¶ Erbarer und vester Herr Haubtman. Ich schick euch hie ein klein buchlein/ von dem vormuͤgen/ des geweychten wassers und benedeyten saltz/ damit meyn guten willen/ unde bereyt gemut/ euch gern zudienen/ antzuzeygen/ Dienstliche bittende/ ir wollet/ dasselb/ zu eynem pfandt/ meyner danckparckeit/ im besten annemen/ dan wisset ich euch/ nach gefallen/ zu willfaren/ wer ich allezeyt bereyt/ willig und gewertig.

Nach dem aber ich/ durch bruder Seyler (der sich eynen unvordienten Gardian/ und eynen hund/ der sehr bellen kan/ schreybt) vor dem volck/ in der kirchen/ zu sambt anderen glidmassen dyser Universitet/ als neu und falsch propheten/ und vorleyder des volcks/ genant/ gescholten und beruͤchtet byn/ und hoͤnlich gefragt. ¶ Weyl ich nicht glaub/ dan das in der heyligen schriefft behalten ist. Warumb ich dan gebenedeyet wasser und saltz acht/ und wa ichs grund in der schrifft hab.

Ich kan nit lenger rue und frid haben/ dan/ so lang mirs meyn nachbaur goͤnnet. Nun wolhyn lieber bruder Seyler/ du wurdest mir keyn schuldt geben/ ob dir/ angefeer/ eyn tropffen dintten in deyne augen fallen wuͤrt/ dan du betrengst mich zu schreyben/ und vorgleychst den ablas dem wasser und saltz/ in vormugen und grunde der heyligen geschrifft/ schildest mich auch/ ein vorfuͤrer des volcks gottis/ das mir in keynen weeg tzymet zu dulden/ ich kan auch nit schweygen/ wie du/ yn dem Ablas Buchlein/ vormercket/ unnd meyner endschuldigung ursachen gelesen hast.

Bald kan ich dir sagen vom wasser/ das die schrifft desselben an vil enden meldet. Steet nit geschrieben Mt 18. Welcher den cleynsten/ auß den/ ßo in mich glauben/ vorhindert oder ergert/ dem ist es gut/ dz ym ein esels muͤlen an hals gehenckt/ und in die tieffe des meres vorsencket werd. ¶ Hoͤrstu nit/ wie das mer brauscht / und wie Christus spricht. Es wer dir nutzer/ ßo du eynen im glauben vorfuͤrest/ das dir ein grahe eselmuͤlhe/ an hals gepunden/ und in das wasser geworffen wuͤrst/ wie fragstu dan/ ßo toͤrlich/ ab das wasser und sein benedeyung/ in der schrifft begriffen seyn. Schreyben nit vil schrifften/ allte und neu/ das unsere vetter/ durch das moͤre gegangen und behalten/ aber die Egyptier untergesuncken und vorsuffen sein? Glaubstu ßo finstu bald geweycht wasser/ glaubstu nit/ ßo sihestu nit anders/ in wasser/ dan sterben und vorderben. Dan als Petrus anhub zu zweyffeln/ kont yn/ daz wasser/ nit lenger ertragen/ wie Matthei am 14. cap. beschriben ist/ hett auch Petrus nit zu Christo geschriehn/ so wer er ersuffen und gestorben .

Dartzu kanstu/ der Seyler/ nit leugnen/ das Christus/ zu Petro gesagt/ ßo ich dein fuͤß nit wasch/ wuͤrdestu keynen teyl/ mit mir haben. Johan. 13. Ich acht darfur/ du seyst in disem valh/ ein unverstendiger Petrus/ der nit weyß/ was Christus mit dem wasser thut/ ßo er fueß reyniget/ und spricht/ wa ich dir/ deynn fueß nit wasch/ ßo wuͤrdestu keynen teyl mit mir haben.

Wie bistu ye so frevenlich kuͤen/ dastu zweyffelst/ ab daz wasser in der schrifft geweycht sein/ ist es nit wol gebenedeyet/ das der mensch in dem wasser/ iunck und geborn soll werden/ nach dem geschrieben. Joan. 3. Es sey dan/ das eyner auß dem wasser und geyst wider geborn werd/ so kan er nit gehn in daz reych.

Nach dem wasser sol ich/ bruder Seyler/ auch das saltz in der schrifft teuten/ und ich achts/ wan ich seyner clugheit folgt/ es wer genug/ ßo ich saget/ wir haben geschrieben im Evangelio/ wan das saltz dolh und nerrisch wirt (wie der Seyler ist) wamit sol man saltzen? Lieber Seyler ich goͤndt dir/ dastu/ daz saltz kuͤnstlich in der schrifft erkendest/ auff das du/ die heyligen gotlichen schrifft/ mit eygen dreuͤmen/ nit vorsaltzest.

Wir woͤllen den schertz hyndan setzen/ und nun von wasser und saltz reden/ der sich/ die kirch gebraucht. Ich sag angesehen die boͤßee uͤbung/ so in saltz und wasser/ gehalten/ das vil besser und zu der selickeit nuͤtzer wer/ das man wasser und saltz/ palmen und kreuter/ knobloch und merrettich ungeweycht lies/ und gar auß der kirchen thet/ darumb das vil seelen vorfuͤrt werden.

Welcher ist so nerrisch/ das er ein zeychen/ wie daz dinck/ daz bedeutet ist/ achten darff/ Ich wil gern eynen sehen/ der sprechen darff/ in dem weynzeychen trinck/ ich weyn. Das zeychen erynnert woll den anseher/ wo er weyn suchen sol/ es hat aber nit den schmack/ stercke/ und hilff des weyns/ dan ich hab noch keynen gesehen/ der von dem weinzeychen oder bierzeychen/ vol und truncken sey worden.

Art und eygenschafft der zeychen ist/ das sie den anseher oder zuhoͤrer/ von sich/ zu andern dingen fuͤren/ haben aber nit macht/ und natur/ der bedeutten dingen/ ia sie seind nicht so mechtig/ daz sie durch sich selber/ den anseher oder anhoͤrer zu bezeychten und bedeutten dingen/ brengen/ es sey dan/ das der anseher oder anhoͤrer/ von den betzeygten dingen bewuͤst hab/ und wisse warumb/ die zeychen auffgericht/ in sonderheit/ wen ein zeychen auß menschlichem willen/ nit auß natur/ herkumpt.

Der rauch/ ist ein naturlich zeychen des feures/ dennoch/ wiewol der rauch dem feuer nohen ist/ sucht man ye nit im rauch die natur und wircklickheit des feuͤrs/ dan helt sich eyner an rauch/ ßo beroͤmeter sich/ wirt schwartz und unsuͤttig / aber von dem feuͤr wirstu warm. Neusset eyner eynes weinpusch/ so vorderbt er das zanfleysch und wirt traurig/ aber neust er den weyn/ ßo behelt er gantz zanfleysch und wirt froͤlich und saett/ das wissen die kleynen kinder auff den gassen. Aber wir armen sunder/ sein zu unserm mercklichen schaden und nachteil/ blind/ geniessen und brauchen die zeychen/ ßo in der schrifft von got angetzeygt/ und suchen/ das in den zeychen/ das wir in den dingen/ so betzeygt werden/ suchen solten/ den wir fuessen und steen in den zeychen/ die uns/ furt/ an andere ding/ leyden. Ist es nit spoͤtlich/ das ettliche gloßen sprechen/ geweycht wasser lescht ab die teglichen sunde. Ja lieber gesel/ wan du wissest/ was tegliche sund seynd/ und wie sie vorgeben werden/ du must deyner reed lachen/ schuttestu die gantz/ Tyber und Elb/ Reyn und Thonau uber eynen sunder/ du wurdest ym keyn teglich sund abwaschen/ seint doch alle ding durch gott gebenedeyet/ was solt dir gebrechen/ das du dem Bader ii pfenning in daz bade goͤbest/ und wuͤschest leyb und seel/ gar wol und reyn/ dan ßo du nit glaubst/ was durch wasser bedeut und angetzeygt ist/ so wurstu nit selig. Marci ultimo. Und ist wasser/ nit anders oder meher/ dan wasser/ und ist gar nicht besser/ dan/ des baders wasser/ dan wasser sonder glauben/ magk die seel nit anruren. ¶ Nun weiß ich wol/ das vil einfeltige menschen/ wenen und achten/ das weywasser/ sol teglich sunde/ in seyner benedeyhung abwaschen/ weyl sie von yren hochgelarten hoͤren/ Das geweycht wasser/ nymbt teglich sunde/ von dem menschen. Also geen sie zu dem geweychten wasser/ wie ein pferdt zu der trenck/ das keyn vornunfft hat. Sie besprengen sich woll/ und waschen augen und stirn/ und kumen mit fleys in die Judischen fuesstapffen.

Die Juden sein ye und ye behent und schnell gewest/ in denn zeychen sunder glauben/ zu hafften/ hilff/ rath/ und trost/ in den zeychen zusuchen/ das thuen heut vil vormeinte Christen/ und predigen dasselb/ vil parfußische propheten. Vil besser wer es/ sie wurffen das saltz in das geweycht wasser/ und senckten das wasser und saltz in ire augen/ domit sie woll gebeysset/ zu gott/ als eynen helffer/ troͤster/ und erloͤßer/ schrihen/ und sich recht umbsehen.

Ich sag nit/ das geweycht wasser und saltz dem menschen schaden bring/ odder das man spoͤttlichen/ von den creaturen gottis clapern sol/ sondern/ ich vorlach allein/ den nerrischen und plintten gebrauch/ das sich die menschen an wasser unnd saltz/ anhefften/ und hangen mit hoffnung/ in worten und zusagungen/ die/ yhn menschen zugesagt/ do sie mit hoffnung/ allein/ in gottis worten bleyben solten/ sie steent ym wasser stil/ unnd solten doch das hertz/ auff/ in gott tragen.

Das wasser in der schrifft/ bedeutet gedult und vorfolgung/ Es bedeutet auch abwaschung oder vorgebung der sunden. Vor folgung/ anfechtung/ ellend/ schmertzen/ armut/ betruͤbnuͤs/ angenumen in dem glauben und anruffung zu gott/ ist auch wasser/ der schrifft/ das sund abnymbt/ als Thobias schreybt am 3. cap. In die tribulationis. Am tag der widerwertickeit/ vorgibt gott sund. Das wasser hatt gott in seynem wort gebenedeyet. Ezechiel. am 36. sprechende. Ich werd uber euch ein rein wasser schuͤten/ und yr werdent von allen euren boßheyten gereiniget / er hatt wasser der schrifft auch geweyhet do er spricht. Ich byn mit ym/ in betrubnis/ am .xc. psalm. Nun/ mit welchem ist er? Er ist mit dem/ der/ in/ anfechten und engsten/ gott anrufft/ wie in gedachten versickel ausgetruckt ist. Nu wissen wir wol/ das uns gott/ durch schrifft lernet/ das wir zu im ruffen unnd schreyen sollen/ wan wir umbgetriben und angefochten werden/ so wil er uns helffen/ und ledig machen/ auff das wir yhm eer und glorien geben/ gethaner hilff/ als im xlix. psalm. Ruff mich an/ im tag/ deynes betrubnis/ so wil ich dich erretten/ und ßo soltu mir eer geben. ¶ Das ist ein edel und selig wasser/ das vorfolgung heyst/ im glauben und rechter gedult angenommen/ dartzu und gemeynlich alle schrifften beruffen und vormanen/ dasselbe wasser/ ist vast wol in der schrifft bekant und gelobt. Mit dem selben wasser/ werden wir Christo gleichformig/ und tragen sein leben in unserm leyb und corper/ wie Paulus zu den Corintern sagt ii. Corin. iiii. Wir sollen/ arbeit/ vorfolgung/ vorachtung/ betrubtnis/ ellend/ und sterblicheit/ umbher/ in unsern leychnam tragen/ und weysen/ domit/ das leben Jhesu Christi/ in unserm sterblichen fleysch/ offenbar machen/ Auß den worten ist abzunemen/ das/ das wasser der schrifft/ ein bild ist/ des lebens Christi/ das unser leben vorderbt/ und uns im leben Christi behelt. Das ist lieber Seyler/ daz wasser/ das uns/ durch das sichparlich wasser/ und element bedeut und angetzeygt ist/ Alle benedeyhung/ ßo durch pfaffen wort/ gehoͤrt werden/ furen uns zu dem wasser der vorfolgung/ und fordern unßer bewilligung/ in leyden/ und angst/ mit freyden des glaubens/ auff zunehmen. ¶ Wan die schrifft von wasser sagt/ ßo meynt sie gemeynlich betrubtnus zu leyden.

Man setzt auch das wasser/ fur die kirchen/ an den weeg/ fur aller menschen augen/ tzu sehen unnd gedencken/ wye der mensch teglich/ soll gutwillig sein/ anfechtung zuleyden. Dasselbe wasser/ solt so gemeyn im predig stul sein/ wie das leyplich wasser/ vor und in den kirchen ist/ aber man hatt/ die unvorstendige menschen/ an benedeyhung/ des nassen wassers gefurt und gehenckt/ das sie/ des leydens und betrubtnis/ welches rechte/ gotliche/ Christenliche/ und hymelische wasser ist/ vorgessen/ derwegen kumpt es vil mals/ das sich die holtzschuher offt/ mit geweychtem wasser/ waschen/ wie eyner ein ziegel badet/ aber eyn kolen/ die farb ab zuwaschen/ dan all die weyl du nit kanst vorfolgung mit gedult und glauben zu gott leyden/ ist es gleych/ wan sich ein muͤnch besprengt/ als wan sich ein Rab/ in eim wasser taucht. Ausserlich wasser/ ist nur zu eynem zeychen/ wie ein hand an eynem stock/ den weg zuweysen/ geben und angericht ist. ¶ Die hultzere hand macht dich nit geen/ sie gibt dir auch nit den weg/ sie tregt dich auch nit/ sie teudt und weyset allein. Alßo/ das wasser/ reyniget nit die seel von sunden/ aber es erynnert dich/ des wassers/ teglicher vorfolgung/ daz du betruͤbtnis/ alle tag/ von yedermeniglich/ in aller massen und weyßen/ wie dir es furfelt/ auff deynem ruͤck tragen/ und dastu/ im hertzen mit guͤtickeyt und geschrey/ zu gott (ßo lang das got wil) dulden und leyden solt/ wie sant Jacob im .1. cap. spricht. Bruͤder/ yr sollt es fur grosse freudt achten/ ßo yr in manichfeltig vorsuchung einfalt/ dan eur glaub/ wird durch vorfolgung bewert. ¶ Angst und anfechtung/ ist nit anders/ dan ein bewerung unsers glaubens. Mancher spricht. Ich getrau und glaub got/ er weyß nit/ was er gesagt hatt/ er kennet sich auch selber nit/ wie er gegen gott geschickt/ und wie seyn eygen hertz bereyt. Darumb schickt gott seynem lieben sohn straff/ ungluͤck/ und unfall zuhals/ wie ad hebreos. 12. geschrieben steet/ und bewert domit yhren glauben/ er leert sie/ wie schwach sie im glauben sein/ und macht sie/ eygene gebrechen erkennen/ und zu gott schreyhen/ durch das gutt fruchtpare wasser/ das dein geyst anruert/ betrubt/ und in gott hoffen macht/ vorgibt gott sund/ das bedeut das wasser/ und alßo/ sol man zwu schrifften zusammen reymen/ eyne sagt: Durch barmhertzickeit und glauben vorgibt got sund und der glaub reynigt das hertz. Proverbia .15. Die ander sagt. Eclesiastici .2. Im tag der anfechtung/ vorgibt gott sunde. ¶ Das wasser/ macht den menschen ledig von sunden/ nicht das elementisch wasser/ Es ist auch nit zubergen/ das der glaub/ der erweckt wuͤrt/ in ubung des wassers/ sunden vorgibt/ und wirckt alles/ das benedeyhung/ des wassers antzeygeen/ dan es muß ye sein/ das sonder glauben/ kein selickeit kompt/ es ist auch offentlich/ das Christus alwegen/ den glauben zuvor erfordert/ eer er hilff gethan/ das er auch gesprochen hat/ Dem der glaubet/ sein alle ding muglich/ wer nit glaubt/ dem ist nicht muglich/ Mar. am .9. Petrus der gieng auff dem wasser/ das ist/ eyner uberwint betruͤbtnis seliglich/ die weyl er glaubt/ wan er aber zweyffelt/ ßo hebt er an ein zusincken wie Petrus .Mat.14.

Nym ein scheinlich exempel auß dem alten gesetz gottes/ das wir leßen im 4. buch der Konig am .2. capitel. Helias und Heliseus stunden am Jordan/ und Helias falttet seynen mantel er wickelt yn zusammen/ und schlug die wasser/ und die teylten sich auff beyden seytten/ unnd do giengen sie beyde durch das wasser. Hie merck lieber Seyler/ wie der Jordan gehorsamlich gespalten ist/ und hatt/ Helie und Heliseo statt geben/ durch zugen / Du moͤchst wol sprechen/ zu den leyhen/ hie merckt/ das der mantell gewirckt hatt/ sonder glauben Helie/ merckt auch mehr/ das der Jordan sich auch on glauben Helie zurteylt/ darumb das Helias seynen mantell/ an seynem heyligen leyb trug und benedeyhet yhn. Also ist es mit wasser/ dan wan der Monich oder pfaff/ Creutz und wort/ uber das wasser geworffen hatt/ baldt kumpt dem wasser ein heyligkeit zu/ da durch es den yenen/ die sich mit waschen oder besprengen/ teglich sunde abreyben kan/ und ist nit von noͤten/ das du glaubest/ der glaub wuͤrckt auch nit vorgebung der sunden/ sondern/ das geweycht wasser. Es ist ein seelig koͤstlich dinck umb geweycht wasser/ in sonderheit/ so es/ ein hol tzschucher geweycht hatt/ das keyner schlaffen/ aber auffsteen solt/ er hett sich dan/ kreutzweyß/ domit besprengt.

Auß solchen schuͤtzworten muget ich fragen. Ist die krafft ym mantell Helie gewest/ das wasser zu spalden/ warumb teylet nit Heliseus/ den Jordan/ auch mit dem selben mantell.

Itzt muß ich meyn reed zu euch/ her Haubtman/ keren/ dan bruder Seyler hebt an zu disputiren. Ich darff sagen. das mir vast von noͤten/ das ich mich wol fursehe / dan mich duncket/ der Seyler sol baldt/ ein flucht redt erdichten/ und sprechen.

¶ Heliseus hatt mit eynem andern mantel/ das Jordanisch wasser geschlagen/ nemlich/ mit des hochgewarten und heyligen vatters bruder Augustinus Alvelders / aber etwan mit eynem andern mantel/ der nit Helie gewest/ den Jordan geschlagen/ Meyn herr Hauptman ich kan mich/ ye nit endthalten/ yr zukunfftige gedancken/ anzugreyffen/ dan bruder Alvelder/ und bruder Seyler/ handeln die schrifft/ wie sie/ mit yren gurtell thun/ yre strick/ bygen sie/ und machen manigfeltig knoten/ sonderlich vil zweyffel knoten/ alles nach yrem wolgefallen und wollust/ der wegen muß ich ein clein wenig wasser/ umb mich werffen/ das mich die grauhen gesellen/ nit geferlich beyssen. Ist es nit eyn frevelich sach/ das ein frumer bruder/ der/ der schrifft/ hoher dan ich/ voreydet ist/ als kindisch/ mit der schrifft umbgeen sol/ als were sie/ ein henffner gurtel/ bruder Alvelder legt mir/ dise schrifft Erit unus pastor et unum ovile/ also auß. Es sol ein Roͤmischer stul seyn/ Ich wil Roͤmischer oberkeit nit zu nahe reden/ aber sonderlich wolt ich/ das sie/ geschickter anwelder und vorteydingst knecht/ auff den plan schicken/ Wo aber das mutwillig gebrauchen/ der schrifft/ yrleubet ist/ so mugt ich in gleycher eynfeldtickeit/ folgende wort/ asinus portat saccum per forum civitatis Sanctae Anne/ also außlegen/ Der grau bruder Seyler/ tregt ein keeß sack uber den marck auff sant Anneberg/ das muß ich ynen zuvor sagen/ damit sie itzt lernen wie ein schlechter ungelarter Nahr ich byn/ auff das sie/ getreulicher/ mit der heyligen schrifft handeln/ und greuffen mich mit lichten und offenbaren schrifften an/ dan dunckel wort/ und plinde außlegung/ kan ich nit wol vornemen.

Ich hette mich schir vorgessen. Nun wil ich dem Seyler sagen/ das ym keyn fluchtreed dienen wirt/ dan Heliseus schluge mit dem mantel Helie/ und gleych das wasser/ das Helias/ aber es wolte sich nit teylen/ eher Heliseus sein hertz/ auff/ in gott/ mit anruffen/ trueg/ der text .4. Reg .2. laudet also. Heliseus hub auff den mantel Helie/ der ym empfiel/ und stundt wider auff dem uffer/ des Jordans/ mit dem mantel/ der Helie empfallen was/ und schlug die wasser/ aber sie teylden sich nit/ und do sagt er/ Wo ist nun der gott Helie? Als Heliseus dyße wort mit seufftzen geschriehen hett/ do schlug er das wasser abermalß/ baldt teylden sich die wasser/ und gaben ym weeg/ durch das wasser zu geen. Hie hoͤr lieber Seyler/ wie es dem heyligen vatter Heliseo ergieng/ da er schlecht/ mit dem mantel yn daz wasser schlug/ hoͤrestu nit/ das ym/ der mantel gar nit dienet/ Meynestu dan/ das geweycht wasser/ werde dir dienen/ zu ablassung der sunde/ wan du die stirn und cappen mit feucht machst/ ich gestee dir/ das du naß wurst/ das auch des baders wasser gewircken kont/ aber das du tegliche sunde/ mit ab waschest/ wan du/ unbesunnen/ den kolben damit netzest/ das fall ich dir gar ab/ dan wan heylickeit des wassers oder personen/ solt uber natur wircken/ hett ich ye und ye gemeynt. Heliseus der solt ya so heylig gewest seyn/ als eing grauher Monich. ich wayß auch wol das der mantel Helie nicht weniger heylickeit/ dan dein geweycht wasser hatt/ aber dennoch warn alle ding zu wenig/ es vormugt auch Heliseus das wasser nit spalten/ biß er im glauben/ sein hertz zu gott warff/ sagende. Wo ist nun der got Helie / mit den worten rieff Heliseus gott an/ und gab ym allein alle wircklikeit/ des mantels/ domit Helias zuvor/ den Jordan zurteylet.

Also ist es/ mit dem geweychten wasser/ Geweycht wasser/ vormagk dir keyn teglig sunde abnemen/ aber das wasser furet dich an gott/ den selben umb vorgebung der sunden/ umb hilff auß noͤten und engsten/ zubiten.

Das bedeuten uns die gebenedeyhung/ so uber wasser gesprochen werden/ der Priester sagt also. O gott biß unserm anruffen gegenwertig/ und schude disem element des wassers die crafft der benedeyhung etc. Das ist/ fur uns durch das sichtbarlich wasser dohyn/ das wir deyn crafft erkennen/ und das wir yhm anruffen/ zu dir/ seylig werden/ hoͤrestu nit lieber Seyler/ wie die kirchen/ des geschreyes zu gott/ in den gebeden gedenckt/ alßo muͤsset auch Heliseus gott anruffen und gedencken/ solt er das wasser spalden. Ich setz dahyn/ aber ich gestee es nit/ das die collecten in der kirchen nach deynem gefallen lauten/ durfft ich darumb nit sprechen/ wie Augustinus/ das vil boͤse gebeet in den kirchen seyn/ das auch besser weer/ man wurff sie auß der kirchen/ dan gott wuͤrt durch solche leßter gesanck und gebeet geuneret. Ich hab aber eyn Roͤmisch meeßbuch/ das meyn meynung bestetiget/ und dir eyn maulkorp anbyndet.

Dan wie ich oben gemeldet/ alßo mußtu in dem gebeet/ dadurch das wasser gebenedeyhet wirt/ leesen (kendestu anders bustaben ) also/ o got biß und sey/ bey unsern anruffungen gnedig. Item/ alles das in den heusern der glaubhafftigen besprengt/ durch gottlich macht/ von aller unreynikeyt ledig/ oder behutt werdt. Item/ gib das gesundtheyt/ durch anruffung/ deynes heyligen namens/ vor allen anfechtungen beschirmt vorteydingt und sicher bleyb. Hoͤrestu nit wie sich die schrifft von Heliseo/ dyer furgelegt/ fuget/ Heliseus ruffet und schreyhet auff zu gott auff das ym/ das wasser dien und statt geeb/ dye heylige kirchen vormant alle und yegliche menschen/ ßo gebenedeyhet wasser handeln/ das sie den gnedigen und barmhertzigen gott anruffen/ das sie/ durch den aller heyligisten nomen gottis erlangen/ dartzu sie benedeyhung des wassers reytzet/ eynnert und furet . Wie tolh und unsynnig seynt die leuth/ die in dem wasser ruhen/ und bleyben mit gedancken und willen/ hoffnung und trost/ in den dingen/ die furt/ ubersich/ in gott weyßen/ seyn die selbe nit doren? wan eyner eyn weyntuch oder rastrumdopff/ wie wein odder bier gebrauchet/ wuͤrdestu nit bald sagen/ der ist von synenn kummen? Das soltu auch Seyler gedencken/ wan eyner geweycht wasser den leyhen tzu vyll prediget. Das sol beschließlich gehalten werden/ das betrubtnis/ elent/ und anfechtung/ yn geschrey und anrueffen zu gott auffgenommen/ wasser ist/ das durch das element bedeut/ und allerley sund abwescht todtlich und teglich. ¶ Das auch keyn wasser/ außgeschl ossen den glauben/ nutz ist. ¶ Und das geweycht wasser/ ein zeychen ist/ das uns in gottis gnaden und huͤlffen furet/ von dem soll das mal gesagt seyn.

Wir haben aber auch noch senliche seufftzen/ uber tegliche sunde/ die selbe seufftzen/ seint auch ein wasser/ die sunden außtyl gen/ ob sie gleych/ an eußerliche vorfolgung auffquellen unnd wachsen. Und werden bedeut/ durch das wasser/ das Christus ym abent esszen/ in das becken gaeß/ seynen Jungern yhre fussen zuwaschen. Die selben historien wil ich kurtzlich ein furen. Also/ Es ist an widerreed war/ das ein yglicher/ der waschens bedarff befleckt und unreyn ist/ Es begert auch keyner/ eynes artztes/ er sey dan kranck. Nun ist gott ye so barmhertzig gewest/ das er auß eygen bewegtnis und gutwilligkeit / die sunder gesucht hat/ yhnen hilff und gnad zugeben. Alßo thet Christus/ er umbguͤrte sich mit dem cleyt seyner barmhertzigkeit/ und schuͤdet wasser yn ein becken/ und wusche seynen Jungern die fueß/ und treuget ynen die fueß/ mit dem tuch/ das ist/ mit seyner menscheyt/ sterbet Christus/ die sunden/ in unserm sterbhafftigem fleysch/ als Paulus ad Ro .8. clar sagt/ alßo weschet gott noch teglich sunde von unsern seelen/ und ist das ausserlich tuch und wasser/ nicht anders/ dan ein zeychen/ das uns Christi guͤtickeit vormant/ der sunde vorgibt/ dan solten/ gemelte zeychen/ aber andere/ yrer gleychen/ sunden vorgeben/ und den menschen vorneuhen im geyst/ warumb/ weer/ der eynig Son gottis/ von hymeln/ zu uns gestigen? Derwegen muß ein ygleicher/ mit glauben/ sich an Christum hefften/ und allein durch Christum/ in gott/ selig werden.

¶ Du darffst auch kein sunde scheuhen/ aber/ Christum/ von eyniger boßheyt wegen/ flihen/ dan sunden und boßheyten/ sollen dich zu Christo furen und iagen. ¶ Dem sonder sol ym hertzen sein/ wie eynem/ der fast kranck/ und der sein kranckheyt seher fuͤlt und befindt/ der selbe tracht baldt/ nach eynem artzt/ er schemet sich auch nit/ ym sein kranckheyten/ blottern/ geschwern/ und eyter zu clagen und zeygen/ er begeert/ an alle ab tzuͤg/ hilff und rath.

¶ Alßo/ soll der sunder sich gegen/ Christo halten/ Christus weyß wol/ und hatt gesagt/ das die gesunden/ keynes artztes bedurffen / sie mussen/ mit sunden/ kranck und schwach sein/ die Christus suchet/ dan er spricht. Ich byn nit kummen/ die gerechten zu beruffen/ sonder ich foder die sunder. Weyl nun Christus/ wie ein getre uer artzt/ allein/ den krancken/ zu gut/ kumpt/ sol keyner sund halben von Christo flyhen oder wenden/ Des hastu ein mercklich exempel/ von Maria Magdalena die unerschrocken/ und an scheuhe zu dem hern gieng/ vorgebung der sunden/ zuerlangen/ sie vorachtet der gleyßner arglistig urteyl/ und trug sich/ mit yren sunden/ zu dem artzt/ der/ sie bevor/ getzogen/ und mit seyner lieb/ angetzund het/ das sie nit auß bleyb. Aber Petrus/ der vilmals ym glauben gewanckelt / schemet sich vor dem hern/ er wisset auch nit den geyst der fueß waschung/ und sprach/ du wescht mir/ meyn fuesse/ numer in ewigkeit/ darauff Christus sagt. Werde ich dir/ deyn fueß nit waschen/ so wurstu/ keynen teyl/ mit mir haben.

¶ Disse wort Christi seynt vast troͤstlich und erschrecklich. ¶ Erschrecklich also/ das die tegliche sunde/ ßo sie nit vorgeben werden/ uns arme sunder/ von dem teyl/ ewigs leben/ endterben/ darumb sol man keyn spil/ mit teglichen sunden haben/ aber sie mit vorachtung ubergeen/ dan sie furen uns in die hell.

¶ Troͤstlich ist aber auch das wort Christi/ das er/ sich selber/ vor uns demuͤtiget und beuget und knihet/ unser sunde zu waschen/ unnd betreyhet uns/ ßo er selber uns nit reynig odder wasche daz wir vorderben werden. Die fuesse/ seynt gedancken und willen/ mit welchen/ wir zu got/ geen/ wie Paulus spricht. Unser wanderung ist im hymel. Dan wie eyner/ mit leyplichen fuessen ym weeg/ zu eyner statt/ gaet/ alßo geen die gerechten/ mit yrem willen und gedancken/ in gottlichen geboten/ zu gott. ¶ Wiewol auch die gerechte menschen/ die auch sonste reyne seint/ mit solchen fuessen/ gott dienen/ und wol thuen/ Dennoch beflecken sie sich/ und sundigen. Mit sunden/ die sie. neyden und hassenn/ die sie auch nit fliehen/ nach umbgeen mugen/ von den sunden weschet sie Christus/ mit dem wasser/ das uns. durch/ das wasser/ ym beken / das ist ym menschen/ und geweycht wasser angetzeygt ist. ¶ Was ist aber das fur wasser? ¶ Das wasser ist eyn scharff grimig urteyl teglicher sunde/ ein betrubt reuhig hertz/ ein widerwil/ neyd/ haß/ vorfolgung/ schmertzen/ unnd gedreng/ das du teglicher sunden halben heyst / wie David spricht. Bespreng mich durch hysoppen/ so werd ich gewaschen und gereyniget. ps. 50. item. Mehr wasche mich/ dan ich/ erkenn meyn sunde/ und die sunde ist wider mich/ alwegen/ ob er sagt. Ich hab meyn sunde/ in ein gestreng/ ernstlichs urteyll gesteelt/ ich haß sie/ ich vorfolge sie/ ich bereu sie mit schmertzen/ und bin alßo/ in mir/ bedrenget unnd unfridsam/ darumb/ mein gott/ reynige mich/ das ist das andere wasser/ es flies auß eusser lichen anfechten/ oder auß erkentnis aygner gebrechen/ das sunden vorgibt/ dan der glaub ubergeusset das wasser uber den bedrengten geyst/ und rei niget das hertz/ das ist Christus/ der durch den glauben/ in dir ist/ der weschet dir/ allein/ dein fueß.

Das wasser bedeutt das sichtbarlich/ leyblich/ geweycht wasser/ du solt durch geweycht wasser/ deynes rechten glaubens erynnert werden/ hastu rechten glauben/ ßo kanstu an solche ob gemelde wasser nit gesein/ wan sich aber der born/ alßo ergeusset/ ßo steestu in rechtem geystlichem geweychtem wasser/ das alle dein sunde erdrencket/ wie daz rot mehr die Aegyptiern erseufft hatt/ das wasser soll man geniessen unnd yn yhm gedrenckt werden. Welcher sich aber an das eusserlich wasser hencket der drinckt ein weynpusch fur weyn.

¶ Hie nach folget von dem Saltz.