente larven und rechte kinder bischoffe.

Da her ists auch blieben/ das an etlichen ortten auch weltlich uberkeyt/ als radherrn und fursten/ yn selbs prediger bestellet unnd besoldet haben/ in yhren stedten und schlossern/ wilch sie gewollet haben on alle urlaub und befelh der Bischoff und Bepste/ Und hat auch niemant dreyen geredt. Wie wol sie es (besorge ich) nicht than habenn auß Christliches rechts verstands/ Sonder das die geystlichen tyrannen das predig ampt veracht und geringe gehalten haben und weyt gesondert vonn dem geystlichen regiment. Szo es doch das aller hohist ampt ist/ an den alle andere hangen und folgen. Widerumb/ wo predigampt nicht ist/ der andern keyns folget. Den Johannes am vierden sprichtt. das Christus nicht tauffet habe/ sonder er predigt nur. Unnd Paulus .i. Corinth. i. beruͤmpt sich/ er sey nicht tzů teuffen/ sondernn tzů predigen gesandt.

¶ Dyse undterweisung hab ich obgenanter Andreas eylendts ainem Layischen Christen zůgůt zůgeschickt/ in sonderhayt der warhait/ und leer gottes zů eeren. Auch derhalben/ daß sich die Obrigkayten entsynnen/ und ire hende an sich halten/ so lang biß sy sich bestendiger warhait erkhundt haben. Will auch gern wider anzayg thůn/ feyndtlich oder freüntlich angesucht. Unnd zů rechtem und festem bekentnuß/ hab ich mein Pitschafft undten an mein Origiginal thůn trucken. Geschehen unnd geschrieben zů Wittenbergk am Montag nach Jacobi. Imm Jar nach der geburt Christi. M.D.XXiii.