Du solt keine zur profession der witweschafft kummen lassen/ sie hab dan vor eynen mann gehabt/ wie gehet es itzt mit den beginen? wie mit den Nonnen? Paulus hatt nicht von Nonnen wollen wissen/ dan Nonschafft ist ein Heydnischer/ nit ein Christlicher stand. ¶ Der Bapst achtet nit/ ob das weyb gleich vor keynen mann gehabt.

Paulus wil das die junge/ menner nhemen/ erben gebern / und yhr heußer yn dinstparkeit/ warten sollen.

¶ Der Bapst spricht/ ich wil/ das die uber .xiiii. jar/ ym i. Timo v.closter verhart haben/ keynen man nhemen sollen.

Paulus hatt ein cleyne sund ermessen/ als geylheyt und untzemkeit/ drumb wurffet er alle junckfrauen und witwen/ ßo unter .lx. jaren seind/ und umb profession der nonschafft. bitten/ von yhrem begeren.

¶ Der Bapst lessit grosse laster/ sund/ und schand ergehen und entstehn/ eher er zugeben wil/ das eyne/ nach gethaner profession auß yhrem band und strick treten mog/ wiewol keyn profession pundig/ ßo unter .lx. jaren voltzogen ist. ¶ Alßo leret und handelt der Bapst wider aposteln und Moisen. Ich geschweig das er wider Christlich freyheyten/ gottlich lob/ und gemein lieb handelt.

Das wer noch zuwenig und ungnug/ er muß auch wider offenlich antzeyg Christi streben und poldern. ¶ Sanct Peter und andere Aposteln waren bedachte und dapfer menner/ und sagten. Gut ists das sich eyner nit beweybt. Matth xix.¶ Darauff sagt Christus. Das kan nit meniglicher begreuffen/ sonder allein wilchem das verlichen ist. Wer das fuelen kan/ der enthalt sich vor vermelhung. Sich Christus sagt/ das keuscheit ein gottlich gab sey/ und das keyner den eelichen stand meyden soll/ er fuel dan die gab gottis. ¶ Christus wil das sich die/ in eeliche leben sollen setzen/ die gabe der keuscheit nit fuelen. ¶ Der Bapst acht nit groß wie eyner solche gab lernet fuelen. und lesset leuth in gelubd der keuscheit fallen/ wie die schwein. in die treber. ¶ In .lx jaren kan eyner lernen/ ob yhm gott gnad der keuscheyt geben hab/ oder nit/ das kan keyner unter .xv. jaren lernen. Eyner kan wol .xx. jar keuschlich leben/ der in dem .xxx. jar voller unkeuscheit wirt.

Ich acht/ der Bapst hab von eyner tollen kuhe gefressen das er die zeit der versuchung auffs hochst/ inß .xv. jar gesteld. Dan ich weiß das vil meydlin und kneblin in .xvi. jaren nit wol fuelen/ wartzu sie Adam treybet/ und weiß das tzuneygung des fleisch die selbe tzeit stiell ligt und schlofft.

Annus probationis nach der schrifft/ seind .lx. jar. Dan Paulus spricht. Es soll keyne unter .lx. jaren tzu widwe i. Timo v.schafft gelassen werden.?

Nun weyl der Bapst selber spricht. das/ gelubden unter xii. jaren von maydlin/ und unter xiiii. jaren von menlin geschehen/ zu keynem orden pinden/ sonder sie haben frey in yhrer macht/ und willen/ auß den clostern tzu gehen/ und sich in die welt zubegeben.

Die Bepst straffen auch mit bann und vermaledeihung Abten/ Priores und Gardien/ wan sie gelubden/ von solchem jungen gesynn annhemen.

Warumb solt ich nit rathen Monichen und Nonnen wan sie sich zu gemerung der gebuͤrd/ geschickt befinden. das sie closter mugen vorlassen? Warumb solt ich nit sagen/ das gelubd der keuscheit/ so unter .lx. jaren geschehen. i. Timo v.unpindig seind? Weil S. Paulus spricht/ das kein weyb zu der profession der witweschafft soll erwelt werden/ sie hab dan .lx. jar gelebt. Solche .lx. jar gepuͤren auch den mennern. Weil Moises das alter manß und weybs stetz gleich macht. Darff der Bapst sagen/ das kein gelubd crefftig ist/ das eyner gethan/ eher er .xiiii. jar uber lebt hab.? Und saget/ das one schrifft/ und in der zeit/ die nit gnug ist/ zu erfaren unsere zuneygung. Warumb solt ich nit/ durch schrifft Pauli sagen/ das gelubde der keuscheit unther .lx. jaren unpuͤndig seind? Dann es kan keyner wissen/ ob er gleich tzeyten keusch ist/ wie lang er alßo wirt bleyben.

Auch weil der Bapst mit vermaledeyhung/ die jene strafft ßo seynem gebott ungehorsam seynd. Warumb solt ich den wider spenigen Bapst. der wider gotliche leer thuet/ auch nit ercleren/ das er und alle sein vorfaren/ von .cccc. und lengern jaren ym bann Anathema und verfluchung gottis gelegen/ gestorben und begraben bey pontio Pilato sie hetten dan yhre leer berauhet. Darumb das sie anders und wider gottliche leer gelert haben? Sie solten knaben und maigdlin von solchen boeßen und pestilentzischen gelubdten abtziehen/ und gethane gelubd one gelt auffpinden.

War ist es/ man thut unrecht/ das man gelubd bricht i. Timo v.wie Paulus spricht. Sie haben das urteyl/ das sie/ den glauben brechen. Aber es ist dannest eyn cleyn ubel/ und vil geringer/ wan du dein gelubd/ der keuscheit brichst/ und vermelhest dich mit eynem weib/ dan dastu unkeuschlich lebest.

Wan Paulus nit gesagt hett. das die sundigen/ so den ersten glauben brechen/ beschluͤß ich. das Nonnen/ Monichen und Pfaffen yhre gethane gelubd/ one sunde mugten/ mit vergleichung/ ablegen. ¶ Und itzt nach solchem verbott Pauli halt ich/ das alle gelubd der menner und weyber auffgeschuͤrtzt seind und unpundig/ ßo lang/ biß ein wolgelarter pfarrer oder Bischoff/ der gelart ist. wie Timotheus und Titus/ gethane gelubd erkandt/ und sie offenlich odder heymlich mit still schweygen becrefftiget haben.

Und ob gleych unßere Bischoffen/ nerrisch geworden sein/ und konden nit rathen/ ßo haben wir die schrifft die noch rath gibet/ die auch alle gelubd der unehe vorwirfft und annullirt der Monichen und Nonnen und pfaffen/ ßo nit uber .lx. jar gekummen seind.

So ist das unser trost/ das wir solche gelubd/ mit hilff. ßo wir den notturfftigen leuthen thuen/ vergleichen und ablegen konnen/ wie Moses yrlaubet .Levi. utli. Dar auß volget/ das man unser capitel nit nach dem buchstaben/ sonder nach seynem inhald und vermugen/ soll vernhe men/ und soll nit alßo verstanden werden. Alles das ein man gelobdt/ gleich das selbige. muß er geben. Dan in gelubden/ da durch eyner gott/ seyne seel vorheyhert / magk ich mich abloeßen/ wie gehort.

Leviti. xxvii.Alhie muß ich noch eynes sagen/ von Monichen und Nonnen. Ich laß geschehen/ das Eltern yhre kynder yn den wigen gott geloben mugen. Dennoch mugen sie yhre unmuͤndige kinder auch erloßen/ mit hilff gegen den armen. weil Moses sagt. So yhemants/ seynen sohn odder dochter/ von eynem monat/ biß an .v. jar/ gott gelobet/ der soll fur den Sohn .v. siclos und fur die dochter .iii. siclos geben. So aber eyner arm were/ der soll noch seynem vermugen geben/ hat er nicht gelt/ ßo helff er armen mit dienßparkeit und beystandt .

Das ist der erste Artickell/ belangende die gelubd/ ßo seelen bedreffen/ wilche gelubd unßere Monichen/ Nonnen und pfaffen doch mit unterscheit thuen.

Dan Monichen und Nonnen geloben keuscheit/ one tzusatz/ strack und frey. Aber die pfaffen. geloben alßo.

gen. vi. rho. vii. Jacob iIch verheisch keuscheit/ ßo vill menschlich gebrechlichkeit tzulesset. Das heyst nit keuscheit geloben. Neyn/ es heyst ßo vill sagen. Ich gelob/ das ich widder keusch noch frum sein will. Dan menschlich gebrechlichkeit ruhet nymmer/ sie ist ewig tzu dem boeßen bereit/ und thut ubell/ widder unßern willen/ und gebyrt stetz sunden.

Derhalben/ wan eyner gelobet/ er woll ßo frum sein/ wie yn seyne kranckheit wil frum lassen. der spricht heymlich. er wolle nymmer frummer sein. Jdoch haldt ich Monichen und pfaffen und Nonnen/ yn dießem gleych/ das yhre gelubde unpuͤndig und crafftloß seynd/ biß ßo lang sie uber .lx. jar alt werden.

Fur den andern artickell mercket/ das kein mann schuldig ist alle ding tzu thuen odder geben/ die er gelobt.

Lev. v.Dan die schrifft saget alßo. Ein mensch der geschworen oder gelobt hat/ mit seynen lippen/ das er/ was woll oder ubel/ gut oder boeß wil thuen. und theut das nit. und erkennet darnach seynen yrthumb/ der soll bueß wircken. ein schaff oder lamb opfern/ ßo wuͤrd der priester fur yhn bieten/ und werden yhm seyne sunde vergeben/ aber so er arm ist/ soll ein par dauben geben.

Disser text gibet uns/ eynen schonen verstand unßers textes. Dan alhie horestu/ ßo eyner gelobt/ ettwas guttes zuthuen/ wilchs er fur gutt acht/ als Monichen und Nonnen thuen/ und die ßo den heyligen geloben/ die wenen sie thuen recht. Aber wan sie ynn dem glauben unterricht werden/ und erkennen/ das yhre gelubd unbillich seynd. Was soll der thuen/ der also etwas gelubt/ das er fur gut und recht achtet/ und befind darnach/ das dasselb nit gut ist/ soll er furtfaren? Nein. Er soll sich endsynnen und lernen und yhm wider sey/ das er durch unwissenheit etwas gelobet/ das boeß und unrecht/ und handreychung zu den lebendigen tempeln/ mit gelt/ gut/ rath/ odder beystandt thuen/ sich alßo straffen.

Alhie vernemet/ das Jepte auch ein gelubd thet. wilchs Judicum xi.er fur gut achtet/ und was ym grund/ ein boeß gelubd/ und Exo. xxwider gott. Dan die schrifft spricht. Du solt nit todten/ Wider diß verbot. gelobt Jepte gott sein gelubd sagende. So du/ die Soene Amon/ in meyne macht gibst/ ßo will ich/ den ersten/ ßo mir. auß meynem hauß endgegen lauffen wirt/ dir verbrennen und opfern. Das solt Jepte mit nicht gethan haben/ dan es war wider gottlichem willen und rath/ das auch der heylig Augustinus/ wie ich/ heldet.

Laß dich nit kummern/ das die schrifft saget/ wie der Judi. xigeyst gottis Jepte gegeben sey. Dan in eyner halben stund und vill ehr/ kan eyner den geist verliren und unrecht thun.

Das scheinlich von Petro gesagt ist/ der gleich yn der Matth xvi.stund/ ßo yhm Christus saget (Du bist heylig) von Christo must horen/ Gehe hinder mich Satana/ du bist mir zu verhindernis. Alßo wirt in kleyner zeyt groß enderung wie mit Jepte beschehen ist/ des halben seyn gelubd nit loblich ist zu achten/ ob er gleych den geist gottis gehabt.

Alßo. und hie mit horestu/ das keyner seyn gelubd. soll volbrengen/ wan er/ erlernet hatt/ das es boeß ist/ sonder er soll reu/ leyd/ und straff leyden/ wie gemeldt.

Das sollen Monichen und Nonnen eynnhemen/ ßo durch unwissenheit/ das gelobt haben/ das sie mit der zeit als boeß und schedlich befinden. Sie sollen sich tzu dem besten halten/ und yhre unwissenheit/ zusampt das nerrisch gelubd bereuhen/ den armen leuthen sonderlich hilff zu erstattung thuen.

Nun die weyl/ vil besser/ und gott beheglicher ist/ das die Nonnen und Monichen weyber/ oder menner haben. kinder in gottlicher leer und lieb tziehen. und leuthselig sein/ Dan das sie/ in den kirchen murmeln/ on verstandt beten/ wider kinder noch andere gottis wort leren. unter sich neydisch und hessig/ und gegen niemants holdselig sein. Sollen sie das best erstlich erwelen/ suchen und thuen.

Item weyl solche grausame sunde/ die nit wol zu sagen seind/ von Nonnen und Monichen beschehen. Die auch erger seind den gemeyne unkeuscheit und ehepruch/ und geschehen derhalben/ das sie starcker natur und zu unreynigkeit/ vast woll geneygt. Wer es tausent mal besser/ das sie sich verenderten/ dann das sie solche greuliche sunde zu thuen benottigt werden. Dan eestifftung soll auff i. Corin vii.gericht werden/ zu vermeyden unkeuscheit/ als Paulus leret. Propter fornicationem unusquisque ducat suam.

Ich sage/ das etzlich Junge Nonnen und Moniche solche sund thuen (die ich in yhr gewissen und in pueßem schieb und sthand halben geschweich) die wichtiger seind dan unkeuscheit mit viehe/ thieren/ und mogten sonst selig werden/ ßo sie in eelichen stand giengen/ ob sie gleych woll gelobd und geschworen hetten.

Weil sie dan durch tegliche erfarung lernen/ das yhre abwitzige und unsynnige gelubd/ yhnen und yhrer seligkeit zu verderbtniß gereichet/ sollen sie. wie gesagt/ das gelubd vergleichen/ und in eynen sichern stand treten. Dan sie seind yhe nit keusch mit solchen sunden/ sie seynd huren und buben vor gott/ und thuend yrem gelubd mit nicht genug ob sie sich solcher greulicher laster enthielten/ sundigen sie doch mit hitzigen gedancken und nachtrachten. Derhalben laß faren. den geferlichen stand/ greuff zu eelichem beth/ das gott erlaubet/ und gut ertzney dartzu gibt.

Wilcher aber zu keuscheit geneigt/ der bleib keusch/ und gelobe nit biß ubir .lx. jar/ dan unter der zeit thuet er ubel und soll der pfarrer seyne gelubd untuglich sprechen. Juniores .lx. reice. i. Timo. v.

Wan auch eyner gelobet/ das er was ubels thun wolt. der soll sein gelubd nit volbrengen/ sonder sich recht bedencken/ gott clagen/ das er frevelich gelobt.

Das ist der ander tzusatz der schriefft kegen unßerm text/ darauß volget. Wie ein mann sein gelubd erfullen magk.

Ich wil auch nit bergen/ das Moises gleich ynn dem capitel/ do er spricht. ¶ Was du eynem mit mund und gemuͤth gelobd hast/ das soltu an vertzug volbrengen. Deu. xxiii. der auch kurtz zuvor sagt. ¶ Du solst keynem lohen des hurhauß opfern/ und kein gelt des fleysch in hauß gottis tragen/ was du gott gelobd hast/ dan die beyde vor gott seind ein grauhe und verfluchung.

Sich Moises der verbeut uns/ das wir nit alle ding gott geben sollen/ ßo wir gelobd haben. Er spricht hastu gott gelt des fleysch oder der unkeuscheit gelobt/ solt du yhm der keynis geben/ dan gott magk der keynes ansehen und annemen. Derwegen sollen wir das nit alßo versteen. Was du gelobd hast/ das soltu geben. Wan eyner ettwas gelobd/ das gott hasset/ aber das gott unbeheglich/ das soll er nit geben/ sonder seyne nerrisch gelubd beweynen und straffen/ wie auß dem vierden capitel oben gesagt.

Nun/ ßo ich ampt/ werck und leben/ der vermeynten geistliche anseh und ermeß (der yenen/ mein ich/ die ynn unstrefflichem und wolscheinlichem leben/ bey den menschen gehn und frum gehalten sein) ßo find ich kein furtrefflicher werck/ dan lang gebeth/ ewig kirchliegen/ messehoren und leßen/ der doch keynes vor gott gutt ist.

Matth vi. Christus verbeut lang gebet/ und spricht. Ihr solt nit vil redende sein (ßo yhr betend) wie die Heyden. Matth. vi. So schwatzen Pfaffen/ Monichen und Nonnen den gantzen tag und nacht. kotern wie Elßdern / wissen auch nit was sie beten/ beten mehr und anders. den got haben wil. ¶ Ich weiß/ ßo sie solche gebet/ in yhrem gelubd der profession begreuffen/ das sie/ gott geloben/ das er nit wil haben. Dan Christus spricht. Nolite. aber. Ne sitis multiloqui. Weyl dan Christus solch lange gebet verbeut/ soll man ablassen/ sich zu dem halten/ der die warheit/ und gerecht weg ist. Gott spricht durch David. Warumb nympt der sunder mein wort und testament in seynen mund?

Gott gebeut/ das yhm kein sunder seyne wort ym maul tragen soll. Der sunder ist/ der/ dem wort nit glaubt/ quibus iuravi in ira mea/ si introibunt in requiem meam/ Wie konden Nonnen und Monichen glauben/ wan sie gottis wort noch horen noch leßen. Wie ists muglich/ das sie solch lang gebeth ym glauben sprechen. Szo brengen sie wenig glauben und vill wort/ der doch keynes gott gefelt odder yhe beheglich gewest.

Christus spricht. Ihr solt nit offenbar beten/ wie die gleyßner/ sonder heymlich/ dan gott sicht im verborgen Matth vi. und heimlichen. Matth. vi. Gott urteylt das hertz/ nit das angesicht. Joh. viii. Got ist ein geist/ und soll geistlich geehrt werden. Johan. iiii. Wir tolhe narren haben uns gar darauff lassen bereden/ das wir fur gnug achten/ ßo wir offenlich am tag/ vor allen leuthen/ singen/ schreyhen. aber beten. Was uns Christus verbeut. das gefelt uns.

Das Christus nit haben wil/ das opfern yhm Monichen und Nonnen. ¶ Anher fuget sich Moises. Szo yhr was ubels gelobdt/ solt yhr reu dar ab haben/ und abstellen. ¶ Drumb solten Monichen und Nonnen/ von solchem katzen gebeth lassen/ das nit mehr/ gott opfern/ der es nit wil haben. Ich geschweig/ das alle sichtparliche und eusser Jo. vi.liche gottis dienste/ nit nuͤtz sein. Und das gott den geist allein teur schatzet/ als Christus sagt. Johannis vi. Das fleysch ist nit nuͤtz. Und sanct Peter .i. c. iii. Der verborgen i. Pet. iiimensch/ ym hertzen/ ist ein kostparlich/ teur ding in augen gottis. ¶ Eusserlich werck acht got fur nicht/ dan er sicht yns inerlich/ heimlich/ und verborgen dingk. Alßo ist alles scheinlich/ offenbarlich gebet gleich das wulffgeheul. das gott vorpeut/ wie kanstu dan mit gutem gewissen gott alßo dienen? wie magstu in solchen gelubden vorharren?

Das laß ich geschehen/ das Monichen und Nonnen offenlich vor den leuthen. yhr gebet erstlich in der Biblien tzeigen/ dar nach die leuth/ ßo umbstehen. inhalt yhrs ges i. Corin xiiii.bets leren/ und thun das kurtzlich. Wie Paulus sagt. Ich wil lieber funff wort/ verstendlich und vernemlich in der kirchen/ alßo beten/ das ich andere menschen leer/ dann funff tausent wort/ in eyner tzunge reden/ wilche die umbsteher nit vernhemen .i. Cor. xiiii. Unßere Pfaffen/ Monichen und Nonnen verstehent yhr gebeth selbst nit/ wie konden sie vernemlich beten? Ich laß diß faren/ da durch auch beweist wirt/ das gott solch fligengethon unannemlich und verdrießlich ist/ und kum zu angefangner rede Jo. iiii. Christi. Christus spricht gott ist ein geist/ darumb mussen yhnen/ die warhafftige anbeter/ im geist und warheit anbeten. Joha. iiii. Darauß volget erstlich/ das fleischlich anbeter/ ßo außwendig beten/ erlogen anbeter seind/ und yr gebeth luͤgenhafftig ist. Nu sollen wir gott kein luͤgen furbrengen? Sollenn wir auch nit fleischlich und leiplich beten/ und ßo wir solch gebeth gelobdt hetten/ solten wir doch nit boeß gelubd volfuren.

Zu dem andern/ weil gott ein geist ist/ sollen wir ome ym geiste dienen/ wie Paulus sagt. Dem ich im geist diene Ro.i. Das thun arme arbeiter vil besser. dan mussige Monichen und Nonnen.

Zu dem dritten/ das die warhafftige anbeter/ in geistlicher freyheit bitten sollen/ derhalben spricht Christus. das die warhafftige anbeter/ wider zu Jherusalem/ noch auff im berg/ gott anbeten werden/ sonder allein im geist und Geyst.in der warheit. ¶ Der geist ist an keine statt gehefft/ sonder mehr. dan yede statt ist. ¶ Warheit. ist an kein leiplich oder Warheyt.sichtbarlich ding gepunden. sonder allein an got geleumt. steht auch in keynem andern. dan im glauben zu got. Also ist ein warhafftiger anbeter/ den gott begerd/ von allen stetten/ von allen eusserlichen dingen frey/ quid/ ledig. und loß. Ist aller creaturen ein her odder gutwilliger diener. ¶ Wider dise tzwu tugend/ geloben Monichen und Nonnen/ ßo in yhrem gelubd und fursatz gedencken. wie sie in dem oder genem closter gott/ mit singen/ schreyhen/ murmeln. und brumen wollen dienen. Ist das gelubd gut? Ist es zu geben? Solstu das halten dastu nerrisch gelobd/ und nerrischer gibst? Laß dich Christum. Paulum und Mosen be Paulus Moses richten. Christus sagt. So yhr in meynem sermon bleibt. Jo. viiiseind yhr meyne junger/ und wirt euch die warheit frey machen. Johan. viii. Sich die zwen artickel stehnt beysamen. Ein junger Christi sein. Und frey sein. Wilcher nit frey ist/ der ist keyn junger Christi. Wilcher kein junger Christi ist/ der ist auch nit frey. Bistu ein junger ßo bistu frey. Wavon frey? merck was ich vor. auß worten Christi gemelt hab. Du bist frey/ von steten/ und allen eusserlichen dingen. Nim ein exempel vom handwaschen der junger und das Christus sagt/ das die warhafftige anbeter/ wider mat. Xv im berg/ noch in der statt betten. Disse freyheit und junger ioh. iiii.schafft/ lernen wir auß den reden Christi/ als Christus spricht. So yhr in meyner red bleibet/ seind yhr mein jun Jo. viii. ger und wirt euch/ die warheit frey machen.

Nun dorsten Monichen/ Nonnen und Pfaffen wol sagen. wir seynd gottis diener und frey/ und doch auß der leer Christi gehn. unnd sich dartzu/ mit und zu yhren armen elenden Clostern/ stein und holtz/ verpinden/ und verfechten das sie wol thun/ wan sie geystliche freyheit/ alßo fahen und gefangen halten/ und fleischlich machen. Wider gottis sermon und Christum/ der gesagt/ das warhafftige anbeter/ noch im berg/ noch heiligem Jherusalem anbeten.

Das ist auch wider Paulum/ dan ob gleich Paulus sich tzeiten aller menschen/ und menschlichen hendell/ dins i. Cor. vi. ix et x pott und mitgesell machet/ dannest spricht er/ das er sein freiheit behalt. At ego sub ullius non redigar potestatem. i. Corinth. vi. Item. Ubi spiritus domini ibi libertas .ii. Corinth. iii. alßo behefftet er sich mit keynem gelubd.

Paulus behelt seyne geistliche freyheit in aller dinsparkeit. Dan ob er sich oder Timotheum nach dem gesetz lesset waschen und beschneyden/ doch thuet er das/ den gefangen zu gut/ damit er sie von Judischer cerimonien und beschneydung mog erloßen. Derhalben prediget er stracks/ mechtiglich/ und unableßlich. Das fleischlich beschneydung und Judische cerimonien unnuͤtz sein. Sich also ist er frey im geist/ und in der warheit des glaubens/ und veracht/ das er den krancken tzu erloßung thuet.

Wan Monichen und Nonnen/ sich alßo zu stetten und eusserlichen dingen verstrickten/ das sie nicht davon hilten/ und hielten andere/ wilche yhnen in wercken und lang gebet uneinlich seind/ fur gut und frum/ hoher dan sich selber/ mocht man mit yhnen geduldt tragen/ ßo sie das offenlich sagten/ das yhr leben unnuͤtz/ und nichts werd. Aber wir sehen/ wie monichen/ nonnen und pfaffen/ allen yhren vleiß/ alle seligkeit/ allen verlust/ auff yhre katzen gebet und himpellischen cerimonien stellen/ und alßo stellen/ das sie die nachlessige und bevor die vorachter. so yhr ordnen und religion/ kappen und kugeln verspotten. dem teuffell geben. Die volbrenger aber preyser yhres gebeths und cerimonien urteylen sie gott tzu.

Alßo verloschen sie alle Christlich freyheit/ und gottliche warheit. Můgen auch in solchen leben/ nit selig werden/ da bin ich buͤrg fur/ dan wie gemelt/ sie dienen gott nit/ und glauben gott nicht. Derhalben sie nit selig werden/ Jo. iii.dan die schrifft sagt. Wilcher nit glaubt/ der ist verloren. Item wiltu zum leben eingehn/ bewar gottis gebott. Gott hat art und natur seyner wolgefelligen wercken außgedruckt/ wie oben vertzelt/ widder die selben aigenschafft geloben sie/ und gehn furt/ das gott ewiglich tzugeben/ das er verbeut und fleucht.

exo. xiii. Nach dem sollen sie Mosen verstehn/ gott spricht. Du solt alle erst geborn menschen gott heylig machen/ wie ich oben berurt/ und wil doch das sie sich loßen und frey machen. Gott fodert von uns mehr freyheit/ dan diensperkeit/ got gefelt ein freyer geist/ untzalicher weiß mehr dan ein gefangner knecht/ wiewoll ein freyher in gott/ gottis diener ist/ dannoch herschet er allen creaturen/ yn lufft/ wasser und erden. Er ist wider an stell/ noch an zeit noch an speiß/ noch an werck gepunden. Alles thuet er frey/ willig und unbedrengt/ das er thut/ darumb. ob gleich die Juden yhr erste geboren kinder gott opfern und heyligen musten/ zu eynem tzeychen/ alter dienßparkeit und gefencknis/ ßo in Aegypto trugen/ und gnediglich dar von abgefurt wurden/ doch musten yhre kinder erlosen/ damit mir das wunderbarlich und evangelische licht/ Christlicher freyheit angetzeit ist.

Was soll ich dan Monichen und Nonnen rathen? Ich solt yhr Jog wol mit yhnen tragen/ ßo sie sich wolten erkennen. Ich merck aber das darab lernen wuͤrden/ das ich yhr nerrisch gefencknis bestetten thet. Sie solten sich frey machen/ got in der warheit und geyst. das ist im glauben/ hoffnung und liebe/ den negsten mit handreychung. in rechter lieb dienen. das wer yn nuͤtzer und notter/ alßo wandelten sie on verkerung gottlicher wercken und gesetz. Oportet misericordiam/ fidem et iudicium primum facere.

Demnoch mocht ich obvermelte text Levi. v. und Deu. xxiii. efern und repertiren/ antzutzeygen/ das gott etliche ding/ ßo neydt und hasset/ das er sie wider fur opfer/ noch fur gelubd annhemen wil. Aber ich wil neu text und ex Le. xxii.empel anbrengen. Nemlich Levi. xxii. stet geschrieben. Du solt kein befleckt opfer williglich/ oder auß pflicht/ als gelubd/ gott opfern. Alles das eynen flecken hatt/ soltu nit opfern/ dan es ist gott unbeheglich. Sich Moises spricht. von willigen/ und schuldigen opfern in gemein. du solt gott/ kein befleckt opfer geben. Du solst gott keyn fleckigt gelubd tzalen. Die sichtliche flecken/ bedeuten geistliche und verborgen flecken/ die auß mangell und ge Tit. i.bruch des glaubens endstehn. Derhalben Paulus sagt. Der unglaubigen gemuͤth und gewissen ist unrein/ seind auch tzu allem gutten werck verworffen. Titum. i. One glauben behaget gott nichts Heb. Nun ist kein tzweyfell. das lang und hell gebet/ auß nott gethan/ wider Christliche freyheit ist/ und volgende wider den glauben. Es ist auch offenbar/ das Christus tattel/ Rost und flecken solches langweriges und offenbar gebeth/ endecket und kentlich gemacht. Das Esaias gethan/ sagende. Szo yhr Esai. i.euer gebeth erweytert und außbreit/ will ich euch nicht erhoren. Wan yhr eure hende außstrecket/ wil ich meyne augen von euch wenden. Dann eure hende seynd voller bluttig hende.bluts. Sich da wie lang gebeth befleckt und bluthrossig ist? Sich wie vil mackell und flecken yn langem gebeth seynd?

Zum erstenn/ verlischet geystlich warheit/ das ist der glaub. derhalben schadten und luͤgen ym gebeth endsprissen/ annemligkeit und falsch urteyl. ertichter schein und glantz.

Zum andern/ leret Christus/ das lang gebeth befleckt ist/ das heidnischer unglaub darynn verborgen/ derwegen spricht er. Ihr solt nit lang betten wie die heiden.

Zum dritten/ sagt Christus anderßwo/ das gleyßner durch lang gebeth den witwen und weßen/ hauß und hoff abteuschen/ oder abreden. Do kumpt das blut/ des Esaias gedenckt. und des gleyßner/ Pfaffen/ Monichen und Nonnen volle hende haben. Ist es nit bluth/ keynem wol gonden/ ydermeniglich bereden/ neyden und hassen? Do kumpt bruderlich veindschafft. Monich stechen. Man findt yhr vil/ die mit lindern schmertzen spitzige messer/ dan neydische tzungen erdulten. Was ist untern geystlichen gemeynet? Wir solten gemein lieb haben/ was ist uns frembder? Wir solten gar auff/ zu nemen und gedeyhen des negsten beflissen und verpflicht sein/ was ist unßer nerrischer? Wir solten gar kein weltlich gutt von leyhen foddern/ was ist uns spotlicher?

Alle terminey/ alle Closter/ alle stifftkirchen/ warten auff testament und guͤtter der negsten. Hetten wir den beutell und gelt. O yhr fratres? was wer euch umb die Seel?

Derhalben spricht Esaias eure hende seind voller bluts. Ist neyd/ haß/ verspottung nit blueth? Ist betrug/ raub. nam. nit bluth? Ist vergessung des negsten nit blueth?

Ist verwarloßung des gerechten/ und rettung des boßhafftigen nit blueth? Ist es nit blueth in deynem gebeth? wan du mit deynem leßen/ das du betten haist/ furttrabest. und lesset witwen/ wesen/ und arme leuth niderdrucken. die du wol erret thettest? Ist solch gebeth nit das befleckt thier/ das gott wider fur opfar/ noch fur gelubd nhemen wil? ßo verstehe ich nit Esaiam der do sagt. Eure hende Esai. i. et .lix.seind voller bluths. der bald das blueth außlegt und spricht. Ihr solt eure boße gedancken/ von meynen augen reyssen. Ihr solt rein sein und lauter/ abstehn ubelltzuthun/ lernen wolthuen/ dem niderdruckten tzu hilff kummen witwen und weßen tzu recht verteydigen. Ob er sagen wolt/ das thuet yhr nit/ drumb habt yhr bluthtigt/ befleckt/ und unrein gebeth/ das yhr nit betten/ noch geloben/ noch ßo gelobdt/ geben solt. Ursach Moises spricht/ yhr solt/ fleckichtig und kobische thierern nicht opfern/ noch auß pflicht/ als gelubde/ gott libern.

Darauß sollen Monichen/ Nonnen unnd Pfaffen mercken/ das yhr gebeth/ unachtpar und nichts werth ist bey gott. Unnd das sie gar keynen grund haben/ solchem gebeth (ob sie es gelobt hetten) nachvolge tzuthun/ eer sie sich/ vom blueth und flecken/ rein gewaschen haben . Weyl sie dan solchs leben fur das hochste achten/ damit prechtiglich brangen/ und andern menschen yr heyligkeyt dorsten mit theyllen/ und gar unthuglich vor gott und vorbotten/ wer yhnen disser ursach halben auch tzurathen/ das sie kugeln und Cloester vorliessen/ geistlicher warheit zu geleben/ ydem zu dienen/ vor allem sich befleyssen: Wer dan ubrig zeit. die ich nit weiß. mochten sie yhr lepperey/ als fleisch tzwanck/ auch brauchen/ das ich hiemit nit gelobt will haben. Was thet eyner/ ßo er gott/ das opfern und geben wuld/ da vor got eynen harten grauhen hett? Er wurd sein gelubd nit erfullen/ ob er gleich das gob. ßo er vorheischen/ sunder auß cleynen tzorn/ yn grossern grimmen gottis einfallen.

Darauß ist leichtlich abtzunhemen/ das kein texte/ one beysetzung und vergleichung anderer texten/ ßo von eyner materien reden/ gnuglich verstanden wirt. Dan ettliche obeingefurthe text tzugeben/ das eyner seyne gelubd abhendig und ledig kan machen. Als Levi. ulti. Und etzliche leren/ das wir unsere gelubd bereuhen sollen/ als Levi. v Und etzliche verbieten das yhene fur gott tzu brengen/ ßo wir gott gelobt haben/ als Deu. xxiii. et Levi. xxii. sollen wir unßern text/ der sagt. Was ein man gott gelobt/ das soll er geben etc. nicht alßo stracks/ an anderung vernemen. sunderlich alßo. ¶ Was ein mann/ gott/ nach inhalt. heyliger schrifft opferdt/ soll er/ an auffhaltung geben. Dan gott behaget kein gelubd und opfer/ das nit gesaltzen ist/ mit weißheit gottlicher schrifft. ¶ Beschlißlich. Gotliche Vota legittimaschrifftliche/ redliche und ordenliche gelubd/ die ich lateynisch Legittima nenn/ das ist/ die nachsatzung und ordnung heyliger schrifft bewilligt und außgeredt seyn/ die soltu gott allein schleunig opfern und geben.

Die andere soltu/ nit geben/ weil sie gott hasset und neydet. Aber solche gelubd mit erstattung und vergleichung/ nit yn sich selber. geben. Wie oben ertzelet. So yhemants weyter berichtung zuhaben begert. Der durch leeße/ das .xxii. capitel Levi. und setze das .xxi. dartzu. ¶ Text.

So ein weib/ gott ein gelubd gelobet/ und ein band gebunden hatte/ im hauß yhres vatters/ in yhrer jugend/ Und yhr vatter/ yhre gelubd und band/ wilches sie/ auff yhre seel/ gebunden gehort hat/ und der vatter macht sich nicht reden. So becrefftigen sie. alle gelubd. Und das band wilches sie an yhrer seel gebunden hatt/ soll sie erfullen. So aber yhre vatter/ in dem tag/ do er yre gelubd erkant. widerredt aber wegert/ soll sie alle gelubd und band/ wilche sie/ an yhre seel gebunden/ nit becrefftigen. Und wirt yhr gott gnedig werden/ dan yhr vatter hatt widergeredt aber das gelubd widersprochen.

Das ist. So ein junckfrau odder maidlin/ in oberkeit yhres vatters ist/ und gelobet gott etwas/ soll sie/ das gelubd nit geben/ eher das yhr vatter bewuͤst hat. Sie sol ßo lang stiell stehn/ unnd das gelubd aufftzihen. biß yhr vatter yhres gelubds vorstendig ist. Darnach wann der vatter/ der tochter gelubd vornhumenn/ hatt/ ehr nicht mehr/ dan eynen tag/ sich tzu bedencken/ ob er. durch seyne bewilligung/ gethane gelubd/ bestettigen will/ oder vorhindern. ¶ Schweiget ehr/ den gantzen tag stiell/ und redet nicht darwider. So macht er/ mit seynem stiellschweigen/ das gelubd/ seyner tochter/ crefftig/ und soll die tochter/ yhre gelubd und band volbrengen.

¶ Wo aber der vatter/ an dem tag/ do ehr seyner tochter gelubd vorstanden hatt/ sagen wurd. Ich gestehe dir deynes gelubds mit nicht. Aber/ ich will nit haben/ dastu deyne gelubd solst vollbrengen/ als dan/ soll die tochter/ yhr gelubd nit volfuren. sonder zuruͤcktzihen und nachlassen ßo wil yhr gott gnedig werden.

Das solten Monichen und Pfaffen eynhemen/ und die kinder/ nit verleyden oder vorfuren/ wan sie in gewaldt und potestat yhres vatters stehn und ettwas gott geloben. Sie predigen aber. Eya es ist woll war/ du solst das gelubd nit volenden/ an deynes vatters willen? Aber dieweyl/ dein gelubd/ tzu gottis loeb und eren. oder tzu heyliger sach kumpt/ magkstu dein gelubd/ on wissen deines vatters volbrengen. Liebe kinder hutet euch vor solchen schmechlern/ sie bedriegen euch/ und fegen eure beudtel und fullen yhre heußer. Dan wie kan ein sach guͤttiger und gottlicher gesein/ dan die ist/ die gott an mittel belanget? Jdoch spricht die schrifft. Wan ein maydlin/ in yres vatters macht ist/ und gelobet waß/ ßo soll sie yhre gelubd nit ehr volbrengen/ eher yhre vatter/ das selbig vernhumen. und nicht darwider spricht. So aber der vatter darkegen redet/ ßo soll das kind/ sein gelubd nit halten/ alsdan wurd yhm gott gnedig sein.

Sich. got wil dir vorgeben/ dastu nerrisch gelobt hast. wan du dein gelubd/ nit volbrengest/ ßo es deynen vatter wider ist. Wuͤrstu aber/ das gelubd wider deynes vatters willen volfuren/ ßo wisse/ das dir got ungnedig sein wil und wird dich straffen.

Man soll auch/ die Eltern/ nit dringen oder mit orenkreben bewegen/ das sie heimlich oder offenlich in gelubd. yhrer kinder bewilligen. Dan die schrifft thuet der keynis und wir sollen der schrifft stracks nachvolgen. Derwegen sollen die alten hinfur witziger sein/ vor allez betrachten. was yhre kinder/ was yhre hauß diener/ meyd und knecht beduͤrffen. Darnach auff yhre nachtburen/ und auff alle nottuͤrfftige sehen/ denen helffen/ mit dem gelt/ das yhre kinder/ villeicht/ den veisten Monichen oder Pfaffen geben hetten. Eynen tag haben die eltern sich tzu bedencken der anfeht zu lauffen. von der stunden. do der vatter/ das gelubd erhort hatt/ das ist/ als er seynes kindes gelubd/ wissen empfangen. ¶ Ich acht es sey ein natuͤrlicher tag. Gen. i.wilcher .xxiiii. stunden langk ist/ von wilchen die schrifft sagt. Und der morgen und nacht sein ein tag gemacht.

Die kinder sollen sich auch nit bald lassen beduncken/ das yhre eltern/ gethane gelubd vermerckt haben/ dan die schrifft sagt nit vergeblich. So sich der vatter stil schweigen macht den tag/ an wilchen er das gelubd vernhumen hatt. Domit uns angetzeigt wirt/ das die kinder yrer vetter still schweigen/ und heimlich nachgebung/ wol mercken muͤssen. Wuͤrd aber ein kind/ hastig eylen/ und seynes vatters wissenheit/ nit gnugsam verstehen/ ßo wuͤrd es gott keynen dienst/ mit vollendung seynes gelubds thun. Was der text von meydlin gesagt/ das soll auch/ meynes bedunckes/ von allen kindern/ ßo noch in obirkeit und gebieth yhrer eltern steend/ verstanden werden. unnd auch von den kindern/ ßo wesen seind/ aber unter .xx. jaren ynn furstehung yhrer tutorn und curatorn leben. Dan das wort (vatter alhie) bedeuthet im Hebreischen/ Eynen/ der/ der Gal. iiii. gebuerd/ alterß/ eher/ und sorg/ auch herschafft halben vatter ist. So wissen wir/ wie Paulus von den jungen erben sagt. Der Erb/ ßo lang er klein ist/ hatt er keynen unterscheit zwischen eynem knecht. Wie woll er ein her ist aller ding. Er lebet unter actorn/ und vormunden. Nun wissen wir/ das kein knecht macht hatt. gott etwaz tzugeloben/ das seynem herren zu steht. So haben auch die kleinierige kinder kein macht/ an yhrer vorsteher zuthun oder bewilligung. ettwas zugeloben und geben.

Alhie frag ich/ wie soll ich mich halten/ wan mein vatter ein Nabol ist/ das ist. Ein nerrischer unverstendiger mann/ der mich villeicht/ ein gelubd lesset geben/ das got ungefellig/ und mir tzuschaden gereichen mocht. ¶ Als wan ich gelobd hett. Ich wolst ein maydlin am achten/ oder ein kneblin am neunden tag/ durch ein feur furen/ Deute. xviii.und alßo rein machen/ das Deu .xviii. verboten. Aber wolt eine heyligen ein gelubd brengen/ oder etwas anders halten/ das doch unrecht ist/ solt ich das gelubd volbrengen? ßo mein nerrischer vatter/ der in der schrifft ubel gelart/ dartzu bewilliget? Nein. Wan du gottis rath hast/ darffestu keynes menschen rath. Im rath meynes volcks (spricht gott) sollen die nit sein/ die auß aigem hertzen war sagen. Ezechiel .xiii.

i. Cori. iiii.Ich will eynenn vatter habenn/ der geschickt ist. wie der yhene/ wilcher sagt. Ich hab euch. in Christo Jesu/ durch das Evangelium geborn. Eynen solchen vater wil ich/ in gelubden/ haben/ der mich durch gottis wort i. cor. iii.gebierd/ und kein fundament setzet/ dan Jhesum Christum.

Szo ein weib. ein mann/ und yhr gelubd volendt/ aber ein rede yhrer lippen auff yhr seel gepunden hatt. Und yr man hatt das gehort/ und den tag/ als er yhr geloben verstanden oder gehort/ still schweigen gewest ist. Sol sie yhr gelubd becrefftigen/ und alle pand/ wilche sie auff yhre seel gepunden/ vollbrengen.

Wan aber yhr man/ in demselbe tag/ als er seynes weibs gelubd vernhumen/ widersprochen/ hatt/ er alle gelubd wilche sein frau geredt und auff yhr seel gepunden/ krafftloß gemacht. Und wuͤrd yhr gott gnedig sein.

Disser text saget von gelubden/ der weyber/ ßo menner haben. und gibt uns zuerkennen/ wie der weyber gelubd/ gantzlich in dem willen/ yhrer menner stehen. Dan der weiber gelubde stehn still und sein unvolkuͤmlich/ biß an die tzeitt/ des wissen/ yhrer menner. Ehr der mann erferet/ das sein weib gelobd/ sol das weib kein gelubd/ es sey klein oder groß erfullen. Aber ßo bald der mann/ seynes weybes gelubd erkandt. hatt/ er nicht mehr dan eynen tag tzu wider reden. Widderredet er/ und wil der frauen nit vergunden/ das yhre gelubd volbreng/ ßo soll sie ablassen und mit nicht yhre gelubd zu ende furen/ ßo wil yhr gott gnedig seyn/ yhre freveligkeit tzu geloben vertzeyhen. Wo aber das weib wider seynes mannes willen gelubd wolt volbrengen/ ßo ertzuͤrnet sie gott/ und feelt von sunden in sunden. Aber wan yhre gemahell still schweiget/ und redet nicht wider yhre gelubd/ ynn dem tag/ do erß vernhumen/ soll die frau das gelubd geben.

Alßo wirt/ des mannes stillschweigen fur bewilligung geacht/ wie das oben/ von den tochtern beruert ist.

Diße clausell saget von bloßen und umbecleyten gelubden / wilche nit mit ayd becleydt seind/ was von gelubden ßo mit ayd becrefftiget sein/ tzu thun ist/ wirt volgende gesagt.

Hie solt ich das verneuen/ ßo oben vermeldet ist. Das leypliche gelubd/ wilche synnliche ding begreuffen/ an mundlich außsag nit volendet werden. Derhalben spricht die schriefft. So ein weib eynen mann hat und yhr gelubd volendet/ aber außredung yhrer lebtzten dartzu gesetzt hatt. Drumb wirt kein gelubd in ynnerlicher vorheischung voll/ es hab dan mundlich außred. Und ob es gleich ym gemuͤth und reede volkumlich ist/ soll die frau/ das selbe mit hand und werck nit volbrengen on yhres mannes bewuͤst. Alßo haben wir tzwe volendung der gelubden. Eyne mit hertzen und mund. Die andere mit wercke und that/ Die erste geschicht vil malß/ Die ander volget aber nit alwegen.

Die weiber sollen yhre menner. gethaner gelubd berichten/ und fragen/ weß sie sich halten. Und sollen die manne auch dermassen geschickt sein/ das sie yhre weiber/ kinder und gesynde konnen unterrichten/ als Moses saget Deu. i. Cor. xiiii.vi.xi. und .xxxii. Und Paulus. Die weyber sollen yhre menner ym hauß fragen und lernen. Wie sollen sie aber thuen. wan yhre mann/ wie der Bapst und seyner gleychen/ nit umb gottliche schriefft wissen? noch verstehen/ wilches gottliche und schriefftlich gelubd ist oder nit? Ich weiß woll das viell weybische menner seynd/ alßo weybisch wie das weib was/ tzu dem Christus saget. Gehen und rueff deynem mann. Sie wissen nit was yn gott saget/ Joh iiiiwissen auch nit ob sie manheit haben oder nit. Wie viell hangen noch an dem Bapst. der selber ein weibische metz ist/ und ist in der Christenheit. nicht weybischer/ dan sein leer/ die noch Christus wort horen kan/ noch weiß das sie eynen mann haben soll. Nicht allein der Bapst ist ein metzisch weib/ sonder alle pfaffen und Monichen und leyhen in gemein/ ßo ein solchen mann emberen/ davon Christus saget. Gehen und rueff deynem mann. ¶ Wil Psal. i.cher ist der mann? ¶ Der tag und nacht ynn gottlichem Deu. vi. xi. xxxii. gesetz arbeit/ und ruhet. Der sein hertz yn das wort gottis setzet. Und seyne seel voller gottlicher rede unnd leer machet. Der mechtig ist/ durch heylsame schriefft tzu ermanen/ und seyne feynde mit gottlichem wort niderlegen Exodi. xxviii.kan. Der auch leerung und warheit yn dem humerall/ unnd das urteyl der kynder Israhel auff seyner brust treget. Der ist der mann den wir fragen/ und von dem wir leren sollen. ¶ Nun wissen wir/ das Bepst und pfaffen itzt nicht gantz geschickt seindt.

Der Bapst hatt yhm eygen gesetz gemacht/ dreum und luͤgen erfunden/ und kein gottliche leer in seynem hertzen und hiern. Warumb lauffen wir dan gen Rhom/ umb rath? umb dispensation? umb leerung? umb warheit? umb urteyl? Weyl er wider rath noch dispensation/ wider leer noch warheit gottis tregt? Derhalben rath ich treulich. ßo eyner eynes manns bedarff/ das er/ eynen gelarten in der schrifft vor allen dingen/ suche und glaub yhm auch Acto. nit mehr/ dan er in der Biblien tzeigen kan/ wie die Thessalonicenses tethen/ ßo Paulo nach suchten/ und erkundten sich/ ob sich die schrifften alßo inhielten/ wie er geprediget het. Sprichstu aber/ das ist uberauß schwer. ßo sage ich widerumb. Es ist schwerer und schedlicher. das eyner leichtfertiglich ist zugeloben und gelubd zutzalen die gott hasset.

Wir seind auch alle/ dißes valß weiber/ eynem gemahell ephe. v.vertrauhet/ der Christus ist. Derhalben/ sollen wir/ es sey mann/ frau/ gesell/ oder mayd/ Bapst/ Bischoff/ Pfaffe/ Monich oder Nonne vor allen/ ehr wir geloben oder unßer gelubd erfullen/ die stuͤm Christi ersuchen.

¶ Ja/ sprichstu/ wo kum ich zu Christo? Ich sage dir seyne stuem ist dir nahe/ in deynem hertzen/ und gehet durch die gantze welt/ wie fragestu dan ßo spotlich? Lyeß aber hore seyne leer/ betracht sie hochlichen/ ßo wuͤrdestu an tzweyffel lernen/ ob du dein gelubd darffest voltzihen.

Schweiget Christus still/ ßo vollende das gelubd. Redt aber die schrifft anders/ und besser/ dan du gelobd hast/ ßo halts dafur/ als wolt dir dein mann nit gestatten/ das du deyne gelubd erfullest. ¶ Nun weiß yedermeniglich/ das aller propheten und Moises stuemen/ auff die stuem Christi gestelt seind. Und wie offt Christus zu den gleißnern spricht. ¶ Ihr wisset nit/ was gesagt ist. Ich will Osee. vi. barmhertzigkeit/ nit opfer. ¶ Opfer begreufft gelubd/ dan kein leyplich gelubd magk on opfer volbracht werden.

Dan die schrifft spricht clerlich/ das etzlich auß freyhem levi. xxii. willen opfern/ etzlich auß vorpindnis/ als die yhene/ die gelubd betzalen. Sich die gelubd betzalen/ die opfern. Nu Math. saget Christus offt/ das gott barmhertzigkeit fodert/ nit Psal. l.gelubd. Und David. Ich weiß dastu keynen lust hast ynn Esa. i et ultimo wal der wercke. opfern. Und Esa. Ihr opfert mihr eure opfer umbsonst. Das sagen sie/ wan durch opfer und gelubd/ unßerer und des negsten nutz und seligkeit verhindert wurd.

Darauß volget/ das ych dem gelubd/ ßo offt empfallen soll/ ßo offt ich merck/ das mich gott zu ettwas geneigt/ das mir zu der seligkeit furderlicher ist. Item ßo ich mercke. das ich meyn gelubd nit kan/ mit der tath/ volbrengen/ gotlich vermanung durch werck.an schaden oder vorseumung meynes negsten/ ßo hore ich/ das mein heubt/ mein mann/ nit bewilliget in mein opfer und gelubd. Wan du dan sihst/ das durch betzalung des gelubd/ dein weib/ kinder oder diener beschediget werden/ solstu vom gelubd lassen. Dan Paulus spricht. i. timo. v Wilche yhr hauß verlosset/ die ist erger dan ein unglaubige. ßo bald du durch gelubd von vorstehung deiner negsten abstellen mußt. solstu das gelub zuruͤck schlahen.

Item sehe ich/ das ein mensch (ehr sey glaubige oder unglaubige) nott und angst leydet/ und kan yhnem helffen oder auß furen/ und volbrengung des gelubd verhindert mich/ soll ich das hindern offen setzen/ und dem menschen Ose. vi.vor hilff thun/ dan mein man wil ordenung in wercken haben. Der alßo spricht. Ich wil barmhertzigkeit/ nit op Matthfer haben. Ihr solt den wesen / witwen und armen zu hilff Esai .i.kummen. Es soll kein betler und notturfftiger unter euch Deu. xvsein. Darumb solstu deyne hand auffthuen/ und den armen bey dir helffen. Du solst deyne augen mit vleys auff Psal.notturfftige keren. Selig ist der/ der achtung und auffsehen hatt auff den armen. Dein vleis und das auffsehen soll durch kein gelubd verhindert werden. Darumb brueff sich yglicher/ und sehe auff alle menschen/ der statt/ darynnen er wanhafftig/ ob yemants sey/ dez er mit handreichung. rath/ odder eynigerley weiß kan helffen/ und werffe sein gelubd zuruͤck/ das yhn von solcher barmhertzigkeit tzeuget/ dan unßer man Jhesus Christus hat uns sein wort clarlich und offenlich gesagt.

Nun horet yhr pilgerem/ yhr lauffet gen Rom. Jocob . Jerusalem/ und erhoret eures haubts Christi wort nit/ von wilchen die gantze schrifft redet. Er spricht/ ich wil mehr barmhertzigkeit/ den opfer haben. Aber yhr lasset tzeiten land und leuth/ weib und kinder/ nachburen und andere in unrath kummen/ ja zeyten in angst und not liegen/ den yhr/ mit dem yene kondt helffen/ das yhr an genante orte traget/ wie wolt yhr gegen eurem haubt (das euch zu andern wercken tzeuget) bestehen? Und wie wolt yhr gottlichen tzorn/ ßo mutwilliglich einfallen?

Und ob der gleich keynes geschech/ werd yhr dannoch pflichtig eur eigen auffsehen zu haben. Ich geschweig. das solche gelubd/ ßo sanct Peter. S. Jacob/ und dem heilig grab geschehen/ unchristlich und affterglaubisch/ und zu nicht nuͤtz sind. Ursach/ S. Peter und Jacob und das heilig grab seind kein got. Und ob sie sonst heilig weren. doch solt yhr gott eyniglich geloben und opfern/ das auch S. Peter selber leret. Und ob gleich solche gelubd tuglich/ weren/ sie doch unnutz/ dan das fleisch Christi ist nicht nutz/ als Joh. vi. Christus spricht/ wie mocht dan/ sein grab/ creutz/ und andere ding nuͤtz sein/ wie werdet yhr auch bestehn (ßo yhe was an den woffenn gelengen ist) weil euch Christus Jo. xx.saget/ wie er S. Thomas dydimus sprach. Darumb dastu mich gesehen/ und dein fynger yn meyne wunden gelegt. hastu geglaubet/ aber selig seind die nit gesehen/ und doch geglaubt haben. Ist dir die schrifft nit genug tzu glauben/ ßo wuͤrd dir auch das grab nit gnug sein. das grab. creutz. negel/ galgen/ und todt Christi seynd alle gemacht von Lu. ult. erfullung wegen der schrifft. Als Christus sagt. ¶ O yhr thoren und langksame tzu glauben/ allen dingen/ ßo die propheten vorgeredt haben. Wisset yhr nicht? das Christus must leyden? und fieng an von Mosen/ und alle propheten/ und leget yhnen die schrifften (ßo von Christo waren) auß ¶ Wiltu wissen das leyden christi/ und was uns/ sein gebuerd. leiden/ tod/ gutes gemacht/ ßo ließ oder hoer die schrifft. ¶ Auß dem grabe wurestu nicht sunder lichs greyffen. Der Bapst Innocentius .iii. ist hertiglich zustraffen/ das er des konigs von Ungern son/ mit banplitzen/ und bey verlust koniglichs erbs/ getzwungen hatt/ gen Hierusalem zu tzihen/ sein land und leutz zuverlassen/ dan gott begert mehr/ das die herren yhren landen und leuthen ob sein/ dan das sie walhen und pilgerem werden. Paulus spricht. Der seinem hauß nit vorsteht/ ist erger/ dan ein unglaubiger.

Es seind auch andere Bepst strefflich/ das sie ein walfart/ in die andern verwandeln/ als die zum heilig grab/ in die gen Rom. Das thunt sie nit von wegen Christlicher seligkeit/ sonder von wegen/ des heiligen pfennig des geprech kennen sie besser/ dan gottlichen willen und gerechtigkeit.

So ein witwen/ oder außgestossen aber repudiirt weib gelobt/ alles das sie auff yre seel gepunden hat/ sol sie voltzihen.

Zu disem text vergleich. das ich obgesagt hab/ das deine gelubde/ wilche du vollbrengen wilt/ sollen tzimlich und schrifftlich sein/ alßo werden die witwen yre hab und heußers behalten. Zum andern. das witwen/ ßo minder dan .lx. jar alt seynd/ witweschafft nit konden profitiren. Zum dritten/ ob sie gleich/ witwestand mit eyd geschworen/ mochten sie sich dannoch/ abloßen. Zum vierden/ das alwegen besser ist/ sie freyhen/ dan das sie das feur und hitz fleischlicher ungestuͤmigkeit tragen. Zum funfften/ weil sie Christo verheyret. und zur ehe gegeben/ sollen sie/ durch kein gelubd/ von Christlicher pflicht/ verhindert werden. Ein warhafftiger gemalh Christi. hatt Christum stetz in armen und was Christus wil/ und wa er ist/ das wil sie/ do ist sie. Disser text gibt den witwen solche macht/ drumb das sie nicht in gebiet yhrer menner seind/ dartzu setze Paulum Rhoma. vii.

Wan ein haußfrau/ ein band. auff yhre seel. mit angehefftem eyd/ pindet/ und yhr mann das gehort hatt/ aber er macht sich doch stilschweigen. nemlich. das er nit/ dawider redet/ haben sie damit alle gelubd becrefftigt. Und sol daß weib/ alle band/ wilche sie auff yhre seel gepunden hatt/ velstrecken odder außfuren. Wo aber der mann/ seyner frauen/ gelubde zu nichte macht/ an dem tag als er sie gehort/ soll das weib alle funde und gelubde oder band (ßo sie auff yhre seel erfunden und gesetzt hatt) nit volbrengen. Derhalben/ das yhr man yhr gelubd machtloß gemacht. und das yhr gott gnedig sein will.

Disser Text spricht mit lichten worten/ das menner macht haben/ band und eyd yhrer weyber tzubrechen/ und das sich die weiber trostlich darauff vorlassen sollen dan gott wil yhn gnedig sein. Jha noch mehr/ das weiber/ widder band noch gelubde sollen erfullen odder halten/ wan sie yhrer menner widderwillen und ungunst vorstehn. Derwegen stellet schrifft/ bestettung und tzurbrechung/ der gelubden/ yn der menner willen/ das sie/ yha/ odder. nein sagen. Das ist von allen gelubden gesagt/ sunderlich von gottlichen und tzimlichen/ dan verworffen gelubd soll keyn weyb vollfuren/ ob yhr mann gleich gunst und willen dartzu geb. Er wer kein mann/ sondern ein Bapst odder Nabal/ wan er in untzimliche gelubd verwilliget. Lasset euch. o yhr weyber kein creatur/ keynen engell/ keynen pfaffen/ von solcher leer Mosi tzihen/ eure menner seind/ eure glorien/ eure kron/ yhr seyt von yhrem gepein und fleisch gemacht. Ihr moget got ye nit anderß. in beheglickeit. dienen/ dan nach antzeyg heyliger schrifft/ alle ander dienst/ verdriessen gott/ als Esaias und Christus sagen. Mandatis hominum me colunt.

Das wirt euch nutz/ und dem Bapst schedlich sein/ wan yr wisset/ das obirkeit eurer menner/ sich nit allein auff blosse verheischung und gelubd/ sonder auch auff eyde außstrecket.

Hett ein witwen ettwas in yhres manß hauß gelobt/ und mit dem eyd beteurt/ aber yhr man hett sich unwillig ertzeygt/ ist sie nichts schuldig tzuhalten.

Mercket auch yhre haußfrauen/ das yr nicht maugellicht solt thun. Mercket/ das euch eure menner gewisser rathen konden wan sie ein clein wenig gelart seyn/ dann Bapst/ Bischoffe/ pfaffen und Monichen.

Sihe hiemit felt der heubt stuck einß. dastu zu der beicht pflegst tragen/ und das vil leuthe bewegt tzu beychten/ Nemlich/ das sie der pfaffen rath besuchen. ¶ Weiber sollen yhrer menner rath suchen erstlich/ kan der man gottlichen rath geben/ sollen sie sich befriden/ und nicht weiter trachten. Ist er ein Nabal sollen sie yhren pastor oder prediger (seind sie anderß gelart in der Biblien) fragen.

Disse buͤrden gehoren nit zur beicht/ die doch unnuͤtz ist.

Alles das ein weib gelobt/ oder mit eyde verpflicht/ yhr seel tzu casteyhen/ das magk yhr man becrefftigen odder crafftloß machen.

Schweyget aber der mann/ von tag zu tag oder thuet. als wer er stum und taub/ ßo bevestet er alle gelubd/ und sol das weib alle pand/ wilche sie mit willen und mund gestrickt/ mit der that volbrengen. Drumb das yhr man den tag stilschweigen gewest ist/ als er yr gelubd vernumen hat. Hatt auch ein mann seynes weibs gelubd gewist/ und nit dawider gesagt/ und alßo grundvest mit seynem stilschweigen gemacht hat. Und untersteht darnach solche gelubd seynes weibs zu weren/ hindern und crafftloß zumachen/ soll er selbst solche kestigung oder quelung ertragen.

Das ist ßovil gesagt/ der mann soll tzwanck des fleisch oder quelung und kostigung des leibs. aber muhe und arbeit. dartzu sich sein weyb/ mit gelubd odder eyde verpflicht hatt/ selber tragen und tzalen/ wan er seynem weib weret/ solche gelubd oder eyd zuvolbrengen/ die er vor. mit stielschweigen crefftig und vest gemacht hatt.

Exemplum/ es ist etwar ein frech. stoltz. oder ein freidig untzam und mutwillig art in eym weib/ die yhr unart und boße zuneygung fuelt/ und wolt sich gern kastigen/ damit sie yhr fleisch gehorsam und unterwurffig mocht machen. Derhalben sie gott etlich tag tzuvasten gelobt/ und setzet yhren eyd dartzu/ auff das sie ye vil strick und pand ym gewissenn trag. und saget das yhrem mann/ der mann schweyget .xxiiii. stund still/ und bevestet alßo durch stielschweygen/ gelubd und eyd seyner frauen.

Darnach lernet er mit der zeyt/ das sein weib kranck und schwach/ aber ungeschickt und greulich wirt. wil yr dan weren/ und verschafft mit seynem verbott/ das sie gelubd und ayd nachlesset/ soll er solche kestigung leyden und vollbrengen/ dan das weib soll alwegen dem gebott yhres manß gehorchen und tzu gevallen sein.

Das sol auch sunderlich auß disem text gelernet werden das die weiber/ gelubd und eyd (wilche auch yhre menner bestettigt haben) sollen nachlassen/ auff yhrer menner geheiß/ aber die menner sollen an yhre laste und purden treten. Drumb sollen die menner wachtsam sein/ und gelubd und eyd yhrer weyber tzeitlich verhindern/ wollen sie anders ruhe und frid haben.

Ich wil nit bergen/ das die lateynische Biblien alhie das wort. Statim. hat (das doch im hebreischen das wortlin .tag. bedeut). Item das hie geschrieben ist. Portabit ipse Iniquitas.iniquitatem suam. das doch grundlich das wort ist/ das der translator oben afflixit lateinet. Drumb bin ich in der hebraischen warheit blieben. Item das wort ieiunium stet nicht im hebreischen/ ich acht unser text hab gloß fur text eingemuscht/ das mehrmal geschehen/ und nit loblich ist.

War ists. Kasteyung/ quelung/ oder anfechtung begreufft vasten/ erbeiten/ und zwanck. Wan ein weib gott gelobet. sie wolt sich mit ruthen oder senckeln geisseln/ auff das sie yhr fleisch tzemig und gevolgig machet/ und saget das yhrem man an/ wie sie gelobt. und eynen eyd geschworen hab/ sich wochelich/ eynen tag oder tzween/ alßo zu geisseln (Das dan weiber yhren menner ansagen sollen) und der man bewilliget heimlich oder offenlich darein/ und wolt darnach/ dem weib weren/ sich alßo blutrostig tzu/ machen/ soll die frau gehorsam sein/ aber der mann soll sich geisseln. Das ist gesagt. Und der mann soll quelung oder kasteyhung seynes weibs tragen. Wollen die menner heile heut und unverwunte weiber behalten/ sollen sie gleich den tag/ als sie yhrer weiber gelubd und eyd vermerckt ha Absolution von gelubd. ben/ die weiber verbieten/ und sprechen. Auß mennlicher oberkeit/ die mir von gott verlihen/ geben und bevolhen/ hebe ich dein gelubd und ayd auff/ und mach deine gelubd und eyd crafftloß/ und verpiet dir etwas ferner darin zuthun. Dissem wort soll das weib glauben und statt geben/ im gewissen fridsam und sicher sein/ dan gott treuget nit/ der den menner solche hohe wirden/ und oberkeit gelert/ verlihen und bevolhen hatt.

Alhie muß ich mit meynen gunstigen bruder und freundt Jorg reych Jorgen Reich burger und kauffman zu Leypsigk / der ein hitziger nachvorscher ist heiliger geschrifft/ und thut das eynem frumen Christen gebuͤrt und wol ansteht/ ein cleyne rede haben. ¶ Nach dem/ gunstiger bruder/ das capitel ob gehandelt und erclert. am end also beschleusset/ das ists gesetz tzwuͤschen mann und weib/ zwuͤschen vatter und tochter/ und offtmals menliche oberkeit erhebt und groß macht/ dan es gibt/ den menner grosser macht/ dan kein Bapst oder Bischoff gehabt hatt/ wie woll/ der Bapst. euch menner solche macht und gewalt abgestolen. dannest ruhet sie noch bey euch mennern/ mit allen freyheiten und herlickeiten/ und yr seint nichts minder/ dan in zeiten Mosi andere mennern gewest sein. Weil auch berurte herligkeit/ der menner/ lobwirdig ist/ und soll von weibern und kindern erberlich geacht werden. wil ich disse schrifft. Es ist nit gut/ das ein mensch allein ist/ wir wollen yhm eyn Faciamus adiutoriumhilff machen/ die yhm gleich ist. handeln doch kurtzlich. ¶ Anfencklich ist das weyb alßo geschaffen. Gott der schafft das rip (wilches er von Adam genhumen hett) zu eynem weib/ und furet sie zu Adam/ wilcher sagt. Der knoch auß meynem knochen/ und fleisch von meynen fleisch/ sie soll mennin genant sein/ dan sie ist/ von yhrem mann genhumen. Alle ding haben achtung auff yhren anfanck und ursprung/ und geben yhm eere. billich haben weiber augen i. cor. xi.und achtung auff yre menner. Drumb spricht Paulus. Das weib ist zu der glorien des manß geschaffen. Gleich als der man/ zu gottis glorien ist gemacht. Dan der man ist nit auß der frauen/ sonder das weib auß dem man. Die frau ist von wegen des manß/ der man ist nit des weibs halben. Das sollen weiber auß ihrem ursprung mercken/ und lernen. das sie auff yhre menner hertz und augen richten sollen/ Die schaffung beder geschlecht/ hat obirkeit/ furtretung/ eere/ rath/ unterhaltung/ und regiment/ den mennern tzugeeigt. Den weibern/ unterthenigkeit/ nachvolgung/ und dienßperkeit auffgelegt. Darumb nent Adam sein weib ein mennin/ hebreisch Ischa/ alßo ist Heva von Adam kummen.

Ferner wer von der gleicheit zusagen/ dan gott unßer her spricht. Wir wollen yhm ein hilff/ ym gleich schaffen. Man redet ein alt sprichwort. Das tzwen ebengenossen und gemeyner selten wol regiren/ oder in frid leben mogen. Dan auß gleicheit der eere und obirkeit/ endspinnet offt ungleicheit und mißhellung ym willen und gemuͤth.

Dem nach schafft gott Adam ein hilff die yhm gleich und ungleich was. Drumb macht er Adam erstlich. Heva darnach/ und gab dem mann obirkeit/ dem weib unterthenigkeit/ wie er auch Adam tzu glorien gottis geschaffen/ und sich ßo gleich gemacht/ das er gar und gantz an gotlichen willen/ lob/ rath/ und hilff hafften solt. Solche gleicheit/ behelt auch die gemalhen/ wan sie in eingesetzter einlicheit bleiben. Alßo/ das die frau yhrem mann unterthenig und gevolgig sey/ ynen erlich und wol halt. und ewig merck/ daz sie vom man genhumen. und mennin genant ist. Widerumb sol der man nit vergessen. das die frau/ sein gbein/ fleisch und bluth ist/ und soll sie stetz lieben/ nimmer hassen und neyden. alles gelassen das ihnen von seynem weib teylt/ Gen. ii.wie Adam sagt/ von derwegen/ wirt der mensch vatter und mutter verlassen/ und seynem weib anhangen. Wan die eeleuth eingesetzte ordenung verkeren. das sie man. und er. mennin wirt/ muͤssen von notten tzwispeltigkeit und spenne endstehn/ dan wo gott nit regirt/ do ist unfrid/ i. Cor. xi. und des teuffels spilh/ der man ist auß gottlicher ordnung das haubt. die verwust wirt/ ßo das weib regirt/ und der mann geregirt wirt. Jtzt red ich nit/ von dem regiment in der kuchen/ des stals/ und der gleichen. Ich sag/ vom regiren des willen und raths davon unser capitel sagt. etc.

Wie gleicheit in einmuͤtigkeit beder willen steht/ alßo steht hilff in leyplicher dinßperkeit. Der helffer ist minder dan der ist/ dem er hilfft. Der helffer sicht/ auff seynen meyster. und befleist sich. ym nach wolgefallen zu dienen. Adiutorium simile.Das ist/ das wortlin Adiutorium/ zu deutsch/ hilff oder hilfflich person. Hebreisch begreufft. Weiblich hilff. hebreisch bedeut ein person/ die vor yhrem mann steht/ ab und tzu geht/ nach des emanß wollgefallen. Also hatt gott durch das wort Adiutorium eweiber gelert/ das ein eweib/ willig und bereit/ vorm angesicht und willen yres emanß stehn sol/ ym in beheglikeit zu wilfaren. In der sum. Ein efrau sol in yres man/ bot und verbot ubersich sehen/ was der man wil/ das sol sie auch wollen. Kurtzlich. was dem man gefelt/ sol yr zu hertzen sein. Sie sol auß des manß augen lernen/ was sein will und begerung ist. froligkeit und traurigkeit/ schumpff und ernst auß yn schopfen. Drumb heists des emanß hilff. Drumb hat auch gott/ die weiber (so doch sonst weich und zart seind) sonderlich harrigk gemacht und gehert/ das sie yren menner dienen mogen. Ich zweifel nit/ das vil menner eynes weibs arbeit uberdrussig wurden. Sih also ist die frau ein hilff des emanß gemacht. Gott gab auch den menschen ein gebott. sagende. Ihr solt wachsen/ und euch gemeren. Gott hat vermuschung des ebeths/ und samelung der kinder gebotten. Nit wie gesagt ist von den unsuttigen grubenheymer. sonder das iglicher man mit seiner efrauen sich befliß ekinder zuzeugen. Derhalben i. cor vii Paulus schreibt. Das eweib hatt yres eigen leibs kein macht/ und widerumb der man ist nit sein selbst. Jedes sol dem andern sein pflicht tzalen. Keinß das ander betriegen. Von disem gebot/ gotlicher ordnung/ und hilff. haben sich monich und nonnen gewaltiglich abgesondert. und achten vil mer Endchristische einsetzung und verbot/ dan gotliche ordenung. wenen auch der Bapst sey kluͤger/ dan got. Pfue dich. und dorsten wol greuliche sunde thun. die gott hoher hasset/ dan ebruch und vermuͤschung mit vih. und wollen sich doch fur monichen und nonnen und keusch personen verteydigen. Matth Christus spricht. Wilcher sihet zu unkeuscheit/ der hatt keuscheit verbrochen. Sie begern nit allein/ sonder sie thun solche sunde der unreinigkeit/ das kein wunder wer/ das gott kloster und leuth verderbt und tzerknischt.

¶ Das. heilig altvetter geflohen haben/ das suchen unser moni chens das heilig weyber beweint haben/ das behagt unßern Nonnen. Sie horen oder leßen/ wie unfruchtparkeit bey den glaubigen veracht gewest ist. wie gern Sara. Rebecka. Rachel. Lia und Anna/ und der gleichen weiber/ kinder getzeucht hetten/ was sie fur schmertzen und leyden gedult haben/ das geschrey der unfruchtparkeit tzuverhuͤten.

Aber unser Nonnen vergessen yrer hilff. datzu sie geschaft. Verachten das gebott der gemerung/ Verlachen kindertzucht/ verwerffen das gotlich und mer ist/ und volbrengen das teuffellisch. Papistisch. und minder ist. Ich wolt doch gern sehen das mir der Bapst eynen geistlichen stand. der glaubigen/ zeiget/ der das ebeth gemiden hatt. die priester und alle geistliche haben eweiber. form/ ym/ und nach dem gesetz gehabt. ¶ Aaron. ¶ Leviten. ¶ Propheten und ¶ Aposteln Christi seind eelich gewest/ allein des Endchrist regiment ist in unelichem und teuffelischem stand/ wan der Bapst yhe Monichen und Nonnen haben wolt/ solt er den gneigten tzum ebeth eweiber oder menner geben. Ich wolt gern weiter weiblich hilff außgelegt. und den eestand erclert haben/ ßo gebricht mir bapir. Ihr leyhen leset die Biblien/ und nempt eure kinder/ yhe er yhe besser/ auß den klostern. und vermelhet sie. so wert yhr gott dienen. rechte eltern sein/ und euren kindern tzur seligkeit helffen.

Gedruckt zu Wittembergk Nach Christ gepurt Tausent funffhundert unnd ayn unnd tzwentzigsten JAR