Uns gelangt ann/ als solt ir euch understanden haben. von dem Capittel allerheiligen stiftkirchen zu appelliren des wir nit wenig beframbden haben . Nach dem ir dann wist mit was privilegien die selb kirche versehen auch welcher gestalt ir derselben verwandt/ und was gnad und guts euch von uns bescheenn/ so hetten wir uns versehen ir wurdt in bedacht desselben solch ewer mudwillig furnemen underlassen haben/ weyl es aber nit bescheenn so ist unser Begere ir wellet nachmals davonn absteenn/ wu es aber nit beschyht so habt ir wol zu achten/ das wir die jhene so dise sache belangedt nit verlassen/ nach dise newrung der kirchen zu nachteil einfhuren gestaten werden sonder die so vil moglich hanthaben das wolten wir euch dar nach zurichten nit verhalten.

Durchleuchtichster hochgebornner Churfurst Eweren Churfurstlichen gnaden sindt unßer gebet gegen got/ und underthenige und gehorßame dinst in vleis alzceit zcuvor. Gnedigster herre wir fugen Eweren Churfurstlichen gnaden undertheniglich wissen/ wie Ewer Churfurstlichen gnaden Schosser alhye zu Wittenberg den Wirdigen achtbaren und hochgelarten Eren Andream Bodensteyn von Carolstadt der freien kunst und heiligen schrifft doctoren allerheiligen Stifftkirchen alhy zu Wittenberg Archidiaconum umb eynen jherlichen hauszcinß/ fur uns verklagt und auff der teill vorbringen wir eyn urteil den Rechten und unßeren Statuten gemes/ unßers dunckens/ gesprochen/ do von obgedachter doctor Andreas an Bebstliche Heilikeit sich beruffen/ als wirs achten unbillich Derhalben bitende Ewer Churfurstlich gnad geruhgen gnediglich dar eyn zu sehen/ zuvorkommen weittere furnehmen muhe expensz und kosthe/ das wollen wir umb Eweren Churfurstlichen gnaden mit unßeren underthenigen gehorßamen und willigen dinsten zuvordienen gevlissen seyn und biten des eyn gnedige anthwort. Datum Wittenberg Sontags nach Fabiani und Sebastiani anno domini xvc funffzcehn/ Eweren Churfurstlichen Gnaden

Unsern grus zuvor Erwirdigen hochgelarte und Erbare liebe andechtige. Als ir unß yzo geschriben daß sich doctor Andreas Karlstat Archidiacon/ understanden von euch gein Rom zu appelliren etc. haben wir sambt Ewr bit alles inhalts vernomenn/ und wellen uns versehen/ Ir werdet euch in dem als die verstendigen und gelarten/ mit gebung apostolos und sonst wie gepurlich und dem rechten gemess gehalten und ertzeigt haben/ und so gedachter doctor Karlhstat daruber ichts unbillichs oder beswerlichs gegen euch furnemenn wurdt So wellen wir euch mit genediger hanthabung nit verlassen/ wir haben dem doctor auch geschriben wie ir ab inligender copien vernemen werdt daß wolten wir euch nit verhalten/ dan euch zu gnaden sind wir geneigt. Datum zu Torgaw am dinstag nach Sand Vicentii tag anno domini xvc xvmo